BINZEN 17
17
Gikerü, Kejozen Kelo Zansü
1Abram, le chen henteküotekü ka Npugü le a-hyühyu thyüo a-ka, “Ale kekvutsin Sunggigü le. A jo zenlo lo a-zintse nyule a-züyo tsü thyülo. 2Ale n zen-o kejozen kelo thyüti, lo n tsipwen kechon pe ntsü ti.” 3Tsontsin Abram le a-mhunpfü kazünyu nkhünrün tinla, tsüka Sunggigü le, 4“Ale nzen-o hi kejozen bin nyo: Nno senye kechon bon thyüti tse ale johoshü bin nle. 5Nzan pe Abram thyü sin loho, ai abraham tseti, ale nkhipe sense kechon bon thyü kela genyu. 6Ale n tsipwen kechon khishüti, lo anyugun peha le rajanyu thyüti. Nle n tsipwen kechon le bin-o anyugun le senye dan thyü chwiryüti.
7“Ale n, lo n tsipwen siki ryü nrün shenhe dan zen-o kethonthen kejozenkelo johokeshü thyüti. Ale n Sunggigü lo n tsipwen dan Sunggigü thyüti. 8Ale ntsoka nle tesin thyüo kebin kazü higü pe n, lo n tsipwen dan tsüti. Kanan kazü hi apentha le kethonthen n tsipwen dan hon thyüti, lo ale anyugun Sunggigü thyüti.”
9Lo Sunggigü le Abraham ka, “Nko ale nzen-o kejozen kelo hi thyüti, nle lo n tsipwen siki ryü nrün shenhe dan-e no. 10Nle lo n tsipwen aphu pechenyu nmeme tse kethyü aphu a-girü kü mvu loshvu. 11-12Ntsoka gerho pechenyu ligü higü nyu lolo jon tetse ka a-girü küti, hagun go hagun kanyu nnyu kelo lo tesin rünyi kecha pisa pe hei kelo dan sin. Higü hile nhin janyu kejozenkelo nme le bin tse tsin shüti. 13Nmeme tse girü la mvuloshvu, lo hile ale nzen kejozenkelo, hile kethonthen tse kethyü nthyü ge zansü nme tsinshü nrün genyu. 14Pechenyu ligü higü a-girü kemvu gü we atemi dan nyu nme tse swü loha, a-le azen-o kejozenkelo gü zenmvu kela genyu.”
15Sunggigü le Abraham ka, “Nnu ka Sarai tse ko sin loha; ntsoka gerho nyu a-zan le Sarah. 16Ale jochü pe a-tsüti, lo a-ge peche nme pe ntsüti. Ale jochü pe a-tsüti, lo a-le senye dan jvü gü thyüti, lo a-tsipwen dan nyu rajanyu le chwiryü ti.”
17Abraham le a-mhunpfü nkhün tsügü kazürün-o tharüchün adyügwa-o, “Temi nme le chentsi kela ki nyu nme hyu logwa ole? Sarah le chen hentekü ki nyu hyulo ti le?” 18Tson-o a-le Sunggigü ka, “Nyuthyüo Ishmael no a kenya gwen lo lamvu ola?” tse ketsoshü.
19Ai Sunggigü le a-ka, “Nmvu, Nnu Sarah le pechenyu nme nnyu pe ntsüti lo nle a-zan pe Isak tholo. Ale kethonthen a, lo a-tsipwen zen kejozen ti. Tsüle kethonthen kejozen kelo nme. 20Ale nle Ishmael genyu kehi nyülo laso, tsügenyu ale jochü pe a-tsüti, ale a-nyenyu kechon pe tsüti lo a-tsipwen thyü nchon shüti. A-le raja tseryü kenyhun pvü gü thyüti, lo ale a-tsipwen pe senye keda nme thyü shüti. 21Ai ale kejozen kenjü güle nnyugü Isak gen ti, teken ki higwen kho ki Sarah le a-nnyu loti.” 22Sunggigü le Abraham nthon pen la njio a-kheo tinla.
23Tsü jonyü Abraham le Sunggigü jozen-o a-nyu gü Ishmael lo a-kanyu kebin pechenyu a-go, a-kanyu nnyu kelo lo a-le hei kelo aphu sin-o anyugun girü küla. 24Abraham le a-keyhun chen henteküo tekü ka a-girülo, 25lo a-nyu gü Ishmael le chen tseryü kenshen. 26Au mihvu nren khenyüme au girülo, 27Abraham gonyu dan aphu zen kentsin-o.
Currently Selected:
BINZEN 17: REGSBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
