Jénesii̱s 45
45
Bi̱ tsꞌén akoó Kosiee̱ yojoo̱ já ntsꞌi̱e̱
1-3Kosiee̱ nguiti̱ kichikjo̱a̱jiín kó tsꞌaxié kui ngu̱i̱ndiee̱ ngayeje já xí bosikójo xi síndotꞌaa̱. Kó kjiꞌa nga akoó yojoo̱ já ntsꞌi̱e̱, nde ngojín já xí bosikójo Kosiee̱ xi kisꞌińdo ngase ki̱a̱a̱. Kó Kosiee̱ bi̱ katsoó já ntsꞌi̱e̱:
—¡Kosiee̱ boá an já! A to̱kó tikón na̱ꞌmina.
—Kósꞌe̱ achichí ꞌniú askjandá Kosiee̱, kó ngaskande ngayeje xota̱ xi chji̱a̱ni Ejipto̱ ko̱jo xota̱ xi síndo ndiꞌaa̱ nda̱ ree̱ xi tsintꞌié én nga bo̱a̱ kamá. Ta̱nga achichí katsakjónní já ntsꞌi̱e̱, nga ndeskande nde kamájín tsíchji̱a̱ nguindyi̱ko̱n Kosiee̱. 4Kósꞌe̱ Kosiee̱ bi̱ katsoó kui jaá:
—Ja̱bíjnúꞌun.
Kó kui jaá kijíkón tiñaa̱, kósꞌe̱ Kosiee̱ bi̱ katsoó:
—Kosiee̱ boá an, ntsꞌiejnú, kui xi akatíñájnúu̱ xota̱ Ejiptoo̱. 5-7Ta̱nga nga ta̱ nda̱jín májnú, kó ngata̱ ndasenjín májnú nga akatíñájnúꞌun. Jè jó nónií nga tjín kjindiá, kó ngui ún nó chaja nga jmí ni ka̱maxchájín tꞌananguii̱, ta̱nga Néná boá xi katsanguiyatjónna tsi̱ꞌe̱ nga an kꞌoxiéꞌájnúꞌun jún ko̱jo ndíjnú, kó nga ꞌniú kjo̱a̱ndikónná kui ni xi ka̱maa̱.
8Kó ja̱ jè kamáyájnú ngotꞌe̱ nga jmí tsi jún xi kananguiyajnúꞌun kꞌi̱e̱e̱, Néná boá xi kꞌi̱e̱ jeꞌejo̱na, kó kuí boá xi katsꞌénna nga an xi ka̱ma an ngo nda̱ xi ko̱tíxoma ngayeje nangui Ejipto̱ ko̱jo nga an xi ka̱ma an nda̱ xi ko̱síngayindi̱ya xá xí tsꞌén nda̱ ree̱ nangui Ejipto̱. 9Kó kuíni nga tsá tanguín nguiníjnú nínga tikón na̱ꞌminá, kó bo̱a̱ tꞌínjnúu̱ nga án boá xi bi̱ tꞌíxián an, nga Néná boá xi katsꞌénna xtitjoón ngayeje nangui Ejipto̱, kó mejénna nga tsá kji̱ndi̱boákónna kui. 10Bo̱a̱ tꞌínjnúu̱ nga ki̱a̱ kꞌuijñá nangui Ngosee̱n, kó ki̱a̱ nijan kꞌuíndo ndií, ndíndee, ko̱jo ngayeje cho̱o̱ ko̱jo ni xi tjiín. Kó ki̱a̱ kꞌuijñátꞌa tiñana. 11Ngui ún nó chaja nga ka̱ma ngase kui kjindiaá, ta̱nga án boá xi tsjàa̱ ni chinie. Ngatꞌa̱ tsí jmí, kui ko̱jo ngayeje xota̱ xi nijan síndojo̱, xcha̱ja ngayeje ni xi tjiín, kó ni̱ma̱ tsꞌén kꞌuíndo.
12Jún ko̱jo nda̱ ntsꞌié án Benjaa̱ xí chistiko̱ nga án má bo̱a̱ xi tꞌíxián an kui nii̱. 13Tꞌíyájnúu̱ na̱ꞌmina ngayeje ni xi je kamáyájnú kꞌi̱e̱e̱ ko̱jo xá xí tjínna kui na̱xi̱ńdaá, kó tsá ndiboájo̱jnú kꞌi̱e̱e̱.
14Kó nguije bo̱a̱ katsó Kosiee̱, janíkjá Benjaa̱ kó nga joó ítsꞌi̱yanii̱ nga askjandá. 15Kósꞌe̱ Kosiee̱ katsjaá ngo ndsó tꞌanijon ngayeje já ntsꞌi̱e̱ sꞌe̱ askjandájo̱, kó kjiꞌa boá nga ngayeje já ntsꞌi̱e̱ kamá tsíchji̱a̱jo Kosiee̱.
16Nda̱ ree̱ achichí tsjá kamaá kui ko̱jo já xí ndyi̱tsꞌenxájo̱ nga tsintꞌié nga já ntsꞌi̱e̱ Kosiee̱ ki̱a̱ síndo nangui Ejipto̱, 17kó ti̱ kuii̱ nda̱ ree̱, katsanguiyaa̱ én Kosiee̱ nga bi̱ katsoó:
«Ti̱ꞌankaꞌájnú chꞌia bórroó, kó ngatjí nguiní nangui Kanaa̱n, 18kó ngatjandiboájo̱ na̱ꞌmíi̱ ko̱jo xota̱ ndiꞌaa̱. Án boá xi tsjàa̱ tꞌanangui xi nda ngasee̱ nangui Ejipto̱, kó kꞌi̱e̱ skji̱ni̱e̱ ngayeje ni nda xi maxchá kuí na̱xi̱ńdaá. 19Teꞌékjo̱e̱ ji nga kꞌi̱e̱ ko̱e̱je̱joni karro̱ xi kji̱ndi̱boáyá jákjíndií ko̱jo ínchjiín ko̱jo na̱ꞌmijnú. 20Kó ngata̱ nda̱jín maá kjo̱a̱a̱ ni xi ku̱i̱ꞌíndo jánján, ngatꞌa̱ kꞌi̱e̱ nangui Ejipto̱ kꞌuieé ngayeje ni xi nda».
21Kó já ntsꞌi̱e̱ Kosiee̱ katsꞌénjo̱ꞌo ni xi katsoó nda̱ ree̱, kó Kosiee̱ katsjaá karro̱ ko̱jo ni chinie tsi̱ꞌe̱ ndi̱ya nínga ko̱e̱je̱. 22Nga ngo nga ngo kui jaá katsjaá ńjño tja̱tsi̱e̱ xi ko̱a̱ja̱, ta̱nga Benjaa̱ ján úchán to̱ntiboa katsjaá ko̱jo ún ꞌniú ńjño xi chajá xi nda. 23Kó na̱ꞌmii̱ katsanguiyaa̱ tie bórró xíꞌin xi ndyi̱yaꞌanijín ni xi nda ngase xi tjín nangui Ejipto̱, ko̱jo tie bórró chjo̱on xi ndyi̱yaꞌanijín pan, ko̱jo to ndso̱ko̱a̱n ṉño̱pan ko̱jo ni chinie xi skji̱ni̱e̱ na̱ꞌmii̱ ngu̱i̱ya ndi̱ya̱á. 24Sꞌe̱ jaskan Kosiee̱ katsꞌénkixotꞌa já ntsꞌi̱e̱, kó nguindiee̱ nga ko̱e̱je̱, bo̱a̱ katsoó nga skjánjo̱jín xkjín ngu̱i̱ya ndi̱ya̱á.
25-26Kó já ntsꞌi̱e̱ Kosiee̱ jatjoni nangui Ejipto̱, kó nga jachó nangui Kanaa̱n katsóyaá Jakoo̱b nga to̱kó tikón Kosiee̱, kó nga kuí boá xi xtitjoón ngayeje nangui Ejipto̱, Jakoo̱b ngaskande mejeén kꞌienya má nga bo̱a̱ kiꞌmií, ngatꞌa̱ nde sꞌijinjín kjimaa̱ kui ni xi tjíꞌmií. 27Kó inda inda jaꞌáꞌyaá kjiꞌa nga kui jaá katsóyaá Jakoo̱b ngayeje ni xi katsó Kosiee̱, kó nga kamábe karro̱ xi katsanguiya Kosiee̱ tsi̱ꞌe̱ nga konguínjo̱ Ejipto̱, achichí tsjá kamaá. 28Kósꞌe̱ bi̱ katsó Jakoo̱b: «¡Jè ndakjiꞌi ꞌne̱! ¡Ndína Kosiee̱ to̱kó tikón! ¡Tasá kjuinkátsijée̱n, tsi̱ꞌe̱ nga skuie ngase an nguindiee̱ nga ko̱ya án!»
Currently Selected:
Jénesii̱s 45: MAIX
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014