Marko 10
10
Gbamipomi he nitsɔɔmi
(Mateo 19.1-12; Luka 16.18)
1Kɛkɛ nɛ Yesu si lejɛ ɔ nɛ e pue nɔ kɛ ho Yudea ni ɔmɛ a mi kɛ Yordan se blɔ ya. Nihi fuu ba ba bua a he nya ekohu ngɛ e he, nɛ e tsɔɔ mɛ ni ekohu kaa bɔ nɛ e pɔɔ peemi ɔ.
2Nɛ Farisifo ɔmɛ ekomɛ ba e ngɔ, nɛ a da lɛ nɛ a bi lɛ ke: “Anɛ wa Mlaa a ngmɛɛ blɔ kaa nyumu fieɔ e yo lo?” 3Se e he nɔ nɛ e bi mɛ ke: “Mɛni kita Mose wo nyɛ ɔ?” 4A ke: “Mose ha he blɔ kaa a ngma hemi womi nɛ a fie lɛ.” 5Yesu de mɛ ke: “Nyɛ tsui wami he je nɛ Mose ngma kita nɛ ɔ ha nyɛ ɔ nɛ; 6se kɛ je je mi bɔmi sisije ɔ, nyumu kɛ yo Mawu bɔ. 7Enɛ ɔ he je ɔ, nyumu ma si e tsɛ kɛ e nyɛ, nɛ e maa pɛtɛ e yo he, nɛ mɛ ni enyɔ ɔ tsuo a maa pee he lo kake; 8lɛɛ jeha nɛ ɔ ɔ, a pi ni enyɔ hu, se he lo kake. 9Lɔ ɔ he ɔ, nɔ́ nɛ Mawu ngɔ tsa a, a ko ha nɔmlɔ nɛ gba mi.”
10Nɛ benɛ a su we ɔ mi ɔ, e kaseli ɔmɛ bi lɛ jamɛ a sane ɔ nɔuu ekohu. 11Nɛ e de mɛ ke: “Nɔ tsuaa nɔ nɛ fieɔ e yo nɛ e ya ngɔɔ nɔ kpa a, e puɛ gba. 12Nɛ ke yo kua e huno nɛ e ya gba nɔ kpa a, e puɛ gba.”
Yesu gbaa jokuɛwi
(Mateo 19.13-15; Luka 18.15-17)
13Nɛ ni komɛ ngɔ jokuɛ tsɔwi kɛ ba Yesu ngɔ konɛ e ta a he; se kaseli ɔmɛ wo a hɛ la. 14Se benɛ Yesu na a, e tsui fia, nɛ e de e kaseli ɔmɛ ke: “Nyɛ ha jokuɛ ɔmɛ nɛ a ba ye ngɔ, nɛ nyɛ ko tsi mɛ blɔ, ejakaa nihi nɛ ngɛ kaa ni nɛ ɔmɛ a nɔ ji Mawu matsɛ yemi ɔ nɛ. 15Niinɛ, i ngɛ nyɛ dee ke: Nɔ tsuaa nɔ nɛ he we Mawu matsɛ yemi ɔ kaa jokuɛ nyafii ɔ, e be mi sɛe kulaa.” 16Nɛ e fua mɛ atuu, nɛ e ngɔ e ninehi ngɔ pue a nɔ, nɛ e gbaa mɛ.
Nyumu niatsɛ ɔ
(Mateo 19.16-30; Luka 18.18-30)
17Nɛ benɛ e je kpo kɛ ma blɔ ɔ nɔ ɔ, nɔ ko sa fo kɛ ba na lɛ nɛ e ba kpla si ngɛ e hɛ mi, nɛ e bi lɛ ke: “Tsɔɔlɔ kpakpa, mɛni ma pee nɛ ma na neneene wami?” 18Nɛ Yesu bi lɛ ke: “Mɛni he je o ngɛ mi tsɛe ke nɔ kpakpa? Nɔ kpakpa ko be kaa ja Mawu nɔ kake. 19Tse o le kita amɛ: ‘Koo gbe nɔmlɔ, ko puɛ gba, koo ju, koo ye lakpa odase, koo sisi nɔ, buu o tsɛ kɛ o nyɛ!’ ” 20Se nyumu ɔ he nɔ nɛ e de lɛ ke: “Tsɔɔlɔ, i ye enɛ ɔmɛ tsuo a nɔ kɛ je ye jokuɛwi a si.” 21Nɛ Yesu hyɛ lɛ nɛ e tsui nu lɛ, nɛ e de lɛ ke: “E piɛ mo nɔ́ kake. Yaa nɛ o ya jua niki tsuo nɛ o ngɛ ɔ nɛ o kɛ ha ohiafohi, nɛ o ma na juetli ngɛ hiɔwe; nɛ o ba nɛ o ba nyɛɛ ye se.” 22Se nyumu ɔ hɛ mi tsake ngɛ munyu ɔ he, nɛ e pue nɔ kɛ ho kɛ dɔmi, ejakaa e ngɛ nihi fuu.
23Yesu hyɛ e he kɛ kpe, nɛ e de e kaseli ɔmɛ ke: “Nyɛ na bɔ nɛ e wa ha niatsɛmɛ kaa a maa sɛ Mawu matsɛ yemi ɔ mi!” 24Kaseli ɔmɛ a he mi po ngɛ e munyu ɔmɛ a he. Se Yesu tsa nɔ nɛ e de mɛ ke: “Bimɛ, tse nyɛ na bɔ nɛ e wa ha nihi nɛ ngɔɔ a hɛ ngɔ fɔɔ a nihi a nɔ ɔ kaa a maa sɛ Mawu matsɛ yemi ɔ mi! 25E wɛ́ hi afukpɔngɔ kaa e maa gu abui hɛngmɛ mi kaa bɔ nɛ e waa haa niatsɛ kaa e maa sɛ Mawu matsɛ yemi ɔ mi ɔ.” 26A he mi po saminya, nɛ a bi a he ke: “Lɛɛ mɛnɔ yi wami a ma nyɛ ma he mɔ?” 27Nɛ Yesu hyɛ mɛ nɛ e ke: “Nimli a blɔfami ɔ a be nyɛe maa pee, se pi ngɛ Mawu blɔfami; ejakaa Mawu blɔfami ɔ lɛɛ a nyɛɔ nihi kulaa peɔ.”
28Kɛkɛ nɛ Petro je nya ke: “Hyɛ, wɔɔ lɛɛ wa si nihi tsuo kulaa nɛ wa ba nyɛɛ o se.” 29Yesu ke: “Niinɛ, i ngɛ nyɛ dee ke: Nɔ ko be nɛ e si we loo nyɛmimɛ nyumuhi loo nyɛmimɛ yihi loo tsɛ loo nyɛ loo yo loo bimɛ loo zugbahi ngɛ imi kɛ sane kpakpa a he, 30nɛ e be wehi kɛ nyɛmimɛ nyumuhi kɛ nyɛmimɛ yihi kɛ nyɛmɛ kɛ bimɛ kɛ zugbahi kɛ yi wami hu totoe lafa nae ngɛ be nɛ ɔ mi lokoo kɛ neneene wami hulɔ ngɛ je nɛ maa ba a mi. 31Se kekletsɛmɛ fuu maa pee se kpɛli, nɛ se kpɛli maa pee kekletsɛmɛ.”
Yesu tu e gbenɔ he munyu nɔ́ nɛ ji si etɛ
(Mateo 20.17-19; Luka 18.31-34)
32Jeha nɛ ɔ a ngɛ blɔ nɔ kɛ yaa Yerusalem, nɛ Yesu nyɛɛ a hɛ mi; kaseli ɔmɛ a he nua si mɛ, nɛ ninɛmɛ nɛ nyɛɛ se ɔ ngɛ gbeye yee. Nɛ e ngɔ ni nyɔngma kɛ enyɔ ɔ ekohu kɛ ya se nɛ e bɔni mɛ nɔ́ nɛ maa ba e nɔ ɔ demi ke: 33“Oʼɛ, wa yaa Yerusalem, nɛ a maa ngɔ Nɔmlɔ Bi ɔ ngɔ wo osɔfo nikɔtɔma amɛ kɛ mlaa tsɔɔli ɔmɛ a dɛ mi, nɛ a maa bu lɛ gbenɔ fɔ, nɛ a maa ngɔ lɛ ngɔ ha majeli ɔmɛ; 34ni nɛ ɔmɛ maa ye e he fɛu, nɛ a maa la lada ngɔ pue e nɔ, nɛ a maa fia lɛ kplibi, nɛ a maa gbe lɛ; nɛ ligbi etɛ se ɔ, e maa te si ekohu.”
Yakobo kɛ Yohane nibimi ɔ
(Mateo 20.20-28)
35Nɛ Yakobo kɛ Yohane, Zebedeo bimɛ ɔmɛ, ba Yesu ngɔ ba de lɛ ke: “Tsɔɔlɔ, wa maa suɔ nɛ o pee nɔ́ ko ha wɔ.” 36Nɛ e bi mɛ ke: “Mɛni nyɛ suɔ kaa ma pee ha nyɛ?” 37a de lɛ ke: “Ha wɔ he blɔ konɛ wa ti nɔ kake nɛ hi o hiɛ ɔ nɔ, nɛ nɔ kake hu nɛ hi o muɔ nɔ ngɛ o nyami ɔ mi.” 38Yesu de mɛ ke: “Nyɛ li nɔ́ nɛ nyɛ ngɛ bie ɔ; anɛ nyɛ ma nyɛ ɛye kplu ɔ nɛ ma nu ɛ maa nu, aloo nyɛ ma nyɛ nɛ a baptisi nyɛ kɛ baptisimi nɛ a kɛ maa baptisi mi ɔ lo?”
39Nɛ a ke: “Wa ma nyɛ.” Se Yesu de mɛ ke: “Kplu ɔ nɛ ma nu ɔ nyɛ ma nyɛ maa nu, nɛ baptisimi nɛ a kɛ maa baptisi mi ɔ a kɛ maa baptisi nyɛ lɛɛ, 40se ye hiɛ ɔ nɔ kɛ ye muɔ nɔ himi ɔ, pi ye nɔ nɛ i kɛ haa, se mohu nihi nɛ a dla to ha amɛ a nɔ ʼi.”
41Benɛ ni nyɔngma a nu ɔ, a muklii mi fu Yakobo kɛ Yohane. 42Lɔ ɔ he ɔ Yesu tsɛ mɛ kɛ ba e ngɔ, nɛ e de mɛ ke: “Nyɛ le kaa nihi nɛ a buu mɛ ma amɛ a nɔ yeli ɔ yeɔ a nɔ kaa nyɔmtsɛmɛ, nɛ a kpɛti nimli ngua amɛ ngɛ a nɔ he wami. 43Se nyɛɛ lɛɛ nyɛ blɔ be jã; se mohu nɔ tsuaa nɔ nɛ hlaa nɛ e pee nɔmlɔ ngua ngɛ nyɛ kpɛti ɔ e pee e he nyɛ sɔmɔlɔ; 44nɛ nɔ nɛ hlaa nɛ e pee nɔkɔtɔma ngɛ nyɛ kpɛti ɔ, e pee e he ni ɔmɛ a tsɔlɔ. 45Ejakaa Nɔmlɔ Bi ɔ hu bɛ́ nɛ a sɔmɔ lɛ, se mohu e ba sɔmɔ konɛ e ngɔ e klaa ngɔ ha kaa kpɔmi nɔ ngɛ nihi fuu a he.”
Yesu tsa Bartimeo hɛyuyuilɔ ɔ
(Mateo 20.29-34; Luka 18.35-43)
46Nɛ a ba Yeriko, nɛ benɛ Yesu kɛ e kaseli ɔmɛ kɛ asafo gidiglɛmɛ je lejɛ ɔ kɛ yaa a, Bartimeo, hɛyuyuilɔ ɔ nɛ ji Timeo bi ɔ, hii si ngɛ gbɛjegbɛ ɔ tue ngɛ nɔ bae. 47Nɛ benɛ e nu kaa Yesu Nazareno ɔ ʼi ɔ, e bɔni ngmlaa kpami ke: “Yesu David, bi naa mi mɔbɔ!” 48Nihi fuu ke e yi ke e pee kɔ. Se e kpa ngmlaa wawɛɛ mohu pe kekle ɔ ke: “David bi, naa mi mɔbɔ!” 49Yesu da si, nɛ e ke: “Nye tsɛ lɛ kɛ ba!” Nɛ a tsɛ hɛyuyuilɔ ɔ, nɛ a de lɛ ke: “Na tsui, tee si, e ngɛ mo tsɛe!” 50Nɛ e sake e tade nɔha a ngɔ fɔ he, nɛ e te si pam, nɛ e ba Yesu ngɔ. 51Yesu bi lɛ ke: “Mɛni o ngɛ hlae kaa ma pee ha mo?” Nɛ hɛyuyuilɔ ɔ de lɛ ke: “Rabuni, (Nyɔmtsɛ) i ngɛ hlae nɛ ma hyɛ nɔ ekohu.” 52Nɛ Yesu de lɛ ke: “Yaa, o hemi kɛ yemi tsa mo!” Nɛ amlɔ ɔ nɔuu ɔ, e hyɛ nɔ ekohu, nɛ e nyɛɛ Yesu se ngɛ blɔ ɔ nɔ.
Currently Selected:
Marko 10: DAN77
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Dangme New Testament © United Bible Societies, 1977.
