Luka 21

Yalɔyo ɔ onia a

(Marko 12.41-44)

1Yesu wo e hɛ nɔ nɛ e na niatsɛmɛ nɛ a ngɔ a nike ni kɛ ngɛ onia daka a mi woe. 2Nɛ e na yalɔyo ohiafo ko hu ba nɛ e kɛ kaplɛ tsɔwi enyɔ nɛ sui pesewa ba wo mi. 3Nɛ e ke: “I ngɛ nyɛ dee anɔkuale mi ke: Kikɛmɛ a yalɔyo ohiafo nɛ ɔ kɛ fuu ba wo mi pe ni ɔmɛ tsuo; 4ejakaa ni ɔmɛ tsuo ɔ, nɔ́ nɛ a na nɛ be nɔ ɔ eko a kɛ ba wo Mawu nike ni ɔ mi ɔ nɛ, se nɔ nɛ ɔ lɛɛ, e hia mi ni nɛ e kɛ hyɛɛ e he nɔ ɔ tsuo e kɛ ba wo mi ɔ nɛ.”

Yesu tu sɔlemi we ɔ puɛmi he munyu

(Mateo 24.1-2; Marko 13.1-2)

5Benɛ ni komɛ ngɛ sɔlemi we ɔ he munyu tue, bɔ nɛ a kɛ tɛ nɛ ngɛ fɛu kɛ nike ni dla lɛ ɔ, e ke: 6“Enɛ ɔmɛ tsuo nɛ nyɛ ngɛ hyɛe nɛ ɔ, be maa ba nɛ a be e mi tɛ kake sie ngɛ eko nɔ nɛ a be tsitsɛɛe ngɔ fia si.”

Amanehlu kɛ yiwami

(Mateo 24.3-14; Marko 13.3-13)

7Nɛ a bi lɛ ke: “Tsɔɔlɔ, lɛɛ mɛni be ni nɛ ɔmɛ maa ba mi, nɛ mɛni okadi maa ba benɛ ni nɛ ɔmɛ maa ba mi ɔ?”

8Nɛ Yesu ke: “Nyɛɛ hyɛ saminya, konɛ a ko mlɔɔ nyɛ; ejakaa nihi fuu maa ba ngɛ ye biɛ mi, nɛ a ma de ke: ‘Ami ʼi;’ kɛ jeha nɛ ɔ: ‘Be ɔ su tã.’ Nyɛ ko bu mɛ tue. 9Nɛ ke nyɛ nu tahi kɛ atua tsɔmihi a he ɔ, nyɛ tsui ko po, ejakaa ja kikɛmɛ a ni nɛ ɔmɛ ba mi lolo, se kɛ̃ ɔ nyagbe ɔ sui lolo.” 10Kɛkɛ nɛ e de mɛ ke: “Ma maa te si ngɔ wo ma, nɛ matsɛ yemi hu maa te si ngɔ wo matsɛ yemi; 11nɛ zugba mimiɛmi nɛ nya wa maa ba hehi slɔɔtohi tsuo kɛ hwɔ kɛ gbenɔ hiɔhi, nɛ gbeye nihi kɛ okadi nguahi maa je hiɔwe kɛ ba.

12“Se loko enɛ ɔmɛ kulaa maa ba a, a maa nu nyɛ, nɛ a maa wa nyɛ yi mi, nɛ a maa ngɔ nyɛ ngɔ ha ngɛ kpe he ɔmɛ kɛ pamitsɛmɛ a tsuhi a mi, nɛ a ma kpaka nyɛ kɛ maa ya matsɛmɛ kɛ ganɔhi a hɛ mi ngɛ ye biɛ ɔ he? 13Nɛ enɛ ɔ ma ha nyɛ he blɔ kɛ ye ye he odase. 14Lɔ ɔ he ɔ nyɛɛ le ngɔ to, konɛ nyɛ ko hao nyɛ he ngɛ nɔ́ nɛ nyɛɛ kɛ ma fa nyɛ he ɔ he; 15ejakaa ma ha nyɛ nya kɛ ni lemi nɛ nyɛ henyɛli ɔmɛ tsuo be nya nyɛe maa da, nɛ a be nya nyɛe maa ku hulɔ. 16Se fɔli tete kɛ nyɛmimɛ kɛ wekuli kɛ huɛmɛ maa ngɔ nyɛ ngɔ ha, nɛ a ma ha a gbe nyɛ ti ni komɛ; 17nɛ nihi tsuo maa nyɛ nyɛ ngɛ ye biɛ ɔ he. 18Se nyɛ yi bwɔmi kake kike be laae. 19Nyɛ tsui si tomi nyɛ ma kɛ he nyɛ klaa amɛ a yi wami.”

Yesu tu Yerusalem puɛmi he munyu

(Mateo 24.15-21; Marko 13.14-19)

20“Ke nyɛ na kaa a bɔ sada wo Yerusalem he ɔ, lɛɛ nyɛ na le kaa e puemi be ɔ su. 21Jamɛ a be ɔ mi ɔ, nihi nɛ ngɛ Yudea a, a tu fo kɛ ya yoku ɔmɛ a nɔ, nɛ nihi nɛ ngɛ ma a mi ɔ, a je kpo nɛ nihi nɛ ngɛ kɔpe ɔmɛ a mi ɔ, a ko ba ma a mi. 22Ejakaa lueyemi ligbi ɔmɛ ji nɛ ɔmɛ nɛ, konɛ nihi kulaa nɛ a ngma a nɛ ba mi. 23Musu tloo yihi nɛ hɛɛ mi kɛ nyɛmɛ nɛ ngɛ nyɔ hae ngɛ jamɛ a ligbi ɔmɛ a mi ɔ. Ejakaa fimi nɛ nya wa maa ba zugba a nɔ, nɛ mi mi fumi hu maa ba kikɛmɛ a ma nɛ ɔ nɔ. 24Nɛ a maa nɔ ngɛ klaate nya, nɛ a maa ngɔ mɛ nyɔguɛ kɛ maa ya majemaje tsuo, nɛ majeli ɔmɛ maa naa Yerusalem nɔ kɛ maa su be nɛ majemajeli ɔmɛ a be ɔ maa su.”

Nɔmlɔ Bi ɔ bami

(Mateo 24.29-31; Marko 13.24-27)

25“Okadihi maa ba pu kɛ nyɔhiɔ kɛ dodoehi a mi, nɛ fimi maa ba majeli ɔmɛ a nɔ ngɛ zugba a nɔ, nɛ a maa do yoyooyo ngɛ wo kɛ oslɔkehi a pɛmi he; 26nɛ nimli maa hɛli ngɛ gbeye kɛ nihi nɛ ma je ɔ mi ɔ blɔ hyɛmi he; ejakaa a ma mimiɛ hiɔwe hewami ɔmɛ tete. 27Kɛkɛ ɔ, a maa na Nɔmlɔ Bi ɔ kaa e ma ngɛ bɔku mi kɛ hewami kɛ hɛ mi nyami babauu. 28Ke ni nɛ ɔmɛ bɔni mi bami ɔ, nyɛɛ da si tutuutu nɛ nyɛ wo nyɛ yi nɔ, ejakaa nyɛ kpɔmi ɔ ngɛ sue.”

Ngmɔkɔ tso ɔ he nikasemi

(Mateo 24.32-35; Marko 13.28-31)

29Nɛ Yesu bu mɛ abɛ ke: “Nyɛɛ hyɛ ngmɔkɔ tso ɔ kɛ tsohi tsuo kulaa; 30be mi nɛ a ngɛ ba sue lokoo ɔ, ke nyɛ na a, nyɛ nitsɛmɛ nyɛ le kaa latsa be su si ta. 31Ja nɔuu hu ke nyɛ na kaa ni nɛ ɔmɛ ngɛ mi bae ɔ, nyɛ na le kaa Mawu matsɛ yemi ɔ su si ta.

32“Niinɛ i ngɛ nyɛ dee ke: Kikɛmɛ a yi nɔ nɛ ɔ be bee, ja ni nɛ ɔmɛ tsuo kulaa ba mi lolo. 33Hiɔwe kɛ zugba maa be kɛ ho se ye munyu ɔmɛ be bee kɛ ho.”

E hia kaa a huɔ

34“Nɛ nyɛ hɛ nɛ hi nyɛ he nɔ konɛ jiklɔɔ yemi kɛ da demi kɛ nya mi ngma he haomi nɛ ko he nyɛ tsui nɛ jamɛ a ligbi ɔ ba ti nyɛ si tlukaa; 35ejakaa e maa ba nihi kulaa nɛ ngɛ zugba mluku ɔ tsuo nɔ ɔ nɔ. 36Lɔ ɔ he ɔ, nyɛɛ huɔ be tsuaa be nɛ nyɛɛ sɔle konɛ nyɛ nyɛ hihi nɛ maa ba nɛ ɔmɛ kulaa mi nɛ nyɛɛ je, nɛ nyɛ nyɛ Nɔmlɔ Bi ɔ hɛ mi nɛ nyɛɛ da.” 37Piani ɔ Yesu tsɔɔ ni ngɛ sɔlemi we ɔ, nɛ ke je jɔ ɔ, e yaa yoku nɛ a tsɛɛ lɛ Nuyoku ɔ nɔ nɛ e ya hwɔɔ. 38Nɛ mɔtu mla a, ma a tsuo baa e ngɔ ba buɔ lɛ tue ngɛ sɔlemi we ɔ.

Currently Selected:

Luka 21: DAN77

ማድመቅ

Copy