Lizsij dih Gaihcij 11
11
Cangqdiq dawz gij vah gaujluenh
1Mwhmwnq lajmbwn sojmiz hih vunz cungj dwg gangj cungj vah he. 2Mwhde gij vunz cungj dwg youq baixdoeng youq; gajlaeng gyoengqde menhmenh baez mwnq baez mwnq senj, yiengq bae daengz dieg Siqnaz raen miz mwnq bingzyienz he le, gyoengqde couh youq mwnq youq. 3Gyoengqde youq mwnq youq le, couh doxcimciek hwj naeuz: “Ox! Daengj raeuz daj cien oenq cien ma hwnq ranz bax.” Gajlaeng gyoengqde couh yungh cien ma dingj guh rin caep ranz, caemh dwg aeu lizcingh ma dingj guh ceijniz caep cien. 4Gajlaeng gyoengqde caiq naeuz: “Daeuj! Daengj raeuz hwnq aen singz he bax! Ndaw singz caemh ij miz aen dap sang fwdfwd he hwj ma riengz gij coh gyoengqraeuz. Yienghmwnq gij vunz raeuz caemh mbouj faensanq daengz ciqgyaiq gak dieg bae lo.”
5Gajlaeng Yehhozvaz yawjraen gyoengq vunz neix cauh singz caeuq hwnq dap le, 6de couh naeuz: “Ox! Gyoengqde dwg aen minzcuz he, caemh dwg gangj cungj vah he. Mbat neix gyoengqde cauh singz hwnq dap, cij ngamqngamq dwg gaihcij; baezneix gyoengqde ijsiengj guh hih saeh, mij'z naeuz guh mbouj daengz hih saeh lo. 7Daeuj, daengj raeuz roengz bae gaujluenh gij vah gyoengqde bae, hawj gyoengqde miz geij cungj vah hwj, gyoengq dingq mbouj rox gyoengq he bae.”
8Couh yienghneix, Yehhozvaz sawjhawj gyoengqde faensanq daengz ciqgyaiq gak dieg bae, guh hawj gyoengqde mbouj ndaej mbouj ngaiz dingz hwnq aen singz mwnq bae. 9Aenvih Yehhozvaz youq mwnq gaujluenh gij vah gyoengq vunz mwnq, hawj gij vunz faensanq daengz ciqgyaiq gak dieg bae, yiengq couh heuh aen singz mwnq heuh Bahbez. (‘Bahbez’ gij coh neix caeuq gij vah Hihbwzlaiz dih gawq ‘gaujluenh’ doeg ijvanh doxdoengz.)
Cenj hih doengh daih gajlaeng
10Laj neix dwg doengh daih gajlaeng Cenj.
Raemx dumh mbwn goq song bi le, Cenj ndaej bak bi mwhde, miz Yaqfazsaj. 11Cenj miz Yaqfazsaj le, de vanzlij souh ndaej hajbak bi, caemh vanzlij miz lwg.
12Yaqfazsaj ndaej samcib haj bi mwhde, miz Cahlah; 13de miz Cahlah le, vanzlij souh ndaej seiqbak lingz sam bi, caemh vanzlij miz lwg.
14Cahlah ndaej samcib bi mwhde, miz Hihbwz; 15de miz Hihbwz le, vanzlij souh ndaej seiqbak lingz sam bi, caemh vanzlij miz lwg.
16Hihbwz ndaej samcib seiq bi mwhde, miz Fazlwz; 17de miz Fazlwz le, vanzlij souh ndaej seiqbak sam bi, caemh vanzlij miz lwg.
18Fazlwz ndaej samcib bi mwhde, miz Lahnguz; 19de miz Lahnguz le, vanzlij souh ndaej songbak lingz gouj bi, caemh vanzlij miz lwg.
20Lahnguz ndaej samcib ngeih bi mwhde, miz Sihluz; 21de miz Sihluz le, vanzlij souh ndaej songbak lingz caet bi, caemh vanzlij miz lwg.
22Sihluz ndaej samcib bi mwhde, miz Nazhoq; 23de miz Nazhoq le, vanzlij souh ndaej songbak bi, caemh vanzlij miz lwg.
24Nazhoq ndaej ngeihcib gouj bi mwhde, miz Dahlah; 25de miz Dahlah le, vanzlij souh ndaej itbak itcib gouj bi, caemh vanzlij miz lwg.
26Dahlah daengz caetcib bi hih bi mwnq, gaenq miz sam daeglwg lo, couh dwg Yaqbwzlanz, Nazhoq caeuq Hahlanz.
Dahlah hih doengh daih gajlaeng
27Laj neix dwg Dahlah hih doengh daih gajlaeng de.
Dahlah miz Yaqbwzlanz, Nazhoq caeuq Hahlanz. Yiengq Hahlanz caiq miz Lozdwz 28-29caeuq song dahlwg, couh dwg Mizgyah caeuq Hiqgyah. [28]Hoeng Hahlanz lij hauxseng couh rai lo. De dwg rai youq bonjdeih de dieg Gyahlwzdij dih Uzwj Singz he; mwh de rai hih mwhmwnq, daxboh de vanzlij lix. [29a]Yaqbwzlanz caeuq Nazhoq cungj aeu yah. Nazhoq aeu dah lwgsau Hahlanz Mizgyah ma guh yah, Yaqbwzlanz aeu Sajlaiz ma guh yah. 30Sajlaiz mij miz lwg, dwg mehmaen he.
31Dahlah daiq daeglwg de Yaqbwzlanz caeuq daeglan de Lozdwz (Lozdwz couh dwg daeglwg Hahlanz) vanzlij miz mehbawx de Sajlaiz daj dieg Gyahlwzdij dih Uzwj Singz bae dieg Gyahnamz. Hoeng gyoengqde bae daengz Hahlanz Singz le, couh youq mwnq youq lo.
32Dahlah souh ndaej songbak lingz haj bi; de rai youq Hahlanz.
Currently Selected:
Lizsij dih Gaihcij 11: YBNT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© New Bridge Publishing Company Limited
