Markus 8
8
Yesu wa Zu̱m ndu̱ Nduki Du̱pu Vat
(Mat 15:32-39)
1Baa mbu̱ qaandiku nang, tu̱ tabar ndukiku khang maɗyi taba nu̱ she nda, yang tu̱k aa da ɗye zu̱m kha wor ma zu̱mndan ɓa. Tu̱ Yesu qa nu̱ mburindakwang tu̱ ze wor za, 2“Nga tu̱k zhiyaye ɓu̱ tabar ndukiku nang, ku̱me meeni qaandi ɓaanda kunung su̱yen ndu̱ nga yang ɗye zu̱m kha wor ɓa. 3Mbu̱ nga ze wor za ku̱ ɗu̱ ku kaari ndu̱ meeri nang ɓu̱ ɗu̱ma ku ɓa ku̱me nduki a nje chele ɓaanda nu̱ ɗa ɓa ki ku ɓakh.”
4Tu̱ nu̱ mburi nda kwa tlogha yenda za, “Chem kaa gwa ɗye zu̱mndi nu̱ke kaa gamaki zu̱mndi ye tabar nduki nu̱ mbu̱ gaari nang fu̱na?”
5Tu̱ Yesu zham wor za, “Ɓurti tolir kim kya khaa nwa?”
Tu̱ ze nda ku za, “Wor mut.”
6Tu̱ yang ze ndukyang za ku̱ kha gha ku yaghai. Nu̱ daki ɓu̱rti tolir mut ndang, tu̱ kuna Magham ku̱men, tu̱ ɓakhla nu̱ gha tu̱ ku̱s vu̱rtan ye nu̱ mburindakwang ma ku̱ shakh ye ndukyang. 7Yurvi pichichindi a nje kha wor koɗom yang nu̱ kunaki Magham ku̱men, kom tu̱ zu̱ za ku̱ shakh ye ndukyang tu̱k. 8Tu̱ zu̱m ku tu̱ mbu̱ wor zhi ku̱tl. Nu̱ tabaki ɓeenan nu̱ khakyang, tu̱ gwa wa nyel kang mut, 9Yang nduki nu̱ zu̱mki ɗye zu̱mnda wa khu̱l du̱pu vat ku, kom tu̱ ze wor za ku̱ ɗu̱ ku laya. 10Fan ndu̱ fan tu̱ vi nu̱ mbu̱ du̱mbu̱l ɗyim su̱yen ndu̱ nu̱ mburi nda kwang tu̱ ɗu̱ mbu̱ ghai Dalmanuta.
Kalar ɗye Saidu
(Mat 12:38-42; 16:1-4; Luk 11:29-32)
11Tu̱ Pariseku a ɓa she Yesu tu̱ nggaasi keele ndu̱ chin a buuri nda ku za ku̱ shi ɗye lazham nggur nu̱ke kaa khaki maa ɗye saidu nggur ye wor nu̱ ɗa viki viɗi. 12Tu̱ Yesu shi ghu̱lu̱pti maɗyi dong kom tu̱ ze wor za, “Nu̱m saki tu̱ nduki nu̱ qaandi virkir nang ki gang ɗye saidu shoɗa? Zhire nga zu̱ran ye nu, a ma wut ɗye saidu nggur ye nduki nu̱ qaandi virkir nang ɓa.”
13Tu̱ yang njig ndukyang nu̱ ye maarang kom tu̱ vi nu̱ mbu̱ du̱mbu̱l ɗyimang tu̱k tu̱ dlan dam fara.
Yis ɓu̱ Parisekwang ndu̱ ɓu̱ Khiridus
(Mat 16:5-12)
14Yang nu̱ mburi Yesu kwang wa mona nu̱ ɗa da ɗye zu̱m ku ɓa kope ɓurti tolir da nu̱ke a mbu̱ du̱mbu̱lang. 15Tu̱ Yesu wu wor za, “shi ma khangkal tun ku̱r vaanu ndu̱ yis ɓu̱ parisekwang ndu̱ ɓu̱ Khiridus.”
16Tu̱ yang nu̱ mburindakwang vi ma zu̱ran ku ye yen za, “Woɗye zu̱ wanang ku̱me ɓurti tolirang a nje khaarem ɓa nda mu?”
17Nu̱ daki mbu̱ ɓalar nu̱ke a shiran kwa tu̱ ze wor za, “Nu̱m saki tun a ɓalar ɗyine song ɓurti tolir ɓanwang na? Alapa maa meeni nun daa mban ɓa? Yang nun gwa mban zum ɓa? Tun nu̱ kaku̱ɗakh memu̱na mu? 18Yitinwang nu̱ nar maa de? Dlu̱mndinwang nu̱ tu̱kti maa de? Alapa tun ɓu̱ kor ɓa? 19Sarchi nang shakki ɓurti tolir qurmun ye nduki du̱pu qurmun ndang, ɓurti tolir nu̱ khaki nyel kya kang kima?”
Tu̱ tlogha yenda ku za, “Kang gwaanggu̱m rap.”
20“Yang ɓurti tolir mutndi nang shakki ye nduki du̱pu vat nda ɗa? Ɓeeni ɓurti tolir nun tabakyang nyel kya kang kima?”
Tu̱ tlogha yenda ku tu̱k za, “Kang mut.”
21Tu̱ ze wor tu̱k za, “Yang nu̱m saki nun daa mbu̱ ɓalar ɓang ɓa?”
Yesu wa Shaana Pugum nggur mbu̱ Basaida
22Tu̱ Yesu ɗu̱ mbu̱ ghai Besaida, tu̱ yang ɗa ɓa ndu̱ pugum nggur yenda tu̱ khuti nda ku za ku̱ su̱ɓa nda ku̱ shaana. 23Tu̱ Yesu khuɓ khar pugumang tu̱ ɗu̱ ndu̱ chin qu̱rse ghayang. Nu̱ koɗki nyakhti nu̱ ve yiti pugumang, tu̱ su̱ɓa nda ndu̱ kharan tu̱ zham nda za, “Ta na ɗyinggur mu?”
24Nu̱ pugumang daki ɗyinan nu̱ viɗi, tu̱ tlogha za, “Ngaa na nduki wa qu̱farku nu̱ kya yiri.”
25Tu̱ Yesu gaɓ tu̱ su̱ɓa yiti khuskyang. Tu̱ pugumang shi nggu̱ti njang, tu̱ yitanang shaana, tu̱ nggaasi na nduki mbari. 26Tu̱ Yesu ze nda za ku̱ ɗu̱ kaari, yang ku̱ mbu mbu̱ ghayang ɓa, kom ku̱ ze aaki mbu̱ ghayang zum ɓa.
Biturus wa Saida za Yesu ke Masiya
(Mat 16:13-20; Luk 9:18-21)
27Tu̱ Yesu ndu̱ nu̱ mburindakwang vi tu̱ ɗu̱ ku mbu̱ ghaiku ɓu̱ Kaisariya Filipi, a mbu̱ yir ku tu̱ Yesu zham wor za, “Woɗye ndukyang a zu̱ran za nga ki kwa?”
28Tu̱ tlogha yenda ku za, “Ɓeeni ndukyang a zu̱ran ku za to ke Yokhana nu̱ baptisma, ɓeenan za to ke annabi Iliya, yang ɓeenanku wa maita za to da chele ɓu̱ annabiku.”
29Tu̱ yang zham wor za, “Yang ɓaanu tun a zu̱ran za nga kiya?”
Tu̱ Biturus tlogha yenda za, “To ke Masiya Kuji Gwaanji Datkandi.”
30Tu̱ yang Yesu dut dlu̱mndi wor za ku̱ ze aaki ku ɓa.
Yesu wa Zu̱ Pooni Mu̱ti ndu̱ Jiiri mbe Mu̱ti nu̱ke Chin a ma Shiran
(Mat 16:21-28; Luk 9:22-27)
31Tu̱ Yesu nggaasi shogar ye wor ɗyine varan za, “Yi ɓu̱ nduk kaa za bonye zum zum, tu̱ dle gume ɓu̱ nduki, ndu̱ kuruku rututundi ndu̱ Maalu̱m Taurete ku zhang nda. Tu̱ tlagha nda nu̱ gha, yang ye qaandi nu̱ kunung kaa ji mbe mu̱ti.”
32Yang zu̱ ɓalar nang ye dalangi, tu̱ Biturus qaandan konggol tu̱ nggaasi dakhla nda ku̱men.
33Yang nu̱ Yesu mbu̱mki tu̱ nggu̱t nu̱ mburi nda kwang, tu̱ wu Biturus a zu̱ran za, “Gol gha ya fan, to Sheɗan. Ku̱me kwaari ɓa ɗya ɓu̱ nduku, no ka shi pooni kwaari wa ɓu̱ Magham ɓa.”
34Nu̱ Yesu qaki nduki su̱yen ndu̱ nu̱ mburindakwang nu̱ she nda, tu̱ ze wor za, “Kap njif nu̱ke a shim mburi nga, kope wa njig tlu̱nar shimndi memu̱naran dong, tu̱ da qu̱far kaatli ɗyinan tu̱ mburi nga si. 35Aaki shimki ɗana nyifi ɓaran, ka mbu̱ɗ nyifirang, yang kap njif nu̱ mbu̱ɗki nyifi ɓaran ku̱me nga ndu̱ labar mbarkandang, a shi kya ɗana nyifirang. 36A fu̱nke boote ni mbu̱ nduk wa gwa larji kap tu̱ yang mbu̱ɗ nyifi ɓarana? 37Woɗye nduk kaa paata nyifi ɓaran ndu̱ nu̱ma? 38Aaki tu̱kki kawar ɓanga, ndu̱ kawar wopar ɓalar ɓanga, mbu̱ qaandi virkir malkandi nu̱ song zhire ndu̱ khang solar kunang. Yi ɓu̱ nduk tu̱k kaa tu̱k kawar ɓaran mbu̱ aa ɓa mbu̱ zhaaji ɓu̱ Zhinkirang ndu̱ ɓu̱ nu̱ ru̱kti ku shakhshakhndi ɓu̱ Magham.”
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016
