Luki 18

Wakkili koe Ala mataraŋɛ la

1Wo tanbi kɔma, Isa ka taale do sa a la talibenu ye, a ka a yita anu la fɔ anu ni to Ala mataranna tɛmuɛ bɛ tɔ, anu juse kana faga wo la. 2A ko: «Kiiti sala do le tota saa do tɔ min bele kilanna Ala la, a te malu mɔgɔ la. 3Furuɲa musu do tugun be wo saa dɔndɛ tɔ. Wagate bɛ a be tagala kɛ kiiti salá bata, a ni a fɔ a ye: ‹N na tɔɲa dii n ma n nun n jague tɛma!› 4A mɛta han, kiiti salá be balanden a la kiite sala. Kɔnɔ lun do, a ka a fɔ a yɛtɛ ma: ‹Tɔɲa le, n bele kilanna Ala la, n te malu mɔgɔ la, 5kɔnɔ kɛ furuɲa muse to bata n tɔɔrɔ koola, a fɛrɛ bele fɔ n ni a la tɔɲa dii a ma. Ka wo ma, a tɔɛ la a si to le n ɲamɔla han a ni n juse fiddɛ.› » 6Marige Isa mɛn ko: «Kiiti salá telenbale ka min fɔ, wo bata wo mɔɛ? 7Ala kan go? A te anu la tɔɲa dii a la mɔgɔ masubɛreŋɛnu ma ba, minnu be anu kulɛ labɔɔla a ma, sue nun tele? A si mɛ anu dɛmanna ba? 8N ni a fɔ wo ye: a si anu la tɔɲa dii anu ma teriya la! Kɔnɔ nde Adamadeŋɛ tini tana wagate min tɔ, n si mɔgɔ taran duge kunma ba, min be dɛnkɛnɛyaren nde ma?»

Farisi anun duuti makelela la ko

9Isa mɛn ka taale do sa mɔgɛnu ye minnu be laaren anu yɛtɛ la, anu ko anu telenta, anu be anu fan nakoloyala mɔgɔ tɔɛnu ye. 10A ko: «Kayi fila yɛlɛta Ala matarandula Ala batu bon banba tɔ. Dɔndɛ mu Farisi le la, doe mu duuti makelela le la. 11Farisi sɔta ɲatɔ, a be Ala mataranna, a ko: ‹Ala, n be i tantula bayi n bele toren iko mɔgɔ tɔɛnu, minnu be kankaya mala, anu be telenbaliya mala, anu be jeena tugun mala. Iyon, n be i tantula bayi n bele toren iko kɛ duuti makelela. 12N be sunna kunɲama fila lɔgɔkun dɔndɔ kɔtɔ. N mɛn be n sɔtɔfeŋɛ bɛ farila bɔɔla.›

13Duuti makelela kan be sɔren kan yanfama tɔ. A ma suusɛ a ɲa yati layɛlɛla saŋɛ tɔ, a be a jusukuŋɛ mabotegela suunɛ la, a ko: ‹Ee Ala, kinikini n ma, n mu junubutɔɛ le la.›» 14Isa mɛn ko: «N ni a fɔ wo ye: kɛ duuti makelela to saagita a bata boŋɛ tɔ, Ala ka ale le bita mɔgɔ telendeŋɛ la, ka tanbi Farisi kayi la. Mɔgɔ yo mɔgɔ min be a yɛtɛ mayɛlɛla a si naa majigi le; min tugun be a yɛtɛ majigila a si naa mayɛlɛ le.»

Isa nun den mɛsɛŋɛnu

15Mɔgɛnu tota anu la bɔɔbɛnu tugun natila Isa ye alako a ni a bole sa anu kuŋɛ tɔ. A la talibenu to ka wo yen, anu fatiyata wonu ma. 16Kɔnɔ Isa ka a fɔ anu ni bɔɔbɛnu nati, a ko: «Wo a to den mɛsɛŋɛnu ni na ke n ma, wo kana anu ladan. Wo ni a lɔn Ala la mansabaya mu wonu ɲɔgɔn de tɛŋɛ la. 17N ni tɔɲa fɔ wo ye: mɔgɔ min yo ma Ala la mansabaya bita iko den mɛsɛŋɛ, wo te don a la mansabaya tɔ abada.»

Nafulu tige la ko

18Kuntige do ka Isa maɲininka, a ko: «Karamɔgɔ ɲinma, n ni fen ma alako n ni abada kise sɔtɔ?» 19Isa ka a jaabi, a ko: «I bata n kele ‹karamɔgɔ ɲinma› fenna? Hali mɔgɔ dɔndɔ maɲin, fɔ Ala dɔrɔn de kaɲin! 20Awa, i ka Ala la yamɔrenu lɔn, ka a fɔla, i kana jeena ma, i kana nɛ bɔɔ, i kana kankaya ma, i kana seedeɲɔgɔya labita foniya la i mɔgɔɲɔgɛ kunma, i ni biliya sa i baaba nun i nɛɛnɛ ma.#18:20 Taureta Musa, kitabu filaɲɔgɛ, sora 20, haaya 12 han 16.» 21Kuntige ko: «N ka wo bɛ labatu kabɔɔ n denden tɛmuɛ.» 22Isa to ka wo mɔɛ, a ka a fɔ a ye, a ko: «Ko dɔndɔ be toren i ye manɛŋɛ la: taga i bolofeŋɛ bɛ mayita, i ni wo nafule mafatan fugarenu ma. Wo butɔ, harige si to le i ye arijanna butɔ. Ka i ka wo ban mala, i ni na sɔ n kɔma.» 23Kuntige la wo jaabire mɔɛla, wo ka a juse makasa koola, bayi nafulu banba tige le mu. 24Isa to ka a yen a juse be makasaren, a ka a fɔ, a ko: «A bɛlɛ nafulu tige ye, don koe la Ala la mansabaya tɔ. 25Iyon, banna don koe Ala la mansabaya tɔ, wo fisa bɛlɛyala ɲɔgɔmɛ don koe la sagiran foronta la.» 26Minnu ka wo mɔɛ, wonu ka a fɔ, anu ko: «Kɔnɔ ka a ɲɔgɔnna le, ɲɔmɔ le si nɔ kisila?» 27Isa ka anu jaabi, a ko: «Mɔgɛ te nɔ koe min na, Ala le si nɔ wo bɛ mala.» 28Wo butɔ, Piyɛri ko Isa ma: «I ma a yen, mɔle bata mɔ bolofeŋɛnu bɛ to ɲɔ, mɔ ka i jokki.» 29Isa ka a fɔ anu ye, a ko: «N ni tɔɲa fɔ wo ye, ka mɔgɔ min sɔnta a la boŋɛ tola ɲɔ, a mata a la muse la ba, a baaba dɔndɛnu ba, a sɔtɔbaganu ba, a la deŋɛnu ba, Ala la mansabaya la ko la, 30a si baraje min sɔtɔ dunuya yan wo si koloya tanbi a fɔlɔtɔnɛŋɛ la pon. A mɛn, abada kise tugun si dii a ma sinan aligiyama.»

Isa la tɔɔrɛ sɔtɔ ɲa

31Wo kɔma, Isa ka a la talibi tan nun fila kele sɔngɔ, a ka a fɔ anu ye, a ko: «Wo tolomasɔ, wo mɔ be yɛlɛla Darisalamu. Nabiyonmɛnu be koe min bɛ sɛbɛren nde Adamadeŋɛ la ko tɔ, a bɛ si naa kamali le. 32Anu si n bita anu ni n don sii gbɛtɛnu bolo, anu ni n majele, anu ni n fɛɛya, anu ni daje tutɛ n ma, 33anu si n botege le lonba la, wo kɔma anu ni n faga. Kɔnɔ, n na faga tele saba luŋɛ, n mɛn si tawuli le.» 34Kɔnɔ a ka kuma min fɔ, a la talibenu ma hali kuma dɔndɔ fahamu. A be maren anu ye kuma dogondeŋɛ la, anu ma min kɔtɔ lɔn.

Ɲabɔnɛ ɲa laka koe

35Isa la sutuyareŋɛ Yeriko saa la, wo ka a taran kayi ɲabɔnɛ do be sigiren kila dala, a be tarili ma tɔ. 36Ɲabɔnɛ to ka jama tanbi kulɛ mɔɛ, a ka ɲininkare ma, a ko: «Fen de be maren?» 37Anu ka a lalɔn, anu ko: «Isa Nasarɛti kaa le be tanbila.» 38Wo butɔ, a ka a kulɛ mayɛlɛ, a ko: «Isa, mansa Dauda bɔnsɛ, kinikini n ma!» 39Mɔgɛnu minnu be jama ɲatɔ, wonu fatiyata a ma, anu ko: «I mɔdɛ!» Kɔnɔ a tota belebelela sɛnbɛ la, a fisa a fɔlɔnɛŋɛ ko, a ko: «Mansa Dauda bɔnsɛ, kinikini n ma!» 40Isa sɔta, a ka yamɔre sa anu ni a nati a ye. Ɲabɔnɛ to ka a madon a la, Isa ka a maɲininka, a ko: 41«I be diren n ni fen ma i ye?» A ka a jaabi, a ko: «Marige, n be diren n ɲa ni laka.» 42Isa ka a fɔ a ye, a ko: «I ɲa ni laka, i la dɛnkɛnɛya bata i lakisi.» 43A ɲa lakata kisanna. Wo kɔma, a tota Isa jokkila, a be Ala tantula. Jama bɛ to ka wo yen, anu fɔlɔta Ala matɔgɔla.

Currently Selected:

Luki 18: MOG

ማድመቅ

Copy