Gɔ̃mèjèje be Xoma 12
12
ABRÀHAM BE ÈDƆA BE GƆ̃MÈJÈJE
Mawu yɔ Abràm
1Mawu gblɔ̃ na Abràm be: “To jo lè àpo èdù mè, lè àpo xòmè mè ku lè ètɔ wò be àxomè, yì èdù kè mù la sɔ fiɔ wòa mè. 2Mù la sɔ wò wɔ̀ dùkɔ̃ gã ɖe, eye ma tu sì na wò. Mù la trɔ nyikɔ wò wɔ̀ nyikɔ ɖìnyi, sɔ tu sì na dùkɔ̃wo. 3Mù la tu sì na àmè kèwo la tu sì na wòa, àmè kè la sɔ wò pò gbɛ̀lɛa, ma sɛ̃kpɛ̃ na ɛ̀; to ji wò ye xòmè kèwo lè ànyigbã kpata jia, la kpɔ sìtu xɔ̀.”
4Abràm jo sìgbè àlekè Tɔhonɔ̀ gblɔ̃ na ɛ̀a nène, eye Lɔt kplɔ̀ ɛ̀ do. Abràm xɔ̀ èpè èkà takpo ci woeàtɔ̃ (75) wàlɛbɛ kè be jo lè Haràn be ànyigbã jia. 5E kplɔ̀ èsrɔ̃a Saraì ku àtàvi yɔvia Lɔt ɖo ŋuti. E sɔ yebe àdɔ̀kùnuwo, e kplɔ̀ àmè kèwo ji be kpɔna lè Haràn ɖo àsi. Wo jo tùtà Kanàn nyigbã ji.
Abràm lè Kanàn ku Ejiptè
Wo va yì ɖo Kanàn nyigbã ji. 6Abràm to èdùa mè kaka yì àfi kè wo yɔna be Sikɛ̀m, kaka yì Mɔ̀re be lokòtia gbɔ. Kanàntɔwo lè ànyigbã ji vɔ̀.
7Tɔhonɔ̀ ze ɖo Abràm ji eye e gblɔ̃ be: “Àpo jìjimèviwo ye mù la sɔ ànyigbã kèa na.” Funua ye Abràm li vɔsakpe na Tɔhonɔ̀ kè ze ɖo e jia lè. 8So funua, e yì èto ji lè Betɛ̀l be èwèzɛ̃pe. E tù yebe gòxɔa ɖo Betɛ̀l lè èwèɖoxɔ̀pe ku Aì lè èwèzɛ̃pe dòmè, e li vɔsakpe ɖèka ɖo funua na Tɔhonɔ̀ eye e pòmlã Tɔhonɔ̀ be nyikɔ. 9E yomè a, Abràm tùtà Nègev lɔ̀ge le to jɛ̃gbɔ̃pewo ɖèka-ɖèka.
10Àdɔ̀ va to lè èdùa mè eye Abràm jo yì Ejiptè-nyigbã ji, sò àxue ɖo funu ɖo àdɔ̀totoa gbà le sɛ̃ŋu kpe è lè èdùa mè. 11Vɔ̀a, gbɔ̀xue wo la ɖo Ejiptè-nyigbã jia, e gblɔ̃ na èsrɔ̃a Saraì be: “Kpɔ mù nya nyuɛ̃ ɖe be wò nyi nyɔ̃nù nya kpɔ ŋutɔ. 12Eŋuã, wàlɛbɛ kè Ejiptètɔwo la kpɔ wòa, wo la gblɔ̃ be: 'Èsrɔ̃a ye yà', wo la wù mù ne woa tàsi wò ya ɖo àgbè. 13Mù ɖèkuku na wò, gblɔ̃ be yè nyi nɔ̀vi nyè nyɔ̃nù ne woa kpɔ ji nyè nyuɛ̃ ɖe ɖo ŋuti wò, eye ma gbà ci àgbè ɖo ŋuti wò.”
14Lè nyàwo toto mèa, ekè Abràm va yì ɖo Ejiptè-nyigbã jia, Ejiptètɔwo kpɔ be nyɔ̃nù kèa nya kpɔ ŋutɔ. 15Faraɔ̀n be àhùa ŋùkɔ̀nɔ̀tɔwo kpɔ ɛ̀, eye wo kafu ì na Faraɔ̀n, eye wo kplɔ̀ nyɔ̃nù kèa ɖo yebe àxomè. 16Sɔ kù ɖo e ŋutia, wo lebè na Abràm nyuɛ̃ ɖe eye wo na ɛ̀ ènyì ku àlɛ̃wo, èsɔ-àkɛtɛwo, kluviwo kudo sumɔ̃vi nyɔ̃nùwo, èsɔ-àkɛtɛviwo kudo èsɔ kpovènɔ̀wo. 17Vɔ̀a, Tɔhonɔ̀ na ètodɔ̃ gã ɖewo jè Faraɔ̀n ku yebe àxuea ji ɖo Saraì, Abràm be èsrɔ̃a ŋuti. 18Faraɔ̀n na wo yɔ Abràm va ye e gblɔ̃ na ɛ̀ be: “Nukɛ ye wò wɔ̀ ku mù leke ò! Nukɛ ŋuti ye wò mu ɖè-gblɔ̃ na mù be yèbe èsrɔ̃ ye ò? 19Nukɛ ŋuti ye wò gblɔ̃ na mù be: 'Nɔ̀vi nyè nyɔ̃nù ye ò?' Eye mù sɔ ɛ̀ ɖo èsrɔ̃ nyè mɔnu ò. Fifìa, èsrɔ̃ wòa ye kè, trɔ xɔ̀ ɛ̀ ne wòa jo lè fikèa!”
20Faraɔ̀n na ègbè yebe àmèwo be woa nyà ɛ̀, e ye, èsrɔ̃a ku ènu kè kpata lè e sia.
Currently Selected:
Gɔ̃mèjèje be Xoma 12: GEN
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Mina Bible © Bible Society of Togo, 2014.