MATIYU 14

1Di saha ka NaaHɛroodi Tɛtirakyi la daa ti wum Yisa damni, 2ka tɔ'asi n‑ti u kpambaya, ni, “Gyɔni sɔ ŋɔn daa suuri niriba koom la nŋɔa, ŋɔna n doaai kum ni; lala zugu n kyɛ ka u mari yiiko n‑tumni alahazibu tuma wa.” 3-4Ka di gbinni n‑daa nŋɔa: Pɔ'asɔ n daa bɛ ni ka u yuuri boonni Hɛroodiyasi. Ŋɔn Hɛroodiyasi daa nyɛ la NaaHɛroodi beeri, Filipi, pɔ'a, ka Naaba daa fa u n‑di u. Dizugu ka Gyɔni daa yɛli Naa maa, ni, “Di ka soori ni i di pɔ'a maa!” Ka u pɔ'a Hɛroodiyasi zugu daa kyɛ ka NaaHɛroodi daa tum n‑gbaai Gyɔni m‑ba u kutti ka kpeesi u dansarika. 5Dizugu ka Hɛroodi daa boori u ku Gyɔni, amaa ka zɔri zama maa dabeem dama ba zaa daa sakki, ni, anabi n nyɛ Gyɔni. 6Ka NaaHɛroodi dɔ'am dabsiri daari kyuu daa ti paai, ka Hɛroodiyasi bipuŋŋa daa wa niriba tooni halli ka Naaba sufu daa ti maai. 7Ka dizugu u daa pɔ noori ka yɛli u, ni, u nin ti u ŋɔn boori seelli kam zaa. 8Ka bii maa ma daa wulisi u ŋɔn ya n‑yɛli seem, ka u daa susi Naaba, ni, u boori la Gyɔni Kɔsuura zugu, ka ba fikki ka n‑niŋi laa ni m‑mari na n‑ti u. 9Ka di daa niŋi Naaba maa sufusa'aŋŋu, amaa u daa pun pɔ noori n‑ti bii maa u saamma tooni, ka di zugu u daa yɛli, ni, ba mari na n‑ti u. 10Ka u daa kyɛ ka ba kyaŋŋi dansarika ni n‑fikki Gyɔni zugu bɛni, 11ka zaŋŋi ka n‑niŋi laa ni m‑mari na nti ti bipuŋŋa maa, ka u daa mari n‑kyaŋŋi n‑ti u ma la. 12Ka Gyɔni nyaandɔliba daa kyɛ na nti zaŋŋi u ningbiŋŋu maa n‑kyaŋŋi nti sɔ'ai, ka naayi kyaŋŋi n‑yɛli Yisa.

13Ka Yisa ŋɔn daa ti wum Gyɔni yɛla maa, u daa kpɛ nyariŋŋu n‑kpa luginseelli sɔ ŋɔn ka ni, ŋɔn ni u nyaandɔliba kɔkɔa. Ka niriba maa daa wum lala ka daa yi tinsi zaa ni n‑kyaŋŋi n‑dɔli mɔ'aduuri maa ka kari u nɔba. 14Ka Yisa ŋɔn daa ti yi nyariŋŋu maa puuni na, u daa laa n‑nya daadam maa, ka u sufu daa zɔ ba namboo, ka u daa tibi ba baaridima maa. 15Zaanoori saha ka u nyaandɔliba maa daa kyɛ na nti yɛli u, “Saha pun gaari, ka kpa wa laa n‑nyɛ la luginseelli sɔ ŋɔn ka ni: tim niriba maa soori ni ba wurigi n‑kpɛ tinkpansi maa ni, n‑da diibu n‑di.” 16Ka Yisa labsi n‑yɛli ba, “Ba ku kyaŋŋi seela. Ya tim ba seelli ka ba di.” 17Ka ba daa yɛli u, ni, “Ti ka diibu kpa, m‑paasi paanu bunkpila anu, ni zaasim ayi kɔkɔa.” 18Ka Yisa daa yɛli ba, ni, ba mara a na n‑ti u. 19Di saha ka Yisa yɛli niriba maa, ni, ba zinma moori la zugu. Ka u daa zaŋŋi paanu anu ni zaasim ayi maa n‑gɔsi saazugu m‑puusi Naawunni ka ŋmaai paanudima maa n‑zaŋŋi n‑ti u nyaandɔliba maa ni ba deaai n‑ti zama maa. 20Di saha maa ba zaa daa di n‑tigi, ka ba daa la'asi dikyɛba an kpalim la m‑paali peeri piiya ni ayi. 21Ninvugseeba ban daa di lala diibu maa mun daa nyɛ la dɔppa tusa anu, m‑paasi pɔ'aba ni biisi.

22Di nyaaŋŋa ka Yisa daa kyɛ ka u nyaandɔliba kpɛ nyariŋŋu puuni n‑daŋŋi tooni n‑lɔŋŋi mɔ'aduuri, ka ŋɔn mammaŋŋa daa kpalim n‑kyeoosiri niriba maa. 23Ka ŋɔn daa kyeoosi ba n‑naai, u daa kyaŋŋi n‑du zoori zugu, ni u ti bɛ bɛni u kɔkɔ m‑puusi Naawunni. Yuŋŋu ŋɔn daa ti ya zibi, ka Yisa daa kpalim m‑bɛ bɛni, u kɔkɔa. 24Ka nyariŋŋu maa daa pun kyaŋŋi tooni wa'aligu, m‑bɛ la mɔ'ari sunsukkuni. Ka pɛsigu daa zeeri ba tooni n‑nyaŋŋi nyariŋŋu maa koom maa ni, ka di daa mugsi ba pam. 25Ka din daa pɔri bɛkyikyeoo, ka Yisa daa kyɛ ba saani maa na n‑kyɛnni koom maa zugu. 26Amaa u nyaandɔliba daa nya u ka u kyɛnni koom zugu, ka di daa gyɛri ba pam, ka ba yɛli, ni, kpiinyisigi n nyɛ u, ka daa ŋmɛ kuŋŋa dabeem zugu. 27Ka Yisa daa tɔ'asi n‑ti ba, n‑yɛli ba, “Ya mari sufukpeemni ka di kyɛ ka dabeem mari ya! Ka mani nla!” 28Dinsaha ka Piita daa yɛli, “N dugma, di yi siri nyɛ la nyini, nyin kyɛ ka n kyaŋŋi koom wa zugu n‑kyɛ i saani na.” 29Ka Yisa daa labsi n‑yɛli u, “Tɔ, kyɛm na!” Ka Piita daa yi nyariŋŋu maa ni n‑tɔm koom maa zugu ka gbaai kyɛnni ni u ti paai Yisa ŋɔn daa bɛ seela. 30Amaa Piita ŋɔn daa ti nya pɛsigu ŋɔn zeeri seem la, dabeem daa gbaai u ka u daa piili n‑simni koom maa ni. U daa kaasi n‑yɛli, “Faam ma, n dugma!” 31Ka Yisa daa teaai u nuu yooma n‑gbaai Piita, ka yɛli u, ni, “Nyin yɛddakɔŋŋna wa, wula zugu ka i birisira?” 32Ka ba daa kpɛ nyariŋŋu maa ni ka pɛsigu maa daa kyɛ zeebu. 33Ka u nyaandɔliba ban daa bɛ nyariŋŋu maa ni daa gyeemni Yisa n‑yɛtti, ni, Naawunni bii n siri nyɛ u.

34Tɔ; ka ban daa lɔŋŋi mɔ'ari maa ba daa ti paai Gyɛnɛsarɛti tiŋŋa. 35Ka bɛni niriba maa ŋɔn daa ti baŋŋi, ni, Yisa n nyɛ u, ba daa tum nti yɛli tinkpansi zaa an daa gyiligi bɛni maa, ka ba daa mari ba baaridima zaa n‑kyɛ u saani na. 36Ka ba daa susi u, ni, u kur kyɛ ka ba siisi u kparigu nangbanni, ka ban daa siisi zaa daa nya alaafɛa.

Currently Selected:

MATIYU 14: maw

ማድመቅ

Copy