Mateo 25
25
Yihewi nyɔngma amɛ a he abɛ ɔ
1“Jamɛ a be ɔ, hiɔwe matsɛ yemi ɔ maa pee kaa yihewi nyɔngma nɛ wo a kanehi ke a yaa kpee ayɛflo huno. 2Se a kpɛti ni enuɔ ɔ kuasiahi ʼi, nɛ ni enuɔ ɔ lɛɛ ni leli ji mɛ. 3Nihi nɛ ji kuasia amɛ wo a kane ɔmɛ, se a ngɔɛ nu ngɔ piɛ we he. 4Se ni leli ɔmɛ hɛɛ nu kɛ tɔ ngɔ piɛ a kane ɔmɛ a he. 5Se benɛ ayɛflo huno ɔ se kɛ ɔ, mahɛ ngɔ mɛ tsuo nɛ a hwɔ mahɛ.
6“Se nyɔ mi kpɛti ɔ, a nu huhui ke: ‘Oʼɛ, ayɛflo huno ɔ ma oo! Nyɛɛ je kpo nɛ nyɛ ya kpee lɛ!’ 7Kɛkɛ nɛ jamɛ a yihewi ɔmɛ tsuo te si nɛ a tsɛ̃ a kane ɔmɛ a mi. 8Nɛ kuasia a mɛ de ni leli ɔmɛ ke: ‘Nyɛ ha wɔ nyɛ nu ɔ eko, ejakaa wa kane ɔmɛ ngɛ gboe.’ 9Se ni leli ɔmɛ he nɔ nɛ a de mɛ ke: ‘Eko ɔ e ba be waa kɛ nyɛ tsuo sue; se mohu nyɛɛ ya nihi nɛ juaa amɛ a ngɔ nɛ nyɛ ya he eko ngɔ ha nyɛ he.’ 10Se benɛ, a ho hemi ya a, ayɛflo huno ɔ ba, nɛ ninɛmɛ nɛ dla a he to lɛ ɔ kɛ lɛ ho yo kpeemi he ɔ ya, nɛ a nga sinya a.
11“Lɔ ɔ se ɔ, yihewi kpa amɛ hu ba nɛ a ba de ke: ‘Nyɔmtsɛ, Nyɔmtsɛ, bli wɔ!’ 12Se e he nɔ ke: ‘Niinɛ, i ngɛ nyɛ dee ke i li nyɛ.’ 13Lɔ ɔ he ɔ nyɛɛ huɔ, ejakaa nyɛ li jamɛ a ligbi ɔ loo ngmlɛfia a.”
Sɔmɔli etɛ ɔmɛ a he abɛ ɔ
(Luka 19.11-27)
14“E ngɛ kaa nyumu ko nɛ benɛ e maa doma a, e tsɛ e sɔmɔli ɔmɛ, nɛ e tu e nihi ngɔ wo a dɛ; 15e ha nɔ kake talenta enuɔ, nɔ kake hu enyɔ, nɛ nɔ kake hu kake, bɔ nɛ nɔ tsuaa nɔ ma nyɛ maa hyɛ nɔ; nɛ amlɔ ɔ e doma. 16Se nɔ nɛ na talenta enuɔ ɔ ho nɛ e ya plɛ he, nɛ e na talenta enuɔ kɛ bɔ he. 17Ja nɔuu nɔ nɛ na enyɔ ɔ hu ya na enyɔ kɛ bɔ he. 18Se nɔ nɛ na kake ɔ ho nɛ e ya tsua zugba mi, nɛ e pu e nyɔmtsɛ ɔ sika a.
19“Se e ngɛ mi hluu ɔ, sɔmɔli nɛ ɔmɛ a nyɔmtsɛ ɔ ba, nɛ e kɛ mɛ ba bu akɔɔtaa. 20Nɛ nɔ nɛ na talenta enuɔ ɔ ba, nɛ e kɛ talenta enuɔ kpã hu ba bɔ he nɛ e ke: ‘Nyɔmtsɛ o ngɔ talenta enuɔ ngɔ ha mi, oʼɛ, i kɛ na talenta enuɔ hu ngɔ piɛ he.’ 21E nyɔmtsɛ ɔ de lɛ ke: ‘Ayekoo, sɔmɔlɔ kpakpa kɛ anɔkualetsɛ, o ye anɔkuale ngɛ nihi bɔɔ mi, ma ha o pee nihi fuu a nyatsɛ: sɛ o nyɔmtsɛ ɔ bua jɔmi ɔ mi.’ 22Nɛ nɔ nɛ na talenta enyɔ ɔ hu ba nɛ e ba de ke: ‘Nyɔmtsɛ, o ngɔ talenta enyɔ ngɔ ha mi, oʼɛ, i kɛ na talenta enyɔ hu ngɔ piɛ he.’ 23E nyɔmtsɛ ɔ de lɛ ke: Ayekoo, sɔmɔlɔ kpakpa kɛ anɔkualetsɛ, o ye anɔkuale ngɛ nihi bɔɔ mi, ma ha o pee nihi fuu a nyatsɛ: sɛ o nyɔmtsɛ bua jɔmi ɔ mi.’ 24Se nɔ nɛ na talenta kake ɔ hu ba de ke: ‘Nyɔmtsɛ, i le mo kaa yi mi walɔ ji mo; o kpaa ni ngɛ he nɛ o du we nɔ́ ko ngɛ, nɛ o buaa nihi a nya ngɛ he nɛ o fia we nɔ́ ko ngɛ; 25nɛ lɔ ɔ ha i ye gbeye, nɛ i ho nɛ i ya pu o talenta a ngɛ zugba mi; ne o ni.’ 26Se e nyɔmtsɛ ɔ he nɔ nɛ e de lɛ ke: ‘Sɔmɔlɔ yaya kɛ alitsɛ, nɛ o le kaa i kpaa ni ngɛ he nɛ i du we nɔ́ ko ngɛ, nɛ i buaa nihi a nya ngɛ he nɛ i fia we nɔ́ ko ngɛ ɔ, 27Jinɛ o blɔ nya ji kaa o ngɔɔ ye sika a ngɔ woɔ tsakeli a dɛ, konɛ ke i ba a nɛ ma ba he ye ni kɛ hekpa. 28Lɔ ɔ he ɔ, nyɛ he talenta a ngɛ e dɛ nɛ nyɛ ngɔ ha nɔ nɛ ngɛ talenta nyɔngma a. 29Ejakaa nɔ tsuaa nɔ nɛ ngɛ nɔ́ ko ɔ, a ma ha lɛ konɛ e na kɛ be nɔ, se nɔ nɛ be nɔ́ ko ɔ, a ma he bɔɔ nɛ e ngɛ ɔ tete ngɛ e dɛ. 30Nɛ sɔmɔlɔ nɛ he be se nami ko nɛ ɔ ɔ, nyɛɛ tsɛ̃ lɛ ngɔ wo blɔ se diblii ɔ mi; lejɛ ɔ ya fomi kɛ lungu nya kpemi maa hi!’ ”
Kojomi ligbi ngua a
31“Se benɛ Nɔmlɔ Bi ɔ maa ba ngɛ e nyami ɔ mi, nɛ bɔfo ɔmɛ tsuo maa piɛ e he ɔ, lɛ be ɔ mi ɔ, e maa hi e nyami sɛ ɔ nɔ; 32nɛ a ma bua majemaje tsuo nya ngɛ e hɛ mi, nɛ e ma gba a mi, kaa bɔ nɛ to hyɛlɔ gbaa jijɔhi kɛ apletsihi a mi ɔ. 33Nɛ e maa ngɔ jijɔ ɔmɛ ngɔ da e hiɛ ɔ nɔ, se apletsi ɔmɛ ɔ, e maa ngɔ mɛ ngɔ da e muɔ nɔ? 34Kɛkɛ nɛ matsɛ ɔ ma de nihi nɛ ngɛ e hiɛ ɔ nɔ ɔ ke: ‘Nyɛɛ ba, nyɛ nihi nɛ ye tsɛ gbaa nyɛ, nyɛ ba ngɔ matsɛ yemi ɔ nɛ a dla to nyɛ, kɛ je je mi sisije ɔ! 35Ejakaa hwɔ ye mi, nɛ nyɛ ha mi ni ye; kuma ye mi nɛ nyɛ ha mi nyu nu; nibwɔ ji mi, nɛ nyɛ ha i ba to nyɛ ngɔ; 36i hɛɛ ye he gu nɛ nyɛ wo mi tade; i nu hiɔ, nɛ nyɛ ba slaa mi; a wo mi tsu mi, nɛ nyɛ ba ye ngɔ.’ 37Kɛkɛ ɔ dali ɔmɛ maa he nɔ de ke: ‘Nyɔmtsɛ, te ligbi nɛ wa na mo kaa hwɔ ngɛ mo yee nɛ wa ha mo ni ye nɛɛ? Aloo kaa, kuma ngɛ mo yee nɛ wa ha mo nɛ ko nu? 38Nɛ te ligbi nɛ wa na mo kaa nibwɔ ji mo, nɛ wa ha o ba to wa ngɔ nɛɛ? Aloo kaa o hɛɛ o he gu nɛ wa wo mo tade nɛɛ? 39Jeha nɛ ɔ te ligbi nɛ wa na mo kaa o ngɛ gboe aloo a wo mo tsu mi, nɛ wa ba o ngɔ nɛɛ?’ 40Nɛ matsɛ ɔ ma he nɔ nɛ e ma de mɛ ke: ‘Niinɛ, i ngɛ nyɛ dee ke: Ligbi abɔ kɛ̃ nɛ nyɛ pee ngɔ ha ye nyɛmimɛ nɛ ɔmɛ a ti nyafii kake ɔ, imi nɔuu nyɛ pee ngɔ ha a nɛ.’
41“Kɛkɛ ɔ, e ma de ninɛmɛ nɛ ngɛ e muɔ nɔ hu ke: ‘Nyɛɛ je ye nɔ, nyɛ nihi nɛ a gbiɛ nyɛ, nyɛɛ ya neneene la a nɛ a dla to abosiami kɛ e bɔfo ɔmɛ ɔ mi! 42Ejakaa hwɔ ye mi, nɛ nyɛ ha we mi ni ma ye; kuma ye mi, nɛ nyɛ ha we mi nyu ma nu; 43nibwɔ ji mi; nɛ nyɛ ha we nɛ ma ba to nyɛ ngɔ; i hɛɛ ye he gu, nɛ nyɛ wui mi tade; i nu hiɔ, nɛ jeha nɛ ɔ hu a wo mi tsu mi, nɛ nyɛ ba slaa we mi.’ 44Kɛkɛ ɔ, mɛ hu a ma he nɔ de ke: ‘Nyɔmtsɛ, te ligbi nɛ wa na mo kaa hwɔ ngɛ mo yee aloo kuma ngɛ mo yee aloo nibwɔ ji mo aloo o hɛɛ o he gu aloo o ngɛ gboe aloo a wo mo tsu mi, nɛ wa ba sɔmɔ we mo ɔ?’ 45Kɛkɛ ɔ, e ma he nɔ nɛ e ma de mɛ ke: ‘Niinɛ, i ngɛ nyɛ dee ke: Ligbi abɔ kɛ̃ nɛ nyɛ pee we ngɔ hi nihi tsɔwi kulaa nɛ ɔmɛ a kpɛti nɔ kake ɔ, nyɛ pee we ngɔ hi mi hulɔ!’ 46Nɛ ni nɛ ɔmɛ ɔ, a maa ya neneene he hiami mi; se dali ɔmɛ maa ya neneene wami mi.”
Currently Selected:
Mateo 25: DAN77
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Dangme New Testament © United Bible Societies, 1977.
