INṬANNA 46
46
Jakob le asûnghai Aiguptaah an fe
1Chuongchun, Israel chu a nei po po leh a suok a, Beer-seba chu a tlung a, a pa Isak Pathien kuomah inthâwinahai ân hlân a.
2Chun, Pathienin zâna a manghaia chun Israel chu a biek a, “Jakob, Jakob,” a ti a. Ama chun, “Hitaka hi ka um,” a ti a.
3Chun, ama chun, “Kei Pathien, i pa Pathien chu ka nih: Aiguptaa zu fe chu ṭi naw rawh: chutaka chun chi ropuitakah ka siem ding che a nih.
4Aiguptaa chun nang leh fe vêng ka ta; chun, zu ṭhuoi kai nâwk ngei ngei ka ti che: chun, Josef chun i thi pha i mit a siempêk ding che a nih,” a ti a.
5Chuongchun, Jakob chu Beersebaa inthawk chun a suok a, Israel naupahai chun an pa Jakob le an nauhai le an nuhmeihai chu chuongna dinga Pharao tawlailîr inphurhaia khan an inchuongtir a.
6 #
Tt 7.14-15
Chuongchun, Jakob le a thlahai po po chun, Kanaana an them suok, an ranhai le an thuomhnawhai chu an sawm a, Aigupta chu an tlung ta a.
7Jakob chun a naupasalhai, a tupahai, a naunuhmeihai, a tunuhai, a thlahai po po chu, Aiguptaa chun a lûtpui tâwl ta a.
8 #
Ex 1.1-14; Nam 26.4-50 Chun, hieng hi Israel thla Aiguptaa lût, Jakob le a naupasalhai hming chu a nih: Reuben, Jakob nau lutîr chu.
9Chun, Reuben naupasalhai chu: Hanok, Pallu, Hezron le Karmi.
10Simeon naupasalhai chu Jemuel, Jamin, Ohad, Jakin, Johar le Kanaan nuhmei le an naupasal Saula.
11Levi naupasalhai chu Gerson, Kohath le Merari.
12Juda naupasalhai chu Er, Onan, Selah, Perez le Zera. (Er le Onan chu Kanaan ramah an thi tah). Perez naupasalhai chu Hezron le Hamul.
13Issakar naupasalhai chu Tola, Puva, Job le Simron.
14Zebulun naupasalhai chu Sered, Elon le Jahleel.
15Hienghai po hi Leah naupahai, a naunu Dina leh Paddan-aram rama Jakob a neipêkhai chu an nih: a naupasalhai le a naunuhmeihai po po chu sâwmthum pathum an nih.
16Gad naupasalhai chu: Ziphion, Haggi, Suni, Ezbon, Eri, Arodi le Areli.
17Aser naupasalhai chu: Imna, Isva, Isvi, Beria le an farnu Sera. Chun, Beria naupasalhai chu: Heber le Malkiel.
18Hienghai hi Labanin a naunu Leah a ipêk Zilpah naupasalhai chu an nih, hienghai hi Jakob a neipêk a, mi sâwmparuk an nih.
19Jakob nuhmei Rakil naupasalhai chu: Josef le Benjamin.
20Josef chun Aiguptaah naupasal Manasse le Ephraim chu a nei a, chuhai chu On khaw thiempu Potiphera naunu Asenathin ama a neipêk a nih.
21Chun, Benjamin naupasalhai chu: Bela, Beker, Asbel, Gera, Naaman, Ehi, Rosh, Muppim, Huppim le Arda.
22Hienghai hi Rakil naupasalhai Jakob a neipêkhai chu an nih; hienghai hi Jakob a neipêk a, an rêng chun sâwmpali an nih.
23Chun, Dan naupa chu Husim.
24Naphtali naupasalhai chu: Jahzeel, Guni, Jezer le Sillem.
25Hienghai hi Labanin a naunu Rakil kuoma a pêk Bilha naupasalhai chu an nih; hienghai hi Jakob a neipêk a, an rêng chun pasari an nih.
26Jakob naupasalhai nuhmeihai tiem lovin Jakob le Aiguptaa lût ve, a ṭhalbea suok po pohai chu, an rêng chun sâwmruk paruk an nih;
27 #
Tt 7.14
chun, Josefin Aiguptaa naupasal a neihai chu pahni an nih: Jakob sûnghai po po Aiguptaa lût chu sâwmsari an nih.
Aiguptaa Josef le a sûnghai chanchin
28Gosen ram tieng lo khikhmu dingin Juda chu Josef kuomah Jakobin a lo in fe hmasatir a: chuongchun, Gosen rama chun an lût ta a.
29Chun, Josef chun a tawlailîr chu a siemrêl a, Gosenah a pa Israel tuok dingin a hang fe a: chun, a kuomah ân hriettir a, a ir a suktuo a, sâwt fe a ir suktuoin a ṭap a.
30Israel chun Josef kuomah, “Damin i la um a, i hmêl ka hmu nâwk ta lei hin tuhin chu nuom leh thi ta de ning,” a ti a.
31Josef chun a unauhai le a pa sûnghai kuomah, “Hang fêng ka ta, Pharao hril ka ta, a kuomah, ‘Ka unauhai le ka pa sûnghai, Kanaan rama umhai kha, ka kuom an hung tlung tah;
32anni chu ran vaituhai an ni leiin berâm vêngtuhai an ni a, an berâm ruolhai le an bâwng ruolhai le an nei po po an hung sawm vawng a nih,’ tiin, hang hril ka tih.
33Chun, Pharao chun a ko cheu a, ‘Ieng sin am in thaw hlak ?’ a ti pha cheu chun,
34nangnîn, ‘I siehlawhai hi kan thlatuhai chenah naupang chite kan ni laia inthawk tu chen hin ran vaituhai kan nih,’ ti ro: chuongchun, Gosen ramah um thei in tih. Berâm vêngtu hrim hrim chu Aigupta mihai tirdak zâwngtak a ni si a,” a ti a.
Currently Selected:
INṬANNA 46: HMOVBSI
ማድመቅ
ያጋሩ
ኮፒ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
