Markus 14
14
Dlegumeku wa Shi Sawari Tlagha nda Yesu
(Mat 21:1-5; Luk 22:1-2; Ykh 11:45-53)
1Wa njig kya qaandi rap ma ku̱ tabar peetar ɗyin ndu̱ tabar ɓurti tolir nu̱ke yis su̱ ɓa a khu̱dli. Yang kuruku rututundi ndu̱ Maalu̱m Taurete kwang nggu̱t njiv nu̱ke wor ka ku̱ski Yesu mbu̱ tuka, ku̱me tlagha nda nda nu̱ gha. 2Tu̱ yang zu̱ ku za nu̱ shipa ku̱s nda nda ye fu̱ɗar tabarang ɓa, ku̱me a sawa ku̱ ndukyang dakhla wor ɓa.
Wa Pasha Mor nu̱ Zhi Mu̱nkandi ye Yesu
(Mat 26:6-13; Ykh 12:1-8)
3Nu̱ Yesu ɗu̱ki Betani, tu̱ ɗu̱ mbu̱ rafti ɓu̱ khuski nggur nu̱ka qaki nda za Siman nu̱ khaati gwaanji. A mbu̱ zu̱mndi ɗye zu̱mndi tu̱ nokhzi nggur a vi nu̱ mbu̱ raftang ndu̱ kulur nggur nu̱ shiki ndu̱ ndogdi alabasta yang kulurang nyeedlan ndu̱ mor me mu̱zhindi khang maɗyi ku̱me shi morang ndu̱ nad me ɗyinan.#14:3 Nad Ɗya mor nggur nu̱ka jiɗki ve qu̱far nggur nu̱ka gwaki Indiya. Zhiran mu̱n maɗyi. Yang mu̱zhin su̱, Tu̱ nokhzang wul kulurang nu̱gha tu̱ zu̱ morang nu̱ mbu̱ ɗyin Yesu.#14:3 Alabasta Ɗya pooni ndogdi nggur tu̱ka koɗma ɗye zu̱r mor zhiran mu̱nkandi nu̱ mban shipar jenjel.
4Tu̱ ɓeena nduki nu̱ke a nje shokhna za, nu̱m saki tu̱ su̱bu̱r mor nang nu̱gha bama? 5Ai tu̱ga wa masa mor nang ɓar, mu̱zhindan ka khu̱l ɓiiri nu̱ tlu̱nar me qaandi won kunung, ta na ka ɗu̱ma vu̱r mu̱zhindang ye nu̱ nungndiku. Tu̱ dakhla nokhzi nang ku maɗyi.
6Tu̱ yang Yesu zu̱ za, njig ma nda, nu̱m saki tun a damta nda? Ai shikya ɗyi mbarkandi ya. 7Ku̱me nu̱ nungndiku a nje su̱yen ndu̱ tunu aakochi, tun ka shi mu̱nkir ye wor sarchi nun shimki, yang nga su̱yen ndu̱ tun aakochi ɓa. 8Wa shi komkomi maɗyi ku̱me wa pasha mor ye vara maa daasa par mu̱ti ɓanga. 9Zhire ngaa zu̱ran ye nu, kap ye maa nu̱ke a ma wopa labar mbarkandi nang mbu̱ larji, nduki ka zu̱ ɗyi nu̱ nokhzi nang shiki ma kwaari nda.
Yakhuda wa Tlogha za Chin ka Masa Yesu ɓara
(Mat 26:14-16; Luk 22:3-6)
10A nje a nje tu̱ Yakhuda Iskariyoti da chele gwaanggu̱m rap ndang ɗu̱ she kuruku rututundi kwang ma masa Yesu ɓar ye wora. 11Nu̱ tu̱kki wanang tu̱ kasha ku maɗyi, tu̱ tlogha ku za wor kaa vu̱r mu̱zhindi yenda. Tu̱ Yakhuda laɓ njiv nu̱ke chin ka masaki nda ɓar waare damta.
Yesu wa Zu̱m ɗye Zu̱mndi Tabar Peetar ɗyin ndu̱ Pudekwang
(Mat 26:17-25; Luk 22:7-14, 21-23; Ykh 13:21-30)
12Fu̱ɗar nu̱ gumapaali, ɓu̱ tabar ɓurti tolir nu̱ke yis su̱ɓa, nang ke fu̱ɗar nu̱ka dlaki qur gamndi sadke ma tabar peetar ɗyinang. Tu̱ nu̱ mburi nda kwang zham Yesu za, “Ta shim daasa mi ɗye zu̱mndi paskyang yor nu̱ fu̱na?”
13Tu̱ Yesu ru̱k rap chele ɓu̱ nu̱ mburindakwang, tu̱ ze wor za, “Ɗu̱ ma mbu̱ ghayang, khuski nggur nu̱ ɗa daki duuli dar ɗyim ka gwa nu, tun mbu gaanje nda. 14Rafti nu̱ viki nu̱si kap, tun ze nu̱ raftang nun za, ‘Maalu̱m a ru̱kki rem za a fu̱n ke kib nu̱ke chin ka zu̱mki ɗye zu̱mndi tabar paskyang ndu̱ nu̱ mburindakwang na?’ 15Ka wuɗ du̱ndi dangkali gwaanji nggur ye nu, nu̱ke kiba a nje ve maa nu̱ viɗang, yang mbanang kwaɗaran tun daasa maarang nu̱gha yerem.”
16Tu̱ nu̱ mburindakwang ɗu̱ mbu̱ ghayang ta gwa ɗyikwang ba wa nu̱ zu̱ki ye wora, tu̱ yang daasa zu̱mndi paskyang nu̱ nje.
17Nu̱ mugdi shiki, tu̱ Yesu ndu̱ gwaanggu̱m rapndang a ɓa ku mbu̱ raftang. 18A mbu̱ zu̱mndi ɗye zu̱mnda ku tu̱ Yesu zu̱ za, “Zhire nga zu̱ran ye nu, nduk da chele ɓaanu nu̱ke chem a zu̱m ɗye zu̱mndi nang su̱yen ndu̱ chin a ma masa nga ɓara.”
19Tu̱ memu̱na wor su̱bu̱r maɗyi, tu̱ yang nggaasi zham Yesu ku ndu̱ da da, a zu̱ran ku za, “Ɗya nga mu?”
20Tu̱ tlogha ye wor za, ɗya ba da chele ɓaanu, tun gwaanggu̱m rapndi nu̱ke tun a sa kha nu su̱yen ndu̱ nga mbu̱ du̱ɓ nang. 21Yi ɓu̱ nduk a ma mu̱ti ba wa nu̱ bu̱laki yang njif nu̱ masaki nda ɓar ɗya ɗye zhiyaye, kuzhom tu̱ga nu̱ kha nda ɓa.
Ɗye Zu̱mndi ɓu̱ Zhinerem gwaanji
(Mat 26:26-30; Luk 22:15-20; 1Kor 11:23-26)
22A mbu̱ zu̱mndi ɗye zu̱mnda ku tu̱ Yesu da ɓurti tolirang tu̱ sa barke nu̱ si, tu̱ ɓakhla nu̱ gha, tu̱ vu̱r ye wor za, “Dlu̱ma nang ɗya manvara.”
23Nu̱ daki ɗyekhtang tu̱ kuna Magham, tu̱ vu̱r ye wora, tu̱ za ku kap ɓaanda.
24Tu̱ ze wor za, nang ke tom ɓang nu̱ mewar alqawar nu̱ke a ma mbu̱tan ku̱me nduki khang.#14:24 Tom ɓang nu̱ mewar alqawar: Zhu tang kaa tlagha kya ɗye ngga tu̱ mbata tomang ma za sola. Yang Yesu wa mbu̱ɗ tom ɓaran ma shiɓ solari. Viri 24:8 25Zhire nga zu̱ran ye nu, nga ma za ɗyim ye qu̱far anap tu̱k ɓa kope fu̱ɗar nu̱ke ngga zaki mewakandi mbu̱ kwaaɗar ɓu̱ Magham.
26Gaanje wa qa taaziku, tu̱ ɗu̱ ku ɗyin Dleng qu̱far Zaitun.
Biturus ka ɓa Keela za nyin Zu̱n Yesu ɓa
(Mat 26:31-35; Luk 22:31-34; Ykh 13:36-38)
27Tu̱ Yesu ze wor za, kap ɓaanu tun kaa ɗa vaanu tun njigti nga baa wa nu̱ bu̱laki nu̱ gha za,
“Ngga ghwaɗ nu̱ khutlorang,
ndu̱ɓang kwa yang ka lakhta vaanda.”
28Yang mbu̱ nga ji mbe mu̱tang ngga kaya nu ma yir Galili.
29Tu̱ Biturus zu̱ yenda za, “Aa wa ɗa vaanda kap tu̱ njig toro, nga ma njig to ɓa.”
30Tu̱ Yesu ze nda za, “Zhire nga zu̱ran yoro, ba meeni mbu̱ virkir nang, to ka keela zu̱ndi nga sar kunung me ku̱ koogurokh shi mbari sar rap.”
31Tu̱ yang Biturus mata ɓalarang ndu̱ du̱mbu̱r a zu̱ran za, “Aa ka tlagha nga, sar da ngam ɓu̱ keela za nang zu̱ndor ɓa.” Yang kap ɓaanda wa zu̱ ku ba wanang tu̱k.
Yesu wa Shi Barari mbu̱ Dam Gesemani
(Mat 26:36-46; Luk 22:39-46)
32Tu̱ ɗu̱ ku Gesemani. Tu̱ Yesu ze nu̱ mburindakwang za, “Kha ma gha fan nga yir ma barari.”
33Tu̱ qa kya Biturus ndu̱ Yaqub ndu̱ Yokhana, tu̱ ɗu̱ ku su̱yen. A nje a nje, tu̱ Yesu damta mbu̱ memu̱naran maɗyi maɗyi. 34Tu̱ ze wor za, “Nga damtaran mbu̱ memu̱nara maɗyi nu̱ke ngaa tu̱ktan wa ngga mu̱ɗi. Ching ma gha fan tun shi buuri.”
35Nu̱ songki nu̱ guma koɗom, tu̱ nggu̱ɗ nu̱ yaghai tu̱ shi barar za, mbu̱ kaa shi ku̱ Magham da sarchi bonye nang ɓar yenda. 36A zu̱ran za, “Aba, Zhinkir ɓanga, to kaa ɗu̱ma shi aa nu̱m, do ɗyekhti bonye na ya ɓar ɓa, yang kap ndu̱ nang, shi na shimndi ɓang ɓa, ku̱ shimndi ɓaa khan guma.”
37Na gaɓki tu̱ gwa nu̱ mburi nda ku wor kunung ndang a ɗyenir ku, tu̱ ze Biturus za, “Siman ta ɗyeni mu? Alapa tom ɓu̱ shi buuri aa me awe da ɓa? 38Shi ma buuri tun shi barari ku̱me nggu̱ɗ nun mbu̱ lambarku ɓa. Memu̱nara wa da ya, yang vara nu̱ dlu̱ ya ɓa.”
39Tu̱ gaɓ tu̱k tu̱ shi barari a maata pitli nu̱ zu̱ki gumapaalyang. 40Na gaɓki tu̱k, tu̱ gwa wora ɗyenirku. Ku̱me yiti wor wa shi taɗa, yang nu̱ gwa ɗye zu̱r yenda ku ɓa.
41Na gaɓki nu̱ kunungan, tu̱ ze wor za, khar leendang tun a ɗyeniri ndu̱ maasi? Maaran wa woɗa! Sarchi wa shi nu̱ke a ma vu̱r Yi ɓu̱ nduk nu̱ mbu̱ khar nu̱ solar ku. 42Ji ma chem ɗi ku̱me wonji nu̱ vu̱rti nga ɓara a khu̱dli.
Wa Ku̱s Yesu
(Mat 26:47-56; Luk 22:47-53; Ykh 18:3-12)
43A mbu̱ ɓalarang, tu̱ na Yakhuda nu̱ke ɗya da chele gwanggu̱m rap ndang. A ɓa su̱yen ndu̱ nduki khang khubtan ku ndu̱ kaskar ku ndu̱ saɓirku. Ku̱me kuruku rututundi ndu̱ Maalu̱m Taurete ku ndu̱ nduk kudaandi a ru̱kki wora.
44Yang Yakhuda nu̱ke a ma vu̱r nda ɓara wa tlaɗ ku ndu̱ wor za, “Njif nang khaapaki nda chele ɓaanda ɗya chin, ku̱s ma nda mbari tun ɗu̱ ndu̱ chin.”
45Ɓar ɓu̱ Yakhuda ke shar, tu̱ peeta she Yesu a qa nda za, “Zhinkir gwaanji, Zhinkir gwaanji, tu̱ khaapa nda.”
46Tu̱ ndukyang ku̱s Yesu ku, tu̱ khuɓ nda. 47Tu̱ da chele ɓu̱ nu̱ mburindakwang fed kaskar ɓaran tu̱ ku̱m maavi ɓu̱ gorkir ɓu̱ kurukwang ve dlu̱mndan tu̱ ku̱rta nu̱ gha.
48Tu̱ Yesu ze wor za, “Nu̱m saki tun a vi ndu̱ kaskar ku ndu̱ saɓirku wa tun a ɓakya ma ku̱s nu̱ muura na? 49Ai aakochi ngaa su̱yen ndu̱ tunu mbu̱ Rafti ɓu̱ Magham, nga shogar ye nu yang nun ku̱si nga ɓa, yang wa ku̱s ku̱ bu̱lar ɓalar ɓu̱ Magham nyedli.”
50Ba nje, tu̱ nu̱ mburi nda kap njigti nda tu̱ ɗa vaanda.
51Yang nyakhtlir nggur a nje nu̱ke ɗya nu̱ mbu Yesu tu̱k, yang nu̱ sa luku ɓa, lu̱pakya varan nu̱gha ndu̱ kapar linen ɗyenda. Nu̱ ndukyang jiiki ma ku̱si nda, 52tu̱ njig kapar linenang nu̱ mbu̱ khar ndukyang tu̱ ɗa varan san nggaran.
Wa Ɗu̱ ndu̱ Yesu Gume Sankhedu̱rin
(Mat 26:57-68; Luk 22:54-55, 63-71; Ykh 18:13-14, 19-24)
53Tu̱ ɗu̱ ndu̱ Yesu gume gorkir ɓu̱ kurukwang, tu̱ kuruku rututundi, ndu̱ dlegumeku, ndu̱ Maalu̱m Taurete kwa taba nu̱ nje. 54Tu̱ yang Biturus mbu gaanje Yesu ɓakh ndu̱ chin, maa yir patle ɓu̱ gorkir ɓu̱ kurukwang. Tu̱ kha gha wudle ɓai a tu̱ku̱ndan ku su̱yen ndu̱ nu̱ nggu̱ti Rafti ɓu̱ Magham kwang.
55Tu̱ kuru rututundi kwa ndu̱ ɓeena Sankhedu̱rin laɓ saidu nu̱ke wor kaa vu̱rki ma ku̱ tlagha Yesu nu̱ gha nu̱ gwaku ɓa.#14:55 Sankhedu̱rin Tabar padawe ɓu̱ dlegumeku, ndu̱ Maalu̱m Taurete ku, ndu̱ nu̱ shogar Taurete ɓar ye nduki. Kuru gwaanjang ke dle gume ɓaanda. Wor ɗyinmut ku. 56Yang ba ndukikwang nje ku khang nu̱ zu̱ki saidu kotame nu̱ ɗyine nda, yang me wor nu̱ kha da ɓa.
57Gana fan, tu̱ nduki nggur ji tu̱ zu̱ saidu kotame nggur ɗyine nda za, 58“Chem wa tu̱kki a zu̱ran za, chin ka gu̱ɗa Rafti ɓu̱ Magham nu̱ nduki du̱nki nang nu̱gha. Chin du̱n nggur nu̱ke ɗya nduk du̱nki ɓa, mbu̱ qaandi kunung ɗyenda.” 59Yang kap ndu̱ nang, nu̱ me wor kha da ɓa.
60Tu̱ yang gorkir ɓu̱ kurukwang ji tu̱ ching gha chele ɓaanda tu̱ zham Yesu za, “Tom ɓu̱ tlogha de? Saidu nu̱ke a vu̱rtan nu̱ ɗyinorang ɗa?”
61Tu̱ yang Yesu kha varan gha yit, nu̱ tlogha aa nu̱m yenda ɓa. Tu̱ gorkir ɓu̱ kurukwang gaɓ tu̱ zham nda za, “Woɗye to ke Masiya Yi ɓu̱ nu̱ barkya mu?”
62Tu̱ Yesu tlogha yenda za, “Ɗya nga, yang tun ka na Yi ɓu̱ Nduk kharan ve bu̱n zu̱me ɓu̱ nu̱ Zalale kap, a ɓar ɗyin ku̱zaptiku nu̱ viɗi.”
63Tu̱ gorkir ɓu̱ kurukwang ɓyakh lukti ɓaran nu̱gha mbe shokhna tu̱ zu̱ za, “Tun a shimkya nyi pooni saidu tu̱ka? 64Tun wa tu̱k ndu̱mndi nu̱ shiki ye Magham. Tun na kima?”
Tu̱ kuma ku kap za, “Wa shipa ku̱ tlagha nda nu̱ gha.”
65Tu̱ ɓeena ndukyang nggasi koɗ nyakhti nu̱ ve nda, tu̱ gu̱n mbi yitan yenda nu̱ gha, a ɓu̱tli nda ku, a zu̱ran za, “Zu̱ njif nu̱ ɓu̱tlkirang yerem.”
Tu̱ nu̱ nggu̱ti kib ɓu̱ Maghamang ku̱s dlabti nda ku.
Biturus wa Keela za nyin Zu̱n Yesu ɓa
(Mat 26:69-75; Luk 22:56-62; Ykh 18:15-18, 25-27)
66Yang ɓu̱ Biturus a vu̱ghai ye dalang nu̱ke a mu̱na raftang. Tu̱ wonkhar nggur chele ɓu̱ nu̱ tlu̱narku ɓu̱ gorkir kurukwang, a ɓa she wora. 67Ba nu̱ naki Biturus a tu̱ku̱n ɓaiyang, tu̱ nggu̱ti nda njang dong.
Kom tu̱ zu̱ za, “To tu̱k ta su̱yen ndu̱ Yesu ye Nazaret!”
68Tu̱ yang Biturus keela za, “Nang zu̱n ɗyi nu̱ke ta zu̱ran na ɓa, yang nang da mban zum ɓa.”
Nu̱ jiiki tu̱ ɗu̱ varan mbu̱ shami, tu̱ koogurokh shi mbaari.
69Nu̱ wonkharang naki nda tu̱k tu̱ ze nduki nu̱ke chingndan ye maaranang za, “Njif nang ɗya da chele ɓaanda.”
70Tu̱ Biturus gaɓ tu̱ keela. Nu̱ shoɓki koɗom, tu̱ nduki nu̱ke a nje chingndan bing ndu̱ Biturusang zu̱ za, “Zhire to da chele ɓaanda ku̱me to ye Galili, aa me ghiindor wa potaro.”
71Tu̱ Biturus nggaasi pu̱zi a ku̱mndari a za, “Sarda nang zu̱n njif nu̱ke tun a ɓalar ɗyine nda nang ɓa.”
72Fan ndu̱ fan tu̱ koogurokh shi mbaari nu̱ rap. Tu̱ yang Biturus kor ɗyi nu̱ Yesu zu̱ki yenda za, “Me ku̱ koogurokh shi mbaari sar rap, to kaa keela zu̱ndi nga sar kunung.” Nu̱ kor ki ɓalar nang tu̱ ngga ghoori.
Currently Selected:
Markus 14: ttrNT
ማድመቅ
ያጋሩ
ኮፒ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016
