Jénesii̱s 41
41
Bi̱ tsꞌén tseꞌéchi̱nii̱ nda̱ ree̱
1Nguije jaꞌa jó nó, ngo chi̱ni tseꞌeé nda̱ ree̱ nangui Ejiptoo̱, nínga ki̱a̱ sikón tꞌa ndejé Niloo̱, 2kó ta̱ nijan má kamábe nga ndyi̱fotjojin ngu̱i̱jin ndójoaa̱ yito cho̱yojo xi achichí tsjákón, xi ꞌniú yiꞌi, kó ki̱a̱ tsakjién ndi̱xcho̱ tꞌa ndejeé. 3Kó ti̱ kamábe nga ndyi̱fotjojin ndejeé ngui yito cho̱yojo xi a ta̱ chꞌokón, xi achichí xkꞌién, kó ki̱a̱ kixindyia tꞌa nínga síndo cho̱yojo xi achichí tsjákoón. 4Kó ta̱niján má kui cho̱yojo xi a ta̱ chꞌokoón ko̱jo xi xkꞌieén iskjinie nga yito cho̱yojo xi achichí tsjákoón.
Kó kjiꞌa má jaꞌaá nda̱ ree̱. 5Ta̱nga ti̱ kisꞌifé nguiní, kó ti̱ tseꞌé chi̱ni nguinií ingo ndi̱ya, nínga kamábe ngo xka̱a̱ to ndso̱ko̱a̱n ṉño̱pan, xi yito ńtín jatjoo̱ xi kisꞌikitsie maá to ndso̱ko̱a̱n ṉño̱pan ko̱jo xi achichí tsjákón kamá. 6Kó jaskan kamábe nga jatjoo̱ kui xka̱a̱ to ndso̱ko̱a̱n ṉño̱paa̱n ngui yito ńtín xí a ta̱ ni̱ma̱kón, kó tjo̱ xí chji̱a̱ni nangui kixií katsꞌénchjaán. 7Kó kui ńtín xí a ta̱ ni̱ma̱koón iskjinie kui ńtín xí achichí tsjákoón xi kisꞌikitsie maá to ndso̱ko̱a̱n ṉño̱pan.
Kó kjiꞌa má jaꞌaá nda̱ ree̱, kó kamákjiín nga chi̱ni boá kui nii̱. 8Kó nga kamá nguindyiojoón achichí nda̱ kamaá, kó katsanguiyakjaꞌá ngayeje xota̱ xi kotꞌasón xi chji̱a̱ni nangui Ejipto̱, ko̱jo ngayeje xota̱ xi kjínkón, kó kui nda̱ ree̱ katsóyaá ni xi tseꞌéchi̱nii̱, ta̱nga nde ngojín kui xotaa̱ xi katsóyaá mí ni xi mejeén tsó kui chi̱ni xi katseꞌeé nda̱ ree̱. 9Kósꞌe̱ nda̱ nguito̱ko̱o̱ já xí tjón kotꞌa bino̱ xi ꞌbi nda̱ ree̱ tsíchji̱a̱jo ree̱, nga bi̱ katsoó:
—¡Ngotꞌe̱ ꞌne̱ nga be an nga achichí nga ndajín an xota̱! 10Ngo ndi̱ya nga kiniꞌínxchínje̱jne̱ an ko̱jo nda nguito̱ko̱o̱ já xí tsꞌénda paa̱n, kó kananguisꞌinjne̱ ndo̱bo̱a̱ya nínga askonjne̱ nguito̱ko̱o̱ já xí koón já xí síndo ndo̱bo̱a̱ya̱á. 11Ngo ni̱xtji̱e̱n tseꞌéchi̱nijne̱ nga jójne̱. 12Kó ki̱a̱ nijan kisꞌijñajo̱jne̱ ndo̱bo̱a̱ya ngo nda̱ ebreo̱ xo̱ngo xi moso̱ katsꞌén nda̱ nguito̱ko̱o̱ já xí koón já xí síndo ndo̱bo̱a̱ya̱á, kó kuí kiꞌmíyájne̱ chi̱nijne̱, kó katsóyajne̱ mí ni xi mejeén tsó chi̱nijne̱ nga ngo nga ngojne̱. 13¡Kó bo̱a̱ má kamá ngayeje ni xi katsójne̱! An katseꞌé nguíni xána, kó nda̱ xi ingoo̱ ji katseꞌékjo̱e̱ ji nga kiniꞌánkꞌién.
14Kósꞌe̱ nda̱ ree̱ katsanguiyakjaꞌá Kosiee̱, kó tatra kaꞌnaxié ndo̱bo̱a̱ya. Kosiee̱ íjoón tsja̱ꞌaa̱, asíkjo ńjñoo̱, sꞌe̱ kijíkoón nda̱ ree̱. 15Kó nda̱ ree̱, bi̱ katsoó Kosiee̱:
—Ngo chi̱ni tseꞌéna, kó nde ngojín xi tsáyána mí ni xi mejeén tsó, ta̱nga jè kiꞌmíyána nga nguije xó ndaꞌyé ji ngo chi̱ni, ꞌmíyé xó ji ni xi mejeén tsó.
16Kósꞌe̱ Kosiee̱, bi̱ katsoó nda̱ ree̱:
—Jmíjínna an kui ngaꞌniuú, ta̱nga Néná tjínrií, kó ka̱márií ka̱tso̱yaa ni xi mejeén xche̱ ji nda̱ ree̱.
17Kósꞌe̱ nda̱ ree̱, bi̱ katsoó Kosiee̱:
—Ngu̱i̱jin chi̱nina ki̱a̱ tikón kixi̱ an tꞌa ndejé Niloo̱. 18Kó ta̱niján má kamábe an nga ngu̱i̱jin ndejeé jatjojin yito cho̱yojo xi yiꞌi xi achichí tsjákón xi ndyi̱kjién ndi̱xcho̱ tꞌa ndejeé. 19Kó nga̱xto̱n kui cho̱o̱ kamábe an nga jatjojin ngu̱i̱jin ndójoaa̱ ngui yito cho̱yojo xi achichí xkꞌién xi a ta̱ chꞌokón. ¡Kji̱e̱ ngo ndi̱ya be an cho̱yojo xi bo̱a̱ kon ngayeje na̱xi̱ńdá Ejipto̱! 20Kó kui cho̱yojo xi xkꞌién xí a ta̱ chꞌokoón iskjinie nga yito kui cho̱yojo xi achichí yiꞌii̱ xi tjón jatjokjaá. 21Xkꞌién kó chꞌokón kamá, kó nda tsi je iskjinie kui cho̱yojo xi yiꞌii̱, nde kamáyájín ngatꞌa̱ to̱kó bo̱a̱ tsꞌén xkꞌién kamá xikoó nga tjón tjón.
Kó kjiꞌa má jaꞌána. 22Jaskan ti̱ tseꞌé nguinína ingo chi̱ni, nínga kamábe an nga kjimaxchá yito ńtiín to ndso̱ko̱a̱n ṉño̱pan xi achichí tsjákón kamá, kó kisꞌikitsie maá to, kó ta̱ ngo tsí yá xi kjifotjoo̱ kui ńtiín. 23Jaskan ti̱ jatjo nguinií ti̱ kui yaá ngui yito ńtín xi a ta̱ ni̱ma̱kón kamá, ntꞌié kamá, kó tjo̱ xi ndiboání xtji̱e̱e̱n nangui kixií katsꞌénxí. 24Kó kui ńtín xí a ta̱ ni̱ma̱koón iskjinie kui ńtín xí achichí tsjákoón. Ngayeje kui nii̱ jè kixiyáa̱ ngayeje já xí kotꞌasoón, ta̱nga nde ngojín xi kamaá katsóyana ni xi mejeén tsó kui chi̱nii̱.
25Kósꞌe̱ Kosiee̱, bi̱ katsoó nda̱ ree̱:
—Nga jó kui chi̱ni xi katseꞌeé nda̱ re, ta̱ ngo tsí má. Néná tsꞌénbokoó ni xi mejeén sa̱ꞌín. 26Nga yito kui cho̱yojo xi achichí tsjákoón, yito nó boá, kó ti̱ kuíní ni xi mejeén tsó nga yito kui ńtín xí achichí tsjákoón, nga jó kui chi̱nii̱ ta̱ ngo tsí má. 27Kó ti̱ nga yito kui cho̱yojo xi xkꞌién ko̱jo xi a ta̱ chꞌokoón xi jatjojinni ndójoaa̱, ti̱ yito nó boá nga, kó nga yito kui ńtín xi a ta̱ ni̱ma̱koón, kui xi kixíꞌniuú ko̱jo xi katsꞌénchjaán tjo̱ xi ndiboání xtji̱e̱e̱n nangui kixií, kuí boá xi tsáyá nga yito nó ka̱ma kjindiá.
28Néná mejeén nga xche̱ ji ni xi mejeén sa̱ꞌín nda̱ re. 29Nga tjón tjón ndibá yito nó nga achichí ni xi ka̱maxchá kꞌi̱e̱ nangui Ejiptoo̱, 30-31sꞌe̱ jaskan kji̱ndi̱boá yito nó nga jmí ni chinie kꞌuiéjín, nga bo̱a̱ ka̱ma taꞌyajín xi kjo̱a̱ꞌátsjiee̱n ngayeje ni tsie xi kisꞌie ngasꞌe̱ nangui Ejipto̱, ngatꞌa̱ kui kjindiá ꞌniuú sa̱ꞌínkjié kui na̱xi̱ńdaá. 32Kó nga jó ndi̱ya tseꞌeé kui chi̱nii̱ nda̱ ree̱, kuí nii̱ xi mejeén tsó nga Néná bo̱a̱ kjiꞌi ni xi sa̱ꞌín, kó nga jè tsá ka̱ma kui nii̱.
33Kuíni nga chjiéngá ngotꞌe̱ ꞌne̱ nda̱ re, ngo nda̱ ti̱ndyi̱sé ji xi chji̱ni̱e̱ ko̱jo xi kjínkón, tsi̱ꞌe̱ nga kui kꞌuijñátjoón na̱xi̱ńdaá. 34Kó ti̱ bo̱a̱ xiaan ji nga nda̱ re, nga kꞌuíndetjén ji xota̱ kui na̱xi̱ńdaá xi kjo̱a̱ꞌátikó ngo nga ún tjiín ngayeje ni xi ka̱maxchá kui xi yito nó nga tsie ni ka̱maxchaá. 35Nga yito kui nó nda xi ndiboaá, bo̱a̱ tꞌíi̱n nda̱ re, nga ngatjaꞌátikó kó ngatjaꞌátjó xki̱ na̱xi̱ńdá ngayeje ni chinie ko̱jo to ndso̱ko̱a̱n ṉño̱pan xi ka̱maxchaá. 36Kó bo̱a̱ tsꞌén kui ni chiniee̱ xtjo̱ꞌátjó, ki̱a̱ ka̱maa̱ kjiꞌa nga ka̱ma kui kjindiá xí yito noó ki̱a̱ na̱xi̱ńdá Ejipto̱, kꞌuié ni chinie, kó kui kjindiaá jmí ni sa̱ꞌínjiín kui na̱xi̱ńdaá.
37Kó nda̱ ree̱ ko̱jo já mosoo̱ nda kamaá ni xi katsó Kosiee̱, 38kó nda̱ ree̱ bi̱ katsoó mosoo̱: «Ngojín ndié sa̱kóná ingo nda̱ xi ꞌniú kjínkón ngase xikoó kui nda̱ xo̱ngo̱ó». 39-41Kósꞌe̱ nda̱ ree̱, bi̱ katsoó Kosiee̱:
—Néná boá xi akoó ngayeje kui nii̱ ji, kó kuí nii̱ xi tsó nga jmíjín ingo nda̱ xi chji̱ni̱e̱ ko̱jo xi kjínkón ngase xikoó ji. Kuíni nga ngotꞌe̱ ꞌne̱, jí boá xi ko̱tixome ji ndiꞌa nínga botixoma an, ko̱jo ngayeje na̱xi̱ńdána, kó chjiéngá nga ngayeje xota̱ xi chji̱a̱ni Ejipto̱ ji ku̱i̱ntꞌiéꞌeén, kó ta̱ an tsí xi ꞌniú ngase nkꞌa ka̱ma xána nga̱soón xá tse̱, ngatꞌa̱ án boá xi nda̱ ree̱.
42Kósꞌe̱ jaskan nda̱ ree̱ jaꞌáxín sti̱ngaro xi tjiyaá tsja xi tsꞌénkjién nga beꞌeé xo̱jo̱n xi tsanguiya, kó tsja Kosiee̱ íyaá. Sꞌe̱ katsjákjo̱a̱ nga katseꞌeé Kosiee̱ ńjño xi nda tsi̱ꞌe̱ nga ko̱a̱ja̱, kó ti̱ katsjaá ngo ni xi jmeyá kjásén xí to̱nsinié nga, 43kósꞌe̱ tsíꞌaá Kosiee̱ nga ki̱a̱ nijan ko̱e̱je̱yajo̱ karroo̱ nda̱ ree̱, nga kui xi je nda̱ xtitjoón, kó kui nda̱ ree̱, bi̱ katsoó xotaa̱ nguindyi̱ko̱n Kosiee̱: «Chjáxꞌájnú ndi̱ya». Kó Kosiee̱ kasakoxaá nga kui xi ko̱tíxomaa̱ ngayeje nangui Ejipto̱. 44Kó nda̱ ree̱ bi̱ katsoó Kosiee̱: «Nda tsi an xi nda̱ ree̱ an, ta̱nga ngojín xota̱ xi ta̱xkiya sa̱ꞌín ngo ni tsi jíjín xi ko̱e̱ꞌékjo̱e̱e̱».
45Kósꞌe̱ nda̱ ree̱ asíkjoo̱ jaꞌeén Kosiee̱ kó Safenat Panea̱ ítꞌa jaꞌén, kó na̱ Asenaa̱t, tsa̱kji̱ín nda̱ xi ꞌmí Potiferaa̱ kui xi chináꞌmii̱ Oo̱n katsjaá nga kui xi chjo̱ón Kosiee̱ ka̱ma. Jaskan nguije kamá kui nii̱, Kosiee̱ kijíkatsijee̱n ngayeje nangui Ejipto̱.
Bi̱ tsꞌén katseꞌéxaá Kosiee̱ nga atíxoma nangui Ejipto̱
46Kjiꞌa nga kamá kantié noó Kosiee̱ katsꞌénkixotꞌa nda̱ ree̱ ngatꞌa̱ kijíkatsijee̱n ngayeje nangui Ejipto̱. 47Kó nga yito kui nó xí tsie ni katsjá tꞌananguii̱, achichí ni kamáxchá ngayeje nangui Ejipto̱, 48kó Kosiee̱ jaꞌátikó ngayeje ni chinie nga yito kui noó, kó jaꞌátjó kui nii̱ xki̱ na̱xi̱ńdá xikó kjiꞌi to ndso̱ko̱a̱n ṉño̱pan kamáxchá kuí tꞌananguii̱. 49Kó Kosiee̱ jaꞌátikó to ndso̱ko̱a̱n ṉño̱pan xikó maá tsi tsomií ndáchíkoón xí jaꞌátikó, ngaskande nguiti̱ kamájín ikꞌíxki̱ to ndso̱ko̱a̱n ṉño̱paa̱n, ngatꞌa̱ jmíjín xi kamaá tsaꞌa xki̱ ngayeje kui nii̱.
50Kó jó ndí kisꞌiee̱ Kosiee̱ nguindiee̱ nga kjindiboá kui kjindiaá, ndí xí yeꞌé na̱ Asenaa̱t. 51Kó ndí tjoón Kosiee̱ Manasee̱#41:51 «Xi tsꞌénchíyáná» tsó kui jaꞌeén nga én ebreo̱. ítꞌa jaꞌén ngatꞌa̱ bi̱ katsó: «Néná boá xi katsꞌén nga kichíyána ngayeje kjo̱a̱xtina ko̱jo ndiꞌaa̱ na̱ꞌmina». 52Kó ndií xi ma jó Efraii̱n#41:52 «Xi tjié» tsó kui jaꞌeén nga én ebreo̱. ítꞌa jaꞌén ngatꞌa̱ bi̱ katsó: «Néná boá xi katsjána ndí kꞌi̱e̱ nangui nínga achichí kjo̱a̱ni̱ma̱ jaꞌa an».
53-54Kó xikó má katsó Kosiee̱ nga ka̱ma, bo̱a̱ má kamá, yito nó jaꞌa nga ta̱nisién nda kamá nangui Ejipto̱. Kósꞌe̱ kjindiboá yito nó nga kisꞌie kjindiaá. Kó kisꞌie kjindiá ngayeje na̱xi̱ńdá, ta̱ ngo tsí nangui Ejipto̱ nínga kisꞌie ni chinie. 55Nguije kisꞌie kjindiá ngayeje nangui xi síndo ki̱a̱ Ejipto̱, xota̱ na̱xi̱ńdaá kui ngu̱i̱ndiee̱ kijíkoón nda̱ ree̱ tsi̱ꞌe̱ nga tsíꞌaá ni chinie. Kó nda̱ ree̱ bi̱ katsoó: «Tanguínchonjnúu̱ Kosiee̱ kó ti̱ꞌánjnú ni xi ka̱tso̱jnú kui nda̱a̱».
56Kó nguije ítsꞌi̱yanii̱ nga kamá kui kjindiá ngayeje kui na̱xi̱ńdaá, Kosiee̱ iskjíxꞌá kui ndiꞌa yiꞌi nínga kixindyia ni xi ma chiniee̱, kó atíñaá to ndso̱ko̱a̱n ṉño̱pan xota̱ Ejiptoo̱. 57ꞌNiú kamá kui kjindiaá nga ngayeje xota̱ xi tjín kjín na̱xi̱ńdá xi jachó nangui Ejipto̱ nga jachókꞌatsiee̱ ni chinie Kosiee̱.
Currently Selected:
Jénesii̱s 41: MAIX
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014