Jénesii̱s 35
35
Bi̱ tsꞌén Néná katsꞌénchikonñé Jakoo̱b ki̱a̱ Betee̱l
1Kó Néná bi̱ katsoó Jakoo̱b: «Kjiꞌa nga ikiyindikíi̱n ntsꞌie ji Esauu̱, an jatjokjaá ki̱a̱ Betee̱l, kó kuíni nga ngotꞌe̱ ꞌne̱ ki̱a̱ ti̱ndyin ji Betee̱l, kó ki̱a̱ ti̱ꞌinndení ngo ṉchandikón».
2Kósꞌe̱ Jakoo̱b, bi̱ katsoó xota̱ xkjín ko̱jo xi ki̱a̱ síndojo̱:
«Tꞌíndomasienjnú kui ni xi ne ndyi̱ꞌmijnúu̱ xi síndojnú, sꞌe̱ jaskan ti̱ndáyájnú kó tasíkjojnú ńjñojnú, 3ngatꞌa̱ chjiéngá Betee̱l konguín, tsi̱ꞌe̱ nga nguindyi̱ko̱n Néná konguinkindyiá. Ki̱a̱ boá nínga sa̱ꞌindáa̱ ngo ṉchandikón Néná, tsi̱ꞌe̱ nga tsjàa̱ ndokꞌóchji, ngatꞌa̱ kuí boá xi asíko̱jona kjiꞌa nga kisꞌiena kjo̱a̱xti. Néná boá xi ngatsjé ni̱xtjin tsoꞌbájo̱na ndi̱ya xí tsoꞌbá an».
4Kó bo̱a̱ tsꞌén kui xotaa̱ katsꞌénkꞌasꞌiee̱n Jakoo̱b ngayeje ni xi ne katsoó xi kisꞌińdoo̱ ko̱jo nanguínijon xi yajánguií tji̱bo̱a̱nijon, kó Jakoo̱b nguindiee̱ ngo yáꞌensino̱ xi tikón ki̱a̱ Sikee̱n ínijín ngayeje kui nii̱. 5Kó nguije jatjo kui ngu̱i̱ndiee̱, Néná katsꞌén nga ngayeje xota̱ na̱xi̱ńdá xí síndo nínga tiñaa̱ nga achichí katsakjónní kui jaá, kó jmíjín xi kijíngatji̱nguii̱ ndií Jakoo̱b.
6Kó Jakoo̱b ko̱jo ngayeje xota̱ xi tsoꞌbájo̱ jachó na̱xi̱ńdá xi ꞌmí Betee̱l, xi tikón nangui Kanaa̱n. 7Ki̱a̱ boá nínga Jakoo̱b jatjokjaá Néná kjiꞌa nga tsangandikoón Esau̱ ntsꞌi̱e̱. Kuíni nga Jakoo̱b ngo ṉchandikón katsꞌénda ki̱a̱a̱, kó kui ngu̱i̱ndiee̱ «Néná xí tsi̱ꞌe̱ Betee̱l» ítꞌa jaꞌén.
8Kui ni̱xtjinján kꞌien na̱ Ndéboraa̱, xota̱chjo̱on xí askoo̱n na̱ Rebekaa̱ ndeskande nga tsa̱kjinchí, kó ngo nguindie yáꞌensino̱ akjanijín, ki̱a̱ tiña Betee̱l, kuíni nga kui ngu̱i̱ndiee̱ «Yaá kjo̱a̱chaꞌaá» ꞌmí.
9Ngasꞌe̱ Néná jatjokjaá Jakoo̱b kjiꞌa nga kijíꞌoyá nguiní Padan Araa̱n, kó katsꞌénchikonñé. 10Kui ni̱xtjinján, Néná bi̱ katsoó: «Jí boá xi ꞌmií Jakoo̱b, ta̱nga jè nguiti̱ Jakoo̱bjín kꞌuin ngasee̱, Israee̱l kꞌuiín ngotꞌe̱ ꞌne̱». Kó ndeskande koó kjiꞌa Néná, Israee̱l katsoó. 11Kó ti̱ ki̱a̱ Néná bi̱ katsó ngasee̱:
«Án boá kui Ne xi tjiín ngayeje ngaꞌniuú, kó mejénna nga kjín xota̱ tji̱e̱ kꞌuieé ji, ki̱a̱ kjo̱tjojinni kjín na̱xi̱ńdá, kó ti̱ ki̱a̱ kjo̱tjojinni kjín já re. 12Tꞌanangui xi katsjáa̱ Abraa̱n ko̱jo Isaa̱ kuí boá xi ti̱ tsjaa ji ngotꞌe̱, kó jaskan tsjàa̱ xota̱ tji̱e̱ tse̱».
13-14Nguije xín ngu̱i̱ndie kijí Néná, Jakoo̱b iskjíbé ndi̱jo̱ xi índoxó sꞌe̱ iskjitjónjón isti̱ ko̱jo bino̱, kó Néná katsꞌénkꞌasꞌiee̱n kui ngu̱i̱ndiee̱. 15Kó nga Néná ki̱a̱ tsíchji̱a̱jo, kuíni nga Jakoo̱b Betee̱l ítꞌa jaꞌén kuí ngu̱i̱ndiee̱, «ndiꞌaa̱ Néná» tsó kui jaꞌeén.
Bi̱ tsꞌén kꞌien na̱ Rakee̱l
16Jaskan jatjoni Jakoo̱b ko̱jo xotaa̱ ki̱a̱ Betee̱l, kó kijí xtji̱e̱e̱n nangui Efrata̱, kó nguije makjáchó má kui nanguii̱, na̱ Rakee̱l ítsꞌi̱yanii̱ tsi̱ndi̱o̱o̱ nga stse̱n ndií xi ingoo̱. 17Kó achichí niꞌin katsꞌén, kósꞌe̱ xota̱chjo̱on xí ꞌboje̱n ndií bi̱ katsoó: «Ngata̱ ndakínjín má ji, ti̱ xi̱ꞌin ka̱ma nguiní kui ndií nga».
18Kó nda tsꞌén katsen kui ndií, ta̱nga na̱ Rakee̱l kichikjo̱a̱jiín, kó nguindiee̱ nga ko̱ya Benoni̱ ítꞌa jaꞌén kuí ndií «ndií kjo̱a̱ndakjanna» tsó kuí jaꞌeén, ta̱nga Jakoo̱b asíkjoo̱ jaꞌeén kó Benja̱ katsoó «ndí xí tjó ngasena» tsó kui jaꞌeén.
19Kó kꞌien na̱ Rakee̱l, kó ki̱a̱ akjanijín ndi̱ya xi fí Efrata̱, ki̱a̱ nínga na̱xi̱ńdá Belee̱n ꞌmí ngotꞌe̱. 20Jakoo̱b ngo xó ndi̱jo̱ katsꞌénda nga̱soón nga̱tsjo̱ó na̱ Rakee̱l. Kó kuí ni̱xtjin xi̱ꞌbi̱ nga kiniꞌánꞌindó kui nii̱, kuí boá kuí xó ndi̱jo̱o̱ xi chi̱bo̱a̱ kjima nínga tikón nga̱tsjo̱ó na̱ Rakee̱l.
21Kó ingo ndi̱ya Jakoo̱b ti̱ kijí nguiní xín ngu̱i̱ndie, kó ki̱a̱ katsꞌénda ndiꞌaa̱ ngu̱i̱chí kjinnii̱ nínga tikón tarieé Edee̱r.
22Tji̱e̱nga kisꞌijña Jakoo̱b kui ngu̱i̱ndiee̱, ndií kui xi ꞌmí Rubee̱n kisꞌiejo̱ na̱ Bilaa̱, kui xi chjo̱on mánii̱ Jakoo̱b, kó tsintꞌié kuí nii̱ Jakoo̱b.
Ndií Jakoo̱b
Tiejó kamá ndií Jakoo̱b.
23Ndí xí kisꞌiee̱ na̱ Líaa̱ kuí boá xi Rubee̱n, ndí xi tjoón, ko̱jo Simeo̱n, ko̱jo Lebii̱, ko̱jo Judáa̱, ko̱jo Isakaa̱r ko̱jo Sabuloo̱n.
24Ndí xí kisꞌiee̱ na̱ Rakee̱l kuí boá xi Kosiee̱, ko̱jo Benjaa̱.
25Ndí xí kisꞌiee̱ na̱ Bilaa̱ na̱ chji̱ni̱e̱ꞌboo̱ na̱ Rakee̱l kuí boá xi Ndaa̱n ko̱jo Neftalii̱.
26Ndí xí kisꞌiee̱ na̱ Silpaa̱ na̱ chji̱ni̱e̱ꞌboo̱ na̱ Líaa̱, kuí boá xi Ngaa̱d ko̱jo Asee̱r.
Kuí bí xí kamá ndií Jakoo̱b xi katsen nga kisꞌijña ki̱a̱ nangui Padan Araa̱n.
Bi̱ tsꞌén kꞌien Isaa̱
27Jaskan Jakoo̱b kijí nguiní ndiꞌaa̱ Isa̱ na̱ꞌmii̱, kui xi kisꞌijña ki̱a̱ nínga ꞌmí Ebroo̱n, nínga kisꞌijña Abraa̱n nga. 28Úchán ichítié ko̱jo kantié noó Isaa̱ nga kꞌien. 29Kó jè ꞌniú xchá Isaa̱ nga kꞌien, kó ndií, kui xi ꞌmí Esauu̱ ko̱jo Jakoo̱b ki̱a̱ yínijín nínga kjiyojonijín xkjín.
Currently Selected:
Jénesii̱s 35: MAIX
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014