Lizsij dih Gaihcij 30
30
Lahgyez hawj Yajgoz aeu dahhoiq de ma guh yahnoix
1Lahgyez raen bonjfaenh de mij seng ndaej saek boux lwg hawj Yajgoz le, couh rahoengz daxce de, couh doiq Yajgoz naeuz: “Mwngz hawj gou seng lwg bax; mbouj nex, gou cingxnyienh rai hoh lo!”
2Gajlaeng, Yajgoz aeuqheiq Lahgyez hwj naeuz: “Mwngz naemqnaeuz gou dwg Cangqdiq hajx? Mbouj hawj mwngz ndaej mizseng hih dwg Cangqdiq, mbouj dwg gou hah!”
3Lahgyez dingq le, couh doiq Yajgoz naeuz: “Nex, dahhoiq gou Bizlah youq dineix; mwngz couh caeuq de ninz bax. Ninz le, gou couh ndaej dajlaeng de miz lwg lo,#30:3 Dwg fanjingj mwhde it cungj laehbeih, dawz ngamq seng hih lwgnding coengq hwnj gwnz raeujhoq mehlawz bae, laeq lwg neix couh dwg mehlawz, caemh dwg hozfaz he. yiengq gou couh ndaej guh daxmeh lo.”
4Gajlaeng Lahgyez couh hawj goengjgvan de aeu Bizlah ma guh yahnoix. Yiengq, Yajgoz couh caeuq de ninz. 5Bizlah cingqgawq daiqndang gwhraix, seng daeglwg he hawj Yajgoz. 6Gajlaeng Lahgyez naeuz: “Cangqdiq dingqri gou gouz de, couh buenq hawj gou deng, caemh soengq hawj gou daeglwg he.” Yiengq de couh an coh hawj daeglwg neix heuh Danq. (‘Danq’ couh dwg ‘saemjbuenq’ dih iqswh.)
7Dahhoiq Lahgyez, Bizlah, caiq daiqndang, caiq seng daeglwg daixngeih hawj Yajgoz. 8Yiengq Lahgyez couh naeuz: “Gou caeuq daxce doxdaeuq doxceng; yawj yienghneix, vanzlij dwg gou hingz lo.” Gajlaeng de couh an coh hawj daeglwg neix heuh Nazfuzdahliq. (‘Nazfuzdahliq’ couh dwg ‘doxceng doxdaeuq’ dih iqswh.)
Liqyaq hawj Yajgoz aeu yahnoix
9Liqyaq raen bonjfaenh de dingz seng mbouj ndaej caiq miz lwg le, couh hawj dahhoiq de Sizbwz hawj Yajgoz guh yahnoix. 10Gajlaeng dahhoiq de couh seng daeglwg he hawj Yajgoz. 11Yiengq Liqyaq couh naeuz: “Gou mingh gaeuq ndei lo!” Couh an coh hawj daeglwg neix heuh Gyahdwz. (‘Gyahdwz’ couh dwg ‘mingh ndei’ dih iqswh.)
12Dahhoiq Liqyaq caiq seng daeglwg daixngeih hawj Yajgoz. 13Liqyaq caemhcaiq naeuz: “Ox! Gou angq hwx; gij vunzbaz cungj ij naeuz gou angq raixcaix.” Yiengq de couh an coh hawj daeglwg neix heuh Yaqsez. (‘Yaqsez’ couh dwg ‘angq’ dih iqswh.)
Vih mak funghgyez hwj doxceng
14Miz baez he, daeng mwh ndaej gvej mienh mwhde, Lijbenq bae reih, youq ndaw reih raen miz cungj mak he heuh funghgyez.#30:14 Dangq vunz ciuhgonq nginhnaeuz cungj mak neix ndaej hawj vunzbaz yungzheih mizndang he. De yaeb ma hawj daxmeh de Liqyaq. Yiengq Lahgyez raen le, couh doiq Liqyaq naeuz: “Cingj mwngz hawj di daeglwg mwngz yaeb ndaej ma hih mak funghgyez hax, hawj di he hawj gou bax!”
15Hoeng Liqyaq han naeuz: “Mwngz ciengj aeu goeng gojyez gou mbouj cuksuenq, vanzlij ij ciengj aeu daeglwg gou yaeb ndaej ma hih mak haj?”
Lahgyez caemh doq han naeuz: “Hauhnaeuz mwngz hawj di mak daeglwg mwngz yaeb ndaej ma hih hawj gou nex, haemhneix gou couh hawj Yajgoz caeuq mwngz ninz.”
16Gajlaeng daengz haemh le, Yajgoz dajlwh ndaw reih ma. Liqyaq couh rumj okdaeuj ciep de, naeuz: “Haemhneix mwngz ij caeuq gou ninz, aenvih gou gaenq aeu funghgyez, couh dwg daeglwg gou yaeb ndaej ma hih, aeu ma vuenh mwngz lo.” Haemh mwnq Yajgoz couh caeuq Liqyaq ninz lo.
17Yiengq, Cangqdiq dingqri Liqyaq gouz de, couh dapwngq de, hawj de mizndang, seng daixhaj daeglwg hawj Yajgoz. 18Liqyaq naeuz: “Gaxgonq gou ngaiz hawj dahhoiq gou hawj goeng gou guh yahnoix; seizneix Cangqdiq couh cangj hawj gou, hawj gou ndaej daeglwg neix lo.” Sojhij de couh an coh hawj daeglwg neix heuh Hijcazgyah. (‘Hijcazgyah’ couh dwg ‘hab ndaej’ dih iqswh.)
19Liqyaq youhcaiq mizndang, caiq seng daixroek daeglwg hawj Yajgoz. 20Liqyaq caiq naeuz: “Cangqdiq caiq soengq hawj gou dijbauj dih daeglwg neix; seizneix goeng gojyez gou gaengjdingq yawjhwnj gou, aenvih gou seng baenx roek daeglwg hawj de lo.” Yiengq de couh an coh hawj daeglwg neix heuh Sihbuqlwnz. (‘Sihbuqlwnz’ couh dwg ‘yawj ndaej hwnj’ dih iqswh.)
21Gajlaeng Liqyaq caiq seng miz dah lwgsau he, an coh hawj de heuh Dijnaz.
22Yiengq Lahgyez nej, Cangqdiq itcig cungj dingqri de gouz de, yiengq seizneix Cangqdiq couh bang de, hawj de mizseng lo. 23Yiengq Lahgyez couh mizndang. Seng ndaej daeglwg he le, de couh naeuz: “Cangqdiq hawj gou mbouj caiq miz gij saetnaj mwnq lo.” 24De couh an coh hawj daeglwg neix heuh Yozswz (‘Yozswz’ couh dwg ‘lai dem’ dih iqswh), aenvih de muengh Yehhozvaz caiq lai dem daeglwg he hawj de.
Yajgoz caeuq Lahbanh damzbuenq
25Lahgyez seng Yozswz le, Yajgoz couh doiq Lahbanh naeuz: “Gou ijsiengj maj ranz, maj laeng dieg Gyahnamz gou lo. 26Cingj mwngz hawj gou daiq heij lwg heij yah gou maj bax. Gyoengqde dwg gou bang mwngz guh baenx cib geij bi hih hong cij ndaej hih; gou baenzlawz bang mwngz guh hong, mwngz caemh gag rox.”
27Yiengq Lahbanh han naeuz: “Muengh mwngz vanzlij giqcuz youq mwnqneix youq! Gou suenqmingh goq lo, rox dwg vihliux mwngz Yehhozvaz cij soengq fuk hawj gou.” 28De caiq naeuz: “Mwngz naeuz gou ni, mwngz ijsiengj aeu geijlai ngaenzhong? Mwngz naeuz geijlai, gou couh hawj mwngz geijlai.”
29Yajgoz dauqfanj han naeuz: “Gou baenzlawz bang mwngz guh hong—gyoengq yiengz mwngz hah, gyoengq cwz mwngz hah, gou bang mwngz guenjleix le, gyoengqde baenzlawz fatdad hwnjdaeuj—mwngz caemh gag rox. 30Mwh gou mijyaengz daeuj dineix mwhde, mwngz sojmiz hih cungj gig noix; seizneix nej, cwz hah, yiengz hah, baenx gyoengq baenx gyoengq. Mboujguenj gou bang mwngz guh gijmaz, Cangqdiq cungj soengq fuk hawj mwngz. Nanzdauh gou ij daengz seizlawz bae cij ndaej gag laeb aen gya bonjfaenh gou nex?”
31Gajlaeng Lahbanh cam naeuz: “Yiengq gou ij hawj mwngz gijmaz nej?”
Yajgoz han naeuz: “Mwngz cungj mboujyungh hawj gou gijmaz. Caenhgag dapwngq gou yiengh he couh ndaej lo; gou couh doiqyungz bang mwngz ciengx yiengz. 32Gou ngoenzneix ij byaij gyoengq yiengz mwngz goqdoh bae, dawz sojmiz hih baenx demj hah, raizbanq hah, couh dwg miz baenx demj ndaem hih menzyiengz, caeuq miz baenx demj bieg hih yiengzbya genj okdaeuj,#30:32 Aenvih itbanh menzyiengz cungj dwg saekbieg he, hoeng yiengzbya cungj dwg saekndaem he. Miz song cungj saek doxcab hih yiengz gig noix. aeu ma suenq baezneix gij ngaenzhong gou. 33Yienghneix baezneix mwngz daeuj caz yawj gou ndaej dih ngaenzhong, caemh ndaej cingqmingz naeuz gou dwg boux lauxsaed he; famz dwg youq laeng gou ciengx hih yiengz, hauhnaeuz mbouj dwg miz baenx demj miz raizbanq hih yiengzbya, caeuq mbouj dwg miz baenx demj ndaem hih menzyiengz, couh suenq gou caeg aeu lo.”
34Lahbanh dingq le, couh doq han naeuz: “Ndaej hah, gou dungziq hawj mwngz yienghneix guh.” 35Hoeng, couh youq ngoenz mwnq, Lahbanh couh dawz miz baenx demj, miz raizbanq hih yiengzbyadaeg, caeuq miz baenx demj, miz raizbanq caiq cab miz saekbieg hih yiengzbyameh, caemh caeuq sojmiz saekndaem hih menzyiengz cungj genj okdaeuj, hawj doengh daeglwg de guenj. 36Doengh daeglwg de couh duq doengh gyoengq yiengz neix bae gyae'gyae, bae daengz mwnq liz Yajgoz ciengx hih yiengz ij byaij miz sam ngoenz baenxlai gyae cij ndaej daengz he. Yajgoz nej, Yajgoz vanzlij dwg youq mwnq dieg gaxgonq bang Lahbanh ciengx yiengz mwnq, ciengx gyoengq yiengz Lahbanh genj okdaeuj lij lw he.
Yajgoz yungh geiqmaeuz dem gyadangq
37Gajlaeng, Yajgoz couh aeu go faexyangz hah, faexgingq hah, faexgyaeuq hah, aeu doengh go neix, aeu nge oiq hih ma le, couh bok gij naeng de bae. Bok reg gek reg, bok hawj de bienqbaenz reg gek reg bieg bae le, 38couh dawz doengh ngefaex neix ma coengq haeuj ndaw doenghheij ruhraemx gyoengq yiengz bienqnaengz daeuj gw raemx he hwj. Yiengq gyoengq yiengz daeuj gw raemx, caemh raen doengh ngefaex neix, couh youq mwnq doxgwih. 39Gyoengq yiengz yiengq haeuj doengh ngefaex miz baenx reg neix bae doxgwih le, roengz okdaeuj dih yiengzlwg cungj dwg miz baenx demj caeuq raizbanq he.
40Yajgoz vanzlij dawz doengh duz menzyiengzmeh Lahbanh genj okdaeuj linghvaih coengq, daengz doengh duz yiengzmeh neix boiqcungj mwhde, hawj gyoengqde yiengq haeuj gyoengq yiengz ndaem Lahbanh bae. Yiengq, roengz okdaeuj dih yiengzlwg couh daiq miz baenx demj ndaem he lo. Gajlaeng Yajgoz couh dawz doengh duz miz baenx demj caeuq doengh duz miz raizbanq he linghvaih coengq hwj, mbouj hawj gij yiengz bonjfaenh caeuq gij yiengz Lahbanh doxgyaux. Yajgoz couh dwg yungh cungj fap neix ma fat doengh dangq gajlaeng.
41Hauhnaeuz daengz doengh duz yiengz biz bwdbwd hoenz hwdhwd he boiqcungj nex, Yajgoz couh dawz doengh ngefaex bok naeng bienqbaenz baenx reg mwnq coengq youq doengh ruhraemx dangqnaj gyoengqde hwj, hawj doengh duz yiengz yiengq haeuj doengh ngefaex miz baenx reg he bae doxgwih. 42Hauhnaeuz daengz doengh duz yiengz cix byom cix ngoenh mwnq boiqcungj nex, de couh mbouj coengq doengh ngefaex neix lo. Yiengq, doengh duz cix byom cix ngoenh mwnq couh gvi hawj Lahbanh, doengh duz cix biz cix hoenz mwnq couh gvi haeuj bonjfaenh lo. 43Gajlaeng, Yajgoz yied ngoenz yied fat, yied ngoenz yied fouq, miz baenx gyoengq baenx gyoengq yiengz hah, vunzhoiq hah, duz lawz hah, caeuq duz lozdoz hah.
Currently Selected:
Lizsij dih Gaihcij 30: YBNT
ማድመቅ
ያጋሩ
ኮፒ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© New Bridge Publishing Company Limited
