INṬANNA 45
45
A unauhai kuoma Josef inpuongna
1Chun, Josef chu a kâwla ngîr po pohai hmaa chun ân sûm zo ta naw a, “Mi po po ka kuoma inthawk hin infe suoktir vawng ro,” tiin a khêk a.
2Chuongchun, Josef a unauhai kuoma ân hriettir sûng po a kâwlah tukhawm an ngîr nawh. Chun, a ṭap ta rak rak a, chuongchun, Aigupta mihai chun an hriet a. Pharao sûnghai khawmin an hriet bawk a.
3Chun, Josef chun a unauhai kuomah, “Josef kha ka nih, ka pa chu a la dam maw?” a ti a. Nisienlakhawm, a unauhai chun an dawn thei naw a, a hmaa chun lungzîngtaka an um leiin.
4Josef bawkin a unauhai kuomah, “Lunginsiettakin mi hung hnai ta u,” a ti a. Chuongchun, an va hnai a. Ama chun, “In unaupa Josef, Aiguptaa lûtpui dinga in izawr kha ka nih.
5Tuhin hitaka fe dinga in mi zawr leiin lungngai naw ro, nangni le nangni intheida bawk naw ro: mihai hringna sanhim dingin Pathienin in hmaah a mi tir hmasa a ni hi.
6Hi kum hni sûng hi hi rama hin ṭâm a hung tla ta a: kum nga a la bâk a, chu sûng po chu hnuoi inlet um naw ni a, bu sîk khawm um naw bawk a tih.
7Chuongchun, hnuoia hin chithlahai hlapêk ding cheu le, sanhimna ropuitaka in ta dinga mi tamtak sanhim ding cheuin, Pathienin in hmaah a mi lo tir hmasa a nih.
8Chuongchun, hitaka mîn kaitirtu hi nangni in ni naw a, Pathien a ni lem, ama chun Pharao paa le a sûnghai po po hotuah le Aigupta ram po po rorêltuah a mi siem ta a.
9 #
Tt 7.14
Inhmâwtakin ka pa kuomah hang fe unla, a kuomah, ‘I naupa Josef chun hieng ang hin a tih, Pathienin Aigupta ram po po hotuah a mi siem ta a, ka kuomah hung thla rawh, sâwt hung riel naw rawh;
10Gosen ramah um i ta, ka kâwl hnaiah i um ding a nih, nang le i nauhai le i tuhai leh, i berâm ruolhai le i bâwng ruolhai leh, i nei po pohai leh;
11chutaka chun keiin châwm ka ti che a, ṭâm ding kum nga a la um si a; chuong naw chun nang le i sûnghai le, i nei po po rimsi rawi in tih,’ ti ro.
12Tuhin nangni mit ngei le, ka sangpa Benjamin mit ngeiin, keia bau ngeiin a hril ti in hmu hi.
13Aigupta rama ka ropuina po po thu le, in thil hmu po po thu hi ka pa hril in ta, ka pa chu inhmâwtakin hitaka hin in hung ṭhuoi thlâk ding a nih,” a ti a.
14Chun, a ir le a sang Benjamin ir chu suktuoin a ṭap bawk a.
15Chun, a unauhai po po chu a fâwp a, a ṭap khum seng a; chu hnunga chun, a unauhai chun thukhawchâng an hrilpui ta a.
16Chun, “Josef unauhai an hung,” ti thuthang Pharao ina an lo hriet chun Pharao le a siehlawhai a suklâwm hle a.
17Pharao chun Josef kuomah, “I unauhai kuomah, ‘Hieng hin thaw ro, in sahai bu inphurtir unla, Kanaan ramah fe ro:
18chun, in pa le in sûnghai chu hung ṭhuoi unla, ka kuoma hin hung ro; chuongchun, Aigupta ram ṭhatna lai tak pêng ka ti cheu a, chu rama thil ṭha takhai chu in fâk ding a nih,’ ti rawh.
19Chun, hieng ang hin hril bawk la: in nauhai ta ding le in nuhmeihai ta dingin Aigupta rama inthawk hin tawlailîrhai lain fe unla, in pa ṭhuoiin hung ro.
20In thuomhnaw khawm ngaituo nuom naw ro, Aigupta ram po poa thil ṭha taphawt hi in ta a ni si a, tiin,” a ti a.
21Chuongchun, Israel nauhai chun chuong ang chun an thaw a: chun, Josef chun Pharao thupêk ang chun tawlailîrhai a pêk a, lampuia dingin fâk ding a pêk bawk a.
22An rênga kuomah silfên inthlengna ding a pêk seng a; Benjamin kuoma lem chu tangka za thum le silfên inthlengna panga a pêk a.
23Chun, an pa kuoma chun sabengtung sâwm Aigupta rama thil ṭha phur le, sabengtungpui sâwm, bu le bei le, lampuia a pa ta dinga mamaw danghai phur ân phur a.
24Chun, a unauhai chu a tir suok a, an fe ta a: chun, ama chun an kuomah, “Lampuia inhal lo dingin fimkhur ro,” a ti a.
25Chuongchun, Aiguptaa inthawk chu an fe tung a, Kanaan rama, an pa Jakob kuom chu an hang tlung a.
26A kuomah, “Josef kha a la dam a, Aigupta ram po po rorêltu a nih,” tiin an hril a. Chun, a lung chu a mit sul a, an thu hril chu a awi si naw a.
27Chun, a kuomah Josef thu hril po po chu an hril a; a chuongna ding tawlailîrhai Josefin a inphur chu a hmu chun an pa Jakob lungril chu a har ta huoi a:
28chun, Israel chun, “A hun tah ie, ka naupa Josef chu damin a la um a ni tak tak hi: ka thi hmain ama zu hmûng ka tih,” a ti ta a.
Currently Selected:
INṬANNA 45: HMOVBSI
ማድመቅ
ያጋሩ
ኮፒ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
