Lizsij dih Gaihcij 29
29
Yajgoz bae daengz ranz Lahbanh
1Yajgoz vanzlij caiq ganjroen; de bae daengz gij dieg vunz baixdoeng he. 2De raen ndaw doengh reih miz aen cingj he. Youq henz cingj miz sam gyoengq yiengz ninz youq henz de, aenvih gij vunz ciengx yiengz cungj dwg dajlwh ndaw cingj neix aeu raemx hwnj ma hawj yiengz gw he. Hoeng, aen cingj neix gwnz de goemq miz baj rin hunghung he. 3(Daengj daengz gyoengq yiengz ma caez le, gij vunz ciengx yiengz cij buen baj rin hung mwnq, aeu raemx hwnj ma hawj yiengz gw, gajlaeng caiq dawz baj rin hung mwnq goemq boiz.)
4Yajgoz raen le, couh bae cam gyoengq ciengx yiengz mwnq naeuz: “Baengzyoux, faenhsou dajlwh mwnqlawz daeuj hax?”
Gyoengqde han naeuz: “Gyoengqraeuz dwg dajlwh Hahlanz daeuj he.”
5Yajgoz caiq cam naeuz: “Faenhsou rox lan Nazhoq, Lahbanh haz?”
Gyoengqde caiq han naeuz: “Rox hah.”
6Yajgoz youhcaiq cam naeuz: “De baenzlawz yiengh hah; vanzlij ndei bax?”
Gyoengqde caemhcaiq han naeuz: “Ndei hah. Neq, hawjm'z yawj hux, dahlwg de Lahgyez duq gyoengq yiengz de goqdaeuj lo.”
7Gajlaeng Yajgoz naeuz: “Yawj lux, gyangjngoenz cungj lij sang gvangxgvangx, mijyaengz daeng gyoengq yiengz doxcomz haem; faenhsou vihmaz mbouj hawj gyoengq yiengz gw raemx le, caiq doiqyungz duq gyoengqde bae ciengx nej?”
8Gyoengqde dingq le, han naeuz: “Gyoengqraeuz ij daengj daengz doengh gyoengq yiengz cungj ma caez le, cij ndaej gwenj baj rin hung goemq cingj, cij ndaej aeu raemx hawj gyoengq yiengz gw.”
9Yajgoz caeuq gyoengqde gangj vah hih mwhde, Lahgyez cingq duq gyoengq yiengz daxboh de goqdaeuj. (Yienzlaiz Lahgyez caemh dwg boux ciengx yiengz he.) 10Yajgoz yawjraen Lahgyez duq gyoengq yiengz daxboh bonjfaenh de byaij goqdaeuj le, couh bae gwenj baj rin goemq cingj mwnq, sien aeu raemx hawj gyoengq yiengz boxlungz de gw. 11Gajlaeng Yajgoz cungj angq hwj raemxra roengz bae, couh rumj goqbae ciep#29:11 Dineix ndaw yienzvaenz dwg naeuz ‘cup naj.’ Lahgyez. 12De doq raemxra roengz doq naeuz Lahgyez ni naeuz bonjfaenh de dwg vaihseng daxboh de, dwg daeglwg Liqbwzgyah. Lahgyez dingq le, couh riq maj naeuz daxboh de ni.
13Lahbanh dingqri naeuz daeglwg dahnuengx de Yajgoz daeuj lo le, couh angq hwj vaiqdi riq okbae ciep de, daiq de ma ranz. Yajgoz caemh gangj naeuz de ni sojmiz dih saeh. 14-17Lahbanh dingq le, angq hwj naeuz: “Mwngz cingqcaen dwg caen vaihseng gou!”
Lahbanh siengj suenqgw Yajgoz
[16]Lahbanh miz song dah lwgsau; dah hung heuh Liqyaq, dah iq heuh Lahgyez. [17]Liqyaq mbouj gaeuq gyaeu, hoeng, Lahgyez dauqfanj baenxsau raixcaix.
[14b]Yajgoz youq laeng Lahbanh youq ndwen he le, [15]Lahbanh doiq Yajgoz naeuz: “Mwngz gannaeuz dwg beixnuengx gou lah, hoeng, cungj mbouj wnggai begbeg bang gou guh hong hah. Naeuz gou ni, mwngz ij aeu geijlai ngaenzhong?”
18Mwhde, aenvih Yajgoz gig haenj Lahgyez, yiengq de couh doiq Lahbanh naeuz: “Hauhnaeuz mwngz dapwngq hawj dahlwg iq mwngz haq laeng gou nex, gou nyienh'eiq bang mwngz guh caet bi hong.”
19Lahbanh han naeuz: “Doiq gou ma gangj, hawj de haq laeng mwngz giengz goq haq laeng vunz. Mwngz couh youq laeng gou mwnqneix youq bax!” 20Yajgoz vihliux Lahgyez, de bang Lahbanh guh baenx caet bi hong, hoeng, caet bi neix doiq de ma gangj, caemhdangq luj geij ngoenz ityiengh, aenvih de gig aiq Lahgyez.
21Caet bi muenx le, Yajgoz couh doiq Lahbanh naeuz: “Dingh hih caet bi daengz lo; cingj mwngz hawj dahlwg mwngz haq hawj gou bax. Yiengq gou couh ndaej aeu de ma guh yah lo.”
22Gajlaeng Lahbanh couh cingj laeuj, cingj dieg mwnq sojmiz dih vunz daeuj gw laeuj. 23Hoeng daengz laep le, Lahbanh dauqfanj soengq dahlwg daeuz de Liqyaq daeuj hawj Yajgoz. Yajgoz couh caeuq de ninz. 24Lahbanh caemh soengq Sizbwz dahhoiq neix hawj Liqyaq guh hoiq.
25Daengz haet daixngeih le, Yajgoz cij rox naeuz yienzlaiz dwg Liqyaq lah. Yiengq de couh bae cimh Lahbanh, naeuz: “Mwngz vihmaz yienghneix doiq gou? Gou dwg vihliux Lahgyez cij bang mwngz guh caet bi hong; mwngz vihmaz yaeuh gou?”
26Lahbanh han naeuz: “Ciuq gyoengqraeuz dineix dih laehbeih, dahnuengx mbouj ndaej haq gaxgonq daxce. 27Hauhnaeuz mwngz nyienh'eiq caiq bang gou guh caet bi hong haem nex, daengj caet ngoenz laeuj goq le, gou couh hawj dah lwgsau iq gou caemh haq hawj mwngz.”
28Gajlaeng Yajgoz caemh dungziq lo. Cingj caet ngoenz laeuj muenx le, Lahbanh couh hawj dah lwgsau iq de haq laeng Yajgoz guh yah, 29caemhcaiq hawj dahhoiq he Bizlah hawj Lahgyez guh hoiq. 30Yiengq Yajgoz couh caeuq Lahgyez guh gvanjbaz lo. De vanzlij haemq aiq Lahgyez, aiq Lahgyez lai goq Liqyaq. Couh yienghneix, Yajgoz caiq caeuq Lahbanh guh caet bi hong.
Gij lwg Liqyaq
31Yiengq Yehhozvaz raen Yajgoz mbouj aiq Liqyaq le, couh hawj Liqyaq mizseng, dauqfanj hawj Lahgyez maen. 32Liqyaq daiqndang le, seng miz daeglwg he. De naeuz: “Aenvih Yehhozvaz raen gou haemzhoj,” yiengq de couh an coh hawj laeq lwg neix heuh Lijbenq. (‘Lijbenq’ couh dwg ‘yawj veiq, miz lwgmbauq’ dih iqswh; gij yaem ‘Lijbenq’ youq ndaw gij vah Hihbwzlaiz couh luj ‘de raen gou haemzhoj,’ gij yaem neix.) De caiq naeuz: “Mbat neix goeng gou itdingh aiq gou lo.”
33Liqyaq caiq mizndang, seng miz daeglwg he. De naeuz: “Yehhozvaz dingqri gou ienq naeuz: ‘Goeng gou mbouj aiq gou’ le, couh caiq soengq daeglwg neix hawj gou.” Yiengq de couh an coh hawj daeglwg neix heuh Sihmenj. (Gij yaem ‘Sihmenj’ youq ndaw gij vah Hihbwzlaiz couh luj ‘dingqri’ cih neix.)
34Liqyaq youhcaiq mizndang, caemhcaiq seng miz daeglwg he. De naeuz: “Mbat neix goeng gou gaengjdingq haenj gaen gou, aenvih gou seng baenx sam daeglwg hawj de.” Yiengq de couh an coh hawj daeglwg neix heuh Liqveiq. (‘Liqveiq’ couh dwg ‘doxgaep’ dih iqswh.)
35Gajlaeng Liqyaq youhcaiq mizndang, youhcaiq seng miz daeglwg he. De naeuz: “Mbat neix gou ij haenh Yehhozvaz!” Yiengq de couh an coh hawj laeq lwg neix heuh Youzdaq. (‘Youzdaq’ couh dwg ‘haenh’ dih iqswh.) Gajlaeng, Liqyaq miz duenh he mbouj mizseng lo.
Currently Selected:
Lizsij dih Gaihcij 29: YBNT
ማድመቅ
ያጋሩ
ኮፒ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© New Bridge Publishing Company Limited
