Gɔ̃mèjèje be Xoma 37
37
Yakɔb bu èvia, Yosɛ̀f
1Yakɔb yì sò àxue ɖo Kanàn nyigbã ji, àfi kè ètɔa nɔ̀ va yìa. 2Ekèa ye nyi Yakɔb be xòmèa.
Yosɛ̀f ku drɔ̃wo
Ekè Yosɛ̀f ɖo èpè woeadrɛ̃a, e kplɔ̀nà fòfoawo do yì nana ènuɖùɖu àlɛ̃awo. Yosɛ̀f nyi ɖèkajɛvi kè kplɔ̀nà Bilhà ku Zilpà kèwo nyi ètɔa be èsrɔ̃wo be èvi ŋusùwo do yìnà. E va gblɔ̃nà woabe ènyà kpòtoewo na woa tɔ. 3Izràɛl kè gbà tɔ̀ Yakɔb-a, lɔ̃nà Yosɛ̀f be ènyà gbɔ wu fòfoawo kpata, ɖo e jì e ya lè yebe sĩsĩ mè. E tɔ̃ èfìɔvi be àwù àbɔ dìdi na ɛ̀, 4eye fòfoawo kpɔ be e lɔ̃ yebe ènyà gbɔ sɔ wu yèwo kpata. Wo crì yebe ènyà gbɔ eye wo mu gbà pònà nupo na ɛ̀ blɛ̀wù ò. 5Yosɛ̀f kudrɔ̃ eye e ɖè è gblɔ̃ na fòfoawo, wo gbà ɖèvuɛ̃ na ɛ̀ wu sã. 6E gblɔ̃ na wo be: “Mì ɖoto ne mìa sè èdrɔ̃ kè mù kua ɖa. 7Mi le bla èlù be ègbewo lè àgblè mè eye zè ɖèkaa, èlù-gbe nyèa sitè, jɔ̀ tututu. Mìa tɔ̀awo va trɔ do è eye wo do èta gũ na ɛ̀. 8Eye fòfoawo ɖo e ŋuti na ɛ̀ be: “Wò ji be yèa ɖùfìɔ ɖo mia ji ne yèa kplɔ̀ mi sìgbè àpetɔ nènea?” Kù ɖo yebe èdrɔ̃wo ku yebe nupowo ŋutia, wo gbà crì wu sãa. 9Yosɛ̀f gbà kudrɔ̃ bu ke eye e gbà gblɔ̃ na fòfoawo be: “Mì ɖoto, mù gbà kudrɔ̃ bu ke: dɔ̃ŋùkusu, wètri ku wètrivi woeɖèkawo do èta gũ na mù.” 10E yì gblɔ̃ ɛ̀ na ètɔa cã; kè e sèa, ètɔa gbe ènyà na ɛ̀ gblɔ̃ be: “Èdrɔ̃ kɛ ŋùkumè wò ku ŋua ò! Ènyè, ènɔ̀ wò ku fòfo wòwo, mi la va do èta gũ na wòa?” 11Fòfoawo le hùãŋu ì, vɔ̀a ètɔa le ènyà kèa ɖo èta mè.
Wo le Yosɛ̀f sɔ sà
12Fòfoawo jo yì Sikɛ̀m be ègbàji, kplɔ̀ woa tɔ be èlãha yì ènu ɖùgbe. 13Eye Yakɔb gblɔ̃ na Yosɛ̀f be: “Fòfo wòwo mu yì ènuɖùɖu na gbe èlãha woa? Va ma dɔ̃ wò ɖoɖa woa gbɔ.” E ɖo e ŋuti be: “Ènyè yekè!” 14E gblɔ̃ na ɛ̀ be: “Va yì kpɔ àlekè fòfo wòawo fɔ̃ ɖo ku èlãha ne wòa va gblɔ̃ na mù.” So kaka Hebrɔ̀n be bàlìa mè ye be dɔ̃ ɛ̀ so eye Yosɛ̀f zɔ̃ va ɖo Sikɛ̀m. 15Ŋusù ɖe kè ɖo e ŋuti wàlɛbɛ kè be le dã lè ègbà jia eye e biɔ ɛ̀ sè be: “Nukɛ wò le ji ò?” 16E ɖo e ŋuti be: “Mù le ji fòfo nyèwo. Fiɔ mù àfi kè wo lè ku èlãha.” 17Ŋusùa ɖo e ŋuti na ɛ̀ be: “Wo jo lè fikèa, ɖo mù le sè wo gblɔ̃ be: “mi yì Dotàn be èdùa mè.” Yosɛ̀f jè fòfoawo yomè, yì kpɔ wo lè Dotàn. 18Wo kpɔ ɛ̀ ɖoɖa. Keŋu gbɔ̀xue be la va ɖo woa gbɔa, wo blase be yèwo la wù ì. 19Wo gblɔ̃ na woa nɔ̀nɔwo be: “Kpɔ èdrɔ̃kutɔa gbãnà. 20Gàmèa yekè! Mì na mia wù ì sɔ dà ɖo èdo mè. Mi la gblɔ̃ be ègbemèlã wɔ̀adã ɖe vũvũ ì ne mia kpɔ ènu kè yebe drɔ̃wo la teŋu wɔ̀a ɖa!” 21Kè Rubɛ̀n sè ènyà kèa, e ji be yèa hlùɛ̃ lè woa simè; e gblɔ̃ be: “Mi mu gbà tɔ àsi yebe àgbè ŋuti ò.” 22Ne bèa ɖe è lè woabe àsi mè eye bèa kplɔ̀ ɛ̀ yì na ètɔa, Rubɛ̀n gblɔ̃ na wo be: “Mì mu gbà kɔ̀ yebe èhũ ɖo ànyigbã ò. Mì yì sɔ ɛ̀ dãŋùgbe ɖo èdo kè lè zògbè jia mè kpò ne mì mu gbà tɔ ɛ̀ àsi ò.” 23Vɔ̀, ekè Yosɛ̀f va ɖo woa gbɔa, wo ɖè yebe èfìɔvi be àwù vlàyà kè lè e ŋutia na ɛ̀. 24Wo le è, sɔ ɛ̀ yì dãŋùgbe ɖo èsìdo mè, èsìdo kèa mè pu ɖo èsì mu gbà lè e mè ò. 25E yomè a, wo va bɔ̀bɔ̀ nɔ̀ ànyi le ɖùnu. Ekè wo kɔ ŋùkumè yì jia, wo kpɔ Ismàɛltɔwo be kèkewo gbãnà, àmè kèwo so Gilead be èdù mè eye wo do àŋɔ̀-rɔbà, Gumi àlo ènutrenu ku làdanùm be àgbã na woabe èsɔ-kpovènɔ̀awo sɔ le yì Ejiptè-nyigbã ji. 26Yudà gblɔ̃ na nɔ̀viawo be: “Àlè kɛ ye la nyi be mia wù mia nɔ̀via ne mia wla yebe èhũ ò? 27Mi yì sà ɛ̀ na Ismàɛltɔwo eye mi mu gbà doàlɔ̀ e ŋuti ò, ɖo mia nɔ̀via, miabe èhũ ke be nyi.” Eye nɔ̀viawo sè yebe ègbè. 28Madìan be àsìsàtɔ kèwo va le yìa, ɖè Yosɛ̀f to lè èdoa mè eye wo sà ɛ̀ klòsalò ga èwì na Ismàɛltɔwo eye wo kplɔ̀ ɛ̀ yì Ejiptè-nyigbã ji. 29Ekè Rubɛ̀n trɔ va èdoa toa, mu gbà kpɔ Yosɛ̀f lè èdoa mè ò. E zɛ̃ yebe àwù 30eye e trɔ yì nɔ̀viawo gbɔ gblɔ̃ be: “ɖèvia mu gbà lè èdoa mè ò, fikɛ mù la yì ji ì lè fifì ò?” 31Wo sɔ Yosɛ̀f be èfìɔvi be àwùa sɔ nyrɔ̃ ɖo ègbɔsu kè wo wùa be èhũ mè. 32Wo sɔ àwù pò èhũa ɖoɖa le gblɔ̃ be: “Mi kè ɖo àwù kèa ŋuti, kpɔ ɛ̀ ɖa be èvi wò tɔ̀ ye be nyi mà a?” 33E kpɔ ɛ̀ jèsi eye e do àpa be: “Ekèa ye nyi èvi nyè be àwù vlàyà! Èlã wɔ̀adã ɖe vũvũ ì; wo flì Yosɛ̀f na mù!” 34Yakɔb zɛ̃ yebe àwù lè èkɔ̀, tà kòtòku ɖo àlì eye e lòfũ na èvia xɔ̀ ŋùkèkè sùgbɔ. 35Ne èvia ŋusùwo ku nyɔ̃nùwo va be yèwoa fakɔ na ɛ̀a, e gbena gblɔ̃nà be: “Èfũ kèa mè ye mù la yì kpɔ èvi nyèa lè èkuwode lè.” Eye ètɔa fã èvia Yosɛ̀f ŋutɔ. 36Eye Madìantɔwo yì sà Yosɛ̀f na Potifàr lè Ejiptè-nyigbã ji. Potifàr kè nyi Faraɔ̀n be kobonɔ̀a, nyi èfìɔsa ji kpɔtɔwo be èga.
Currently Selected:
Gɔ̃mèjèje be Xoma 37: GEN
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Mina Bible © Bible Society of Togo, 2014.