BVÜKESHHU 21
21
Nssümagha Kenoncca ghena
(Aye 15.12-18)
1“Ayen hathu ha pi Israel nyithu cülo: 2#Lev 25.39-46. Keujüla nthu na Ibri nyi nssümagha shüya lethu ma amapi tugho nthu kekuli saben. Amapi tagüwa wi mangla pi ndhinengla ma teshi chiaben. 3Keujüla ma awubvü npikeya tuwi nssümagha sa gho lethu ma wubvü tsü teshi nu bvüaben, isala keujüla ma awubvükeya seng wi nssümagha sa gho lethu ma wubvü tsü ssinu bvüya mehai. 4Keujüla ma ba kesawa na awubvü yapi ma cü nu atsanga pvüghaya lethu nzawa nu ma tsangathu lela ma pvüwa ji, nu npvüzawa na ma ketan bvüaben. 5Isala keujüla nssümaghawa na ma ba kesawa, ma wubvü, nu ma tsangathu nen nu ma bvü nsa mvu lethu, 6ma ba kesawa na ma ssinu kekinyipen wi waben. Ciwi ma pi ajenka nyelela adonbvü chenla ngan thsü nu ma khuna wenphia. Isalethu ma kahang wi ma ba kesawa nssümagha sa waben.”
7Keujüla anyi kesü ma nga pi nssümaghale sa jeü lethu nzawa tsüpi nssümaghalothu ti sala lisha chi nben. 8Keujüla nzawa tsüpi ma wubvü sa thsüle jeü chi, isala ma nzawa tsü n-nenla lethu ma pi ma ba wi jeü neng chilo; ma pvüwa na ma pi asang wi jeü keya nmi, kepaghenanye ma nzawa tuwi ma jüh n-niela kesalina. 9Keujüla anyi kesü nssümaghale pi ma tsawa cüle shüya lethu ma nza tsüwa pi ma nga ti nsathu yishü. 10Keujüla anyi kesü ma wubvü meshibvüwa yaya lethu kheni makesü kedsakejjü, athsümeni, nu kemeshon kebenwa tsüpi ma wubvü atuwa tsü ncüthu yishü. 11Keujüla ma nzawa tuwi kekuli hathu ha sa meya lethu ma kedhikejü mangla meyala nzawa tsü teshi chi nsathu yishü.
Nkemehai Kekulithu ghena Ayenthu
12 #
Lev 24.17. “Thowa na anyi kesü kihhe pi shü thsü khe ma la pi shü thsülo.”
13 #
Scs 35.10-34; Aye 19.1-13; Jos 20.1-9. Isala keujüla tsüna aghandu ma pathile nsa lethu, hi nthu ghena apen kesü kessi cüden, ma ya ciwi bvü wa ben wa thsülo. 14Isala anyi kesü ma leben minu nu aghandu anyi kesü pathi lethu, ma bvü sen nu hi kekinyipen wi du lela ma pi shü thsülo.
15“Thowa na ma ba nu ma jja kihhe khe ma pi shü thsülo.
16 #
Aye 24.7. “Thowa na anyi kesü pi jeüle nyelela pi ma nssümagha sale ghan sen bvü khe ma pi shü thsülo.
17 #
Lev 20.9; Mat 15.4; Mrk 7.10. “Thowa na ma ba nyelela ma jja kishencü khe ma pi shü thsülo.
18“Keujüla ciwi kesali nu anyi kesü alon nyelela ma kwen shen pi kepawa shun lela ma nshü lethu, anyi tsüwa tsü metenmesha nben. Keujüla nyu ma kiccü kecüwa na awe dha wa, 19isala tsashi wi shagha akhhatssü sen nu alentsenya lethu anyi nyu kekiccüwa na matsü kededi kutimen sapi cü nu ma npi mehai keya chu ma noncca ben.
20“Keujüla anyi kesü akhhatssü pi ma nssümagha, maghalo nyelela maghale kihhe nu amaghawa na shü lethu anyi tsüwa metenmesha ben. 21Isala keujüla nssümaghawa tsüna ghanan kesü keni jüwi tsü nshü lethu ma pvüwa tsü metenmesha nben. Ma keben kededi tsüna ma kemeten sadha.”
22Keujüla anyi pahan kepali nu nza atsanpvü ketenwa patena, nu ajjawa mesa-mena nu ma tsa bhatagha lethu, anyi ma patena kecüwa na nzawa wuba na pisa khaju khie khe accülikesathu na khidhi kechi tsüpi dhilo. 23Isala keujüla nzawa mesa-mena lethu kemeten tsüna kahangli kesü mithon wi kahangli kesü, 24#Lev 24.19,20; Aye 19.21; Mat 5.38. anyon kesü mithon wi anyon kesü, ayha kesü mithon wi ayha kesü, akwen kesü mithon wi akwen kesü, accü kesü mithon wi accü kesü, 25kemecang mithon wi kemecang, ayisü mithon wi ayisü, kekihhe mithon wi kekihhe.
26“Keujüla anyi kesü ma nssümagha maghalo nyelela maghale nyon kihhethsü lethu, ma nyon tsü ghena nssümaghawa tsü teshi pi bvü thsülo. 27Keujüla ma ayha kesü kihheshü lethu ma yha tsü ghena nssümaghawa tsü teshi pi bvü thsülo.
Apvüthu khhi
28“Keujüla amesü süpon kesü na anyi shunthi lethu alon pi tsü kecenthilo, nu ma sa tsü ndsala; isala amesü pvüwa tsü metenmesha nben. 29Isala keujüla amesü süpon tsüwa na anyi keshun tsüpi ma yen sa nu ma pvüwa lela kitsan chidha lela ma tsü hupi nthengla nu anyi shunthi lethu, alon pi amesü tsü kecenthi, nu ma pvüwa la pi shü thsülo. 30Isala keujüla ma pvüwa tsüna ma kahangli hangshayale kesalina kedhikejü tsü sa lethu, khaju pi ma miwi chi khe ma tsüpi dhi nsathu yishü. 31Keujüla amesü süpon tsüna pvüzanyi nyelela lanyi shunthi lela ayen tsü makesü saben. 32Keujüla amesü süpon tsüna nssümagha maghalo nyelela maghale shunthi lethu, amesü pvüwa na rükatssü changha pi nssümaghawa pvüwa dhilo, nu alon pi amesü tsü la kecenthilo.
33“Keujüla anyi kesü na ayyiku chhü nu nshanla nyelela ma keshan khupi nu amesü süpon nyelela gada kesü na tsü non wi khulidu lethu, 34ma asahang men tsü dhi nsathu yishü. Ma apisa pi ma pvüwa cü nu asahang kamang tsü khuya mehai. 35Keujüla anyi kesü mesü süpon na kepawa mesü süpon shunthi lethu, manyi amesü hang kebenwa tsüpi jeü nu apisa pi manyi gishüya, nu manyi na amesü keshüwa sa tsü la ha pi gishüya mehai. 36Isala keujüla amesü süpon tsü anyi keshun tsüpi ma yen sa tenle kesa pi chü thsüdha; isala ma pvüwa na tsü hupi nthengla lethu, ma anyi tsüwa kededi men ma mesü süpon kahang pi ncüthu yishü, nu ma amesü keshüwa tsü khuya mehai.”
Currently Selected:
BVÜKESHHU 21: RENGNBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
