BINZEN 20
20
Abraham lo Abimelek
1Abraham le Mamre ka ketu sen-o Kanan tesinzin Kadesh lo Shur au jaka yhun hü. Tsontseo kenkhin ki Gerar nyu yhun kebin ka, 2a-le a-nu Sarah le a-lügi le tse zola. Tson-o Gerar raja Abimelek le Sarah zen lola. 3Kheje me a-miki Sunggigü le ryüo a-ka: “Nle sila ti, nle tenu higi zenlo kela genyu, higi le kalu kela nyu so; ” tsonshü.
4Ai Abimelek le a-kho ka ryü mvuzun, lo a-le, “Npugü, ale thyüzümvu! Nle a higü lo a temi dan nkela ti ole? 5Abraham le a npfü tsügi le a-lügi letse zoshü, lo tsügi-e tsühontse zoshü. Ale anyun nshün-o thyü le, lo ale thame thyüzü lamvu le.”
6A-minki Sunggigü le a-jokeni-o, “Ale nle nnyun nshün hi thyü kela sha bin; tsügenyu ale nno amhundyü nyu mula mvu nrün genyu n ntsen lo-o nno a-kesü mvule. 7Ai ntsoka tenugi pe a-nyepvü tsü nila lo. A-le sidyükeshanyu nme, lo a-le n genyu kehi thyüti, tson-o nno simvu loti. Ai nle tsügi rani shüla kemvu we, n-e lo ntemi aphu sila ti.”
8Tsüsinyü lony-ü gü Abimelek le a-hensin kedanyu dan aphu ko shüo dihontse layo tsüpe anyugun ka zoshü, tsontsin anyugun le nshvu sala. 9Tson-o Abimelek le Abraham ko shüo a-ka, “Nle agun ge nyuthyü shü ola? Ale n ge nyuthyüzü shüo nle kenke sen ryü age lo a rajaphen so shü ti tse ola? Temi nme nle a ge thyü keshü hi hontse thyü loshvu. 10Nle nyuthyüo tsonshü ola?”
11Tsontsin Abraham le, “Ale Sunggigü kerhvu nme hinyu ndi lo anyugun le adushvu la-o anu zen lola ti ado tse rüchün kela genyu le. 12A-le alügi ketsin. A-le apvü nyugi le ai ajvü nyugi mvu lo ale a-lolo laso. 13Tsügenyu Sunggigü le apvü kanyu a nipe sinrünyi kazü ki keshü ka, ale a-ka, ‘Nle ligü higü ka-e ale ntsügü le tsezo-o nle ajozen kehü tsinshü logwa le tse a-ka zoshü le.’ ”
14Tson-o Abimelek le Sarah pe Abraham tsü nila, lo a-le tanyü, methu lo gonyu ko pe Abraham tsü shü. 15A-le Abraham ka, “A kazü le hile; nle diki bin nyü yo bin lo.” 16Abimelek le Sarah ka, “N zen kehü dan aphu mhundyü ka nle thyüzü lamvu tse kethyü zansü ale raka yieme pe ntsügü tsüshü bin nle; nle thyüzü lamvu tse kethyü ligü higü shalo ti.”
17-18Abraham nu Sarah no tson kela genyu, Npugü le Abimelek keda kanyu tenunyu nme-e no nyuzen mvula. Tsügenyu Abraham le Abimelek genyu hishü, tsontsin Sunggigü le a-thyü kesherhün shü. A-le a-nu lo a-gogi dan ko thyü kesherhün shüo anyugun no nyuzen lo.
Currently Selected:
BINZEN 20: REGSBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
