BVÜKESHHU 16
16
Manna nu Akvukhithu
1Mathu Ejipt teshi nu asha keniwa taghamanga ghanan Israel nyi maben Elim wina lentsen wa Elim nu Sinai manyi jü Sin yyikeshü wi tsü ghoya. 2Ciwi mathu tsüdila Mosa nu Aaron manyi wi leben nkaghajüh khi, 3nu manyi wi kiza, “Ejipt wi Apvüwa yala ikhang pathi thsüthu mehai kesa nan. Ciwi ikhang donki nu asa dsa nu atsse kepa wi la dsa pi anonkwenya kesa nan. Isala nshinyi ikhang ssi shhugho he ayyikeshü wi tsüdi khwenthi shüa tendha le!”
4Apvüwa na Mosa wi kiza, “Hi khili nthu tsüdi ghena tang wina atsse tsangho chi cüden. Anyithu na ghanan kaghapenla shula tsü ghanan ghena atssewa tsü saghuyalo. Hi hatinu mathu hi kecükegwe kechiwa tsü nie tenla nye khe mathu ghan nan den. 5Tugho ghanan wi mathu na ghanan kaghapen saghuya keten keni ju saghuya nu tsüpi kidenya.”
6Tsalina Mosa nu Aaron manyi Israel nyithu tsüdi wi kiza, “Shita nthu Apvüwa na Ejipt wina nthu ssi shhugho le kesa chüyaben. 7Ghanen wi nthu na Apvüwa tenle kesa ma kewegü muyaben. Nthu leben-nkaghajüh khi nu ma shun kesa tsüna ma zayadha — anle, ma shunle, kepaghenanye ishinyi na ma kecükegwe kechi tsü sa keben ketanle.” 8Tsaseng wi Mosa na khi, “Apvüwa na minulen lethu asa nu aghanen lethu amesa pi nthu kedsa mvu chu cüben, kepaghenanye nthu na khati leben- nkaghajüh khi pi ma shun khe ma zayadha. Nthu na ishinyi shun keben tsüna Apvüwa shunben le.”
9Mosa na Aaron wi khi, “Anyithu maben kiza nu gho Apvüwa tuwi ngan thsülo, kepaghenanye ma mathu leben-nkaghajüh tsü zayadha.” 10Aaron na anyithu maben kekiza ti mathu na khapeghe wa ayyikeshü wi ghangchi nan zuli Apvüwa kewegü na akulukeshü wi shhugho. 11Apvüwa na Mosa wi khi, 12“Israel nyithu na leben-nkaghajüh kekhi tsü hi zayadha. Aghani du keten pang wi mathu asa muyaben, nu ghanenwa wi mathu amesa nsenthu keyishü tsüdi muya ben. Tsaseng wi mathu na hi Apvüwa mathu Nyiza le kesa chüyaben.”
13Minulen wi akvukhithu na pighe dugho mathu kemnanpen tsü pongya, nu ghanenwa wi ajangcü na kemnanpen kevü maben wila benla. 14Ajangcü na anikhu ceng kebvü seng wi pala pahan mehaitsü füghancü nu ghapasi kesa na ayyikeshü miwi pong benla. Tsüna akejanbi ti biye kesa. 15#1 Kor 10.3 Israel nyithu na tsü mukeya wi mangwa khe nchü nu mathu khokho wi keü, “Ha mangwa nu?”
Mosa na mathu wi khi, “Hawa ha Apvüwa na nthu dsalo khupi kecü atsse tsü. 16Apvüwa na ahza khukechi na, nthu tsüdila khaju nsenthu yishü khe ma theghi anyi keji kezeng nie nu meshu kesü ghena atsüde keni tsüti saghu yalo.”
17Israel nyithu na tsüti sa, nu pahan na kejon nu kepa na kezeng-u saghuya. 18#2 Kor 8.15. Mathu tsü kede wa nan kejon saghu keyathu na ji ntsa nsa, nu kezeng-u saghu keyathu la zeng ntsa nsa. Tsüdila ma nsenthu keyishü tsü ketan saghuya. 19Mosa na mathu wi kiza, “Thola tsüpi dhitsüwa wi ghena ntheng lalo. 20Isala mathu pahan Mosa na kekhi tsü nkinala misha pi theng. Ghanenwa wi tsüna amedhen ghonu bighe pi hansa benla, nu Mosa na mathu miwi aghepvü. 21Ghanen kaghapenla wa meshu kesüsü nsenthu keyishü tsü saghuya; nu khathansha wi aghani saa shagha khe tsüna ayyi wi tssü wa.”
22Tugho ghanan wi mathu na wa khenighani yaketen keni ju atsse meshu kesüsü ghena atsüde mejüjü saghuya. Mathu jawi accülikesathu tsüdi gho tsü cüki pi Mosa kiza, 23#Bvü 20.8-11. nu ma mathu wi khi, “Apvüwa ahza khukechi na dhitsü wi tsüna kemetha kemnan tsathang sametha pi ma wi kechi. Nansü nthu mangwa gü mvu ben khe güya nu mangwa shvu mvu ben khe shvu yalo; nu ma gilli tsüpi dhitsüwa ghena theng nsathu yishü.” 24Mosa na mathu kekiza ti mathu na ma gilli tsü pi dhitsüwa ghena thengya; tsüna meyasa nyelela nbighe. 25Mosa na khi, “Nansü ha dsalo, kepaghenanye nansü ha Sabbath, kemnan tsathang sametha pi Apvüwa kecü, nthu na kemnanpen ameiwi khiela atsse tsü muya nben. 26Nthu ghanan tugho jüwi tsü atsse saghu yalo. Isala tagü ghanan kemnan tsathang wi ciwi mangla muya nben.”
27Tagü ghanan wi anyi pahan na atsse tsü saghuyale bhawa, isala mathu na mangla mu meya. 28Tsaseng wi Apvüwa na Mosa wi kiza, “Khathula nthu na hi ahza khukechiwa tsü nkinala hhaghe ben ten nu? 29Hi Apvüwa, kemnan tsathang kesü pi nthu kecü tsü meshenyalo, tsalina hi keshüthangla tugho ghanan wi ghanan keni tsse pi nthu cüden. Anyi tsüdila ma tagü ghanan witsü khiewa ben khe ma ciwi ben wa nu ajjen nteshila.” 30Tsalina anyithu tagü ghanan wi tsü kekuli mangla nsala.
31 #
Scs 11.7,8. Anyithu na atsse tsüpi manna#16.31: manna: Ibri jüh wina “ha mang nu?” (vers 15 wila ghangchi.) le khi. Tsüna palacü kizzakeu ti mikidhi kesa, nu anikholi pi amesa ghapasi gü ketheng kinyan ti kesa. 32Mosa na khi, “Manna tsü pahan pi ithu tsangathu ghena thenglalo kesa Apvüwa na ahza pi ithu cü, isanu mathu na ma ithu ssi shhugho ayyikeshü wi atsse pi ithu kecü tsü muya thsüle kesalina.” 33#Ibr 9.4. Mosa na Aaron wi kiza, “Alakhü kesü khuya nu manna atsüde keni kede pi ma non wi chiya, nu tsü sengho Apvüwa tuwi ithu shicübvüghathu ghena theng yalo.” 34Apvüwa na Mosa kekiza ti Aaron na tsü sen wa Cenkethenjüh Khitson tuwi chi nu pi ciwi tsanqaitheng. 35Israel nyithu na mathu wa hangwa kesa Kanaan yyi wi tsü npi kecu chu amapi jügha ghena manna tsü dsa. (36Atsüde tsü na amaha kegishü ngwe wi kesü.)
Currently Selected:
BVÜKESHHU 16: RENGNBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
