BINZEN 19
19
Sodom Kemu
1Tsanggelonyu mihvu le Sodom nyu keryü je, Lot le nyida gü khinrun ka dun bin. Au hyushü nyemhun a-le so-o gü au teno shü titse gü. A-le au mhundyü nyu nkhün lo njio, 2au ka, “Kedahvu, ale rape hai tsü titse hika hü nle. A ka ki ryülo. Hai pha süla njio ntsoje sun lolo. Tson-o lonyü nshwe so-o hai le dikipon güjü yo gülo gwa le.” Ai au le, “Nmvu le, ahi le ntsoje khensin nyida gü tsonchonyu hü ti, tsonla.” 3A-le au ka zo tserülo laryü, kenkhin ki au le a-zen-o a-ka ki gunla. Lot le a-gonyu ju no tesin genyu tensü peha roshü lo ketyüketsü nda kegwa thyü shülo tse zoshü. Tson-o ndalo ntsin anyugun tyütsü lo.
4tesin hvu le zhügü kemvu ka Sodom temi le ryü ka gü hun pfü lola. Nyida günyu temi nche peshü aphu tsüka bin. 5Anyugun le Lot ko-o a-ka, “Ntsoje nka ki ryü kebin hvu le diki hü nla? Zenchwiryü agun tsü shülo!” Sodom temi dan le au zen serikemvu thyü nyü sola.
6Lot le kamhun ki chwilo njio asizin kakhin la. 7Tson-o a-le anyugun ka, “apfünyu dan, ale hagun ka hi bin nle, serikemvu tsühontse thyü nyata! 8Hire, ale anyu lünyu phusen mihvu le bin nyo. Ano au zen chwiryü hagun tsüo, hagun le au zen-o nyu thyü nyü yo thyü lolo. Ai temi hihvu ge we thame thyü nyalo; au le asin nyu, tsügenyu ale au ntsen lomvu loshvu.”
9Ai anyugun le, “Agun ketekhi nyao tinla, nle tesin le! Nle segü le tseo agun no nyuthyü mvulo shvuyo agun ka zo bin nla? Agun tsonkhin nya nmvu yatselo au nyeki nle shvu kvuti.” Anyugun le Lot chen ketilao kakhin gü boren la titse kethün ryü. 10Ai temi hvu le Lot süpe kanyu ki shü lola njio ka khin la. 11Tson-o au le kamhun ki kebin temi dan aphu yhütyü no tha hyu mvula, tsügenyu anyugun le kakhin gü hyulo mvula.
Lot le Sodom nyu Tinkela
12Temi hvu le Lot ka, “Nyida günyu n nyenyu, peche, tenu, lo nmvunyu, nmvue nshvunye kecha lihi-e hü yatselo zenchwi la lo, 13ayi le bin higü nkela titse kebin genyu. Temi hidan nmusa kebin khwen dan Npugü le nyülo laso, lo Sodom nkela lotse ayi nishü laso.”
14Tsüselo Lot le gü anyugi hvu loti tse kebin hvuka, “Whütse hinyu chwila lo; Npugü le bin higü nke la titse kebin genyu tsonzoshü.” Ai au le ale keyüthyü bin ado tsela.
15Tsangben lo ntsin tsanggelonyu hvule, Lot ketsun-o, “Whütse nyida gü nke kela ka hagun keyhun nmhenmvu lo nrün genyu nnu lo nnyugi au zenchwi lalo tsonshü.” 16Lot le kenyuhvula. Tson-e Npugü le a-shwi njün-o; temi hvu no ale, a-nu, lo anyugi hvu anyugun ben sü zenchwi ryüo nyida gü nkenshü. 17Tson-o tsanggelonyu nme le anyugun ka, “Rhünlo nrün genyu tinlo! Rani-o siki nri nya lo ketejon nyu sun nya. Simvulo nrün genyu rincho ki tin kü lalo,” tsonshü.
18Ai Lot le zonio, “Nmvu, agun no tsühontse nyata kedagü, 19Hai le a njün sa-o a kenishü laso. Ai rincho dan le nithen ritsin; ale tsüki gülo kemvu ka kenke teno-o si kelai le. 20Hai le rünyi keshen ligü hyubin nmon? Tsü gü le a-kho nnisa bin nyo. Ano tsü nyu gü lo ta- tsü le bin keshen nme hai le hyu logwa-ale tsü nyu kenshvu ndio bin logwa le.”
21Tsontsin a-le, “Elo, akenda le. Ale nyishwe tsügü nkela loha. 22Whütse tinlo! Nle tsü tilo kemvu ka ale thame thyü loha.”
Lot le tsüpe keshen letse ko kela genyu, rünyi tsü zan pe Zoar letse la.
Sodom lo Gomorrah Kenke
23Lot le Zoar tikelo ka yhüko le chwiryü jüla. 24Tson-o Npugü le matso ripe Sodom lo Gomorrah nyida hvu so ge shüo, 25tsühvu lo tsü ketejon apentha, temi lo tsünyu yhun kebin lihi-e sin-o nkela. 26Ai Lot nu le rani-o sizin nrishü tson tsin tsi thün me ngwa la.
27Tsüsinyü lonyü nshwe ka Abraham le Npugü mhundyü ka so kethyü bin ka gü. 28A-le Sodom, Gomorrah lo ketejon apentha shwikeshü ka, kazü günyu mami keda rokebin hontse, mah le khu kebin hyulo. 29Ai Sunggigü le Lot le yhun kehü ketejon nyu nyida hvu nke kela ka, a-le Abraham rüchün-o Lot kenipe kenshvu kendi bin kishülo.
Moab lo Ammonite nyu le Yhunso keryü
30Lot le Zoar nyu bin nshvu kela genyu anyugi hvu zen-o rincho ge kü gü tsokü nme ka yhun hü. 31Nyurigi le a-sikezen gi ka, “N hin pvü le then güzhü laso, lo kazü nyu temi nme nhin zeyhun-o nhin no nyuzen kelomin ndiso. 32Tsügenyu, nhin pvü no zutsü nze lolo a-zenzhüo a-tsipwen no bin lo tinu.” 33Tson-o tsüje au le vainsha zu pe a-la shüo, nyurigi le a-zen-o zhü. Ai a-le nzesa kebin genyu tsü shamvu.
34Tsüsinyü nyurigi le a-sikezengi ka, “Ale nje a-zenzhü laso; ntsoje ko a-no nze nilo njio nle a-zen zhülo; Nhin mihvu nren nhin pvü nyu nmeme no bin lo tile.” 35Tson-o tsüje au le a-no nze lo-o nchegi le a-zenzhü. Tsüje ko a-le nzesa kela genyu a-le tsü shamvu. 36Hihontseo Lot nyugi mihvu nren apvü zen-o nyunphu pvülo. 37Nyuri gile peche nme nnyunlo-o a-zan pe Moab thalo. A-le ntsoka kehü Moab nyu dan bon gü. 38Nchegi ko peche nmennyun lo-o a-zan pe Benammi tholo. A-le ntsoka kebin Ammon nyu dan bon gü.
Currently Selected:
BINZEN 19: REGSBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
