Tio 18

Uvaʼs itxhust quBʼaal Jesuus inqʼa xaol, tiʼ uvaʼ yeʼ laʼ taqʼ bʼen tibʼ siqʼesal

Kuxh 9.33-37; Luk 9.46-48

1Antichetzxh tuulbʼal inqʼa qʼij inqʼae, tul molmotxh tok inqʼa nikich itxhus tibʼ kʼatz Jesuus. Tul ech motx tal te Jesuus s-eche: —¿Jabʼisteetzebʼ oʼ palnaʼql qiqleʼm laʼ ibʼan sakʼatza uvaʼs laʼ axeʼt tiʼ ibʼanax iqʼesalil inqʼa tenam s-kaqaayil? —xeʼtaq te Jesuus.#Luk 22.24

2Yaʼne isikʼle tzaan Jesuus val u nitxaʼ. Tul ikʼutxh Jesuus xoʼl inqʼa nikich itxhus tibʼ s-kʼatza. 3Tul ech tal Jesuus s-eche: —Nuqxh toq val sete: Oq uvaʼ yeʼxh laʼ motx ejalpu vetxumbʼal, tul oq yeʼ laʼ ebʼan, eche vitxumbʼal u nitxaʼ uvaʼa, tul tira yeʼ laʼ utxh etok tal uvaʼ nik ibʼanvat quBʼaal Tiuxh viqʼesalil.#Kuxh 10.15; Luk 18.17 4Pet jaʼl ex, uvaʼ laʼ etiqʼo kuʼl etibʼ, tul laʼ etaqʼ bʼen etibʼ s-eche vitxumbʼal u nitxaʼ uvaʼa, tul aʼetz quBʼaal Tiuxhe nik bʼanon vet iqʼesalil tetaanima, u quBʼaal Tiuxh, uvaʼ tu amlikaʼ. Tul aʼetz exe, palnaʼq vet etiqleʼm laʼ ibʼan xoʼl inqʼa xaol.{*}#18.4 ¿Kam nik elkaʼp inqʼa yol uvaʼ ech tal quBʼaal Jesuus s-eche?: —Jaʼl ex, uvaʼ ayaʼlxh ekʼuul laʼ ekʼul vaʼq inqʼa nitxaʼ tiʼ vetootzaqit in, tul inetze nik ekʼul in, —chiche. Aʼ tal quBʼaal Jesuus uvaʼ laʼich tiqʼo kuʼl tibʼ inqʼa nikich itxhus tibʼ s-kʼatza tiʼ ikʼulux jolt inqʼa imol s-niman tetz Jesuus. Atz at taanima tiʼ inqʼa niman tetz Jesuus laʼich ibʼana. Pet jit aʼ laʼich ibʼan, eche uvaʼ nikich ibʼan inqʼa iqʼesal uqʼeʼybʼal xoʼl inqʼa tij imam Israeel. Tan tira yeʼ nikich motx ilotxh inqʼa xaol tiʼ tiqʼol viyolbʼal quBʼaal Tiuxh s-bʼaʼn. 5Tul bʼaʼn uvaʼ at etaanima tiʼ inqʼa niman vetz laʼ ibʼana, tul laʼ motx ekʼula, kʼuxh yeʼl invaʼq tiqleʼm vatz inqʼa xaol, atz kʼuxh ech kuxhte vaʼq tal nitxaʼ s-vatz. Jaʼletz uvaʼ ech laʼ ibʼane tiʼ ikʼulux vaʼq u niman vetz, tul inetze nik ikʼul in.

Uvaʼs itxhusun quBʼaal Jesuus tiʼ yeʼ ibʼanax u paʼv

Kuxh 9.42-48; Luk 17.1-2

6Pet jaʼl uvaʼ laʼ txhokon ikuʼ t-paʼv vaʼq uvaʼ yaʼn kuxh tok tiʼ vinyolbʼal, uvaʼ ech kuxh tatin, eche vaʼq nitxaʼ, tul aʼ ikʼulel uvaʼ laʼ txhʼunbʼal bʼen vaʼq nimla sivan tiqul. Tul laʼ kʼonil bʼen jaqʼ u mam aʼ. Tul tzitzi laʼ jiqʼbʼik ka, tul laʼ kameʼl. Tan jit aʼ ikʼulel uvaʼ laʼ itzʼeʼvi. 7¡Echetz txumlebʼalxh inqʼa aʼ kuxh nik itxhok teesal ka inqʼa niman vetz!, tan tetxhal kuxh laʼ txhokox txumbʼal tiʼ tel ka inqʼa niman vetz. Poro txumlebʼalxh uvaʼ laʼ txhokon txumbʼal tiʼ eteesal ka s-viʼ. 8Oqetz nik iyan vetitzʼabʼal taʼn uvaʼ nik ekaneʼ, atz taʼn uvaʼ nik etzeqʼeʼ, tul tiraetz yeʼ ekan veteʼ; atz tira yeʼ etzeqʼ veteʼ. Pet aʼ ebʼan uvaʼ, eche ex vet yeʼl eqʼabʼ laʼ ebʼana, atz eche ex vet yeʼl etoq laʼ ebʼana. Tan aʼl bʼaʼn sete uvaʼ laʼ emaq etibʼ, tul yeʼl ex laʼ bʼen ex tu mam xamal uvaʼ yeʼl iyaʼebʼal imotxebʼal. 9Oqetz nik iyan vetitzʼabʼal taʼn uvaʼ nik esaqi, tul tiraetz yeʼ esaqi veteʼ. Pet aʼ ebʼan uvaʼ, eche ex vet yeʼl evatz laʼ ebʼana. Tan aʼl bʼaʼn sete uvaʼ laʼ emaq etibʼ, tul yeʼl ex laʼ bʼen ex tu mam xamal.

Uvaʼs txumbʼalimal ibʼant quBʼaal Jesuus eela u xaol uvaʼ tzʼeqxinaʼql tu paʼv tuchʼ val u karneʼl uvaʼ tzʼeqx ka

Luk 15.3-7

10Pet yeʼ laʼ etixva invaʼq u niman vetz, uvaʼ yaʼn kuxh tok tiʼ vinyolbʼal. Tan xeemal vet taʼn inqʼa aanxel, inqʼa at kʼatz quBʼaal Tiuxh tu amlikaʼ. 11[Tul toq val sete uvaʼ, aʼ qat ulk in, in, u Kʼaola uvaʼ qat bʼen s-alam aanima, tiʼ ichitix inqʼa xaol, inqʼa tzʼeqxinaʼql taʼn u paʼv.]

12Echetz abʼivaq val u yol uvaʼ toq val sete: Tan oq at invaʼq vinaq uvaʼ at oʼ kʼalal (100) ikarneʼl, tul oqetz laʼ tzʼeqx ka invaʼq, tul tetxhal kuxh laʼ taqʼ ka u vinaq bʼelelavat toʼkʼal (99) inqʼa ikarneʼl. Tul laʼ qʼaʼv tiʼ itxhokox u karneʼl uvaʼ laʼ tzʼeqx ka. 13Oqetz laʼ bʼen ileq tzaan u vinaq vikarneʼl uvaʼ laʼ tzʼeqx ka xoʼl tzeʼ, tul toq val sete, uvaʼ mam vet chiibʼichil laʼ ibʼan u vinaq tiʼ vaʼl u karneʼl viʼ jolt inqʼa yeʼ laʼ tzʼeqxi. 14Echatetz titzʼabʼale u quBʼaal Tiuxh uvaʼ tu amlikaʼ, tan yeʼ isaʼ uvaʼ laʼ tzʼeqx ka invaʼq inqʼa xaol uvaʼ yaʼnaq kuxh tok tiʼ vinyolbʼal, inqʼa ech tatin, eche tal nitxaʼ.

Uvaʼs talt quBʼaal Jesuus ikuyt tibʼ inqʼa xaol s-vatzaq

15Pet oq laʼ ikʼaxbʼisa axh invaʼq amol, tul aʼl laʼ bʼen ayol s-tuchʼ sajunal. Oqetz laʼ iqej axh vamol, tul oleʼvyetz vet axhe tiʼ toksal t-bʼey. 16Pet oqetz yeʼ laʼ iqej axh vamol, tul aʼl laʼ eeqʼo vet vaʼq, atzoq kaʼvaʼtoʼq, xaol seʼe. Tan aʼ isaʼ uvaʼ, ech ivatz kaʼoxvoʼq xaol laʼ bʼanax tutxh u yol.#Luk 17.3; Deuteronoomio 17.6-19 17Oqetz yeʼat laʼ iqej vamol kaʼoxvoʼq u xaol uvaʼ laʼ eeqʼo seʼe, yaʼnetze laʼ bʼen aal u yol te inqʼa iqʼon iviʼ xoʼl inqʼa niman vetz. Pet oq jitoq laʼ iqej vamol inqʼa iqʼon iviʼ xoʼl inqʼa niman vetz, tul echetz laʼ ibʼen vete s-palsan yol.

18Tul nuqxh toq val sete: At etiqleʼm tiʼ toksal inqʼa xaol t-bʼey. Jatvaʼletz inqʼa xaol uvaʼ laʼ niman inqʼa laʼ etala, tul chiteletz veteʼ. Tul atetz tokebʼal tiʼ tilix u mam bʼaʼnil tu amlikaʼ. Pet jatvaʼl inqʼa xaol uvaʼ yeʼ laʼ niman inqʼa laʼ etala, tul qitzeletz veteʼe. Tul yeʼletz tokebʼal tiʼ tilix u mam bʼaʼnil tu amlikaʼ. 19Tul toqat val sete: Oq at kaʼvoʼq ex laʼ ebʼan eela eyol tzitza vatz u txʼavaʼ tiʼ etabʼit kamxh invaʼq te vinBʼaal Tiuxh t-amlikaʼ, tul laʼ ibʼana. 20Tan tal kʼulel tibʼ kaʼvaʼl, atz oxvaʼl s-viʼ, tul atetz in s-xoʼl laʼ ibʼana, —xeʼt Jesuus.

Uvaʼs txumbʼalimal itxhusun quBʼaal Jesuus tiʼ u kuybʼal, tul tiqʼo tzaan kaʼvaʼl xaol uvaʼ atich itxʼoq tuulbʼal viyol

21Yaʼne ech tal Luʼ te Jesuus s-eche: —InBʼaal, ¿jatpaquletz laʼ inkuy ipaʼv vinmol, uvaʼ laʼ bʼanon u yeʼbʼaʼn s-ve? ¿Maq juqpaqul laʼ inkuya? —xeʼt Luʼ.

22Tul ech tal Jesuus s-eche: —Jit kuxh juqpaqul; pet juqpaqlen laval imutxʼ (490) laʼ akuy ipaʼv vamol.

23Tan eela vibʼant quBʼaal Tiuxh iqʼesalil tuchʼ uvaʼ ibʼan val u mam iqʼesal uvaʼ imol vet inqʼa taqʼonvil, inqʼa atich itxʼoq. 24Yaʼne xeʼt vet u mam iqʼesal tiʼ tilix inqʼa txʼoq. Tul iqʼol vet ok val u aqʼonvil vatz u mam iqʼesal, val uvaʼ yeʼlich vet vitxʼoq s-atxhel. 25Tul yeʼ nikich toleʼv vet tiʼ itxhoox vitxʼoq. Yaʼne ibʼekʼ vet u mam iqʼesal ikʼayil u aqʼonvil tuchʼ tixqel tuchʼ inqʼa initxaʼa, atz tuchʼ jankʼal inqʼa kamaq tetz, echetz laʼich itxhojp vete vitxʼoq.

26Yaʼne qael ikuʼ u aqʼonvil. Tul ech tal te u mam iqʼesal s-eche: «Inqʼesal, kuyxh inpaʼv. Tul bʼan bʼaʼnil s-ve. Tul qʼoon toq intxhojt vintxʼoq see s-kaqaayil,» xeʼte. 27Toybʼaetz vet u mam iqʼesal ivatz u taqʼonvil, tul ikuy vet ipaʼv tiʼ vitxʼoq. Tul yekich txhaqpul vet bʼen.

28Eletz kuxh vet bʼen u aqʼonvil vatz u mam iqʼesal, tul ex ikʼul tibʼ tuchʼ val vimol s-aqʼonvil. Atichetz bʼak bʼiil itxʼoq vimol s-xeʼ, oʼ kʼalalich (100) denaario. Tul itxey vet u aqʼonvil vimol. Atz ipoqʼ iqul vimol. Tul ech tal s-te s-eche: «¡Nal kuxh atxhoj vatxʼoq s-ve!» xeʼte.{*}#18.28 U denaario nik tal tzitza, aʼe val u txhʼitxhʼ puaq uvaʼ nikich ibʼanbʼe inqʼa aj Rooma. Tul vaʼlich qʼij aqʼon vijaʼmil. Tan vaʼlich denaario nikich txhojpik iqʼij vaʼl aqʼonvil tuulbʼal uvaʼs atich quBʼaal Jesuus vatz txʼavaʼ.

29Yaʼne ijoqbʼa kuʼ tibʼ u aqʼonvil, uvaʼ bʼiilich kuxh vitxʼoq vatz vimol s-aqʼonvil, uvaʼ maʼtich ikuyux tiʼ vitxʼoq. Tul ech tal s-eche: «Kuyxh inpaʼv, txa. Qʼoon toq intxhojt vintxʼoq see s-kaqaayil,» xeʼte.

30Poro yeʼl bʼeeq kuyun u aqʼonvil uvaʼ sibʼichxh vitxʼoq atich xeʼ viqʼesal. Pet aʼl ex taqʼt kuʼ vimol t-tzeʼ uvaʼ bʼiilich kuxh vitxʼoq. Tan aʼich isaʼ uvaʼ tetxhal laʼich txhojp u txʼoq s-te.

31Tiletz vet jolt inqʼa aqʼonvil kam uvaʼ ibʼan u aqʼonvil uvaʼ sibʼichxh vitxʼoq, tul txumunaq veteʼ. Tul exaq tal vet te u mam iqʼesal.

32Yaʼne ibʼekʼ vet u mam iqʼesal tul u aqʼonvil inpaqte, uvaʼ sibʼichxh itxʼoq. Tul ech tal u mam iqʼesal s-te s-eche: «¡Yaabʼla aqʼonvil bʼak axh! Tan qat inkuy axh tiʼ jankʼal inqʼa atxʼoq, inqʼa at siinxeʼ. Tan kuykunyxh axh sinvatz. 33Pet ¿yeʼetz kolxh qat atxum ivatz naq vamol tiʼ vitxʼoq, eche uvaʼ qat intxumt avatz?» xeʼt u mam iqʼesal.

34Tul lakpiyichxh vet iviʼ u mam iqʼesal. Tul oksal vet bʼen u aqʼonvil, uvaʼ sibʼichxh itxʼoq, tiqʼabʼ inqʼa vinaq, inqʼa nikich motx kʼaxbʼisan inqʼa xaol t-tzeʼ. Tul tetxhal itxhoj vet u vinaq vitxʼoq s-kaqaayil. 35Echatetz kuxh laʼ ulbʼel exe taʼn vinBʼaal, uvaʼ tu amlikaʼ, oq jitxh ayaʼl ekʼuul laʼ ekuy ipaʼv inqʼa emol tiʼ inqʼa yeʼbʼaʼn uvaʼ laʼ motx ibʼan sete, —xeʼt Jesuus.

Currently Selected:

Tio 18: ixlC

ማድመቅ

Copy