Mateo 24
24
Yesu tu sɔlemi tsu ɔ puɛmi he munyu
(Marko 13.1-2; Luka 21.5-6)
1Nɛ benɛ Yesu je kpo kɛ je sɔlemi we ɔ kɛ yaa a, e kaseli ɔmɛ ba e ngɔ nɛ a ba tsɔɔ lɛ sɔlemi we ɔ tsu ɔmɛ. 2Se Yesu de mɛ ke: “Tse nyɛ ngɛ ni nɛ ɔmɛ tsuo hyɛe? Niinɛ, i ngɛ nyɛ dee ke: A be tɛ kake sie ngɛ eko nɔ ngɛ hiɛ ɔ nɛ a be kpae ngɔ bu si.”
Haomi kɛ yiwami
(Marko 13.3-13; Luka 21.7-19)
3Benɛ Yesu hii si ngɛ Nuyoku ɔ nɔ ɔ, e kaseli ɔmɛ ba e ngɔ ngɛ se ba de lɛ ke: “Tsɔɔ wɔ be nɛ a maa pee ni nɛ ɔmɛ, nɛ mɛni ji o bami kɛ je nɛ ɔ nyagbe ɔ he okadi?”
4Nɛ Yesu he nɔ nɛ e de mɛ ke: “Nyɛɛ hyɛ nɛ hi konɛ nɔ ko ko ba mlɔɔ nyɛ. 5Ejakaa nihi fuu kɛ ye biɛ maa ba, nɛ a ma ba de ke: ‘Imi ji Kristo ɔ nɛ!’ Nɛ a maa mlɔɔ nihi fuu. 6Se nyɛ maa nu tahi kɛ tahi a ta womihi a he; nyɛɛ hyɛ nɛ nyɛ tsui ko po; se e sa kaa ni nɛ ɔmɛ tsuo nɛ ba mi, se kɛ̃ ɔ, nyagbe ɔ sui lolo. 7Ejakaa ma maa te si ngɔ wo ma, nɛ matsɛ yemi maa te si ngɔ wo matsɛ yemi; nɛ hwɔ kɛ zugba mimiɛmi maa ba hehi slɔɔtohi tsuo. 8Se enɛ ɔmɛ tsuo ɔ kɔɔmi ɔmɛ a sisi jemi ʼi.
9“Lɛ be ɔ mi ɔ, a ma je nyɛ ngɔ wo dengme mi, nɛ a maa gbe nyɛ; nɛ ye biɛ ɔ he ɔ majemaje tsuo maa nyɛ nyɛ. 10Nɛ jamɛ a be ɔ mi ɔ, nihi fuu a nane ma kpata, nɛ a maa tsɔɔ a huɛmɛ a se blɔ, nɛ a maa nyɛ a he. 11Nɛ lakpa gbali fuu maa te si, nɛ a maa mlɔɔ nihi fuu. 12Nɛ nɔ́ nɛ mlaa kuami maa hiɛ he je ɔ, nihi fuu a suɔmi ɔ he maa jɔ. 13Se nɔ nɛ hɛɛ mi kɛ pii si ɔ, lɛ e yiwami a ma he. 14Nɛ a maa fiɛ matsɛ yemi ɔ Sane Kpakpa nɔ ngɔ tsɔɔ je ɔ tsuo, nɛ a kɛ ye majemaje ɔ tsuo odase; nɛ kɔlɔ ɔ loko nyagbe ɔ maa ba.”
Hehiami ngua a
(Marko 13.14-23; Luka 21.20-24)
15“Lɔ ɔ he je ɔ, ke nyɛ na ma doku ninye ni nɛ gbalɔ Daniel tu he munyu ɔ kaa e maa si ngɛ he klɔuklɔu ɔ” (nɔ nɛ ngɛ kanee ɔ, e kɔ se!) 16“Lɔ ɔ lɛɛ nihi nɛ ngɛ Yudea a, a tu fo kɛ ya yoku ɔmɛ a nɔ; 17nɔ nɛ ngɛ tsu yi mi ɔ e ko kple si ya ngɔ nɔ ko kɛ je e we mi; 18nɛ nɔ nɛ ngɛ ngmɔ si ɔ, e ko kpale e se ya ngɔ e tade. 19Se i ngɛ yihi nɛ hɛɛ muklii kɛ nyɔ nyu hali ngɛ jamɛ a be ɔmɛ a mi ɔ kpo mo hae. 20Se nyɛɛ sɔle konɛ nyɛ fo tumi ɔ nɛ ko ba ngɛ fiɛ be mi aloo ngɛ Hejɔɔmi Ligbi ɔ nɔ. 21Ejakaa jamɛ a be ɔ mi ɔ, he hiami babauu maa ba nɛ a nɛ e nɔ gblee kɛ je je ɔ sisije kɛ ba su mwɔnɛ mwɔnɛ, nɛ jeha nɛ ɔ a be e nɔ nae gblegbleegblee. 22Nɛ ke a pui jamɛ a ligbi ɔmɛ a nɔ kpiti ɔ, jinɛ a be he lo ko he lo ko yiwami hee; se nihi nɛ a hla amɛ a he ɔ, a maa po jamɛ a ligbi ɔmɛ a nɔ kpiti.
23“Lɛ be ɔ mi ɔ, ke nɔ ko de nyɛ ke: ‘Oʼɛ, Kristo ɔ ngɛ hiɛ ɔ loo hiɛ ɔ’ ɔ, nyɛ ko he ye. 24Ejakaa lakpa kristohi kɛ lakpa gbali maa te si nɛ a maa pee okadi nguahi kɛ nyakpɛ nihi kɛ maa tsɔɔ, nɛ kaa e maa hi jinɛ a maa mlɔɔ nihi na a hla amɛ tete. 25Oʼɛ, i de nyɛ ngɔ to. 26“Lɔ ɔ he ɔ, ke a de nyɛ ke: ‘Oʼɛ, e ngɛ nga a nɔ’ ɔ, nyɛ ko ya; aloo ‘Oʼɛ e ngɛ se tsu ɔmɛ a mi’ ɔ, nyɛ ko he ye. 27Ejakaa bɔ nɛ slaba jee beleku ngaa kɛ yaa bonyoku ɔ ja nɔuu Nɔmlɔ Bi ɔ bami ɔ maa pee.
28“Ejakaa he tsuaa he nɛ gbogboe fɔɔ si ngɛ ɔ, lejɛ ɔ okpokuhi buaa a he nya ngɛ.”
Nɔmlɔ Bi ɔ bami
(Marko 13.24-27; Luka 21.25-28)
29“Se jamɛ a ligbi ɔmɛ a nɔ he hiami ɔmɛ a se ɔ, e be kee nɛ pu maa tsɔ diblii, nɛ nyɔhiɔ be kpee hu, nɛ dodoehi ma tsɔ kɛ maa je hiɔwe ngɔ fia si, nɛ hiɔwe he wami ɔmɛ ma mimiɛ. 30Kɛkɛ ɔ, Nɔmlɔ Bi ɔ okadi ɔ maa je kpo ngɛ hiɔwe, nɛ lɔ ɔ lɛɛ zugba a nɔ wetso ɔmɛ tsuo maa wo ya, nɛ a maa na Nɔmlɔ Bi ɔ kaa we ma ngɛ hiɔwe bɔku ɔmɛ a nɔ kɛ he wami dɛ hɛ mi nyami babauu. 31Nɛ e maa tsɔ e bɔfo ɔmɛ kɛ Titimati nɛ gbi nya wa, nɛ a ma bua e nihi nɛ a hla amɛ a nya kɛ maa je kɔɔhiɔ eywiɛ ɔ nɔ, kɛ maa je hiɔwe nyagbe he kake nɔ kɛ yaa su nyagbe he kpa nɔ.”
Ngmɔkɔ tso ɔ he nikasemi
(Marko 13.28-31; Luka 21.29-33)
32“Nyɛɛ kase ngmɔkɔ tso abɛ nɛ e bu ɔ: benɛ e kɔni ɔmɛ plɔke nɛ e bɔni bahi fumi ɔ, nyɛ le kaa latsa be ɔ su ti ta. 33Ja nɔuu nyɛ hu, benɛ nyɛ maa na ni nɛ ɔmɛ tsuo ɔ, nyɛɛ le kaa e su agbo ɔmɛ a nya ta. 34Niinɛ, i ngɛ nyɛ dee ke: Kikɛmɛ a yi nɔ nɛ ɔ be bee, ja ni nɛ ɔmɛ tsuo ba mi lolo. 35Hiɔwe kɛ zugba maa be kɛ ho, se ye nyumu ɔmɛ be bee kɛ ho.”
Nɔ ko li ligbi ɔ kɛ ngmlɛfia a
(Marko 13.32-37; Luka 17.26-30; Luka 17.34-36)
36“Se jamɛ a ligbi ɔ kɛ jamɛ a ngmlɛfia a, nɔ ko nɔ ko li. Bɔfohi nɛ ngɛ hiɔwe ɔ tete li, nɛ Bi ɔ tete li, ja Tsaatsɛ nɔ kake kɛkɛ. 37Se bɔ nɛ Noa ligbi ɔmɛ pee ɔ, ja Nɔmlɔ Bi ɔ bami ɔ hu maa pee. 38Ejakaa bɔ nɛ e ngɛ ngɛ ligbihi nɛ nyɛɛ nyu afua a hɛ mi, nɛ ni ɔmɛ hɛɛ ni yemi kɛ ni numi kɛ yo ngɔmi kɛ gba hami mi hluu kɛ ya su ligbi nɛ Noa ya sɛ daka a mi, 39nɛ a hɛ be a he nɔ kɛ ya su nyu afua a ba muɔ mɛ tsuo kɛ ho ɔ, ja nɔuu Nɔmlɔ Bi ɔ bami ɔ maa pee. 40Lɛ be ɔ mi ɔ, ni enyɔ maa hi ngmɔ si, a maa ngɔ nɔ kake, nɛ a ma si nɔ kpa a. 41Yi enyɔ maa wɛɛ ngɛ wɛ se; a maa ngɔ nɔ kake, nɛ a ma si nɔ kpã a. 42Lɔ ɔ he ɔ nyɛɛ huɔ, ejakaa nyɛ li ngmlɛfia nɔ nɛ nyɛ nyɔmtsɛ ɔ ma. 43Se nyɛ na nɛ nyɛɛ le kaa, ke wetsɛ ko le ngmlɛfia nɔ nɛ juɔ baa a, jinɛ e maa huɔ nɛ e be blɔ ngmɛe nɛ a yua e we ɔ ngɔ wo mi. 44Lɔ ɔ he ɔ nyɛ hu nyɛ dla nyɛ he ngɔ to, ejakaa ngmlɛfia nɛ nyɛ susuu we ɔ nɔ nɛ Nɔmlɔ Bi ɔ ma.”
Tsɔlɔ kpakpa kɛ tsɔlɔ yayami
(Luka 12.41-48)
45“Lɛɛ mɛnɔ ji tsɔlɔ anɔkualetsɛ kɛ ni lelɔ mɔ nɛ e nyɔmtsɛ ngɔ lɛ ngɔ to e webi ɔmɛ a nya konɛ e ha mɛ a nya mi ngma ngɛ be nɛ sa mi ɔ? 46A gbaa jamɛ ɛ tsɔlɔ ɔ, nɔ nɛ benɛ e nyɔmtsɛ ɔ ba a, nɛ e ma ba na lɛ kaa e ngɛ jã pee ɔ. 47Niinɛ, i ngɛ nyɛ dee ke, e maa ngɔ lɛ ngɔ to e nihi tsuo kulaa nya. 48Se ke jamɛ a tsɔlɔ ɔ ji tsɔlɔ yayami ɔ, e ma de ngɛ e tsui mi ke: ‘Ye nyɔmtsɛ ɔ ngɛ e bami be ɔ tsɛe kɛ ngɛ toe;’ 49nɛ e ma bɔni e huɛmɛ tsɔli ɔmɛ kpa fiami, nɛ e kɛ da deli maa ye nɛ e kɛ mɛ maa nu ɔ, 50jamɛ a tsɔlɔ ɔ nyɔmtsɛ ɔ maa ba ligbi nɛ e hyɛ we lɛ blɔ kɛ ngmlɛfia nɛ e li, 51nɛ e ma tsɔtslɔɔ e mi nɛ e ma ha lɛ e blɔfami nɔ́ ngɛ osatotsɛmɛ ɔmɛ a kpɛti. Lejɛ ɔ ya fomi kɛ lungu nyakpemi maa hi.”
Currently Selected:
Mateo 24: DAN77
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Dangme New Testament © United Bible Societies, 1977.
