Marko 11
11
Yesu Yerusalem sɛmi
(Mateo 21.1-11; Luka 19.28-40; Yohane 12.12-19)
1Benɛ a ngɛ Yerusalem sue nɛ a su Betfage kɛ Betania ngɛ Nuyoku ɔ he ɔ, Yesu tsɔ e kaseli ɔmɛ a ti ni enyɔ, 2nɛ e de mɛ ke: “Nyɛɛ ya kɔpe nɛ ngɛ nyɛ hɛ mi haa nɛ ɔ mi. Nyɛ lejɛ ɔ sumi pɛ, nyɛ maa na teji bi nɛ a muɔ lɛ si nɛ nɔ ko nɔ ko hi e nɔ hyɛ; nyɛɛ pɛne lɛ kɛ ba. 3Nɛ ke nɔ ko bi nyɛ ke: ‘Mɛni he je nyɛ ngɛ enɛ ɔ pee’ ɔ, nyɛ de lɛ ke: ‘E he ngɛ Nyɔmtsɛ ɔ hiae, se e be kɛe nɛ a maa kpale lɛ kɛ ba ekohu.’ ” 4Lɔ ɔ he ɔ, a ya nɛ a ya na teji bi ɔ nɛ a muɔ lɛ si ngɛ agbo ɔ nya ngɛ blohu ɔ mi, nɛ benɛ a ngɛ lɛ pɛnee ɔ, 5nihi nɛ daa si ngɛ lejɛ ɔ a ti ni komɛ bi mɛ ke: ‘Mɛni nyɛ ngɛ teji bi ɔ pɛnee ya pee?’ 6Nɛ a de mɛ bɔ nɛ Yesu de mɛ ɔ, nɛ a ngmɛ mɛ blɔ.
7A kɛ teji bi ɔ ba Yesu ngɔ; nɛ a kɛ a tadehi pue e nɔ, nɛ e kuɔ hi e nɔ. 8Nihi fuu kɛ a tadehi ha blɔ ɔ nɔ; nɛ ni komɛ hu po tso kɔnihi kɛ je pu ɔ mi nɛ a kɛ pue blɔ ɔ nɔ. 9Nɛ nihi nɛ nyɛɛ hɛ mi kɛ nihi nɛ nyɛɛ se ɔ wɔ lele ke: “Hosiana! A gbaa nɔ nɛ ma ngɛ Nyɔmtsɛ ɔ biɛ mi ɔ! 10A gbaa wa tsɛ David matsɛ yemi nɛ ma a! Hosiana ngɛ hiɔwe lokoo!” 11Nɛ Yesu sɛ Yerusalem, nɛ e ya sɔlemi we ɔ; nɛ e hyɛ ni ɔmɛ tsuo kɛ kpe, nɛ benɛ je bɔni jɔmi ɔ, e si lejɛ ɔ nɛ e kɛ ni nyɔngma kɛ enyɔ ɔ ho Betania ya.
Yesu gbiɛ ngmɔkɔ tso ɔ
(Mateo 21.18-19)
12E nɔ je na a, benɛ a je Betania kɛ ma a, hwɔ ye Yesu. 13Nɛ e na ngmɔkɔ tso ko ngɛ lokoo nɛ ba ngɛ yi, nɛ e ho ya hyɛ kaa alinɔ e maa na nɔ ko ngɛ nɔ lo. Se benɛ e su he ɔ, e nɛ nɔ́ ko kaa ja ba sɔuu, ejakaa ngmɔkɔ womi be sui lolo. 14Yesu wo e nya nɔ nɛ e de ngmɔkɔ tso ɔ ke: “Nɔ ko be o nɔ yiblii yee gblee kɛ maa ya neneene!” Nɛ e kaseli ɔmɛ nu.
Yesu ya sɔlemi we ɔ
(Mateo 21.12-17; Luka 19.45-48; Yohane 2.13-22)
15Benɛ a su Yerusalem ɔ, Yesu ya sɔlemi we ɔ nɛ e bɔni nihi nɛ ngɛ ni juae kɛ nihi nɛ ngɛ ni hee ngɛ sɔlemi we ɔ hemi. E sake sika tsakeli ɔmɛ a kplɔɔɔ ɔmɛ kɛ nihi nɛ ngɛ lahuɛhi juae ɔmɛ a sɛ̃ ɔmɛ ngɔ fia si. 16Nɛ e ngmɛ́ blɔ kaa nɔ ko nɔ ko nɛ tloo nɔ́ ko kɛ gu sɔlemi we ɔ. 17Nɛ e tsɔɔ mɛ ni ke: “A ngma ke: ‘A ma tsɛ ye we ɔ jejemawɛli kulaa a sɔlemi we.’ Se nyɛɛ lɛɛ nyɛɛ kɛ pee ojofiali a kplo.”
18Nɛ osɔfo nikɔtɔma amɛ kɛ mlaa tsɔɔli ɔmɛ nu, nɛ lɔ ɔ he ɔ a hla bɔ nɛ a maa pee nɛ a kpata e hɛ mi; se a ngɛ lɛ gbeye yee, ejakaa asafo ɔ kulaa nya kpɛ a he ngɛ e ni tsɔɔmi ɔ he.
19Ke su gbɔkuɛ ɔ, e jee ma a mi.
Ngmɔkɔ tso ɔ he nikasemi
(Mateo 21.20-22)
20Nɛ mɔtu mla, benɛ a bee ɔ, a na kaa ngmɔkɔ tso ɔ ngla kɛ e sipoku tsuo. 21Petro kai nɛ e de Yesu ke: “Rabi, hyɛ, ngmɔkɔ tso ɔ nɛ o gbiɛ ɔ ngla! 22Nɛ Yesu he nɔ nɛ e de mɛ ke: “Nyɛ he Mawu ye! 23I ngɛ nyɛ dee anɔkuale mi ke: Nɔ nɛ ma de yoku nɛ ɔ ke: ‘Hia nɛ o ya nɔ wo mi!’ nɛ e ji nɔ ngɛ e tsui mi, se mohu e heɔ yeɔ kaa nɔ nɛ e de ɔ a maa pee ɔ, e maa ba mi ha lɛ. 24Lɔ ɔ he ɔ, i ngɛ nyɛ dee ke: Nihi abɔ kulaa nɛ nyɛ ma kpa he pɛɛ ngɛ nyɛ sɔlemi mi ɔ, nyɛ he ye kaa nyɛ ma na nɛ a kɛ ma ha nyɛ. 25Nɛ be saa be nɛ nyɛ daa si ngɛ sɔlee ɔ, ke nyɛ ngɛ nɔ ko he sane ko ɔ, nyɛ kɛ ke lɛ, konɛ nyɛ hiɔwe tsɛ ɔ hu kɛ nyɛ tɔmi ɔmɛ nɛ ke nyɛ. [ 26Se ke nyɛɛ lɛɛ nyɛɛ kɛ ki ɔ, nyɛ tsɛ nɛ ngɛ hiɔwe ɔ hu kɛ nyɛ tɔmi ɔmɛ be nyɛ kee.”]
He blɔ nɛ Yesu ngɛ
(Mateo 21.23-27; Luka 20.1-8)
27Nɛ a kpale ba Yerusalem ekohu. Nɛ benɛ Yesu ngɛ nyɛɛe ngɛ sɔlemi we ɔ, osɔfo nikɔtɔma amɛ kɛ mlaa tsɔɔli ɔmɛ ba e ngɔ, 28nɛ a ba bi lɛ ke: “Mɛni he blɔ o ngɛ nɛ o kɛ peɔ kikɛmɛ a ni nɛ ɔmɛ, aloo mɛnɔ ha mo he blɔ nɛ o kɛ pee ni nɛ ɔmɛ?” 29Yesu he nɔ nɛ e de mɛ ke: “Imi hu ma bi nyɛ nɔ kake nɛ nyɛ ha mi heto, konɛ ma tsɔɔ nyɛ nɔ he blɔ nɛ i ngɛ nɛ i kɛ peɔ ni nɛ ɔmɛ. 30Yohane baptisimi ɔ, hiɔwe e je aloo nimli a dɛ mi e je? Nyɛ ha mi heto!” 31Nɛ mɛ sɔuu a sa nya ngɛ a kpɛti ke: “Kɛ wa ma de kɛɛ? Ke wa de ke e je hiɔwe ɔ, e ma bi wɔ ke: ‘Mɛni he je nɛ nyɛ he we lɛ yi mɔ?’ 32Nɛ ke wa ke e je nimli a dɛ mi ɔ,” (a ngɛ ma a gbeye yee ejakaa nihi tsuo buu Yohane gbalɔ niinɛ.) 33A he nɔ nɛ a de lɛ ke: “Wa li.” Nɛ Yesu de mɛ ke: “Lɛɛ imi hu i be nyɛ tsɔɔe nɔ he blɔ nɛ i ngɛ nɛ i kɛ peɔ ni nɛ ɔmɛ mɔ.’
Currently Selected:
Marko 11: DAN77
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Dangme New Testament © United Bible Societies, 1977.
