BINZEN 16
16
Hagar lo Ishmael
1Abram nu Sarai le nyu nme-e nnyu pe a-tsümvu. Ai a-le a-go gi nme Ijipt nyu a-zan le Hagar tse kethyü le bin, 2tsü genyu Sarai le Abram ka, “Npugü le ano nyu nyhun mvu laso. Nle a-ki gülo, a-le nyu nnyu pe atsü-e logwa.” Tson-o Abram le Sarai jozen la. 3Tson-o a-le Hagar pe Abram no a-thenu thyü. (Abram le Kanan nyu yhun kebin chen tseryü siki.) 4Abram le Hagar zen kengüo tsügi le nyu phupfü lo. A-le nyu phupfü lo kela shalo-o ketekho lo Sarai shwi ntsü lola.
5Tsüselo Sarai le Abram kazo, “Hagar le ashwi ntsü kebin tsüle n kemu le. Ale tsügi pe ntsüshü, lo a-le nyu phupfü kebin shalo ntsin a-le ashwi ntsü lola so. Nhin digü le njü yo Npugü no kera shülo!”
6Tsontsin Abram le, “Gwasa le, a-le ngogi lo nben nyu bin nyo; nle a-khipe nyuthyü nyüyo thyülo.” Tsüselo Sarai le Hagar nshwenyhün sa-o tsügi le tinla.
7Tsüka Npugü jolonyu nme le Shur ki kegü tson kazü kesi gü nyu zülu nme ka Hagar teno lo-o 8a-ka, “Sarai gogi Hagar, nle dikipon ryü lo diki gü zhü nla?” tson ketso.
Tsontsin a-le, “Ale a npugi kanyu tin jü nle,” tsonshü.
9Npugü jolo gü le a-ka, “Rani-o Npugi ki gun gü a-go thyü bin lo.” 10Tson-o, “Ale n tsipwen thyü nchon pe swülo bukeho thyü shüti. 11Nle peche nme nnyu loti, lo a-zan pe Ishmael tholo, Npugü le nle nnyu kenjün thyüo nra keshü nyülo kela genyu. 12Ai nnyu gü le tehen gada nme hontse ti; a-le ligü higü-e ntsun lo ligü higü a-ntsun ti. A-le a-shvunye aphu zen kekha-o yhun ti.”
13Hagar le a-npfü a-nthon-o, “Ale Sunggigü hyutsin thyü la-o yhun bin-o tsü rüla zolo gwa ti ole?” Tson-o a-le a-nthon keshü Npugü pe, “Hyukehü Sunggigü,” tse kola. 14Tsügenyu mele Kadesh lo Bered au jaka zülu gü tsüpe, “Ahyu kebin Rhünkehü gü zülu tse ko hü.”
15Hagar le peche nme nnyu pe Abram tsü, lo a-le a-zan tha pe Ishmael thyülo. 16Tsü gwenkho tsüle Abram le a-keyhun chen hentetseo tsero ka.
Currently Selected:
BINZEN 16: REGSBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
