Lizsij dih Gaihcij 12
12
Cangqdiq senj Yaqbwzlanz
1Miz baez he, Yehhozvaz doiq Yaqbwzlanz naeuz: “Mwngz ij lizgaih bonjdeih mwngz, ndaw ranz bohmeh mwngz, caeuq gij caencik beixnuengx mwngz, bae mwnq he; yiengq daengz mwh he, gou swhmboujyienz naeuz mwngz ni mwnqlaw. 2Gou gaengjdingq hawj mwngz miz lwg, miz lan, miz laenj, fatdad lailai hwj bienqbaenz aen guek hunghung he. Gou caemh ij soengq fuk hawj mwngz, hawj mwngz miz mingz, gij vunz caemh ndaej dajlaeng mwngz ndaej miz fuk. 3Bouxlawz hoh fuk hawj mwngz hih, gou caemh hoh fuk hawj bouxlawz; bouxlawz mang mwngz hih, gou caemh mang bouxlawz. Lajmbwn sojmiz hih minzcuz cungj dwg dajlaeng mwngz ndaej miz fuk.”
4-5Yiengq Yaqbwzlanz caemh ciuq Yehhozvaz raengq hih yienghmwnq bae guh lo; [5a]de daiq mehyah de Sajlaiz caeuq daeglwg daeg nuengxau de, Lozdwz, vanzlij miz gyoengqde youq Hahlanz soj rom ndaej hih gyadangq, daiqlienz de sojmiz hih vunzhoiq, yiengq dieg Gyahnamz bae lo. [4b]Mwh de dajlwh Hahlanz okdin bae hih mwhmwnq, de ndaej caetcib haj bi.
[5b]Gyoengqde bae daengz dieg Gyahnamz le, 6vanzlij giqcuz byaij bae, bae daengz Siqgiemq hih mwnq Mozliq miz go faex hung he. Mwhmwnq gij vunz Gyahnamz vanzlij youq mwnq youq. 7Youq mwnq Yehhozvaz yienh hawj Yaqbwzlanz raen, doiq de naeuz: “Yaqbwzlanz, gou ij dawz mwnq dieg neix soengq hawj doengh daih gajlaeng mwngz.” Yiengq, Yaqbwzlanz couh youq mwnq Yehhozvaz yienh hawj de raen hih mwnq caeb aen daiz dajbwiz he bwiz de docih de.
8Gajlaeng Yaqbwzlanz caiq daj mwnq senj bae Bwzdwzliq hih mbiengj baixdoeng dih mwnq canhgih he dap bungz youq. Mwnq canhgih mwnq hih mbiengj baixsae dwg Bwzdwzliq, mbiengj baixdoeng dwg gaenh aen singz heuh Ngaiq he. De caiq youq mwnq caeb aen daiz dajbwiz he hawj Yehhozvaz, gingqbaiq Yehhozvaz. 9Gajlaeng Yaqbwzlanz caiq baez mwnq baez mwnq yiengq baixnamz senj bae, bae daengz Gyahnamz hih mbiengj baixnamz mwnq gansauq mwnq.
Yaqbwzlanz bae Ngaihgiz
10Aenvih dieg Gyahnamz roeb daengz iekvangh gig youqgaenj, yiengq Yaqbwzlanz couh yiengq baixnamz bae, bae daengz dieg Ngaihgiz, youq mwnq camqciz youq. 11Mwh gyoengqde ijvanh daengz Ngaihgiz hih mwhde, Yaqbwzlanz doiq mehyah de naeuz: “Gou rox mwngz dwg boux vunzbaz gyaeugyaeu ndeindei he. 12Hauhnaeuz gij vunz Ngaihgiz rox naeuz mwngz dwg mehyah gou nex, gyoengqde couh ij ciengj aeu mwngz, couh dawz gou gajrai bae. 13Yiengq mwngz couh ij naeuz gyoengqde ni naeuz mwngz dwg dahnuengx gou lah. Gyoengqde couh vih mwngz hwj doiq gou ndei, mbouj gaj gou lo.”
14Gajlaeng cingqgawq luj de gangj gwhraix; mwh gyoengqde byaij daengz Ngaihgiz hih mwhde, gij vunz Ngaihgiz raen mehyah de gyaeu raixcaix. 15Doenghheij daqcwnz goengjvuengz Ngaihgiz caemh raen de gig gyaeu, couh youq dangqnaj goengjvuengz haenh de, naeuz de gyaeu ij rai bae. Gajlaeng de couh ngaiz daiq haeuj ndaw vangzgungh bae laeng goengjvuengz lo. 16Yiengq goengjvuengz caemh vih de hwj doiq Yaqbwzlanz gig ndei, soengq hawj Yaqbwzlanz baenxbienh cwzcwz, yiengzyiengz, lozdoz lozdoz, lawzgoeng, lawzmeh#12:16 Duz lawz luj duz max. cungj miz, caeuq haujlai vunzhoiq.
Goengjvuengz ienq Yaqbwzlanz
17Gajlaeng, Yehhozvaz vih goengjvuengz aeu mehyah Yaqbwzlanz, couh fad goengjvuengz, hawj de caeuq ndaw ranz de cungj baenz bingh hung. 18Yiengq goengjvuengz rox le, couh baij vunz bae heuh Yaqbwzlanz daeuj, doiq de naeuz: “Mwngz vihmaz ij yienghneix doiq gou? Vihmaz mbouj naeuz gou ni de dwg mehyah mwngz nej? 19Vihmaz ij naeuz de dwg dahnuengx mwngz nej? Guh hawj gou aeu de ma guh yah. Nex! Mehyah mwngz youq dineix; mwngz vaiqdi daiq de deuz!” 20Gajlaeng goengjvuengz couh hawj gij vunz de gam Yaqbwzlanz caeuq mehyah de caeuq doenghheij hoiq de, boenq gyoengqde deuz, daiqlienz doenghheij doxgaiq de cungj hawj de dawz deuz liux.
Currently Selected:
Lizsij dih Gaihcij 12: YBNT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© New Bridge Publishing Company Limited
