Luka 20

He blɔ nɛ Yesu ngɛ

(Mateo 21.23-27; Marko 11.27-33)

1E ba mi kaa ligbi ɔ eko nɔ benɛ Yesu ngɛ Sane Kpakpa a fiɛe kɛ ngɛ ma a tsɔɔe ngɛ sɔlemi we ɔ, osɔfo nikɔtɔtɔma amɛ kɛ mlaa tsɔɔli ɔmɛ kɛ nikɔtɔma amɛ ba e ngɔ, 2nɛ a ba de lɛ ke: “Tsɔɔ wɔ he blɔ nɛ o ngɛ he je nɛ o peɔ ni nɛ ɔmɛ, nɛ mɛnɔ ji nɔ nɛ ha mo kikɛmɛ a he blɔ nɛ ɔ?” 3E ha mɛ heto ke: “Imi hu ma bi nyɛ sane kake nɛ nyɛ ha mi heto: 4Yohane baptisimi ɔ nɛɛ, hiɔwe e je aloo nimli a dɛ mi e je?” 5Se a sa nya ngɛ a kpɛti ke: “Ke wa de ke e je hiɔwe ɔ, e ma de ke: ‘Mɛni he je nɛ nyɛ he we lɛ yi mɔ?’ 6Nɛ jeha nɛ ɔ ke wa de ke e je nimli a dɛ mi ɔ, ma a kulaa maa fia wɔ tɛ, ejakaa a kpa si kaa Yohane ɔ, gbalɔ ʼi.” 7Nɛ aha lɛ heto ke a li he nɛ e je. 8Nɛ Yesu de mɛ ke: “Lɛɛ imi hu i be nyɛ tsɔɔe nɔ́ he blɔ nɛ i ngɛ nɛ i kɛ peɔ ni nɛ ɔmɛ.”

Wai ngmɔ ɔ mi apaatsɛmɛ ɔmɛ a he abɛ ɔ

(Mateo 21.33-46; Marko 12.1-12)

9Yesu ya nɔ nɛ e bu ma a abɛ nɛ ɔ ke: “Nyumu ko pee wai ngmɔ nɛ e ngɔ ha huli apaa yemi, nɛ e doma, nɛ e se ya kɛ. 10Nɛ benɛ be ɔ su ɔ e tsɔ tsɔlɔ ko kɛ ya huli ɔmɛ a ngɔ konɛ a ha lɛ wai ngmɔ ɔ mi yiblii ɔ eko; se apaatsɛmɛ ɔmɛ fia lɛ ni, nɛ afie lɛ kɛ dɛ̃ gu. 11E kpale tsɔ tsɔlɔ kpa ko hu, se lɛ hu a fia lɛ ni, nɛ a pue e hɛ mi si, nɛ a fie lɛ kɛ dɛ gu. 12E kpale tsɔ nɔ nɛ ji etɛ; se lɛ hu a plaa lɛ, nɛ a tsitsɛɛ e kuɛ se kɛ je kpo 13Nɛ wai ngmɔtsɛ ɔ ke: ‘Kɛ ma pee kɛɛ? Ma tsɔ ye bi nɛ i suɔ ɔ; eko ɔ lɛɛ ke a na lɛ ɔ, a ma gbo lɛ zo.’ 14Se benɛ huli ɔmɛ na lɛ ɔ, a de a he ke: ‘Ni yelɔ ɔ ji nɛ ɔ nɛ; nyɛɛ ba nɛ nyɛ ha waa gbe lɛ, konɛ ni ɔmɛ nɛ pee wa nɔ.’ 15Lɔ ɔ he ɔ, a tsitsɛɛ e kuɛ se kɛ je wai ngmɔ ɔ mi nɛ a ya gbe lɛ. Lɔ ɔ he ɔ, kɛ wai ngmɔtsɛ ɔ maa pee mɛ kɛɛ? 16E ma ba kpata huli ɔmɛ a hɛ mi, nɛ e maa ngɔ wai ngmɔ ɔ ngɔ ha ni kpahi.” Se benɛ a nu ɔ a ke: “Kpaoo!” 17Se Yesu hyɛ mɛ kɛ kpe nɛ e ke: “Mɛni ji nɔ́ nɛ a ngma nɛ ɔ mɔ, ke:

‘Tɛ ɔ nɛ tsu fiali ɔmɛ sake fɔ he ɔ,

Kɔlɔ ɔ nɔuu lɛ plɛ kɔ nya tɛ nɛ ɔ nɛ.’

18Nɔ tsuaa nɔ nɛ maa nɔ tɛ nɛ ɔ nɔ ɔ, e mi ma tsɔtslɔɔ; se nɔ nɔ nɛ e maa nɔ ɔ, e maa wɛɛ lɛ mɔnyɔmɔnyɔ.”

Oniatsumi he sane

(Mateo 22.15-22; Marko 12.13-17)

19Osɔfo nikɔtɔma amɛ kɛ mlaa tsɔɔli ɔmɛ ngɛ hlae nɛ a nu Yesu ngɛ lɛ ngmlɛfia a nɔ nɔuu se a ya ye ma a gbeye, ejakaa a kɔ se kaa a he nɛ e bu kikɛmɛ a bɛ nɛ ɔ nɛ. 20Nɛ a wo e he ka, nɛ a tsɔ huɔli, nihi nɛ pee a he kaa dali, konɛ a wo e nya tso kpɛ benɛ pee nɛ a ngɔ lɛ ngɔ wo amlaalo hewami kɛ he blɔ ɔ dɛ mi. 21Nɛ a bi lɛ ke: “Tsɔɔlɔ, wa le kaa o tuɔ munyu nɛ o tsɔɔ ni dami nya, nɛ jeha nɛ ɔ hu o hyɛ we nimli a hɛ mi, se mohu anɔkuale mi o tsɔɔ Mawu blɔ ɔ ngɛ. 22Anɛ e da kaa wa tsuɔ onia haa Kaisare, aloo e dɛ?” 23Se benɛ Yesu kpa a ga a si ɔ, e de mɛ ke: 24“Nyɛɛ ngɔ cedi kɛ ba nɛ ma hyɛ! Mɛnɔ foni kɛ biɛ lɛ ngɛ nɔ nɛ ɔ?” Nɛ a ha lɛ heto ke: “Kaisare nɔ ʼi.” 25Nɛ e de mɛ ke: “Lɛɛ nyɛɛ ngɔ Kaisare nihi ngɔ ha Kaisare, nɛ Mawu nihi ɔ nyɛ ngɔ ha Mawu!” 26Nɛ a nyɛ we e nya tso kpɛ ko nɛ a wo ngɛ ma a hɛ mi, nɛ e heto ɔ pee mɛ nyakpe nɛ a ma a nya.

Ni gbogboehi a sitemi he sane

(Mateo 22.23-33; Marko 12.18-27)

27Nɛ Sadukifo ɔmɛ hu nɛ tsɔɔ kaa ni gbogboehi a si temi ko be ɔ, a ti ni komɛ ba e ngɔ nɛ a ba bi lɛ 28ke: “Tsɔɔlɔ, Mose ngma ha wɔ ke: ‘Ke nɔ ko nyɛmi nɛ ngɛ yo gbo nɛ e si we bi ɔ, e nyɛmi ɔ nɛ ngɔ e yo ɔ konɛ e wo nina ngɔ ha e nyɛmi ɔ.’ 29Jeha nɛ ɔ nyɛmimɛ kpaago hi si, nɛ a kpɛti nɔkɔtɔma a ngɔ yo, nɛ e gbo nɛ e si we bi. 30Nɛ e se nɔ ɔ ngɔ yo ɔ, nɛ lɛ hu e gbo nɛ e si we bi. 31Nɛ nɔ nɛ ji etɛ ɔ hu ngɔ lɛ, nɛ ja nɔuu ni kpaago ɔ tsuo pee; se a si we bimɛ nɛ a gbo. 32Nɛ mɛ tsuo a se ɔ yo ɔ hu ba gbo. 33Lɛɛ ni gbogboehi a si temi ɔ mi ɔ, a ti mɛnɔ yo e maa pee, ejakaa mɛ ni kpaago ɔ tsuo kɛ lɛ hi si?” 34Yesu ha mɛ heto ke: “Je nɛ ɔ mi bimɛ ngɔɔ yo, nɛ a kɛ yo haa gba; 35se nihi nɛ maa sa je nɛ ma a kɛ ni gbogboehi a si temi ɔ nami ɔ, a ngɔɛ yo, nɛ pohu a kɛ yo ha we gba; 36nɛ jeha nɛ ɔ hu a be gboe hulɔ, ejakaa a ngɛ kaa hiɔwe bɔfohi nɛ Mawu bimɛ ji mɛ, akɛnɛ si temi bimɛ ji mɛ he je ɔ. 37Se kaa ni gbogboehi maa te si ekohu ɔ, Mose nitsɛ tsɔɔ ngɛ hue kpɔ ɔ sane ɔ mi benɛ e tsɛ Mawu ke, Abraham Mawu kɛ Isak Mawu kɛ Yakob Mawu ɔ. 38Mawu ɔ, e pi ni gbogboehi a Mawu, se mohu hɛ kali a Mawu ji lɛ; ejakaa e hɛ mi ɔ nihi tsuo kulaa hɛ ngɛ.” 39Se mlaa tsɔɔli ɔmɛ a ti ni komɛ he nɔ nɛ a de lɛ ke: “Tsɔɔlɔ, o munyu ɔ ngɔ.” 40Nɛ a kɛ́ lɛ sane ko bimi hu.

Mesia a he sane

(Mateo 22.41-46; Marko 12.35-37)

41Nɛ Yesu bi mɛ ke: “Kɛ pee kɛɛ nɛ a deɔ ke Kristo ɔ David bi ji lɛ ɔ? 42Ejakaa David nitsɛ de ngɛ La womi ɔ mi ke:

‘Nyɔmtsɛ ɔ de ye Nyɔmtsɛ ɔ ke:

Hii ye hiɛ ɔ nɔ,

43Kɛ maa su be nɛ ma ngɔ o henyɛli ɔmɛ

Ngɔ pee o nane si sɛ̃.’

44Ke David tsɛ lɛ ‘Nyɔmtsɛ ɔ’ lɛɛ kɛ peɔ kɛɛ nɛ e ji e bi mɔ?”

Yesu bɔ mlaatsɔɔli ɔmɛ a he kɔkɔ

(Mateo 23.1-36; Marko 12.38-40)

45Ma a tsuo hɛ mi nɛ Yesu de e kaseli ɔmɛ ke: 46“Nyɛ hɛ nɛ hi nyɛ he nɔ ngɛ mlaa tsɔɔli ɔmɛ a he, se a suɔ tade wuyawuyahi a mi nyɛɛmi, nɛ a suɔ jua nɔ ngamihi kɛ nikɔtɔmahi a sihi hehi ngɛ kpe he ɔmɛ kɛ okplɔɔ yi himi ke a tsɛ ni yemi; 47nihi nɛ mii yalɔyi a wehi, nɛ lakpa tomi he ɔ, a sɔlee sɔlemi gagaagahi ɔ; ni nɛ ɔmɛ a fɔ bumi maa pe nine.”

Currently Selected:

Luka 20: DAN77

ማድመቅ

Copy