Jénesii̱s 34
34
Sikee̱n ndajín katsꞌénjo̱ na̱ Ndinaa̱
1Ngo ndi̱ya na̱ Ndinaa̱ kui xi ndí chjo̱ón na̱ Líaa̱ ko̱jo Jakoo̱b, kijítsabekoo̱n ínchjín xí chji̱a̱ni na̱xi̱ńdaá. 2Kó nga kamábe nda̱ xi ꞌmí Sikee̱n, ndií Jamoo̱r nda̱ xi xota̱ tji̱e̱ Ee̱b xi atíxomaa̱ kui ngu̱i̱ndiee̱, iskjíbé kjo̱a̱ꞌniú kó chꞌo katsꞌénjo̱ kjo̱a̱ꞌniú. 3Ta̱nga katsꞌénmején na̱ Ndinaa̱, tsi̱ꞌe̱ nga sa̱ꞌínjo̱ꞌo katsaki. 4Kó kuíni nga Sikee̱n tsíchji̱a̱jo Jamoo̱r na̱ꞌmii̱ tsi̱ꞌe̱ nga ko̱e̱je̱kíꞌaá kui tsa̱kji̱ín nga ku̱i̱xanjo̱.
5Jakoo̱b tsintꞌié nga chꞌo kiniꞌánjo̱ kjo̱a̱ꞌniú tsa̱kji̱ín, kó jmí ni katsójín ngaskande nga jachó jaá, ngatꞌa̱ cho̱ xi tjiín kijíkatsijee̱n ngu̱i̱jin kꞌijñáján kuí jaá. 6Kó Jamoo̱r, na̱ꞌmii̱ Sikee̱n, kijíkoón Jakoo̱b tsi̱ꞌe̱ nga ku̱i̱chji̱a̱joni̱jmi.
7Nguije jachó ndiꞌaa̱ jaá Jakoo̱b, achichí katsꞌénxchán nga kamábe ni xi kamátaꞌin ndichja. Ngatꞌa̱ kui ni xi katsꞌén Sikee̱n katsꞌénkjánrií xota̱ xkjín kuí jaá. Chjiénjín nga bo̱a̱ kjiꞌi ni xi katsꞌén Sikee̱n katsaki. 8Ta̱nga bi̱ katsó Jamoo̱r:
—Ndína Sikee̱n ja̱koxi̱ nga ngayeje ini̱ma̱a̱ nga mejeén kui naa̱. ꞌNiú míꞌájnúꞌun nga teꞌéndiéjnúu̱ nga ku̱i̱xanjo̱ kui tsa̱kji̱ín, 9kó bo̱a̱ tsꞌén nga xota̱ xingu̱i̱ ka̱ma, kó ka̱ma já xíꞌinjnú ku̱i̱xanjo̱ ndí xí ínchjínjne̱, kó já xíꞌinjne̱ ku̱i̱xanjo̱ ndí xí ínchjínjnú. 10Kó ti̱ ka̱ma kꞌi̱e̱ ku̱i̱ndyionjnú ngu̱i̱jii̱n xota̱jne̱. Kꞌi̱e̱ tikón kui na̱xi̱ńdaá: ¡ka̱ma kꞌi̱e̱ ku̱i̱ndyionjnú, tanguínjnú ta̱ nínga mejénjnú, kó ka̱ma si̱ꞌantsiejnú tꞌanangui kꞌi̱e̱e̱ nga!
11Kó Sikee̱n bi̱ katsoó Jakoo̱b ko̱jo jaá:
—Ta̱ ni xi mejénjnú tsjajnúꞌun tsi ko̱e̱ꞌéndiéjnúꞌun nga ku̱i̱xanjo̱ an na̱ Ndinaa̱. 12Jmí ndasenjín nda tsi kjín ni chji̱a̱ꞌajnúꞌun, an kꞌuichjí án, ¡ta̱nga teꞌéndiéjnúꞌun nga ku̱i̱xanjo̱ an kui naa̱!
13Ta̱nga jaá Jakoo̱b tsꞌenṉcha̱jo Sikee̱n ko̱jo Jamoo̱r, 14Kó bi̱ katsoó kuí jaá:
—Ka̱májín ko̱e̱ꞌéndiéjne̱ nga ngo nda̱ xi jmíjiín sirkunsisioo̱n ku̱i̱xanjo̱ ndichjajne̱, ngatꞌa̱ kjo̱a̱soboá májne̱ kui nii̱. 15Ngototo tsi jún ko̱jo ngayeje já xíꞌiín si̱ꞌánjnúu̱ sirkunsisioo̱n yojojnú, bo̱a̱ tsí tsꞌén nga ka̱ma ko̱e̱ꞌéndiéjne̱ nga ka̱ma ku̱i̱xánjnú. 16Kó bo̱a̱ tsꞌén nga ka̱ma nga já xíꞌinjnú ku̱i̱xanjo̱ ndí xí ínchjínjne̱, kó já xíꞌinjne̱ ka̱ma ku̱i̱xanjo̱ ndí xí ínchjínjnú, kó ka̱ma kꞌi̱e̱ ku̱i̱ndyionjne̱ kui ngu̱i̱ndiee̱, kó ta̱ ngo tsí na̱xi̱ńdá ka̱ma ñá nguijee̱. 17Ta̱nga tsi sasiénjínjnú kui nii̱, ta̱sá ndyi̱monguínjne̱, kó xín konguínjo̱jne̱ na̱ Ndinaa̱.
18Kó Jamoo̱r ko̱jo Sikee̱n katsꞌénjo̱ꞌo ni xi katsó kui jaá. 19-20Kó Sikee̱n ꞌniú ton kamáyándikón ngu̱i̱jii̱n xota̱ xkjín, kó nga ꞌniú kamámejeén na̱ Ndinaa̱, kui ko̱jo na̱ꞌmii̱ tji̱e̱nmá kijíchji̱a̱jo xota̱xa̱á kui na̱xi̱ńdaá, 21kó bi̱ katsoó:
—Kui jaá, ndií Jakoo̱b xota̱ nda boá, ko̱e̱ꞌéndiée̱ nga kꞌi̱e̱ kꞌuíndo kui na̱xi̱ńdaá, kó ka̱ma ko̱tíñá ko̱jo tsi kꞌo̱tsie ni kꞌi̱e̱e̱, jè yajnú nga ta̱nisién tiyá tꞌananguii̱, kó tjín nguindie kꞌi̱e̱e̱ nínga ka̱ma kꞌuíndo, kó ñá ka̱ma ku̱i̱xanjo̱ ndí xí ínchjiín, kó kui jaá ka̱ma ku̱i̱xanjo̱ ndí xí ínchjínná. 22Ta̱nga tsi̱ꞌe̱ nga kꞌi̱e̱ kꞌuíndojo̱na kꞌi̱e̱e̱, ngo ni ndyi̱míꞌá, nga chjién xó nga ngayeje já xíꞌiín si̱ꞌáa̱n sirkunsisioo̱n yojoná. 23¡Ko̱e̱ꞌéndiée̱ nga kꞌi̱e̱ ngatꞌíndojinná! ¡Kó bo̱a̱ tsꞌén ngayeje cho̱ ko̱jo kjo̱a̱cho̱n xi tjiín tsa̱ñá ka̱ma!
24Kó jáxaá katsꞌénjo̱ꞌo ni xi katsó Jamoo̱r ko̱jo Sikee̱n, kó ngayeje já xíꞌiín katsꞌeén sirkunsisioo̱n yojoo̱. 25Ta̱nga Simeoo̱n ko̱jo Lebii̱, já ntsꞌi̱e̱ na̱ Ndinaa̱ kijí na̱xi̱ńdáján xi ma ján ni̱xtjin, kó ki̱cha̱ katsꞌénkꞌiénni ngayeje já xíꞌin xi katsꞌeén sirkunsisio̱n yojoo̱, kó nde ngojín xi tsꞌaxiéꞌá yojoo̱ ngatꞌa̱ oo̱n kuí jaá. 26Nguije katsꞌénkꞌién Jamoo̱r ko̱jo Sikee̱n kui jaá, tsꞌaxié na̱ Ndinaa̱, sꞌe̱ kijíjo̱. 27-29Kó kui jaá Jakoo̱b katsjánié xota̱ xi je jesoón, kó katsꞌénchejé ngayeje ni xi tjín kuí na̱xi̱ńdaá, kijíjo̱ ngayeje cho̱tsa̱nga̱, ko̱jo cho̱yojo ko̱jo bórró ko̱jo ngayeje ni xi tjín na̱xi̱ńdaá ko̱jo nínga jnoo̱. Ti̱ tsꞌasꞌien xki̱ ndiꞌa, kó katsꞌénchejé ni xi tjiín, kijíjo̱ ngayeje kjo̱a̱cho̱n xi kisꞌiee̱, kó kijíjo̱ꞌniú jákjíndí xi̱xi̱i̱ ko̱jo ínchjiín. Kó bo̱a̱ tsꞌén katsꞌéngojo ni xi kiniꞌánjo̱ na̱ Ndinaa̱. 30Kó Jakoo̱b katsꞌénxchánjo̱ Simeoo̱n ko̱jo Lebii̱ nga bi̱ katsoó:
—Kjo̱a̱a̱ ni xi kiniꞌánjnú, achichí kjo̱a̱xti jéꞌe̱jojnúꞌun. Ngotꞌe̱ ꞌne̱ xota̱ Kanaa̱n ko̱jo xota̱ Feree̱ nde ka̱mamejénjiín sku̱i̱e̱na. Chiboa tsí má ñá, kó tsi kui xotaa̱ ku̱i̱ꞌíkjo xkjín sꞌe̱ skjánjo̱ná, ka̱márií sa̱ꞌínkꞌiénná ngayeje ñá.
31Ta̱nga kuí jaá bi̱ katsó:
—¡Chjiénjín nga Sikee̱n xikoó tsi ngo na̱ masien katsꞌén ndichjajne̱ katsaki!
Currently Selected:
Jénesii̱s 34: MAIX
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014