Jénesii̱s 40
40
Bi̱ tsꞌén katsóya Kosiee̱ ni xi tsó jó chi̱nii̱
1-2Nguije jaꞌa ni̱xtjin, nda̱ nguito̱ko̱o̱ já xí tjón kotꞌa bino̱ xi ꞌbi nda̱ ree̱ ko̱jo nda̱ xi tsꞌéndaa̱ pan, kui jaá ndajín katsꞌén kondraa̱ nda̱ ree̱ nangui Ejipto̱, kó achichí katsꞌénxchánjo̱ nga jó kui jaá. 3Kósꞌe̱ katsanguisꞌien ndo̱bo̱a̱ya kuí jaá ki̱a̱ ndo̱bo̱a̱ya nínga tjiꞌyá Kosiee̱. 4Kó kui nda̱ nguito̱ko̱o̱ já xí koón já xí síndo ndo̱bo̱a̱ya̱á, katsjáxaá Kosiee̱ nga kui skondá kui jaá.
Kó nguije jaꞌa ni̱xtjin, 5ngo ni̱xtji̱e̱n nda̱ xi nguito̱ko̱o̱ já xí tjón kotꞌa bino̱ xi ꞌbi nda̱ ree̱ ko̱jo nda̱ xi tsꞌéndaa̱ pan, ngo chi̱ni katseꞌeé nga ngo nga ngo ti̱ kuii̱ ni̱xtji̱e̱n, kó nga ngo nga ngo kui chi̱nii̱, tjiín ngo ni xi tsó. 6Kó nga kamánguindyiojón Kosiee̱ jachókatsijee̱n kui jaá, kó kamábe nga achichí ndasen síndo. 7Kó Kosiee̱ bi̱ katsoó:
—Mí kjo̱a̱a̱ nga ndasen tindyion konjnú.
8Kó kui jaá bi̱ katsó:
—Kjo̱a̱a̱ nga ngo chi̱ni tseꞌéjne̱, ta̱nga jmíjín xi tsáyájne̱ mí ni xi mejeén tsó kui chi̱nii̱.
Kósꞌe̱ Kosiee̱ bi̱ katsó:
—Tꞌíyajnúꞌun chi̱nijnú, kó Néná ka̱tso̱yaná mí ni xi mejeén tsó.
9Kósꞌe̱ kuí má tjón kui nda̱ xi nguito̱ko̱o̱ já xí tjón kotꞌa bino̱ xi ꞌbi nda̱ ree̱, xi bi̱ katsó nga katsóyaá Kosiee̱ chi̱nii̱:
—Ngu̱i̱jin chi̱nina kamábe an ngo ꞌniuú tostsi̱je, 10xi ján tjia kisꞌiee̱, kó kamábe an nga ti̱kjiꞌa tjitjó ńtsꞌieén kui tjiaa, ko̱jo naxoó, ko̱jo tjíchjí kui tostsi̱je̱é. 11Kó ti̱ kamábe an nga ngo chi̱tsen xi ꞌbiyá ni nda̱ ree̱ tsꞌényaꞌa an ngu̱i̱ya ndsa̱ an, kó iskjíbé an kui tostsi̱je̱é kó iskjítjíi̱ ngu̱i̱ya chi̱tse̱én, kósꞌe̱ an katsjáa̱ nda̱ ree̱.
12Kósꞌe̱ Kosiee̱ bi̱ katsoó:
—Nga ján kui tjiaa kui ńꞌniuú, ján ni̱xtjin boá, kó kui nii̱ xi mejeén tsó nga 13ngotꞌe̱ ján ni̱xtjii̱n nda̱ ree̱ sa̱ꞌínjetakoón, kó tsja̱á nguinií xá xi kisꞌiee̱ ngasꞌe̱, tsi̱ꞌe̱ nga ji ka̱ma nguiní ji nguito̱ko̱o̱ já xí tjón kotꞌa bino̱ xi ꞌbi nda̱ ree̱. 14Ngo kjo̱a̱nda míꞌaá, ngatjaꞌátsjien chií an nguije ka̱ma kui nii̱. Nga ka̱ma xi si̱ꞌin ji ndokjo̱e̱je ji nda̱ ree̱ kjo̱a̱a̱ an, kó ꞌna̱xiéní kuí ndo̱bo̱a̱ya̱á. 15Nda̱ Ebreo̱ an, kó ta̱ kjo̱a̱ꞌniú nga kjindiboájo̱na kui ngu̱i̱ndiee̱, jmí ni xi ndajín katsꞌénjín an nga ndo̱bo̱a̱ya tikòn an.
16Nga kamábe kui nda̱ nguito̱ko̱o̱ já xí tsꞌéndaa̱ pan nda̱ ree̱ nga Kosiee̱ nda tsꞌén katsóyaá chi̱nii̱ kui nda̱a̱, bi̱ katsoó Kosiee̱:
—Ti̱ ngo chi̱ni tseꞌéna an nga: Ngu̱i̱jin ńjñána kamábe an ján ni̱se̱nya pan nga̱són tokó án. 17Ngu̱i̱yaa̱ kui ni̱se̱nya xí tikón nkꞌaa ndyi̱a̱ ngayeje to̱ko̱ya pan ixi xi nda chinie xi tsi̱ꞌe̱ nda̱ ree̱, ta̱nga ni̱siee̱ kjindiboá kjinie kui paa̱n.
18Kósꞌe̱ Kosiee̱ bi̱ katsoó:
—Nga ján ni̱se̱nya̱á, ján ni̱xtjin boá. Kó kuí nii̱ xi mejeén tsó nga 19ngotꞌe̱ ján ni̱xtjii̱n nda̱ ree̱ tsja̱ákjo̱a̱ nga si̱ꞌankꞌiee̱n kó ngo yá kjuienboáꞌaá, kó cho̱ xi fítji̱e̱e̱n skji̱ni̱e̱ yojòo̱.
20Xi ma ján ni̱xtjin, kjiꞌa má nga jachónó nda̱ ree̱ nangui Ejipto̱ ngo sꞌué ꞌniú katsꞌeén ngayeje chji̱ni̱e̱ꞌboo̱ ko̱jo mosoo̱, kó ki̱a̱ nguindyi̱ko̱n ngayeje xota̱ xi jachó kui sꞌueé katsjákjo̱a̱ nga ko̱ꞌna̱xié ndo̱bo̱a̱ya nguito̱ko̱o̱ já xí tjón kotꞌa bino̱ xi ꞌbi nda̱ ree̱ ko̱jo nguito̱ko̱o̱ já xí tsꞌéndaa̱ pan. 21Nda̱ nguito̱ko̱o̱ já xí tjón kotꞌa bino̱ xi ꞌbi nda̱ ree̱ katsjá nguinií xaá, 22ta̱nga nda̱ nguito̱ko̱o̱ já xí tsꞌéndaa̱ pan nda̱ ree̱, katsjákjo̱a̱ nga ikjienboaꞌa nga kiniꞌánkꞌién, kó jatjosón xikó má katsó Kosiee̱.
23Ta̱nga kui nda̱ nguito̱ko̱o̱ já xí tjón kotꞌa bino̱ xi ꞌbi nda̱ ree̱ nguiti̱ jaꞌátsjienjiín Kosiee̱, ta̱sá katsꞌénchíyá kjin.
Currently Selected:
Jénesii̱s 40: MAIX
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014