MATIYU 15

1Di saha ka Farisii dimseeba daa yi Gyɛrusalɛm n‑kyɛ Yisa saani na, ban ni zaaligu karimbaseeba. Ka ba daa yɛtti, 2ni, “Bɔ n niŋi ka i nyaandɔliba maa sa'amni la ti yaadima kaari? Dama ba bu peaari ba nuusi ka diri bundirigu.” 3Ka Yisa daa labsi n‑yɛli ba, “Ka bɔ n niŋi ka yarima za'asiri Naawunni zaaligu, ya yaadima kaari dɔligu zugu? 4Naawunni daa pun bu yɛli ya lala? - ni, ‘Tim i ba ni i ma gyirima’; ni, ‘ŋɔn tɔ'asi bumbeoo zaŋŋi n‑kpa u ba bee u ma, ya nin kyɛ ka u kpi.’ 5Ya mun yɛtti, ni, sɔ yi ti yɛli u ba, bee, u ma, ni, ‘Yan da naa n‑nya seelli n saani ka n pun zaŋŋi n‑ti Naawunni.’ 6Ni, lala zugu di bu laa n‑kpa ni di daama gyeemni u ba ni u ma yaasa. Di zugu ka ya niŋi ka ya ba'a laa n‑ka Naawunni zaaligu ni, ya yaadima kaari dɔligu zugu.” 7Ni, “Ya birikɔnsi daandima wa! Anabi Aizaaya daa pun mari yɛlimaŋni ŋɔn daa bugi n‑yɛli ya yɛla seem la, ka daa sɔbi, ni, Naawunni yɛliya, ni#:-

8‘Niriba wa gyeemni ma la ni ba nangbana.

Ba sufu mun ka n saani, ka kpalim n‑wɔ'a;

9Ba gyeemni ma la yɔri:

Ban wulisiri la zaaliseaa maa pa la bunseelli zaa

Na'ala ninsaala yɛligu kɔkɔa.’ ”

10Ka Yisa daa booli niriba maa u saani na n‑yɛli ba, “Ya wumma! Ya baŋŋma! 11Di pa la din kpeeri ninsaala noori ni n‑kyɛ ka u leebi da'ari daana Naawunni saani. Amaa bunni din yiiri nira noori ni na n kyɛ ka u leebi da'ari daana.” 12Ka u nyaandɔliba maa daa kyɛ u saani na nti boosi u, ni, “Ammi, i mi, ni, nyin yɛli seem la bu niŋi Farisidima maa nya'asim?” 13Ka Yisa daa gyɛrigi n‑yɛli ba, “M Ba ŋɔn bɛ arizana ni wa yi bu sa tiseaa, ba nin vukki lala tii maa n‑lusi. 14Ya kyɛli ba! Dama ba nyɛ la zoomma, ka zooma yi ya n‑dari u zoontaraana, ba zaa ya n‑lu la bɔ'ari ni.” 15Di saha ka Piita daa yɛli u, “Kur wulisim ti nyɛsiri wa gbinni.” 16Ka u daa yɛli, ni, “Ya gba yam na bu gaari ban dinni maa? 17Ya bu mi di gbinni? - ni, bunseela an kpeeri ninsaala noori, u puuri ka a kpeera, ka gatti n‑yi bangyira zii la ni. 18Amaa din yiiri ninsaala noori ni na, u sufu ni na ka di yiira, ka din mun nin toaai n‑sa'am ninvugkasi. 19Dama teesibeeri zaa yiiri ninsaala puuni, ni u sufu ni na; an kyɛ ka u tumni tumbeeri - n‑kuuri niriba, n‑tumni la zina, m‑boori seeba pɔ'aba, n‑zuura, m‑ma'ari ziri n‑lusiri niriba kootu ni; ka tuuri ninsaala ni Naawunni. 20Yɛlibeeri anŋɔ taabu zaa n kyɛ ka ninsaala leebi da'ari daana, amaa nira yi bu peaai u nuusi ka di bundirigu, lala ku toaai n‑kyɛ ka u leebi da'ari daana.”

21Yisa daa yi bɛni m‑bakki n‑kyaŋŋi tinseaa kan pɔri Taaya ni Saidoon tinsi ni. 22Ka Kyɛna'ampɔ'asɔ ŋɔn daa yi lala tinsi maa na daa fabinni pampam, ni, “N daana, nyin NaaDauda bii wa, zɔm ma namboo! Arizimbeoo n kur mugsiri m bipumbila ka di bu veeli gba!” 23Yisa mun daa bu labsi u seela. Ka u nyaandɔliba daa kyɛ u saani na nti susi u, ni, “I bu ya kari u? - Dama u kur katti ti nɔba n‑fabinni pampam.” 24Ka u daa labsi n‑yɛli ba, ni, “Ba daa bu tum ma na faasee ni n kyɛ Izraɛli dima ban bɔrigri hoo peesi la saani na.” 25Pɔ'a maa mun daa kyɛ u saani na n‑gbaantiri n‑ti u n‑yɛtta, “N daana, kur suŋŋma ma!” 26Amaa Yisa daa labsi n‑yɛli u, “Kyɛ ka ti daŋŋi n‑diisi biisi la. Di bu tu ni ti zaŋŋi biisi bundirigu maa m‑basi babisi la.” 27Ka pɔ'a maa daa yɛliya, ni, “Yɛlimaŋni, n Daana, amaa babisi la gba ku kɔŋŋi ba piisi ban su ba la sa'akyɛba an luri tiŋŋa la.” 28Ka Yisa daa labsi n‑ti u, ni, “Mboo! Pɔ'a, i mari la yɛdda pam gba! Di nin niŋi nyin boori seem n‑ti i.” Ka u bipuŋŋa maa daa nya tippu lala saha maa.

29Di saha ka Yisa daa bakki n‑kyaŋŋi n‑dɔli Galilii mɔ'ari kpaŋŋa, nti du zoori zugu n‑zinni bɛni. 30Ka niriba pam daa mari ba baaridima n‑kyɛnni u saani na, gbarisi ni wɔbsi n daa bɛ ni, ni zoomma ni tubkpira dima, ni banŋɔ taabu pam. Ba da zaŋŋi ba m‑basi Yisa nɔba ziiya, ka u daa tibi ba zaa. 31Ka di daa niŋi daadam maa alahazibu, dama ba daa nya ka mugsi tɔ'asira, ka wɔbsi nyari tippu, halli ka gbarisi ti doaari n‑kyɛnni ka zoomma gɔsiri n‑nyari gba. Ka ba daa pɛ'ai Izraɛli dima Naawunni di zugu.

32Yisa mun daa booli u nyaandɔliba maa u saani na nti yɛli, “N sufu bu maai niriba wa yɛla zugu, dama ba bɛ n saani ka di paai dabsa ata ka ka seelli ni ba di. M bu boori n kyɛ ka ba kuli yɔri, baseeba nin ligi soori ni.” 33Ka u nyaandɔliba maa daa yɛli u, ni, “Yani ka ti nin nya bundirigu n‑diisi niriba wa zaa moo wa ni?” 34Ka Yisa daa yɛli ba, “Boroboro abala ka ya mara?” Ka ba daa labsi n‑yɛli u, ni, “Abayɔpɔi ka ti mara, ni zaasim beela.” 35Ka ŋɔn daa kyɛ ka niriba maa zini tiŋŋa maa, 36u daa zaŋŋi boroboro ayɔpɔi ni zaasim maa n‑tisi Naawunni pɛ'abu ka ŋmaasi n‑tisi u nyaandɔliba maa, ka ba daa zaŋŋi n‑tɔri daadam maa. 37-38Ka sɔkam zaa daa di n‑tigi; dɔppa maa daa paai tusa anaasi, m‑paasi pɔ'aba ni biisi maa. Ba daa ŋɔbi ka kyɛa, ka u nyaandɔliba maa daa vaai dikyɛba la m‑paali peeri ayɔpɔi. 39Ka Yisa ŋɔn daa kyeoosi ba ka ba kyaŋŋi maa, ŋɔn ni u nyaandɔliba maa daa kpɛ nyariŋŋu n‑kyaŋŋi Magyada tiŋŋa ziiya.

Currently Selected:

MATIYU 15: maw

ማድመቅ

Copy