Gɔ̃mèjèje be Xoma 38
38
Yudà ku èvia ŋusùwo
1Vɔ̀ lè gà ŋua mèa, Yudà jo lè nɔ̀viawo gbɔ yì Adulàm be ŋusù ɖe kè wo yɔna be Hiràa gbɔ. 2Lè funua, Yudà kpɔ Kanàntɔ kè wo yɔna be Cuà be èvi nyɔ̃nùa. E kplɔ̀ ɛ̀, si, eye be dɔ̃ kudo è, 3e fɔfu eye e jì ŋusùvi kè Yudà yɔ be Ɛr. 4Nyɔ̃nùa gbà jì ŋusùvi bu kè e ɖo nyikɔ na be Onàn. 5E yomè a, e gbà jì ŋusùvi ètɔ̃gɔ̃a eye be yɔ ɛ̀ be Celà. Kèziv be èdùa mè ye Yudà lè, eye wo jì Celà.
6Eye e kplɔ̀ Tamàr tùgbɛ̀jɛvia na Ɛr èvia cucugbãa. 7Yudà be èvi cucugbãa, Ɛr nyi àmè bàɖà lè Tɔhonɔ̀ be ŋùmè, eye be na e ku. 8Yudà gblɔ̃ na Onàn be: “Yì dɔ̃ ku fòfo wò kè kua be èsrɔ̃a. Wɔ̀ kudo è sìgbè lekè e jè nène, ne wòa do xòmè na fòfo wòa.” 9Vɔ̀ ekè Onàn nya be jìjimèa mu la va nyi yè tɔ̀ òa, ne e yì le dɔ̃ ku fòfoa be èsrɔ̃a, e ɖènà èfudodo be èsìa kɔ̀nà ŋùgbe, ne mu gbà do xòmè na fòfoa ò. 10Ènu kè be le wɔ̀a nyi ènu bàɖà lè Tɔhonɔ̀ be ŋùmè, eye be na e cã ku. 11Yudà va gblɔ̃ na ètoyɔvia Tamàr be: “Yì nɔ̀ àhòvɔa mè lè ètɔ wò be àxomè kaka ne èvi nyè Celà bèa sĩ.” Tututu ye be gblɔ̃ ekèa ɖo be: “Mu nyɔ be ɖèvi kèa cã bèa gbà ku sìgbè fòfoawo ke nène ò!” Tamàr jo yì ci ètɔa be àxomè.
12Àzã fuuwo va yì eye Cuà be nyɔ̃nùvi kè nyi Yudà be èsrɔ̃a ku. E kè wo ɖo àsi àkɔ na ɛ̀ vɔ̀a, Yudà ku èxlɔ̃a Hirà Adulàmtɔ a, wo yì Timnà be èdùa mè lè yebe èlãha be èfukpàtɔwo gbɔ. 13Wo yì sìa Tamàr be: “Kpɔ, èto wò yì Timnà be èdùa mè ne yebe èlãha be èfukpàkpa.” 14E ɖè yebe àhòvɔa dà ɖɛ eye e sɔ ŋùmèxenu cɔ̃ ŋùkumè ne wo mu gbà jèsi ò, e yomè a e yì nɔ̀ ànyi lè Ènayìm be kɔpe kè lè Timnà be èmɔ̃ jia be mɔnu. Ɖo e nya nyuɛ̃ ɖe be Celà sĩ vɔ̀, co Yudà mu sɔ yè sɔ na ɛ̀ ne bèa ɖè ò. 15Kè Yudà kpɔ ɛ̀a, e kpɔ ɛ̀ sìgbè àhasìtɔ nène ɖo e sɔ ènu cɔ̃ ŋùkumè. 16E zɔ̃ yì e gbɔ lè èmɔ̃a tomè gblɔ̃ na ɛ̀ be: “Fifìa mù ji be ma dɔ̃ ku wò!” Ɖo, mu kpɔ ɛ̀ jèsi be yèbe ètoyɔvi ye ò. Tamàr ɖo e ŋuti be: “Nukɛ wò la na mù ne wò dɔ̃ ku mù ò?” 17E gblɔ̃ be: “Mù la sɔ àlɛ̃nɔvi ɖèka ɖoɖa wò.” Tamàr yì e ji be: “Mù la lɔ̃ ne wò sɔ ènu ɖe sɔ ɖo èkpe e ji na mù kaka va ɖo gà ŋua mèa.” 18E gblɔ̃ be: “Àwòbanu kɛ ye mù la na wò ò?” E ɖo e ŋuti be: “Àpo àlɔ̀ga tu ènu jia, ègojiblanu wòa, ku èkpò kè lè àsi na wòa ye.” Yudà sɔ wo sɔ na, dɔ̃ kudo è eye e fɔfu na ɛ̀. 19Tamàr sitè e yomè jè èmɔ̃ eye kè be ɖè ŋùmèxenua joa, e trɔ sɔ àhò be àwùa do.
20Yudà sɔ àlɛ̃nɔvia na èxlɔ̃a kè so Adulàm-a, dɔ̃ ɛ̀ ɖoɖa nyɔ̃nùa gbɔ ne bèa xɔ̀ àwòbanuawo va. Èhlɔ̃a mu va yì kpɔ nyɔ̃nùa lè funu ò, 21eye e biɔ àmè kèwo lè funua gblɔ̃ be: “Fikɛ ye àhasìtɔ kè lè Ènayìm be èmɔ̃ jia lè ò?” Wo ɖo e ŋuti be: “Àhasìtɔ ɖekpe mu nɔ̀ funu kpɔ ò”. 22E trɔ va Yudà gbɔ eye e va gblɔ̃ na ɛ̀ be: “Nyè mu kè ɖo e ŋuti ò, eye àmè kèwo lè funua, gblɔ̃ be àhasìtɔ ɖekpe mu nɔ̀ funua kpɔ ò.” 23Yudà yì e ji be: “E nya wɔ̀ ye! Mi mu gbà do nupo na mia ɖokoe ò, mù sɔ àlɛ̃nɔvia ɖoɖa eye wò yì vɔ̀ mu lè funua ò!”
24Vɔ̀ wètri ètɔ̃ yomè a, wo va sìa Yudà be: “Tamàr, ètoyɔvi wòa yì wɔ̀ àhasì, wu ekèa, e fɔfu kpe è!” Yudà ɖè ègbè be: “Wo ne ɖè è to eye woa tɔ ɛ̀ èzò!”
25Wàlɛbɛ kè wo le ɖè è toa, e dɔ̃ àmè ɖoɖa ètoa gblɔ̃ be: “Ŋusù kè tɔ̀ ye nyi ènu kèawoa ye mù fɔ èfua na.” E yomè a, e gblɔ̃ be: “Jè àgbàgba ne wòa ji àmè kè tɔ̀ ye nyi àlɔ̀gàvi tu ènu ji, ègojiblanu ku èkpò kèawo!” 26Yudà kpɔ wo jèsi eye e gblɔ̃ be: “E wɔ̀ ànùkua wu mù ɖo nyè mu sɔ ɛ̀ na èvi nyè Celà be ɖè ò.” Vɔ̀, e yomè a, mu gbà dɔ̃ kudo è gbèɖe ò.
27Lè yebe èvijìji be gàmèa, wo kpɔ be vènàvi ye be le ja jì. 28Ekè wo le jì èviawo na ɛ̀a, ɖèvi ɖèka ɖè àlɔ̀ to eye nyɔ̃nù kè le ji èvia na ɛ̀a, sɔ èkà jɛ̃ bla ɖo yebe àlɔ̀tinu gblɔ̃ be: “Ekèa ye to cucugbã.” 29E yomè a, e trɔ ŋlɔ̃ yebe àlɔ̀a eye nɔ̀via ye wo va jì cucugbã. Nyɔ̃nùa gblɔ̃ be: “Èmɔvi kè wo ɖèa be gɔ̃mè ɖe?” Eye wo yɔ ɖèvia be nyikɔ be Perɛ̀s, ekè gɔ̃mè ye nyi èmɔ̃vi ɖèɖe. 30Ɖèvi kè be àlɔ̀tinu wo bla èkà jɛ̃ ɖoa, cã va to e yomè, eye wo yɔ ɛ̀ be Zeràh.
Currently Selected:
Gɔ̃mèjèje be Xoma 38: GEN
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Mina Bible © Bible Society of Togo, 2014.