Markus 7
7
Nu̱ Mburi me Ghai ɓu̱ Zhikankirku
(Mat 15:1-9)
1Pariseku ndu̱ ɓeena Maalu̱mku nu̱ shogar Taurete ɓar nu̱ ɗa viki ku Urshalima tu̱ ɗa ɓa ku she Yesu. 2Tu̱ yang na ɓeena nu̱ mburi Yesu ku a zu̱m ɗye zu̱mndi ku ware shiɓti khar. 3Ɓu̱ Pariseku ndu̱ Yakhudeku nu̱ka zu̱m ɗye zu̱m ku ɓa kope wa shiɓ khar wor nu̱gha mbari dong, ku̱me nang ke me ghai ɓu̱ zhikankir ku ɓaanda. 4Mbu̱ aa gaɓ ku goma, nu̱ka zu̱m ɗye zu̱m ku dong ɓa kope wa shi wurti ku. Ɓeena me ghai kwa nje khang tu̱k nu̱ka mbuki ku wa shiɓti du̱ɓaku ndu̱ kayangku, ndu̱ duuli nu̱ shiki ndu̱ vi.
5Ku̱me nang tu̱ Pariseku ndu̱ Maalu̱m Taurete kwang zham Yesu za, “Nu̱m saki nu̱ mburorkwang nu̱ka shiɓ khandan gha ma zu̱m ɗye zu̱mndi ku̱me ku̱ khutlo me ghai ɓu̱ zhikanerem kwang ɓa?”
6Tu̱ tlogha ye wor za, “Ɗyi nu̱ Annabi Yishaya zu̱ki nu̱ ɗyine nwa wa khansi tun nu̱ tlu̱nar nar yiti ku!”
Baa wa nu̱ bu̱laki za,
“Nduk nang a gor dlu̱ma ku ve me wora,
yang memu̱na wor ɓakh ndu̱ ngaa.
7A ghar ghai ya ku ba bam;
ku̱me a shoga kya me ghai
ɓu̱ nduki ɓar ku,
yang tu̱ka zu̱ za ɗya ɓalar ɓu̱ Magham.”
8“Tun wa zhang wopar nu̱ Magham zu̱ki gha, tun a khutlo me ghai ɓu̱ nduki. Wa shiɓti kayangku, ndu̱ ɗyekhtiku, ndu̱ ɓeena ɗyiku khang nun kaa shiki.”
9Tu̱ ze wor tu̱k za, “Wanang ni, tun wa zhang ɓalar ɓu̱ Magham gha ku̱me khutlo nu me ghaiku ɓaanu.”
10Jiwa Musa wa zu̱ za, “Vu̱rna zhaaji ye mankir ɓaaro ndu̱ zhinkir ɓaaro.”
Yang tu̱k, “Njif nu̱ pu̱zki man ndu̱ zhin, ku̱ tlagha nda nu̱ gha.”
11Yang tun wa ka zu̱ za, “Ku̱ nduk shaata man ndu̱ zhin ɓa, aa mbu̱ bonyeku. ‘Aa nu̱ke wa shipa tu̱ga ku̱ shaata wora nun za kaa ɗu̱ma zu̱ran za chin wa kar chin vu̱r ɗyin khaa nda bar ye Magham.’ 12Nang ke njiv nun kaa nggu̱tlki nda ndu̱ shaatar man ndu̱ zhin. 13Tun wa ka gaɓ nu̱ ɓalar ɓu̱ Magham ma aa nu̱m ɓa nu̱ ku̱nshe me ghai nun kaa shogaki ye qusonggi ɓaanu, kom ndu̱ ɓeena ɗyiku khang nun kaa shiki.”
Ɗyi nu̱ka Su̱bu̱rki Nduku Gume Magham
(Mat 15:10-20)
14Nu̱ Yesu qaki ndukikwang khang nu̱ gume nda tu̱k, tu̱ ze wor za, “Tun kap gwa ma dlu̱mdonu ya mbari, tun daa mbu̱ ɗyi nu̱ke ngaa ma zu̱ran ye nu. 15Tun a nje ka viki nu̱ mbe nduku nu̱ke ka su̱bu̱rki nda ɓa, kope ɗyina viki mbe nduk ka su̱bu̱rki nda gume Magham.”
16Kap nu̱ dlu̱mndi tu̱kti maa ku̱ tu̱kki.
17Nu̱ njigki ndukyang tu̱ vi nu̱ kaari, tu̱ nu̱ mburi nda kwa zham nda za ku̱ zu̱ mbu̱ ku̱rti ɓalarang ye wora. 18Tu̱ tlogha ye wor za, “Alapa nun daa mban tu̱k ɓa? Nun zu̱n nu̱ ɗyine ɗyi nu̱ viki nu̱ mbu nu̱ka su̱bu̱r nduk gume Magham ɓa? 19Ku̱me nu̱ vi nu̱ mbu̱ memu̱naran ɓa, yang vi kya nu̱ ve mban, yang ka ɓa nggin nu̱ yaghai. Yesu zu̱ nang ma wutan ye nduki za, aanyi ɗye zu̱m mbari, nduk kaa ɗu̱ma zu̱mndan.”
20Tu̱ zu̱m guma ndu̱ ɓalarang za, “Ɗyi nu̱ ɗa viki ɓar mbe nduk ka su̱bu̱rki nda gume Magham. 21Ku̱me kwaari malkandi kap ka ɗa vi mbu̱ memu̱na nduku, wa laɓti nusu ndu̱ khusku bam bam. Khu̱rti ndu̱ khuski ndu̱ nokhzi ɓu̱rkandi, zawar ndu̱ muuru, tlaghar mu̱ti ndu̱ laɓti nusu bam bam. 22Kom ndu̱ khape ndu̱ mu̱nari ndu̱ kotame ndu̱ kwari shimndi zawar ndu̱ zhiri ndu̱ su̱bu̱rti dlu̱m, ndu̱ gwaari ɗyin ndu̱ me nggu̱bu̱ng. 23Ɗyi malkandiku nang kap kaɗa vi mbe nduku tu̱ su̱bu̱rti nda nu̱ gha gume Magham.”
Maito nu̱ Nokhzi nggur Shiki
(Mat 15:21-28)
24Tu̱ Yesu njig ye maa nu̱ke a sang tu̱ ɗu̱ ku nu̱ bing ndu̱ Taya ndu̱ Sidon tu̱ zhur nu̱ mbu̱ rafti ngguri nu̱ke nu̱ shim ku̱ aaki zu̱n ɓa. Yang kap ndu̱ nang nu̱ shi tuka ɓa. 25Fan ndu̱ fan nu̱ nokhzi nggur nu̱ke khu̱kheeti malkanda mbe woi ɓaran ye nusu tu̱kki labar ɓaran, ta ɓa tu̱ nggu̱ɗ nu̱ yaghai gume nda. 26Yang me ghai ɓu̱ nokhzang ɗya Gu̱rik, kha nda Finikiya mbu̱ dlar ghai Suriya. Tu̱ nokhzang khuɗ Yesu za ku̱ shakh woi ɓaranang ndu̱ khu̱kheetang.
27Tu̱ Yesu ze nda za, “Njig ku̱ qusonggyang zu̱m tu̱ mbu̱ wor zhi dong ku̱me nu̱ shipa ku̱ da ɗye zu̱mndi ɓaandang tu̱ vu̱r ye yiɗaku ɓa.”
28Tu̱ nokhzang tlogha ye Yesu za, “Wanang ni, yang kap ndu̱ nang, Zhinerem gwaanji yiɗakwang wa ka gwa ɓeena ɗye zu̱mndi nu̱ ku̱ɗbaki me khar qusonggyang ye maa zu̱mndi ɗye zu̱mndi ɓaanda.”
29Tu̱ Yesu ze nda za, “Ɗu va kaari, khu̱kheetang wa shakh ndu̱ woi ɓarang ku̱me ɓalar no zu̱ki nang.”
30Nu̱ gaɓki nu̱ kaari, tu̱ ɗa gwa ye nokhzang qaandan ɗyin gaanggiri, yang khu̱kheetang wa vi ɓar mbe nda.
Yesu wa Shaana Tuurang ngguri
31Tu̱ Yesu njig ghai Taya tu̱ peeta mbu̱ Sidon tu̱ ɗu̱ me ɗyim chitndi nu̱ Galili, tu̱ peeta tu̱ ɗu̱ bing ndu̱ dlar ghaiku gwangndi nu̱ka qaki wor za Dikapolisang. 32A far ta ɓa ndu̱ tuurang nggur nu̱ke nu̱ka ɗu̱ma ɓala mbar ɓa, tu̱ khuti nda ku za ku̱ su̱ɓa nda ma ku̱ shaana.
33Tu̱ Yesu ɗu̱ ndu̱ njifang konggol ye maa nu̱ke nduk nje ɓa, tu̱ sa ye kharanku nu̱ mbu̱ dlu̱mndan tu̱ koɗ nyakhti tu̱ su̱ɓa ghiindan. 34Kom tu̱ ghar yitan nu̱ viɗi, tu̱ miishekep tu̱ zu̱ za, “Epata” mban za, “Qu̱nu.”
35Fan ndu̱ fan tu̱ dlu̱mndan qu̱ni, tu̱ ghiindan kwatli, tu̱ shi ɓala mbari.
36Tu̱ yang Yesu wu wor za ku̱ ze aaki ɓa, yang wu wor nu̱ shikya tu̱ kha wa a zu̱kya ye wor za ku̱ shaata zu̱ran ye nduki. 37Tu̱ ndukyang shi lazham wa nu̱m gom, a zu̱ran ku za, “Kap ɗyi nu̱ shikya mbari! Ku̱me wa ka sa tuurang tu̱ tu̱k ma tu̱ meɗum shi ɓala.”
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016
