BVÜKESHHU 20
20
Ayenkhukechithu Tagha
(Aye 5.1-21)
1Anyiza na khi, nu hathu ha ma jüh: 2“Hi Apvüwa nthu Nyiza, nthu na Ejipt wi nssümagha sa keben wi nthu ssi keshhughowa tsüle. 3“Hi ketan khe acenpvü kepa wi nkinyila. 4#Bvü 34.17; Lev 19.4; 26.1; Aye 4.15-18; 27.15. “Nthu ghena atsikezhü mangla nsala, tsüna tang wi nyelela ayyi miwi nyelela atssü wi nyelela ayyi cakhu wi kebenthu tsi ti mangla nsala. 5#Bvü 34.6,7; Scs 14.18; Aye 7.9,10.Atsikezhü tuwi nkukedula nyelela tsü nkinyila, kepaghenanye hi Apvüwa nthu Nyiza nu anonkemeyen Nyiza. Hi kemeten sengho hi nanmeghü ketenthu nu mathu shicüthu abvüye kecheng nu mejü kecu wi cüden. 6Isala hi nanketizen pi hi ghali nu iyenthu nie ketenthu abvüye hazar wila ccücaden.
7 #
Lev 19.12
“Nkemehai ghena wi inyan nsenla, kepaghenanye hi Apvüwa nthu Nyiza; inyan sensa ketenwa metenmesha cüden.
8 #
Bvü 16.23-30; 31.12-14. “Sabbath yen tsü nieya nu sen methayalo. 9#Bvü 23.12; 31.15; 34.21; 35.2; Lev 23.3. Nthu na ghanan tugho jüwi nthu kekuli tsüdi saya, 10isala tagü ghananwa tsüna kemnan tsathang sametha pi hi cüdha. Tsü ghanan wi thola kekuli nsala — tsüna nthu, nthu tsangathu, nthu nssümaghathu, nthu sahangthu, nu nthu diyyiwa wi kahang asangthu lela. 11#Ade 2.1-3; Bvü 31.17. Hi Apvüwa, ghanan tugho jüwi atssan, ayyi, atssükedone, nu ciwi kebenthu tsüdi sachi, isala tagü ghanan wi hi mnan wa. Tsalina hi Apvüwa, sawegü pi Sabbath miwi chi nu tsü sametha chitheng.
12 #
Aye 27.16; Mat 15.4; 19.19; Mrk 7.10; 10.19; Luk 18.20; Efe 6.2-3 “Nba nu njja nyuwakü yalo, isathu hi ayyi pi nthu cü keben wi tsü nthu na kesie hangyaben.
13 #
Ade 9.6; Lev 24.17; Mat 5.21; 19.18; Mrk 10.19; Luk 18.20; Rom 13.9; Jos 2.11 “Anyi npathila.
14 #
Lev 20.10; Mat 5.27; 19.18; Mrk 10.19; Luk 18.20; Rom 13.9; Jos 2.11 “Keqheza nsala.
15 #
Lev 19.11; Mat 19.18; Mrk 10.19; Luk 18.20; Rom 13.9 “Nghanfüla.
16 #
Bvü 23.1; Mat 19.18; Mrk 10.19; Luk 18.20. “Milikemesa wi nyu shei npila.
17 #
Rom 7.7; 13.9 “Nyu keben ntepaghala; nyu wubvü, nssümaghathu, amesüsi, gadathu, nyelela ma keben katsüha lela ntepaghala.”
Anyithu Kemessiwa
(Aye 5.22-33.)
18 #
Ibr 12.18,19. Anyithu na atsankeshigü nu tutuwa kekhou hhai zaya, atsancwe nu ayikha wi annikekhu shhugho keben kemu wi mathu messi pi kedheggü nu temeja wi ngan wa. 19Mathu na Mosa wi khi, “Keujüla no ajühkhi pi ikhang kiza lethu ikhang na tsü kinaben, isala keujüla Anyiza na ajühkhi pi ikhang kiza lethu ikhang na shü nashe messiben.”
20Mosa na khineng, “Nmessi lalo; Anyiza na nthu ghan-nanle gho nu nthu sapi ma jühkina thsü, isanu nthu ya nsami thsüle kesalinale.”
21Isala anyithu na temeja wi ben wa nu Mosa ketan akulukeshü kejang kete Anyiza keben pen wi wha.
Kekinyipen wi Ayenthu
22Apvüwa na Mosa kiza nu Israel nyithu wi khi thsü, “Hi Apvüwa, tang wi ben nu nthu keccüneng tsü nthu na muyadha. 23Nthu ketanla nthu ghena suna nu rükatssü pi hi nkenye acenpvü kepa wi zhüpi nkinyila. 24Ayyi pi hi kekinyipen kesü saya, nu nthu khaghaneni nu amesüsi pi tsü miwi mecang pi kekinyi nu kecca ghena kekinyi sala ahhansha salo. Kahe wila nthu hi kinyilo apen ma kepa sa cüden, hi nthu wi gho nu sawegü pi nthu cüden. 25#Aye 27.5-7; Jos 8.31.Keujüla nthu na alon pi hi kekinyipen sa lethu alon tsü pakhhi pi nsala, kepaghenanye nthu na alon kejenji kesen wi tsü sapi ighena nmetha thsüla shaben. 26Hi kekinyipen sa lethu acükhaku sa senki ciwi nchila, isa lethu nthu na ciwi ki keten wi nthu kemissü pi nyu ccücaben.”
Currently Selected:
BVÜKESHHU 20: RENGNBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
