BINZEN 15
15
Sunggigü le Abram zen Kejozenkelo
1Tha higü sika tsemin ki Npugü le ryüo Abram ka, “Nshvunyalo Abram, Kenshvu nyu ale n nokhin loti lo nchün keda nme pe n tsüti.”
2Ai Abram le, “A-phuso kekvu Npugü, ale anyenyu nme kendi le, nle achün thyü keshü tsüle agenyu nyukegwa thyülo tila? A kenya gwen nrün le Damaska nyu temi Eliezer n tiso. 3Nle anyenyu nme-e pe atsü shümvu, agonyu nme le akenya dan gwen tiso.”
4Tsontsin Npugü le a-ka zonikeshü a-le nyülo: “Gogü Eliezer le nkenya dan gwen loha; n npvü nnyu le nkenya gwen ti.” 5Tson-o Npugü le a-zen kamhun ki chwiryüo a-ka, “Tsangge nri shüo, nle swülo gwa yatselo shyenyü dan swüshwilo; tsonshüo a-ka ntsipwen no chon pe tsühontse ti.”
6Abram le Npugü tenyen, lo a-ketenyen hi genyu Npugü le a-shwi a-kenyüo a-le kemitsin le tselo.
7Tson-o Npugü le a-ka, “Ale kazü higü pe ntsüo nno nhon thyü titse Babilon nyu Ur ka nzen chwiryü le.”
8Ai Abram le, “Npugü Sunggigü, tsüle ahon thyü titse ale dihontse shalo gwa tila?” tse shünshü.
9Tsontsin a-ka, “Methutsü nme, tenyü lü nme lo tenyütse nme, chenshen shen thyü kela, lo nsu nme lo paro nme tse senryü atsü shülo.” 10Abram le nyukhu tsüdan sen Sunggigü ki ryüo; duthü kenyhun thyü pe ponha pe kecha gü ntsun küshü; ai ale tegü hvu we duthü mvu. 11Güda dan le thyükesimi dan ge ryü, ai Abram le tsü hüla.
12Yhüko che güzhü kelaki, Abram le zhüsa güla, lo tsüka kenshvu lo kenrin kethyü le a-ge ryü. 13Npugü le a-ka, “Nsenye le lojvü kecha ki tesin thyüo yhunti; a-nyugun le tsüki chen tsizi medo thyü lo mele anyugun nshwe ti. 14Ai ale shaja pe anyugun no a-dokethyü tsipwen gü tsüti, lo anyugun le lojvü tsü gü kheo tin kejü ka kenya kechon senchwi ti. 15Lo nno thensa kela siki nnyun bwenye tse sio n lope sunti. 16N tsipwen dan le rani hiki ryü kemvu ka phuzi no bin ti, Amornyu temi dan serikemvu le pen kemvu zun genyu.”
17Yhüko che la-o zün lo ntsin, mah kekhu la nme lo mah kenyü chwe nme le chwiryüo nyukhu duthü pe shü kenjü janyu tin la. 18Tson-o tsüka Npugü le Abram zen-o kejozen nme thyüshü. “Ale Ijipt rhi ka gü Eufrates züri gü keti kazü hi aphu pe n tsipwen tsüti, 19Kenitnyu, Keniznyu, Kadmonitnyu, 20Hitnyu, Periznyu, Regaim, 21Amornyu, Kanan nyu, Girgashnyu lo Jebusnyu kazü aphu sin.”
Currently Selected:
BINZEN 15: REGSBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
