Gɔ̃mèjèje be Xoma 11
11
Babɛ̀l be èxɔ̀ tùtu tɔ jiŋùkusi
1Ànyigbã kpata dona ègbè ɖèka ku ènyàti ɖèkawo. 2Vɔ̀a, ekè wo le ɖiɖi yì èwèzɛ̃pe gbɔa, àgbètɔwo kè ɖo tèpe gbàjà ɖe ŋuti lè Sinèa be ànyigbã ji eye wo sò àxue ɖo funu. 3Wo gblɔ̃ na woa nɔ̀nɔwo be: “Mì na mia mlì ànyikɔ ne mia mè èkpeawo lè èzò mè.” Ànyikɔ mèmeawo lè èkpe tèpe eye àŋɔ̀ ye lè simitì tèpe na wo. 4Wo gblɔ̃ be: “Mì na mia sò èdù ɖèka eye mia tù èxɔ̀ yì tɔ jiŋùkusi. Mì na mia sɔ nyikɔ ɖèka ne mi mu gbà kãkã ɖo ànyigbã kpata ji ò.”
5Tɔhonɔ̀ ɖì va la kpɔ èdù ku èxɔ̀ yì tɔ jiŋùkusi kè ye Adàm be èviwo tùa. 6Eye Tɔhonɔ̀ gblɔ̃ be: “Eè! Woa kpata wo nyi dùkɔ̃ ɖèka eye wo le do ègbè ɖèka ye èdɔ cucugbã kè wo wɔ̀a ye kè! Fifìa èmɔ̃nu ɖèɖe lè be ènu ɖekpekpe be wɔ̀wɔ ma gbà sɛ̃ŋu na wo ò! 7Mì na mia yì titɔ woabe ègbèa ne àmè ɖekpe mu gbà sè nɔ̀via be ènyà gɔ̃mè ò!” 8So funua, Tɔhonɔ̀ kãkã wo ɖo ànyigbã kpata ji eye wo tɔtè èdùa tùtu. 9Eye wo ɖo nyikɔ na ɛ̀ be Babɛ̀l, ɖo funua ye Tɔhonɔ̀ titɔ ànyigbã kpata be ègbè dodoa lè eye funua ke Tɔhonɔ̀ kãkã àgbètɔwo ɖo ànyigbã kpata ji lè.
So Sɛm ji va ɖo Abràham ji
10Kpɔɖa Sɛm be xòmèa ye kè: Sɛm sĩ, xɔ̀ èpè èkà èvè takpo (100) wàlɛbɛ kè e jì Àrpàkasàd lè èpè èvè yomè lè èsìɖɔɖɔ èdù gbàjà tɔ̀a be ŋùgbedòmè. 11Ekè e jì Àrpàkasàd vɔ̀a, Sɛm nɔ̀ àgbè èpè èkà woèvè takpo (500) eye e jì èvi ŋusùwo ku nyɔ̃nùwo.
12Àrpàkasàd xɔ̀ èpè ègbã vɔ àtɔ̃ (35) ye e jì Sɛlàh. 13Ekè e jì Sɛlàh vɔ̀a, Àrpàkasàd nɔ̀ àgbè èpè èkà èwo ci ètɔ̃ (403), e jì èvi ŋusùwo ku nyɔ̃nùwo.
14Sɛlàh xɔ̀ èpè ègbã (30) wàlɛbɛ kè e ji Ebɛ̀r. 15Ekè e jì Ebɛ̀r vɔ̀a, Sɛlàh nɔ̀ àgbè èpè èkà èwo ci ètɔ̃ (403), e jì èvi ŋusù ku nyɔ̃nùwo.
16Ebɛ̀r xɔ̀ èpè ègbã vɔ ènè (34) ye e jì Pɛlɛ̀g. 17Ekè e jì Pɛlɛ̀g vɔ̀a, Ebɛ̀r nɔ̀ àgbè èpè èkà èwo takpo ci èwo (430), e jì èvi ŋusù ku nyɔ̃nùwo.
18Pɛlɛ̀g xɔ̀ èpè ègbã (30) ye e jì Rèwu. 19Ekè e jì Rèwu vɔ̀a, Pɛlɛ̀g nɔ̀ àgbè èpè èkà àtɔ̃ ci àsiɖèkɛ (209), e jì èvi ŋusù ku nyɔ̃nùwo.
20Rèwu xɔ̀ èpè ègbã vɔ èvè (32) ye e jì Serùg. 21Ekè e jì Serùg vɔ̀a, Rèwu nɔ̀ àgbè èpè èkà àtɔ̃ ci adrɛ̃ (207), e jì èvi ŋusù ku nyɔ̃nùwo.
22Serùg xɔ̀ èpè ègbã (30) ye e jì Nàhɔr. 23Ekè e jì Nàhɔr vɔ̀a, Serùg nɔ̀ àgbè èpè èkà àtɔ̃ (200), e jì èvi ŋusù ku nyɔ̃nùwo.
24Nàhɔr xɔ̀ èpè èwì vɔ àsiɖèkɛ (29) ye e jì Teràh. 25Ekè e jì Teràh vɔ̀a, Nàhɔr nɔ̀ àgbè èpè èkà èvè takpo ci woeàsiɖèkɛ (119), e jì èvi ŋusù ku nyɔ̃nùwo.
26Teràh xɔ̀ èpè èkà takpo ci èwo (70) ye e jì Abràm, Nàhɔr ku Haràn. 27Kpɔɖa, Teràh be xòmèa ye kè: Teràh jì Abràm, Nàhɔr ku Haràn. Haràn jì Lɔt. 28Haràn ku jè ŋùkɔ̀ na ètɔa Teràh lè yebe xòmè nyigbã ji kè gbà le nyi Kaldeatɔwo be èdù Urà mè. 29Abràm ku Nàhɔr wo ɖe èsrɔ̃; Abràm be èsrɔ̃a be nyikɔ nyi Saraì; eye Nàhɔr tɔ̀a nyi Milkà, Haràn be èvi nyɔ̃nù, Milkà ku Iskà be ètɔ. 30Saraì nyi kònɔ̀, mu jì èvi ò.
31Teràh kplɔ̀ èvia ŋusù Abràm, yebe tɔgbeyɔvi Lɔt, Haràn be èvi ŋusù, ku ètoyɔvia Saraì, èvia ŋusù Abràm be èsrɔ̃, eye wo to jo lè Kaldeatɔwo be èdù Uràa mè, yì Kanàn nyigbã ji. Wo va yì ɖo tèpe kè wo yɔna be Haràn eye wo sò àxue ɖo funua. 32Teràh nɔ̀ àgbè èpè èkà àtɔ̃ ci àtɔ̃ (205) eye e ku lè Haràn.
Currently Selected:
Gɔ̃mèjèje be Xoma 11: GEN
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Mina Bible © Bible Society of Togo, 2014.