Luki 19

Isa nun Sake la ko

1Isa donta Yeriko saa tɔ, a be ɲɔ takuntula. 2Wo ka a taran kaye do be ɲɔ, a tɔgɔ Sake. A mu duuti makelelanu la kuŋɛ le la, nafulu banba be a bolo. 3A be katala Isa yen koe la, a ni a lɔn min mu a la. Kɔnɔ jama to be siyaren, a mɛn sɔdaŋɛ wutu, wolo ka a ma, a ma nɔ a yenna. 4A borita jama ɲatɔ a tagata yɛlɛ toori lɔgɛ do la, alako a ni a yen, bayi a be tanbila ɲɔ le la. 5Isa la kereŋɛ wo dula tɔ, a ka a ɲa layɛlɛ kantɔ, a ka a fɔ Sake ye, a ko: «Sake, jigi teriya teriya la, bayi a fɛrɛ bele fɔ n ni yigiya i bata bi.» 6Sake jigita teriya la, a ka Isa labɛn sɛɛwa butɔ. 7Min bɛ ka wo yen, a bɛ kumata Isa ma anu da kɔtɔ, anu ka a fɔ: «A bata taga yigiya junubutɔɛ bata.» 8Wo butɔ, Sake sɔta a ka a fɔ Marige Isa ye, a ko: «N Marige, n si n tɛn bolofeŋɛnu tɛma dii fugarenu ma. A mɛn, ka n ka fondo bɔɔ mɔgɛ min bolo mamafue la, n si wo ɲɔgɔn naani lasaagi a ma.» 9Isa ka jaabire sa, a ko: «Bi, kɛ boŋɛ mɔgɛnu bata malakise sɔtɔ. Iyon, kɛ kaye tugun mu Iburahima bɔnsɛ do le la. 10Wo ni a lɔn, nde Adamadeŋɛ bata na mɔgɔ samareŋɛnu le ɲinidula ka anu lakisi.»

Jon kayi tan na ko taale

11Mɔgɛnu tota anu tolomasɔla Isa la kumanu la. Isa to be sutuyala Darisalamu la, mɔgɛnu be a miraren aa Ala la mansabaya be naala bɔɔla le kɛnɛ tɔ kɔtɛ. Wolo mu, Isa mɛn ka taale do sa, 12a ko: «Mansa bɔnsɛ kayi do le tota ɲɔ. A be bɔɔla a bata, a ni taga dula yanfama tɔ mansa banba bata, alako a ni mansaya sɔtɔ ɲɔ, wo kɔma a ni saagi a fɛ a bata. 13Kɔnɔ yannun a ni taga, a ka a la jon kaye mɔgɔ tan kele, a ka kaalisi kolo dɔndɔ dɔndɔ don anu bɛ bolo, a ka a fɔ anu ye: ‹Wo ni a nafule ma wo la manankuŋɛ la han n ni saagi›. 14Kɔnɔ wo mansa bɔnsɛ kayi la jamanɛ mɔgɛnu be a kɔnden. A la bɔɔreŋɛ a la jamanɛ tɔ, a la taga kɔma anu ka kiilanu lasanba ka a fɔla: ‹Mɔ bele diren wo tige ni ma mɔ kunma mansa la.› 15Kɔnɔ hali wolo mu, wo kaye mata mansa la, a mɛn tasaagita a la jamanɛ tɔ. A la saagireŋɛ, a be kaalise donden joŋɛ minnu bolo, a ko anu ni anu kele, alako a ni a lɔn, anu bɛ dɔndɔ dɔndɔ ka tɔnɛ min sɔtɔ wo tɔ. 16Jon fɔlɛ nata, a ko: ‹N marige, i ka kaalisi kolo dɔndɛ min don n bolo, n bata a lawali n ka a ɲɔgɔn tan sɔtɔ a kunma.› 17Mansa ka a fɔ a ye, a ko: ‹Wo kaɲin, ile mu jon ɲinma le la. I to telenta ko dɔgɔmaŋɛ la ko tɔ, wo butɔ, i si ma saa tan mansa la.› 18A filaɲɔgɛ nata, a ko: ‹N marige, n bata i la kaalisi kolo dɔndɛ lawali, n bata a ɲɔgɔn loolu sɔtɔ›. 19Mansa ka a fɔ wo tugun ye: ‹Ile tugun si ma mansa la saa loolu kunma.› 20Joŋɛ doe tugun nata, a ka a fɔ: ‹N marige, i la kaalisi kole le ka. N be a mandiren kuta kunte le tɔ. 21N be kilanden i la, bayi i mu kayi jusu bɛlɛŋɛ le la: i ma min sa, i be wolo jiganna; i ma min foyi, i be wolo tɛgɛla.› 22Mansa ka a jaabi, a ko: ‹Ile jon koroŋɛ, n be i makiitila i la kuma le la. I ka a lɔn yati n mu kayi jusu bɛlɛŋɛ le la: n ma min sa, n be wolo jiganna; n ma min foyi, n be wolo tɛgɛla. 23Awa, fen de be a maren i ma n na nafule don nafulu lawalila bolo? Wo butɔ, n tini na, n ni a makele anun a tɔnɛ.› 24Mɔgɛ minnu be sɔren a kɛnna, a ka a fɔ wonu ye, a ko: ‹Wo a la kaalisi kolo dɔndɛ bita a bolo, wo ni a don kaalisi kolo tan tige bolo.› 25Wo butɔ, anu ka a jaabi, anu ko: ‹Mɔ marige, kɔnɔ kaalisi kolo tan ɲan be wo bolo.› 26Kɔnɔ mansa ko: ‹N ni a fɔ wo ye, min ka taakue bita a ɲinma la, do tugun si sa a tɛŋɛ kunma. Kɔnɔ min ma taakue bita, hali donden min be a bolo, wo si bɔɔ le a bolo. 27Anun, n kɛ jaguenu tugun minnu bele diren n ni ma anu kunma mansa la, wo wonu nati yan, wo ni anu faga n ɲala.› »

Isa madon koe Darisalamu la

28Isa la bandeŋɛ wo fɔla, a mɛn tasɔta ɲatɔ yɛlɛla Darisalamu. 29A la sutuyareŋɛ Betifage nun Betani saanu la, a keta kɔnkɛ do ma, mɔgɛnu be a fɔla min ma «Jayitunu kɔnkɛ». A la kereŋɛ ɲɔ, a ka mɔgɔ fila kii a la talibenu tɔ, 30a ko: «Wo taga saa min be mɔ ɲatɔ. Wo tini don ale saa butɔ, wo si sofali deŋɛ taran kitiren ɲɔ, mɔgɔ ma sigi min kunma betunna. Wo ni a fulen, wo ni a nati. 31Ka min ka wo maɲininka: ‹Wo be a fulenna fenna?›, wo ni kɛlɛ fɔ: ‹Marige le hajue be a ma.› » 32Wo kiilanu tagata. Isa ka a fɔ anu ye ki min na, anu ka a taran ɲɔgɔnna le. 33Anu be sofali deŋɛ fulenna wagate min tɔ, a tigenu ka a fɔ anu ye: «Wo be kɛ sofali deŋɛ fulenna fenna?» 34Anu ko: «Marige le hajue be a ma.» 35Wo butɔ, anu ka a nati Isa ye, anu mɛn ka anu la dorokenu sa sofali deŋɛ kɔɛ tɔ, anu ka Isa layɛlɛ a kanna. 36A to be tagala, mɔgɛnu be anu la dorokenu lafontila a ye kila tɔ.

37A la sutuyareŋɛ Jayitunu kɔnkɛ jigijige la, talibi jama bɛ fɔlɔta Ala tantula sɛɛwa butɔ anu kulɛ mayɛlɛreŋɛ la, Isa la wali sɛnbɛma bɛ la ko la, minnu mata anu ɲala, 38anu tota a fɔla:

«Barikɛ be kɛ mansa ye,

min be naren Marige Ala tɔgɛ la! # 19:38 Jaburu, sora 118, haaya 26 fɛlɛ.

Hɛra be saŋɛ tɔ!

Nɔɔra be Ala ye kantɔ!»

39Wo butɔ, Farisi minnu be jama tɛma, wo donu ka a fɔ Isa ye: «Karamɔgɔ, i la talibenu yamɔri anu ni anu mɔdɛ.» 40Isa ka anu jaabi, a ko: «N ni a fɔ wo ye: ka kɛnu ka anu mɔdɛ, kurenu yati si naa anu kulɛ labɔɔ sɛnbɛ la.»

Isa la dire Darisalamu la ko la

41Isa to sutuyata Darisalamu la, a ka ɲɔ saa yen, a dita a la ko la, 42a ka a fɔ, a ko: «Wole Darisalamu kaanu, ka wole tugun ka a talɔn nun bi luŋɛ, koe min be jususa diila wo ma, wo si bɛn nun. Kɔnɔ kɔtɛ wo bata dogon wo la. 43Lun do si naa ke wo ma, wo jaguenu si sansaŋɛ sɔ wo la saa la miliŋɛ bɛ tɔ, anu si wo la kila bita sɔngɛ bɛ la. 44Anu si saa nun a mɔgɛnu halagi feu, anu si boŋɛ bɛ tiɲa ka a birikenu bɛ lansan. A si ma ɲɔgɔnna le, bayi Ala be diren wo kɔla malakise la kɛ wagate min tɔ, wo bele a talɔnden.»

Isa la julanu bee koe Ala batu bon banba tɔ

45Awa, Isa donta Ala batu bon banba butɔ, a ka mɔgɛnu taran ɲɔ minnu be julaya mala, a fɔlɔta anu beela, 46a ka a fɔ anu ye, a ko: «A be sɛbɛren kitabue tɔ, Ala ko: N na boŋɛ si ma Ala mataran dula la,#19:46 Annabi Esayi la kitabue, sora 56, haaya 7 fɛlɛ. kɔnɔ wole bata a ma boenmalanu daakadula la.#19:46 Annabi Yeremi la kitabue, sora 7, haaya 11 fɛlɛ.»

47Wo kɔma, Isa tota mɔgɛnu kawandila lun go lun Ala batu bon banba tɔ. Kɔnɔ sarika lakela kuntigenu, anun sariya karamɔgɛnu, anun saa kuntigenu be a faga ɲa ɲinila. 48Kɔnɔ anu si nɔ a bitala ki min na, anu bele wo kɛɲa yenden, bayi jama bɛ be kitiren a tolomasɔ koe la Isa da kulɛ la.

Currently Selected:

Luki 19: MOG

ማድመቅ

Copy