Markus 15
15
Wa Ɗu̱ ndu̱ Yesu Gume Nggomna Bilatus
(Mat 27:1-2, 11-14; Luk 23:1-5; Ykh 18:28-38)
1Nu̱ dumaari shiki, tu̱ kuruku rututundi ndu̱ dlegumeku, ndu̱ Maalu̱m Taurete ku, ndu̱ ɓeena nduki nu̱ke a mbu̱ tabarang shi sawari ndu̱ yen. Kom tu̱ gu̱n Yesu gha, tu̱ da nda tu̱ ɗu̱ ndu̱ chin, gume nggomna Bilatus.
2Tu̱ Bilatus zham nda za, “To ke Kuji ɓu̱ Yakhudeku mu?”
Tu̱ yang tlogha yenda za, “Ta zu̱ ndu̱ meero.”
3Tu̱ kuruku rututundi ta ɓa ndu̱ zhaano ɓaran ɗyine ɗyi ku zum zum tu̱ yang kha varan gha yit. 4Tu̱ Bilatus gaɓ tu̱ zham nda za, “Wonji a ɓa ndu̱ zhaano ɓa ku ɗyin ɗyiku khang, yang tom shi ɓala de?”
5Yang, Yesu nu̱ zu̱ aa nu̱m ɓa, tu̱ ɗyinang shi lazham ye Bilatus.
Wa Dla Kumar Mu̱ti ye Yesu
(Mat 27:15-26; Luk 23:13-25; Ykh 18:39–19:16)
6Yang aa nyi sonyi, sarchi tabar peetar ɗyin, Bilatus wa ka ngga nduk da gha nu̱ke a zhaaru̱m nu̱ke ndukyang datki. 7Yang khuski nggur a nje, dlu̱man za Barabas, nu̱ke a nje gu̱ndan zhaaru̱m su̱yen ndu̱ nyeezan nu̱ arbilisi ku ku̱me wor tlaghaki khuski nggur sarchi dakhlar ngguri. 8Tu̱ tabar ndukyang a ɓa a zu̱ran ku za ku̱ Bilatus shi ɗyi nu̱ su̱nki nu̱ shiran ye wora.#15:8 Tu̱ da su̱qur wor nu̱ viɗi. Ɓeeni bu̱larku zu̱ki.
9Tu̱ Bilatus zham wor za, “Tun a shim ngga nga kuji ɓu̱ Yakhudekwang gha ye nu mu?”
10Ku̱me wa zu̱n nu̱ke kuruku rututundang da zhaano ɓu̱ Yesu nu̱ gume nda ku̱me zhiri. 11Tu̱ yang kurukwang sokh ndukikwang za ku̱ zu̱ ku za wora shim ku̱ ngga kya Barabas gha.
12Tu̱ Bilatus zham wor tu̱k za, “Yang ngga shi kya nu̱m ndu̱ njif nun ka qaki nda za kuji ɓu̱ Yakhudekwang na?”
13Tu̱ gha su̱qur wor nu̱ viɗi tu̱k za, “Ku̱ katli nda gha.”
14Tu̱ Bilatus zham wor za, “Ku̱me nu̱ma? Shikya nyi zopa?”
Tu̱ shaata gha su̱qur wor nu̱ viɗi za, “Ku̱ katli nda gha.”
15Yang ku̱me Bilatus a shim mu̱n memu̱na ndukyang, tu̱ ngga Barabas gha. Tu̱ yang shi kurpi ye Yesu, kom tu̱ vu̱r nda ma ku̱ katli nda gha.
Sojeku ɓu̱ Bilatus wa Ndu̱m Yesu
(Mat 27:27-31; Ykh 19:2-3)
16Tu̱ sojekwang ɗu̱ ndu̱ chin mbu̱ sham nggur mbu̱ patle ɓaanda nu̱ka qaki za pu̱ritoriyam, tu̱ qa ɓeena sojeku kap ta ɓa.#15:16 Pu̱ritoriyam Mbu̱ sham ɓu̱ Nggomna Bilatus, maa nu̱ke sojeku ka khaki nu̱ nje. 17Tu̱ sa poona lukti kwaaɗar yenda nu̱ke ɗyiman vyang tu̱ gaɓ tu̱ shi ɗye zhar yenda ndu̱ njekhti tu̱ san mbu̱ ɗyinan.#15:17 Lukti kwaaɗa Ponan nu̱ yelndi ɓa, a shikya mu̱si nda ku. 18Tu̱ nggasi ghar ghai yenda ku a zu̱ran ku za, “Gundi kuji ɓu̱ Yakhudeku.”
19Tu̱ ghwaɗ nda ku ndu̱ saɓiri vu̱ ɗyinan tu̱ koɗ nyakhti ku nu̱ ve nda kom tu̱ kurum gha ku gume nda za wora vu̱r gorki yenda nggwa. 20Nu̱ woɗaki me ndu̱mndi ɓaanda yenda, tu̱ fed lukti vyangndi nu̱ kwaaɗarang ɓar ve nda, tu̱ sa lukti ɓaran yenda, kom tu̱ ɗu̱ ndu̱ chin ku maa kaatli nda gha.
Wa Katl Yesu gha
(Mat 27:32-44; Luk 23:26-43; Ykh 19:17-27)
21A mbu̱ yir ku tu̱ na khuski ngguri a peetari dlu̱man za Siman nduk Sariyan, zhin Alekhzanda ndu̱ Rufus a ji mbu̱ gure ngguri, tu̱ ranna nda tu̱ da qu̱far kaatlang. 22Tu̱ ɗu̱ ndu̱ Yesu ku ye maa nggur nu̱ka qaki za Golgota, mban za ye ma qu̱tli du̱ɓ ɗyin. 23Tu̱ vu̱r ɗyim anap nu̱ longgaki nu̱ gha ndu̱ mur yenda ye maaran, tu̱ yang zhang zaran gha.#15:23 Mur Ɗya ɗyim kuzhi nu̱ka saki longgume ye khaati. 24Nu̱ katlki nda gha, tu̱ shakh luktiku ɓaran nu̱ chele ɓaanda, tu̱ shi palam ge tombol ku ku̱me ku̱ zu̱n ɗyi nu̱ke aaki kaa gwaki.
25Katl nda gha vi mu̱dlam nu̱ dumaari. 26Tu̱ bu̱la ɗyi nu̱ daki zhaano ku ɓaran ɗyinanang nu̱ ve qu̱far kaatlang za, “Kuji ɓu̱ Yakhudeku.” 27Tu̱ katl nu̱ muuriku rap gha su̱yen ndu̱ chin, da a yin bu̱n ɓaran nu̱ zu̱ma, da a yin bu̱n ɓaran nu̱ gu̱ɗau. 28Nang ke nyedli ɗyi nu̱ lagarkatang zu̱ki za, “Wa shiga nda nu̱ mbu̱ nu̱ zop ku.”#15:28 Wa shiga nda nu̱ mbu̱ nu̱ zop kwa: Ɓeena bu̱lar khar nu̱ zhwang nu̱ sa ɓa. 29Tu̱ nduki nu̱ke a peetari tu̱ ku̱s me ghu̱mndi ve nda tu̱ ku̱s yakhta yin wor a zu̱ran ku za, “Yoori, to nu̱ke to ka ɗu̱ma gu̱ɗa Rafti ɓu̱ Magham nu̱gha, to ɗu̱ma du̱ndan nu̱gha mbu̱ qaandi kunung ɗyenda. 30Ɗono vaaro to ɗa zhur nu̱ yaghai me qu̱far kaatlang ɗo!”
31Kuruku rututundi ndu̱ Maalu̱m Taurete kwang tu̱k wa shi me ghu̱mndi ve nda ku chele ɓaanda a zu̱ran ku za, “Wa ɗana nduki yang wa ku̱na ɗana varan. 32Bu ku̱ Masiya, kuji ɓu̱ Israila, a pu̱r ɓar ɗyine qu̱far kaatli nang leendang, ma nami chem maita nda.”
Aa nu̱ muuriku nu̱ katlki wor gha su̱yen ndu̱ Yesu wa shi maatli ɓalarku yenda.
Mu̱ti ɓu̱ Yesu
(Mat 24:45-51; Luk 23:44-49; Ykh 19:28-30)
33Nu̱ fu̱ɗar chingki nu̱ tala, tu̱ maarang kap za varan zhum, maa yir vi kunung nu̱ mugdi. 34Baa vi kunung ndang tu̱ Yesu da su̱quran nu̱ viɗ maɗyi za, “Eloi, Eloi, lama sabakhtani?”
Mban za, “Maghamndi ɓanga, Maghamndi ɓanga, nu̱m saki to yaɓtang gha?”
35Nu̱ ɓeena nduki nu̱ke a nje chingndanang tu̱kki wanang, tu̱ zu̱ ku za, “A qakya annabi Iliya.”
36Tu̱ nduk da shi ɗari tu̱ ɗa da ndoɗyiri tu̱ yoɓ nu̱ mbu̱ ɗyim ɓeundi, tu̱ san me saɓiri tu̱ zoɓa ye Yesu ma ku̱ za, a zu̱ran za, “Njig ma nda nami mbu̱ Iliya kaɗa ɓa tu̱ zhur nda nu̱ yaghai.”
37Tu̱ Yesu da su̱quran nu̱ viɗi ndu̱ du̱mbu̱r kom tu̱ ngga nyifi ɓaran gha.
38Tu̱ kapar taɗakandi nu̱ke a mbu̱ rafti ɓu̱ Maghamang ɓyakh mban rap, ji viɗi ma yir vu̱ghai. 39Sarchi nu̱ke gorkir soje nu̱ke a nje chingndan wudle Yesu naki pooni mu̱ti nu̱ shikyang, tu̱ zu̱ za, “Zhire njif nang ɗya Yi ɓu̱ Magham.”
40Nusuku nggur a nje chingndan ɓakh a nggu̱tan. Yang Maryam ye Magadaliya ndu̱ Maryam man Yaqub koɗomandi, ndu̱ Yusufu ndu̱ Salomi a nje chingndan chele ɓaanda. 41Nusuku nang a mbu gaanje Yesu ku Galili, a tlu̱nar yenda. Ɓeena nusuku a nje tu̱k na ɓa ki Urshalima su̱yen ndu̱ chin.
Par Mu̱ti Yesu
(Mat 27:57-61; Luk 23:50-56; Ykh 19:38-42)
42Mugdi wa shi, yang ɗya fu̱ɗar daasari, ku̱me vi dumaaran ɗya Fu̱ɗar Maasi ɓu̱ Yakhudeku. 43Tu̱ khuski nggur nu̱ke ɗya da chele nduki nu̱ vu̱rti sawari mbu̱ tabar ɓu̱ Yakhudekwang, nu̱ zhaaji yang a bu kwaaɗar ɓu̱ Magham tu̱k, dlu̱man za Yusufu ye Arimatiya.#15:43 Nu̱ vu̱rti sawari ɓu̱ Yakhudekwang: Wor ke sankhedu̱rin Luk 14:60. Tu̱ shi me khusku. Tu̱ ɗu̱ she Nggomna Bilatus. Tu̱ khuɗ ku̱ vu̱r man var Yesu yenda. 44Tu̱ Bilatus shi lazham nu̱ tu̱kki za tang Yesu wa mu̱ɗi. Tu̱ yang qa gorkir ɓu̱ sojekwang tu̱ zham nda mbu̱ yel Yesu wa mu̱ɗi. 45Nu̱ gwaki zhire ni mbu̱ me gorkir sojang, tu̱ vu̱r man var Yesu ye Yusufu. 46Tu̱ Yusufu masa kapar linen, ta zhur nu̱ man var Yesu yaghai, tu̱ ɗyikhlan nda nu̱ mban, tu̱ khatla gha mbu̱ ku̱jip nu̱ raki nu̱ mbu̱ ndogdang. Tu̱ za me ku̱jipang nu̱gha ndu̱ ndogdi ngguri. 47Yang Maryam ye Magadaliya ndu̱ Maryam man Yusufu wa na ye ma nu̱ khatlaki nda nu̱ si mbu̱ ku̱jipang.
Currently Selected:
Markus 15: ttrNT
ማድመቅ
ያጋሩ
ኮፒ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016
