Mateo 21
21
Yesu Yerusalem sɛmi
(Marko 11.1-11; Luka 19.28-40; Yohane 12.12-19)
1Nɛ benɛ a ngɛ Yerusalem sua nɛ a su Betfage ngɛ Nuyoku ɔ he ɔ, Yesu tsɔ e kaseli ɔmɛ a ti ni enyɔ, 2nɛ e de mɛ ke: “Nyɛɛ ya kɔpe nɛ ngɛ nyɛ hɛ kpɛ nɛ ɔ mi, nɛ amlɔ ɔ, nyɛ maa na teji yo nɛ a muɔ lɛ si kɛ e bi; nyɛɛ pɛne mɛ ba ha mi. 3Nɛ ke nɔ ko bi nyɛ munyu ko ɔ, nyɛ de lɛ ke: ‘A he ngɛ Nyɔmtsɛ ɔ hiae;’ nɛ amlɔ ɔ, e ma ha nyɛɛ kɛ mɛ maa ba.”
4A pee enɛ ɔ tsuo, konɛ nɔ́ nɛ gbalɔ ɔ de ɔ nɛ ba mi ke:
5“Nyɛ de Zion biyo ɔ ke:
Oʼɛ, o matsɛ ɔ ma o ngɔ,
E he jɔ nɛ e hi teji nɔ
Kɛ teji nɛ ji ni tsumi lohwe ɔ bi nɔ.”
6Lɔ ɔ he ɔ kaseli ɔmɛ ho nɛ a ya pee bɔ nɛ Yesu fa mɛ ɔ. 7Nɛ a kɛ teji ɔ kɛ e bi ɔ ba, nɛ a ngɔ a tade ɔmɛ ngɔ pue e nɔ, nɛ e kuɔ hi nɔ. 8Nɛ nihi fuu ngɔ a tadehi ngɔ ha blɔ ɔ nɔ, nɛ ni komɛ hu po tsohi a kɔnihi ngɔ pue blɔ ɔ nɔ; 9nɛ nihi nɛ nyɛɛ hɛ kpɛ kɛ nihi nɛ nyɛɛ se ɔ tsuo wɔ lele ke: “Hosiana David bi ɔ! A gbaa nɔ nɛ ma ngɛ Nyɔmtsɛ ɔ biɛ mi ɔ! Hosiana ngɛ hiɔwe lokoo!”
10Nɛ benɛ e sɛ Yerusalem ɔ, ma mluku ɔ tsuo bu hoo ke: “Mɛnɔ ji nɛ?” 11Se asafo ɔ ke: “Nɔ nɛ ɔ ji Yesu, gbalɔ nɛ je Nazaret ngɛ Galilea a nɛ.”
Yesu ya sɔlemi we ɔ
(Marko 11.15-19; Luka 19.45-48; Yohane 2.13-22)
12Nɛ Yesu ya Mawu sɔlemi we ɔ nɛ e ya fie nihi nɛ ngɛ ni juae kɛ nihi nɛ ngɛ ni hee ngɛ sɔlemi we ɔ, nɛ e sake sika tsakeli ɔmɛ a kplɔɔ ɔmɛ kɛ nihi nɛ ngɛ lahuɛ ɔmɛ juae ɔ a sɛ ɔmɛ ngɔ fia si. 13Nɛ e de mɛ ke: “A ngma ke: ‘A ma tsɛ ye we ɔ sɔlemi we’ se nyɛɛ lɛɛ nyɛɛ kɛ pee ojo fiali a kplo.”
14Nɛ hɛ yuyuili kɛ nihi nɛ a hule ba e ngɔ ngɛ sɔlemi we ɔ, nɛ e tsa mɛ. 15Se benɛ osɔfo nikɔtɔma amɛ kɛ mlaa tsɔɔli ɔmɛ na nyakpɛ nihi nɛ e pee kɛ jokuɛwi ɔmɛ nɛ a ngɛ lele wɔe ngɛ sɔlemi we ɔ ke: “Hosiana David bi” ɔ, a muklii mi wo la, 16nɛ a de lɛ ke: “O ngɛ nɔ́ nɛ ni nɛ ɔmɛ ngɛ dee nɛ ɔ nue loo” Nɛ Yesu de mɛ ke: “Ee, anɛ nyɛ kane we hyɛ ke: ‘Bimwɔwi kɛ nyɔ nya bimɛ a nya nɛ o dla yi jemi ngɔ to ngɛ’ ɔ lo?” 17Nɛ e si mɛ nɛ e je ma a mi kɛ ho Betania ya, nɛ e ya hwɔ lejɛ ɔ.
Yesu gbiɛ ngmɔkɔ tso ɔ
(Marko 11.12-14; 11.20-24)
18Se mɔtu benɛ e kpale e se nɛ e yaa ma a mi ɔ, hwɔ ye lɛ. 19Nɛ e na ngmɔkɔ tso ko ngɛ blɔ ɔ he, nɛ e gba kɛ ya he, se e nɛ nɔ́ ko ngɛ nɔ kaa ja bahi kɛkɛ; nɛ e de ngmɔkɔ tso ɔ ke: “Kɛ je be nɛ ɔ kɛ yaa a, o be yiblii ko woe gblegblee hu!” Nɛ ngmɔkɔ tso ɔ ngla amlɔ ɔ nɔuu. 20Nɛ benɛ e kaseli ɔmɛ na a, a nya kpɛ a he nɛ a ke: “Kɛ pee kɛɛ nɛ ngmɔkɔ tso ɔ ngla amlɔ nɛ ɔ ɔ?” 21Se Yesu he nɔ nɛ e de mɛ ke: “Niinɛ, i ngɛ nyɛ dee ke: ke nyɛ ngɛ hemi kɛ yemi nɛ nyɛ ji nguane ɔ, pi nɔ́ nɛ a pee ngmɔkɔ tso nɛ ɔ kɛkɛ nɛ nyɛ maa pee; se ke nyɛ de yoku nɛ ɔ tete ke: ‘Hia nɛ o ya nɔ wo mi’ ɔ, e maa ba mi ja. 22Nɛ nɔ́ tsuaa nɔ́ nɛ nyɛ maa sɔle ma bi kɛ hemi kɛ yemi ɔ, nyɛ nine maa su nɔ.”
He blɔ nɛ Yesu ngɛ
(Marko 11.27-33; Luka 20.1-8)
23Nɛ benɛ Yesu ba sɔlemi we ɔ nɛ e ngɛ mɛ ni tsɔɔe ɔ, osɔfo nikɔtɔma amɛ kɛ ma nikɔtɔma amɛ ba e ngɔ nɛ a ba bi lɛ ke: “Mɛni he blɔ o ngɛ he je nɛ o peɔ kikɛmɛ a ni nɛ ɔmɛ, nɛ mɛnɔ ha mo kikɛmɛ a he blɔ nɛ ɔ?” 24Se Yesu he nɔ nɛ e de mɛ ke: “Imi hu ma bi nyɛ munyu ko nɛ ke nyɛ tsɔɔ mi ɔ, imi hu ma tsɔɔ nyɛ he blɔ nɛ i ngɛ he je nɛ i peɔ kikɛmɛ a ni nɛ ɔmɛ. 25Yohane baptisimi ɔ jije e je? Hiɔwe e je loo nimli a dɛ mi?” Nɛ a hla mi ngɛ a kpɛti ke: “Ke wa ke ‘e je hiɔwe’ ɔ, e ma de wɔ ke: ‘Mɛni he je nyɛ he we lɛ yi mɔ?’ 26Nɛ ke wa ke: ‘E je nimli a dɛ mi’ ɔ, lɔ ɔ hu wa ngɛ asafo ɔ gbeye yee; ejakaa nihi tsuo buu Yohane gbalɔ.” 27Kɛkɛ nɛ a he nɔ nɛ a de Yesu ke: “Wa li.” Lɛ hu e de mɛ ke: “Lɛɛ imi hu i be nyɛ tsɔɔe nɔ he blɔ nɛ i ngɛ he je nɛ i peɔ kikɛmɛ a ni nɛ ɔmɛ mɔ.”
Bimɛ nyumuhi enyɔ ɔmɛ a he abɛ
28“Se jeha nɛ ɔ, kɛ nyɛ susuu kɛɛ? Nyumu ko ngɛ bimɛ enyɔ; nɛ e ya nɔkɔtɔma a ngɔ nɛ e ke: ‘Ye bi, mwɔnɛ ya tsu ni ngɛ ye wai ngmɔ ɔ mi.’ 29Nɛ e he nɔ ke: ‘I be yae.’ Se pee se ɔ e pia e he, nɛ e ya. 30Nɛ e ya jokuɛ ɔ hu ngɔ, nɛ e de lɛ ja nɔuu. Se lɛɛ e he nɔ ke: ‘Tsaatsɛ ma ya!’ se e yɛ. 31Ni enyɔ nɛ ɔmɛ a kpɛti mɛnɔ lɛ pee nɔ́ nɛ a tsɛɔ suɔ ɔ?” A de lɛ ke: “Nɔkɔtɔma a ʼi.” Yesu de mɛ ke: “Niinɛ, i ngɛ nyɛ dee ke, onia tsuli ɔmɛ kɛ ajuama amɛ ngɛ nyɛ hlami sɛe kɛ yaa hiɔwe matsɛ yemi ɔ mi. 32Ejakaa Yohane ba nyɛ ngɔ ngɛ dami blɔ nɔ, nɛ nyɛɛ lɛɛ nyɛ he we lɛ yi; se onia tsuli ɔmɛ kɛ ajuama amɛ he lɛ ye. Nɛ pee se benɛ nyɛ na le hu ɔ, nyɛ pia we nyɛ he tete, konɛ nyɛ he lɛ nyɛɛ ye.”
Wai ngmɔ ɔ mi huli yaya amɛ
(Marko 12.1-12; Luka 20.9-19)
33Yesu ke: “Nyɛɛ bu abɛ kpa ko hu tue: Wetsɛ ko ngɛ, nɛ e pee wai ngmɔ, nɛ e po piɛ wo he kɛ kpe, nɛ e tsua tɛ muɔ ngɛ mi, nɛ e ma mɔ ngɛ mi; nɛ e kɛ ha ni tsuli apaa humi; nɛ e doma? 34Nɛ benɛ yiblii kpami be su ɔ, e tsɔ e tsɔli kɛ ya huli ɔmɛ a ngɔ ke a ya ngɔ e yiblii ɔ kɛ ba ha lɛ. 35Se huli ɔmɛ nu e tsɔli ɔmɛ, nɛ a fia nɔ kake kpa, nɛ a gbe nɔ kake, nɛ a fia nɔ kake hu tɛ. 36Jeha nɛ ɔ, e tsɔ tsɔli kpahi nɛ hiɛ pe kekle ni ɔmɛ, nɛ a pee mɛ ja nɔuu. 37Se lɛ tsuo se ɔ, e tsɔ e bi kɛ ya a ngɔ ke: ‘Ye bi ɔ lɛɛ a ma gbo lɛ zo.’ 38Se huli ɔmɛ, benɛ a na bi ɔ mohu ɔ, a de a he ke: ‘Ni yelɔ ɔ ji nɛ ɔ nɛ? Nyɛɛ ba, nyɛ ha waa gbe lɛ, konɛ waa ye e ni ɔmɛ!’ 39Nɛ a nu lɛ nɛ a tsitsɛɛ e kuɛ se kɛ je wain ngmɔ ɔ mi, nɛ a gbe lɛ.
40“Jeha nɛ ɔ, ke wain ngmɔtsɛ ɔ ba a, kɛ e maa pee huli nɛ ɔmɛ kɛɛ?” 41A de lɛ ke: “E ma kpata kikɛmɛ a nimli yayami nɛ ɔmɛ a hɛ mi butuu, nɛ e maa ngɔ wain ngmɔ ɔ ngɔ ha huli kpahi apaa humi, nihi nɛ kɛ yiblii ma ba ha lɛ ngɛ be nɛ sa mi.” 42Yesu de mɛ ke: “Anɛ nyɛ kane we gblee ngɛ ngami ɔmɛ a mi ke:
‘Tɛ ɔ nɛ tsufiali ɔmɛ sake fɔ he ɔ,
Kɔlɔ ɔ nɔuu lɛ plɛ kɔ nya tɛ.
Nyɔmtsɛ ɔ dɛ mi enɛ ɔ je,
Nɛ e ngɛ nyakpɛ ngɛ wa hɛngmɛ mi.’
43Lɔ ɔ he je ɔ i ngɛ nyɛ dee ke: A ma kpɔ Mɛwu matsɛ yemi ɔ ngɛ nyɛ dɛ; nɛ a ma ngɔ ha majeli a ma ko nɛ woɔ yiblii. [ 44Nɛ nɔ tsuaa nɔ nɛ maa nɔ tɛ nɛ ɔ nɔ ɔ, e mi ma tsɔtslɔɔ; se nɔ nɔ nɛ tɛ ɔ maa nɔ ɔ, e maa gblɛ lɛ mɔnyɔmɔnyɔ.]”
45Nɛ benɛ osɔfo nikɔtɔma amɛ kɛ Farisifo ɔmɛ nu e bɛ ɔmɛ ɔ, a kɔ se kaa a he munyu e ngɛ tue ɔ nɛ. 46Nɛ jinɛ a ngɛ hlae kaa a nu lɛ; se a ya ye asafo ɔmɛ gbeye ejakaa a buu lɛ gbalɔ.
Currently Selected:
Mateo 21: DAN77
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Dangme New Testament © United Bible Societies, 1977.
