BVÜKESHHU 17
17
Alonshi wi Atssü Keshhugho
(Scs 20.1-13)
1 #
Scs 20.2-13. Israel nyi mabenla Sin yyikeshü tsü teshi nu wa Apvüwa kekhi kenie wi apen kesü wina apen kesü wi keqoedeja wa. Mathu Rifidim wi kemnanpen saben, isala ciwi kejjü tssü nmi. 2Mathu na wa Mosa wi leben-nkaghajüh khi, “Atssü pi ikhang jjü thsülo.”
Mosa na khineng, “Nthu mangkesa na hi kesami bhaten nu? Nthu mangkesa na Apvüwa ghan-nan le saten nu?” 3Isala anyithu na dighe ntsa sa kesalina wa Mosa wi leben-nkaghajüh khineng, “No mangkesa na Ejipt wi ikhang ssi shhugho nu? Ikhang, ikhang tsangathu, nu asahangthu yala dighethi shü thsüa ten kwe?”
4Mosa na ma leben ntsa sa Apvüwa wi khie nu khi, “Hi anyi hathu ghena mangwa saya nu? Mathu alon pi hi kecenthia le bendha.”
5Apvüwa na Mosa wi khi, “Israel nyi ccülikesathu pahan ssiya nu anyithu tuwi walo. No akhhatssü pi Nil Ghaku kihhe kechiwa tsü la khuya. 6Hi ntuwi wa Sinai Yikha wi alon miwi ngan benlaben. Alon tsü kihhechithu anyithu ya jjüya thsüle kesalina atssü na shhughoaben.” Mosa na Israel nyi ccülikesathu tuwi na tsüti sachi.
7Apen tsüwa nyan pi Massa nu Meriba #17.7: Massa nu Meriba: Anyan hathu ha Ibri jüh wina “ghankenan” nu “leben-nkaghajüh kekhi” ci, kepaghenanye Israel nyithu na leben-nkaghajüh khi nu “Apvüwa na ntsakhiwa ithu ssitenla nu?” isa ma ghan-nan.
Amalek nyithu ssinu Aghikesa
8Amalek nyithu na Refidim wi gho Israel nyithu ssikaghashen. 9Mosa na Joshua kiza, “Anyi pahan ssiya nu wa ghanen wi Amalek nyithu ssisalo. Anyiza na hi kekiza ti hi wa ayikha miwi ikhhatssü ghansen nu ngan benden.” 10Joshua na Mosa ma kekiza ti wa Amalek nyithu ssinu aghisa, tsü tsüwi Mosa, Aaron, nu Hur ma kecheng na ayikha miwi kia. 11Mosa na ma kwen zanki keben chu Israel nyithu na khangya, isala ma kwen zanshaya lethu Amalek nyithu na khang shagha. 12Mosa na ma hacü mnanya kesa wi Aaron nu Hur manyi na alon kesü sengho nu Mosa ya ma miwi donki thsü, nu manyi ma kete wi kesü ajewa nu kesü na tavüwa ngan nu ma hacü tsü zükeqhe ghan sen wa aghani kedu cu. 13Hatinu Joshua na Amalek nyithu miwi khangya.
14 #
Aye 25.17-19; 1 Sam 15.2-9. Tsaseng wi Apvüwa na Mosa wi kiza, “Meshenben ten le kesalina khangkeya cüki ha zhüyalo. Hi Amalek nyithu tsü yasatha sa tenle kesa Joshua kizalo.” 15Mosa na kekinyipen kesü saya nu tsü nyan pi “Apvüwa na ithsükizankiwa” isa ci. 16Ma khi, “Apvüwa thsükezankiwa tsü misikhhali zanki chilo! Apvüwa na anuphanla Amalek nyithu ssisa benden.”
Currently Selected:
BVÜKESHHU 17: RENGNBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
