Luka 19

Yesu kɛ Zakeo

1Yesu ya sɛ Yeriko nɛ e ngɛ mi poe kɛ yaa. 2Nɛ oʼɛ, nyumu ko ngɛ lejɛ ɔ nɛ a tsɛɛ lɛ Zakeo, nɛ onia tsulɔ nɔkɔtɔma kɛ niatsɛ ji lɛ. 3E ngɛ hlae nɛ e na Yesu nɛ e le lɛ, se nihi babauu ɔ he ɔ, e nyɛ we ejakaa nɔmlɔ kpiti ji lɛ. 4Lɔ ɔ he ɔ, e sa fo kɛ sɛ hlami nɛ e ya kuɔ sikamore tso ko, konɛ e hyɛ lɛ, ejakaa lejɛ ɔ blɔ e maa gu. 5Nɛ Yesu su lejɛ ɔ, e wo e hɛ nɔ, nɛ e de lɛ ke: “Zakeo, o he nɛ esɔ nɛ o kple si, ejakaa o we ɔ mi ma to mwɔnɛ ɔ.” 6Nɛ Zakeo he sɔ kɛ kple si nɛ e fua Yesu atuu. 7Nɛ benɛ ni ɔmɛ na a, mɛ tsuo a tu munyu huitihuiti ke: ‘E ya to nyumu yayami peelɔ ngɔ.” 8Se Zakeo da si nɛ e de Nyɔmtsɛ ke: “Nyɔmtsɛ, oʼɛ, ma ngɔ ye nihi fa ngɔ ke ohiafohi, nɛ ke i kɛ yaka nya pomi kpɔ nɔ ko nɔ́ ko ngɛ e dɛ ɔ, ma ku ngɔ bɔ he si eywiɛ ha lɛ.” 9Nɛ Yesu de lɛ ke: “Mwɔnɛ yi wami hemi ba we nɛ ɔ mi, ejakaa lɛ hu Abraham bi ji lɛ. 10Ejakaa Nɔmlɔ Bi ɔ ba nɔ nɛ laa a hlami kɛ yi wami hemi.”

Sika kpɔ ɔ he abɛ ɔ

(Mateo 25.14-30)

11Benɛ a ngɛ ni nɛ ɔmɛ tue bue ɔ, e bu abɛ ko kɛ si nɔ, ejakaa e su Yerusalem tã nɛ a susu kaa amlɔ ɔ nɔuu Mawu matsɛ yemi ɔ ma je e he si. 12Lɔ ɔ he ɔ e ke: Ablade ko doma kɛ ho lokoo ya konɛ e ya ngɔ e matsɛ yemi nɛ e kpale kɛ ba. 13E tsɛ e sɔmɔli nyɔngma nɛ e je cedi nyingmi enyɔ ngɔ ha mɛ; nɛ e de mɛ ke: ‘Nyɛ plɛ he kɛ ya su ma ba.’ 14Se e ma mi bi ɔmɛ nyɛ lɛ, nɛ a tsɔ tsɔli kɛ fie e se ke: ‘Wa sume nɛ ɔ nɔ nɛ o ba ye wa nɔ matsɛ.’

15“Nɛ e ba mi kaa benɛ e nine ya su matsɛ yemi ɔ nɔ nɛ e kpale e se kɛ ba a, e fa ke a tsɛ jamɛ a sɔmɔli ɔmɛ nɛ e ngɔ e sika a ngɔ ha a kɛ ba, konɛ e na nɔ́ nɛ a na ngɛ sika a he plɛmi mi’ 16Nɛ kekle nɔ ɔ ba ba de ke: ‘Nyɔmtsɛ, sika a fɔ nyɔngma.’ 17Nɛ e de lɛ ke: ‘Ayekoo, sɔmɔlɔ kpakpa, akɛnɛ o ye anɔkuale ngɛ nɔ nyafii kulaa mi he ɔ, ye ma nyɔngma nɔ.’ 18Nɛ nɔ nɛ ji enyɔ ɔ ba ba de ke: ‘Nyɔmtsɛ, o sika a fɔ enuɔ.’ 19Nɛ lɛ hu e de lɛ ke: ‘Mo hu ye ma enuɔ nɔ.’ 20Nɛ nɔ kake ɔ hu ba ba de ke: ‘Nyɔmtsɛ, oʼɛ o sika a nɛ i fi ngɔ wo duku mi ngɔ to ɔ ji nɛ ɔ nɛ; 21i ya ye mo gbeye ejakaa o yi mi wa; o woɔ nɔ́ nɛ o ngɔ fɔɛ si, nɛ o kpaa nɔ́ nɛ o du we.’ 22Se nyɔmtsɛ ɔ de lɛ ke: ‘Sɔmɔlɔ yayami, mo nitsɛ o nya mi munyu ma kɛ kojo mo.’ Nɛ o le kaa yi mi walɔ ji mi; i woɔ nɔ nɛ i ngɔ fɔɛ si, nɛ i kpaa nɔ nɛ i du we ɔ, 23mɛni he je mɔ nɛ o kɛ ye sika a ya ha we tsakeli ɔmɛ, konɛ ke i ba a nɛ ma ba he ye ni kɛ hekpa?’ 24Kɛkɛ nɛ e de nihi nɛ daa si ngɛ e kasa nya a ke: ‘Nyɛ kpɔ sika a ngɛ e dɛ, nɛ nyɛ ngɔ ha nɔ nɛ ngɛ cedi nyingmi enyɔ ɔ.’ 25Nɛ a de lɛ ke: ‘Nyɔmtsɛ, e ngɛ cedi nyingmi enyɔ.’ 26‘I ngɛ nyɛ dee ke, nɔ tsuaa nɔ nɛ ngɛ nɔ́ ko ɔ, lɛ nɔuu a ma ha; se nɔ nɛ be nɔ́ ko ɔ, nɔ́ nɛ e ngɛ ɔ tete a ma kpɔ ngɛ e dɛ. 27Se jamɛ a ye henyɛli ɔmɛ nɛ sume kaa ma ye a nɔ matsɛ ɔ, nyɛɛ ngɔ mɛ kɛ ba hiɛ ɔ nɛ nyɛ ba gbe mɛ ngɛ ye hɛ mi.’ ”

Yesu Yerusalem sɛmi

(Mateo 21.1-11; Marko 11.1-11; Yohane 12.12-19)

28Nɛ benɛ Yesu de enɛ ɔ ɔ, e be sɛ hlami kɛ ma Yerusalem blɔ ɔ nɔ. 29Nɛ e ba mi kaa benɛ e su Betfage kɛ Betania ngɛ yoku nɛ a tsɛɛ Nuyoku ɔ he ɔ, e tsɔ e kaseli ɔmɛ a ti ni enyɔ; 30e ke: “Nyɛɛ ya kɔpe nɛ ngɛ nyɛ hɛ mi ɔ mi, nɛ ke nyɛ sɛ mi ɔ, nyɛ maa na teji bi nɛ nɔ ko hi e nɔ hyɛ muɔɔ si ngɛ lejɛ ɔ; nyɛɛ pɛne lɛ nɛ nyɛɛ ngɔ lɛ kɛ ba. 31Nɛ ke nɔ ko bi nyɛ ke: ‘Mɛni he je nyɛ ngɛ lɛ pɛnee’ ɔ, nyɛ de lɛ ke: ‘E he ngɛ Nyɔmtsɛ ɔ hiae.’ ” 32Nɛ ninɛmɛ nɛ a tsɔ ɔ pue nɔ kɛ ho, nɛ a ya na kaa bɔ nɛ e de mɛ ɔ. 33Se benɛ a ngɛ teji bi ɔ pɛnɛe ɔ, nɔtsɛ ɔ bi mɛ ke: “Mɛni he je nyɛ ngɛ teji bi ɔ pɛnee?” 34Nɛ a ke: “E he ngɛ Nyɔmtsɛ ɔ hiae.” 35Nɛ a kɛ lɛ ba Yesu ngɔ nɛ a kɛ a tadehi pue teji bi ɔ nɔ, nɛ a wo Yesu ngɔ hi nɔ. 36Nɛ benɛ e yaa a, a kɛ a tadehi ha blɔ ɔ nɔ. 37Nɛ benɛ e su he nɛ a kpleɔ Nuyoku ɔ ngɛ ɔ, e kaseli asafo ɔ tsuo bɔni nyami, nɛ a je Mawu yi wawɛɛ ngɛ he wami ni tsumihi tsuo nɛ a na a he; 38a ke: “A gbaa matsɛ nɛ ma ngɛ Nyɔmtsɛ ɔ biɛ mi ɔ, hejɔmi ngɛ hiɔwe nɛ hɛ mi nyami ngɛ hiɔwe lokoo!”

39Nɛ Farisifo ɔmɛ a ti ni komɛ je asafo ɔ mi de lɛ ke: “Tsɔɔlɔ, ka o kaseli ɔmɛ.” 40Se Yesu he nɔ nɛ e de mɛ ke: “I ngɛ nyɛ dee ke, ke ni ne ɔmɛ ma ma a nya a, lɛɛ tɛhi ma kpa ngmlaa.”

Yesu fo ya pue Yerusalem nɔ

41Nɛ benɛ Yesu su ta nɛ e na ma a, e fo ya pue e nɔ, 42nɛ e ke: “E ji ngɛ o ligbi nɛ ɔ nɔ ɔ, o na le nihi nɛ hi ha o he jɔmi jinɛ saii! Se jeha nɛ ɔ a ngɔ laa mo. 43Ejakaa o ligbi hi ma, nɛ o henyɛli ɔmɛ maa tsua muɔ ngɔ wo o he, nɛ a maa po klaangma ngɔ wo o he, nɛ a ma sa o yi ngɛ he tsuaa he, 44nɛ a maa ngɔ mo ngɔ fia si kɛ o bimɛ nɛ ngɛ o mi ɔ, nɛ a be tɛ kake sie ngɛ eko nɔ ngɛ o mi, ejakaa o yo we o slaami be ɔ!”

Yesu ya sɔlemi we ɔ

(Mateo 21.12-17; Marko 11.15-19; Yohane 2.13-22)

45Nɛ Yesu ya sɔlemi we ɔ nɛ e bɔni nihi nɛ ngɛ ni juae ngɛ mi ɔ fiemi; 46e de mɛ ke: “A ngma ke: ‘Ye we ɔ, sɔlemi we ʼi,’ se nyɛɛ lɛɛ nyɛɛ ngɔ pee ojofiali a kplo!”

47Nɛ Yesu ya tsɔɔ ni daa ngɛ sɔlemi we ɔ; se osɔfo nikɔtɔma amɛ kɛ mlaa tsɔɔli ɔmɛ kɛ ma a mi nikɔtɔma amɛ ngɛ hlae nɛ a kpata e hɛ mi; 48se a li blɔ nɔ nɛ a maa gu, ejakaa ma mluku ɔ tsuo heɔ lɛ yeɔ, nɛ a buɔ lɛ tue.

Currently Selected:

Luka 19: DAN77

ማድመቅ

Copy