Tio 19

Uvaʼs itxhusun quBʼaal Jesuus, tiʼ uvaʼ yeʼ laʼ isaʼa laʼ utxh jatxo ibʼ

Kuxh 10.1-12; Luk 16.18

1Yaʼetz kuxh vet Jesuus tiʼ iyoloneʼ, tul el vet bʼen Jesuus tuulbʼal Galileea. Tul yekich vet Jesuus tu txʼavaʼ tuulbʼal Judeea tziʼ elaʼp u aʼ u Jordaan. 2Tul mam tenam txhʼuyich tzaan tiʼ Jesuus. Tul nikich motx ibʼan Jesuus bʼaʼn inqʼa yaabʼ.

3Aqʼbʼetz jolol inqʼa fariseeo vatz Jesuus, tan nikich motx itxhok txumbʼal tiʼ tel Jesuus t-bʼey tiʼ inimal u bʼekʼbʼal. Tul ech val u yol motx tabʼi te Jesuus s-eche: —¿Maqetz laʼ utxh vatz u bʼekʼbʼal uvaʼ kam kuxh s-tiʼil laʼ ijatxvat tibʼ invaʼq u vinaq tuchʼ tixqel? —xeʼt inqʼa fariseeo.

4Yaʼne ech tal Jesuus s-eche: —Yeʼetzebʼ nik ibʼen sete kam u yol uvaʼ tzʼibʼamal ka uvaʼ, vaʼl kuxh vinaq, atz vaʼl kuxh ixoq iviinqixsa ka quBʼaal Tiuxh vatz u txʼavaʼ uvaʼs ixeʼt tzaan u qʼij saq.#Jeenesis 1.27; 5.22 5Tan ech vaʼt u yol tzʼibʼamal ka s-eche: «Laʼ taqʼ ka u vinaq itxutx ibʼaal. Tul laʼ ikʼul vet tibʼ tuchʼ u tixqel. Tul vaʼl kuxh vet itxhiʼoʼl u vinaq tuchʼ u tixqel laʼ ibʼana,» chich u yol.#Jeenesis 2.24 6Tan jit vet kaʼvaʼl vatz quBʼaal Tiuxh laʼ ibʼana. Pet vaʼl kuxh veteʼ. Echetz nik valte sete, jabʼiste uvaʼ quBʼaal Tiuxh nik aqʼon ikʼul tibʼ, tul yeʼxhabʼil vet vaʼq laʼ jatxon ixoʼl, —xeʼt Jesuus.

7Yaʼne ech tal inqʼa fariseeo te Jesuus s-eche: —Oq echxhte, tul ¿kam s-tiʼil tal ka Moisees uvaʼ tetxhal kuxh laʼ taqʼ u vinaq vaʼl uʼ tetz jatxo ibʼ te u tixqel?, tal uvaʼ laʼ talvat inimat viyol uvaʼs tiqʼot tibʼ tuchʼ u tixqel, —xeʼt inqʼa fariseeo.#Deuteronoomio 24.1-4

8Yaʼne ech tal Jesuus s-eche: —Kam koq s-tiʼil, pet tiʼ kuxh u tial ikʼuul inqʼa xaole, eche u tial ekʼuul s-txheel, ikuyvat Moisees ijatxt tibʼ u vinaq tuchʼ u tixqel. Pet jit ech uvaʼe ibʼan ka quBʼaal Tiuxh uvaʼs ixeʼt tzaan u qʼij saq. 9Pet toq val sete: Yeʼ laʼ utxhi laʼ ituki bʼen u vinaq u tixqel, oq kam kuxh invaʼq s-tiʼil. Pet ech kuxh laʼ tutxhe, oq aʼ u ixoq laʼ iyansa tibʼ tuchʼ vaʼt vinaq. Tan oq loqʼs kuxh laʼ ituki bʼen u vinaq u tixqel, tul oq laʼ tiqʼo u vinaq invaʼtoʼq ixoq, tul yansa ibʼetz vete laʼ ibʼan u vinaq. Jaʼletz txhan vet u vinaq uvaʼ laʼ iqʼon vet u ixoq uvaʼ jatxel vet tibʼ tuchʼ vitzumel, tul yansa ibʼetz vete laʼ ibʼan s-kaʼbʼil, —xeʼt Jesuus.#Tio 5.32; 1 Koriintios 7.10-11

10Yaʼne ech tal inqʼa nikich itxhus tibʼ kʼatz Jesuus s-eche: —Poro oqetz ech laʼ elkaʼpun invaʼq u vinaqe tuchʼ tixqel, tul bʼaʼn uvaʼ tira kuxh yeʼ laʼ utxh txhejchil, —xeʼtaq te Jesuus.

11Tul ech tal Jesuus s-eche: —Jit kaqaay inqʼa vinaq laʼ txʼolon uvaʼ yeʼ laʼ txheji. Pet taʼn kuxh inqʼa vinaq uvaʼ quBʼaal Tiuxh laʼ lotxhon tiʼ itxʼolt tatineʼ. 12Tan at vinaq uvaʼ yeʼnaq alaloq, tul atxh vet tzaan s-tiʼ uvaʼ aʼxh yeʼ laʼ txheji. Atz at vinaq uvaʼ laʼ utxh itxhejaʼ; pet junt aʼ laʼ saʼon s-tiʼ, tul yeʼ laʼ txhej veteʼ. Pet atetz jolt vinaq uvaʼ junt kuxh nik imaq tibʼ tiʼ yeʼ itxhejaʼ, tan aʼ titzʼabʼal ipaxsal inqʼa yol tiʼ vibʼant quBʼaal Tiuxh, uvaʼ tu amlikaʼ, viqʼesalil xoʼl inqʼa xaol.

Pet oqetz at ex laʼ txʼolon emaqt etibʼ tiʼ yeʼ etxhejaʼ, tul maqvaqetz etibʼ, —xeʼt Jesuus.

Uvaʼs taqʼt quBʼaal Jesuus bʼaʼnil tiibʼa inqʼa nitxaʼ

Kuxh 10.13-16; Luk 18.15-17

13Yaʼne okaʼp jolol nitxaʼ vatz Jesuus, tiʼ uvaʼ laʼich taqʼ jaʼ Jesuus iqʼabʼ tiviʼ. Tul laʼich inatxh Jesuus Tiuxh s-tiʼ. Poro aʼetz inqʼa nikich itxhus tibʼ kʼatz Jesuus nikich yaon inqʼa xaol, atz inqʼa nitxaʼ, tiʼ yeʼ ipaloʼk kʼatz Jesuus.

14Tul ech tal Jesuus te inqʼa nikich itxhus tibʼ s-kʼatza s-eche: —Yeʼ kuxh emaq tukuʼl inqʼa nitxaʼ sinvatz. Pet ukoqn ul, tan jaʼl uvaʼ ech vitxumbʼal, eche inqʼa nitxaʼ, tul aʼetz inqʼae, laʼ bʼen til qʼij isaq tal uvaʼ nik ibʼanvat quBʼaal Tiuxh iqʼesalil, —xeʼt Jesuus. 15Yaʼetz kuxh vet Jesuus tiʼ taqʼax jaʼ iqʼabʼ tiviʼ inqʼa nitxaʼ, tul bʼen vet Jesuus.

Uvaʼs iyolon quBʼaal Jesuus tuchʼ val u chelem vinaq uvaʼ txʼiolich iqʼij

Kuxh 10.17-31; Luk 18.18-30

16Yaʼne aqʼbʼ val u chelem vinaq kʼatz Jesuus. Tul ech tal te Jesuus s-eche: —Bʼaʼnla Txhusul qetz, ¿kam laʼ inbʼana tul laʼ bʼen vil qʼij saq yeʼl iyaʼebʼal imotxebʼal vatz quBʼaal Tiuxh? —xeʼte.

17Yaʼne ech tal Jesuus te u vinaq s-eche: —¿Kam s-tiʼil ‹bʼaʼnla txhusul,› chich axh s-ve? Tan taʼn kuxh quBʼaal Tiuxhe bʼaʼn. Pet oqetz laʼ asaʼ bʼen eelt u qʼij saq yeʼl iyaʼebʼal imotxebʼal tul nima inqʼa bʼekʼbʼal, inqʼa alel ka taʼn quBʼaal Tiuxh, —xeʼt Jesuus.

18Tul ech tal u vinaq te Jesuus s-eche: —¿Jabʼisteetz vaʼtoʼq bʼekʼbʼal s-te? —xeʼte.

Yaʼne ech tal Jesuus s-eche: —Aʼetze uvaʼ: Yeʼ laʼ yatzʼon axh. Yeʼ laʼ ayansa eebʼ tuchʼ tixqel amol. Yeʼ laʼ elqʼ axh. Yeʼ laʼ atzʼeq tzij tiʼ amol.#Eeksodo 20.13-14, 16; Deuteronoomio 5.17-19 19Laʼ ooksa iqʼij atxutx abʼaal tiʼ vanimataʼ. Tul saʼ vamol, eche uvaʼ nik asaʼt eebʼ, —xeʼt Jesuus.#Eeksodo 20.12; Deuteronoomio 5.16; Leviitiko 19.18

20Yaʼne ech tal u vinaq te Jesuus s-eche: —Jankʼalxh inqʼa yol uvaʼ nik aaleʼ, tan ayaʼx tzaan inxeʼt tiʼ iqeexeʼ uvaʼs txulich in. Pet ¿maq atelxh invaʼtoʼq uvaʼ yeʼ nik inbʼaneʼ? —xeʼte.

21Tul ech tal Jesuus s-eche: —Ape. Oq nik asaʼeʼ uvaʼ laʼxh atxhabʼa tiqʼol uvaʼ nik isaʼ quBʼaal Tiuxh, tul quxh kʼayi ka jankʼal inqʼa kamaq eetz. Tul aqʼ vijaʼmil te inqʼa meebʼaʼ. Tul txhʼuyeʼven s-viʼ. Echetz bʼen eelte u mam bʼaʼnil tu amlikaʼ, —xeʼt Jesuus.#1 Koriintios 13.3

22Tabʼietz vet u chelem vinaq viyol Jesuus, tul yekich txumun vet s-tiʼ sibʼenaʼ. Tan mamalaichxh kamaq tetz atiche.

Uvaʼs txumbʼalimal itxhusun quBʼaal Jesuus tiʼ ibʼant quBʼaal Tiuxh iqʼesalil t-taanima inqʼa txʼiol iqʼij

23Yaʼne ech tal vet Jesuus te inqʼa nikich itxhus tibʼ s-kʼatza s-eche: —Nuqxh toq val sete uvaʼ oqxh itzaʼlal te u txʼiol iqʼij vibʼant quBʼaal Tiuxh iqʼesalil t-taanima. 24Tan jankʼal, eche invaʼq kameeyo, tan yeʼ laʼ utxh ipal paʼl tuul ixotel invaʼq tzʼisbʼal bʼaq. Echatetz kuxh invaʼq u txʼiol iqʼije, tan tzaʼlxh s-te vibʼant quBʼaal Tiuxh iqʼesalil t-taanima, —xeʼt Jesuus.

25Tabʼiaqetz veteʼ, tul tira kuxh motx yan vet u yol s-vatz. Tul ech motx tal vet te Jesuus s-eche: —Oqetz ech, eche uvaʼ nik aaleʼ, tul ¡yeʼxhabʼilebʼ oʼ laʼ chitp oʼ! —xeʼtaqe.

26Yaʼne itiila saqi Jesuus inqʼa nikich itxhus tibʼ s-kʼatza. Tul ech tal Jesuus s-eche: —Kʼuxh tira yeʼ laʼ utxh vet ikolt tibʼ inqʼa xaol s-vatz, tiʼ yeʼ ibʼen tu kʼaxkʼo, poro vatz quBʼaal Tiuxh, tan kaqaayil kuxh laʼ itxʼol quBʼaal Tiuxh ibʼanaxeʼ, —xeʼt Jesuus.

27Yaʼne ech tal Luʼ te Jesuus s-eche: —¿Keʼchetz oʼ? Tan qat motx qaqʼl ka inqʼa kamaq qetz s-kaqaayil. Tul il oʼ txhʼuyel oʼ seʼe. ¿Kametz invaʼq bʼa laʼ aqʼax s-qe? —xeʼt Luʼ.

28Tul ech tal Jesuus s-eche: —Nuqxh toq val sete uvaʼ at etiqleʼm sinkʼatza laʼ ibʼana, ex inqʼa txhʼuyel ex s-viʼ. Tul ant ex laʼ kʼuqeʼv ex viʼ kabʼlaval inqʼa atibʼal sinkʼatza, uvaʼs laʼ inkʼuqeʼv tu nimla vatineʼ tuchʼ u viqleʼm tiʼ ibʼanax iqʼesalil, in, u Kʼaola uvaʼ qat bʼen s-alam aanima, atz uvaʼs laʼ topoon u qʼij uvaʼs tikʼ laʼ ibʼant quBʼaal Tiuxh tutxh kaqaayil inqʼa kam. Tul ant ex laʼ motx aqʼon kuʼ inqʼa yol tinuqul tiʼ kabʼlaval inqʼa tenam, inqʼa atoʼk ibʼij inqʼa ikʼaol Israeel s-tiʼ.#Tio 25.31; Luk 22.30 29Tan jaʼl uvaʼ laʼ taqʼ ka totzotz s-viʼ, atz laʼ taqʼ ka titzʼin tatzik, itxutx ibʼaal, tixqel, initxaʼa, atz itxʼavaʼ, tul sibʼxh vet vichʼexel laʼ aqʼax s-te viʼ uvaʼ laʼ taqʼ ka. Tul laʼ bʼen til qʼij saq uvaʼ yeʼl iyaʼebʼal imotxebʼal. 30Tan mamala xaol nik taqʼ bʼen tibʼ s-nim vatz quBʼaal Tiuxh. Aʼetz inqʼa xaole uvaʼ, aʼ quBʼaal Tiuxh nik iqʼon kuʼl. Pet at xaol uvaʼ nik tiqʼo kuʼl tibʼ vatz quBʼaal Tiuxh, aʼetz inqʼa xaole uvaʼ, aʼ quBʼaal Tiuxh laʼ aqʼon bʼen s-nim.#Tio 20.16; Luk 13.30

Currently Selected:

Tio 19: ixlC

ማድመቅ

Copy