Mateo 20
20
Wai ngmɔ ɔ mi nitsuli ɔmɛ
1“Hiɔwe matsɛ yemi ɔ ngɛ kaa nyumu we tsɛ ko nɛ je kpo makɛ mla nɛ e ya bɔ ni tsuli apaa kɛ ya e wai ngmɔ mi. 2Nɛ benɛ e kɛ ni tsuli ɔmɛ ye nya cedi kake ligbi kake ɔ, e wo mɛ blɔ kɛ ho e wai ngmɔ ɔ mi ya. 3Nɛ kɛ ma mɔtu ngmlɛ nɛɛ mi ɔ, e je kpo ekohu nɛ e ya na ni kpahi komɛ nɛ a daa si yaka ngɛ jua a nɔ; 4nɛ e de ni nɛ ɔmɛ hu ke: ‘Nyɛ hu nyɛɛ ya wai ngmɔ ɔ mi, nɛ nɔ́ nɛ sa a ma ha nyɛ.’ 5Nɛ a ho. Jeha nɛ ɔ kɛ ma ngmlɛ nyɔngma kɛ enyɔ kɛ ngmlɛ etɛ mi ɔ, e je kpo nɛ e ya pee ja nɔuu. 6Nɛ kɛ ma gbɔkuɛ ngmlɛ enuɔ mi ɔ, e je kpo nɛ e ya na ni kpahi komɛ hu nɛ a daa si yaka gu, nɛ e bi mɛ ke: ‘Mɛni he je nɛ nyɛ daa si yaka gu ngɛ hiɛ ɔ je nami nɛ ɔ tsuo nɛ ɔ?’ 7A de lɛ ke: ‘Akɛnɛ nɔ ko bɔɛ wɔ apaa a he je.’ E de mɛ ke: ‘Nyɛɛ hu nyɛɛ ya wai ngmɔ ɔ mi.’
8“Nɛ bene su gbɔkuɛ ɔ, wai ngmɔtsɛ ɔ de e tsɔlɔ nɔkɔtɔma a ke: ‘Tsɛ ni tsuli ɔmɛ nɛ o wo mɛ hiɔ, nɛ o bɔni kɛ je sekpɛtsɛmɛ ɔmɛ a nɔ kɛ ya su kekletsɛmɛ ɔmɛ a nɔ.’ 9Lɔ ɔ he ɔ, benɛ gbɔkuɛ ngmlɛ enuɔtsɛmɛ ɔmɛ ba a, mɛ tsuo a na cedi kakaaka. 10Nɛ benɛ keklebi ɔmɛ ba a, a susu kaa a maa fɔ a nɔ ɔ nɔ; se mɛ hu a na cedi kakaaka. 11Se benɛ e su a dɛ ɔ, a pɛ ngɛ a nya he kɛ si we tsɛ ɔ, 12a ke: ‘Sekpɛtsɛmɛ nɛ ɔmɛ, ngmlɛfia kake kɛkɛ a tsu ni, nɛ o ha mɛ kɛ wɔ nɛ wa tsu ni je nami nɛ pɔ tɔ wɔ nɛ latsa tsa wɔ ɔ tsuo pɛ.’ 13Se e he nɔ nɛ e de a ti nɔ kake ke: ‘Ye huɛ, i pee we mo yayami ko; anɛ pi cedi kake nɛ i kɛ mo ye nya lo? 14Ngɔɔ nɔ́ nɛ ji o nɔ́ ɔ nɛ o ho. Se i suɔ kaa ma ha sekpɛ nɔ nɛ ɔ kaa bɔ nɛ i ha mo mo ɔ kɛ̃, 15Aloo i be he blɔ kaa i kɛ imi nitse ye nihi peɔ nɔ́ nɛ i suɔ lo? Anɛ ye mi mi jɔmi nɛ ɔ he je o hɛngmɛ tsu nɛ ɔ?’ ” 16Kikɛ nɛ ɔ, “Sekpɛtsɛmɛ ma plɛ kekletsɛmɛ, nɛ kekletsɛmɛ ma plɛ sekpɛtsɛmɛ.”
Yesu tu e gbenɔ he munyu nɔ nɛ ji si etɛ
(Marko 10.32-34; Luka 18.31-34)
17Nɛ benɛ Yesu yaa Yerusalem ɔ, e ngɔ e kaseli nyɔngma kɛ enyɔ ɔ kɛ ya se ngɛ blɔ ɔ kpɛti, nɛ e de mɛ ke: 18“Oʼɛ, wa yaa Yerusalem, nɛ a maa ngɔ Nɔmlɔ Bi ɔ ngɔ wo osɔfo nikɔtɔmahi kɛ mlaa tsɔɔli ɔmɛ a dɛ mi, nɛ a maa bu lɛ gbenɔ fɔ. 19Nɛ a maa ngɔ lɛ ngɔ ha majeli ɔmɛ, nɛ a ye e he fɛu, nɛ a fia lɛ kplibi nɛ a sɛu lɛ; nɛ ligbi nɛ ji ligbi etɛ ɔ a ma tle lɛ si ekohu.”
Nyɛ ko nɔbami
(Marko 10.35-45)
20Kɛkɛ nɛ Zebedeo bimɛ ɔmɛ a nyɛ kɛ e bimɛ nyumu ɔmɛ ba Yesu ngɔ ba kpla si nɛ e ba lɛ nɔ ko. 21Nɛ Yesu bi lɛ ke: “Mɛni o ngɛ hlae?” Yo ɔ he nɔ ke: “De nɛ ye bimɛ enyɔ nɛ ɔmɛ a ti nɔ kake nɛ hi o hiɛ ɔ nɔ, nɛ nɔ kake hu nɛ hi o muɔ nɔ ngɛ o matsɛ yemi ɔ mi.” 22Se Yesu he nɔ ke: “Nyɛ li nɔ nɛ nyɛ ngɛ bie ɔ. Anɛ nyɛ ma nyɛ kplu nɛ ma nu ɔ maa nu?” A de lɛ ke: “Wa ma nyɛ.” 23Nɛ e de mɛ ke: “Ye kplu ɔ nyɛ maa nu ji nɛ ɔ lɛɛ, se ye hiɛ ɔ nɔ kɛ ye muɔ nɔ himi ɔ, e pi ye nɔ nɛ i kɛ haa, se mohu nihi nɛ Tsaatsɛ ngɔ ha momo ɔ a nɔ ʼi.”
24Nɛ benɛ ni nyɔngma a nu ɔ, a muklii mi fu nyɛmimɛ enyɔ ɔmɛ. 25Lɔ ɔ he ɔ Yesu tsɛ mɛ kɛ ba e ngɔ, nɛ e de mɛ ke: “Nyɛ le kaa ma amɛ a nɔ ganɔ ɔmɛ yeɔ a nɔ, nɛ a kpɛti nimli ngua amɛ hu ngɛ he wami ngɛ a nɔ. 26E ko ba ja ngɛ nyɛ kpɛti; se nɔ tsuaa nɔ nɛ suɔ kaa e plɛ nɔmlɔ ngua ngɛ nyɛ kpɛti ɔ, le mohu e plɛ nyɛ sɔmɔlɔ. 27Nɛ nɔ tsuaa nɔ nɛ suɔ kaa e plɛ nɔkɔtɔma ngɛ nyɛ kpɛti ɔ, lɛ mohu e plɛ nyɛ tsɔlɔ. 28Kaa bɔ nɛ Nɔmlɔ Bi ɔ bɛ nɛ a sɔmɔ lɛ, se e ba sɔmɔmi mohu, nɛ e ngɔ e klaa a kɛ ha kaa kpɔmi nɔ kɛ ha nihi fuu ɔ.”
Yesu tsa hɛyuyuili enyɔ
(Marko 10.46-52; Luka 18.35-43)
29Nɛ benɛ a je Yeriko kɛ yaa a, asafo babauu nyɛɛ Yesu se. 30Nɛ oʼɛ nyumuhi hɛ yuyuili enyɔ hii si ngɛ blɔ ɔ tue, nɛ benɛ a nu kaa Yesu bee ɔ, a kpa ngmlɛɛ ke: “Naa wɔ mɔbɔ, Nyɔmtsɛ, David bi!” 31Se asafo ɔ ke a yi ke a ma a nya; se a kpa ngmlaa pe kekle ɔ ke: “Naa wɔ mɔbɔ, Nyɔmtsɛ, David bi!” 32Nɛ Yesu da si nɛ e tsɛ mɛ nɛ e ke: “Mɛni nyɛ ngɛ hlae nɛ ma pee ha nyɛ?” 33A de lɛ ke: “Nyɔmtsɛ, kaa a bli wa hɛngmɛ ɔmɛ!” 34Nɛ Yesu mi mi sa lɛ ngɛ a he, nɛ e ta a yɛngmɛ omɛ a he, nɛ amlɔ ɔ a hyɛ nɔ, nɛ a nyɛɛ e se.
Currently Selected:
Mateo 20: DAN77
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Dangme New Testament © United Bible Societies, 1977.
