Matayo 13
13
Musumo wa Mbuto.
Mk. 4:1-25; Lk. 8:4-18.
1Mu busi bubo Yesu atukile mu numba, eikede ku mutili wa kitatenge. 2Musanganano munene wamuvuilide, kububo eingide mu buato, eikeide; nu musanganano unsania wemene ku mutili. 3Nu abatendile bitondo bingi mu misumo bune, Unguililazi, muyiki endile kuyika mbuto; 4nu gayikaga, mbuto imozi zakolokile mu ntungo mua nzila, nu tuzoni tuavule tuazilile: 5ingo zakolokile gantata ga luanda, takuabezaga bisogo bingi: nu kazanga kongo zasile kubuno takuabezaga bisogo bingi: 6nu gasanukile musi, zagulumine; kubuno tazabezaga na mizi, nu zomine. 7Ingo zakolokede mu mikele; nu mikele zasile nu zazilimbanizie: 8nu ingo zakolokile ga bisogo bisoga, nu zakolamine biguma bingi, imozi lukama, ingo makumi mutuba, nu ingo makumi masatu. 9Wozo uli na matuzi makunguilila, nti unguilila.
10Nu beigisibua bage bamuvuilide, bamubuide bune, Buni bukubeisa misumo? 11Yesu abakuide bune, Inyue umuakasilue menge ma kumenya tukungu tua bukota bua meigulu, tondo babo tabamakasilue. 12Kububuno muntu unsania uli na kena, bakamukasa kango, nu akaba na bingi: tondo muntu unsania uteli na kena, akanyagua kako keli nako. 13Ku bubo ukunkubeisila misumo; kubuno bekumona tondo tabekumona, nu bekungua tondo tabekungua, aba tabekumenyinina. 14Nubo bazindilizie meigisia ma mulengania Yesaya ekubabula bune, Kungua mungue, tondo tamuamenyinine; nu kumona muamone, nu tamukutitika;
15Kubuno mitima za bantu babano zabezaga mibibu,
Nu matuzi mabo tamakunguaga,
Nu basila kuziba meiso;
Buno banavua kutitika,
Nu kungua na matuzi,
Nu kumenyinina mu mitima zabo, Nu kugaluka lingo,
Nu ninabonia. #Yesaya 6:9, 10.
16Tondo meiso meinyu meli na mbogimbogi, kubuno mekumona; matuzi meinyu meli na mbogimbogi lingo, kubuno mekungua. 17Lebelebe nkumubula bune, Balengania beingi nu bantu beisanana batundile kumona ku binsania bimukumona kubio, tondo tababimonineko; nu batundile kungua ku binsania bimukungua kubio, tondo tababiunguleko. 18Umpanga unguililazi ku musumo wa muyiki wa mbuto. 19Muntu unsania ukungua kuidagi lia bukota, kuteli kulimenyinina, ububo wozo mubi ekuvua, nu ekunyaga mbuto zayikua mu mutima wage. Wono uwayikilue mu ntungo mua nzila. 20Nuwe wayikilue ga luanda, uwozo ukungua kuidagi nu kazanga kongo ekulitunda na mbogimbogi; 21tondo nteli na muizi munda muage, ekusigala nkungu nkeke; nu gakuvua kabebe aba lubabazio ku kabamba keidagi, kazanga kongo ekuikuka. 22Nuwe wayikilue mu mikele, uwozo ukungua kuidagi; tondo tubebe tua kisi nu buengelezi bua bikulo, bukulimbania idagi, we ntakolame. 23Nuwe wayikilue mu bisogo bisoga uwozo ukungua kuidagi nu kulimenyinina; uwozo wakolama biguma; umozi lukama, ungo makumi mutuba, ungo makumi masatu.
Musumo wa Bisugu.
24Abeisile ungo musumo bune, Bukota bua meigulu bualingimana na muntu wayikile mbuto nsoga muisoa liage: 25tondo gabezaga bantu beiyombeka ku tulo, wamusomba avule, kuyika mbuto mbi munkatini mua mbuto nsoga, nu endile. 26Tondo gasile mbuto nsoga zakolamine, nsamba za tunkukuzungu zamonekile nuzo kuzo. 27Nu bakambi ba nyene isoa bavule, bamubuzizie bune, Mukota, ndi ntuayikile mbuto nsoga muisoa liobe? Kuni kuatukila tunkukuzungu? 28Akuide bune, wansomba uwakitile bubo. Bakambi bage bamubuide bune, Ndi ukutunda tuende kuyula tunkukuzungu? 29Ababuide bune, Kilo; kubuno ndi muayula tunkukuzungu, nti muayula mumpunge. 30Bisigazi biasile gamozi aba mu nkungu za kutubula: nkabula batubuzi buno, Lingazi kukungika tunkukuzungu nu kutukanda bibombo bibombo kutukagisibua; tondo kundamaniazi mumpunge mu kigenge kiane.
Musumo wa Mbuto za lua Bunyonyo.
Mk. 4:30-32; Lk. 13:18.
31Abeisile ungo musumo bune, Bukota bua meigulu bualingimana na kambuto ka lua bunyonyo, muntu akakatile, nu akayikile muage muisoa: 32keli kakeke ku mbuto insania; tondo gabukukula, bukutinga mbuto insania, nu nti zaba muti munene, nu mu ntabi zazo tuzoni tua mu mpelela nti tukuvua kukata.
Musumo wa Mugago.
Lk. 13:20, 21.
33Abeisile ungo musumo bune, Bukota bua meigulu bualingimana na mugago, wisile mukikulu mu bianzi bisatu bia bugali, nu bunsania buagagile nunse. 34Nu Yesu atendile na musanganano binsania mu misumo, ntanabuatendile buatatendile ku musumo: 35bubo lizindilile liatendagua na mulengania bune,
Nkatenda ku misumo;
Nkatenda biabezaga biabisua kutukila kulinga kua kisi. #Luimbo 78:2.
36Nu Yesu asigile musanganano, nu eingide mu numba; beigisibua bage bamuvuilide, nu bamubuide bune, Tuisulile musumo wa tunkukuzungu tuabezaga muisoa. 37Nu abakuide bune, Ukuyikaga mbuto nsoga eli Muana wa muntu; 38Nu isoa lili bantu ba kisi; mbuto nsoga zili bana ba bukota; tunkukuzungu tuli bana ba wozo mubi; 39nu musombi eli Liabo, u Satana; busi bua kutubula buli kuzinda kua nkiko, batubuzi beli migenzi za Kalaga, 40Umpanga bantu bakakundamania tunkukuzungu nu kutuisa ga keiya, nu bubo ubukaba ku kuzinda kua nkiko. 41Muana wa muntu akasinga migenzi zage, bakasombola mu bukota buage binsania bikuagia bango, nu bakiti babi. 42Nu bakeisua mu kiziba kia keiya, ukukaba idilo nu kubuga meinyo. 43Mu busi bubo bantu basoga bakasana anga kisongo kia busi mu bukota bueIsibo. Wozo uli na matuzi makunguilila, nti unguilila.
Musumo wa Bikulo Biabisua.
44Bukota bua meigulu bualingimana na kikagi kiabisilue muisoa; muntu akimonine, nuwe akibisile lingo; nu ku mbogimbogi zage, endile, nu akunzisizie biage binsania, nu akunzile lilio isoa.
Musumo Weikozi lia Bukunza Bubibu.
45Lingo, bukota bua meigulu bualingimana na muntu mukunzia, walondaga ikozi isoga lia bukunza bubibu; 46nu gamonine ikozi lia pelele lia bukunza bubibu, endile nu akunzizie biage binsania, nu alikunzile.
Musumo wa Kakila ka Biena.
47Lingo, bukota bua meigulu bualingimana na kakila kisagua mu kitatenge, kakundamanizie biena bia nkita na nkita: 48geiyalile kakila bundo, bakabulutile ku muse; beikeide, bakundamanizie hiabezaga bisoga mu mato, nu bisile biabezaga bibi. 49Nu ububo ubukaba mu kuzinda kua nkiko; migenzi zikavua, bakatikia bagi abezaga munkatini mua bantu beisanana, 50nu bakeisua mu kiziba kia keiya, ukukaba idilo nu kubuga meinyo.
51Ndi muamenyinina bunsania? Bamuakuide bune, E. 52Nu ababuide bune, Musanzi unsania uli muigisibua mu bukota bua meigulu alingimana na muntu muiya numba ukutikia bikulo bitangi nu bizinda muisuku liage.
Yesu Ekusubia ku Nazaleta, Bamusomba.
Mk. 6:1-6; Lk. 4:16-32.
53Nu gasilile Yesu misumo zeno, atukile. 54Nu gabasile mu kilongo kia kuabo abeigisizie mu numba zabo za musanganano, nu bangamine nu batendile bune, Kuni kuasanga muntu wono menge mamano, nu migeleko zeno? 55Ndi wono ta umuana wa mukulumizi wa mbabu? ndi nina ta uwozo ukumanua buno Malia? nu ndi bato bage ta u Yakobo, nu Yosefu, nu Simona, nu Yuda? 56Nu babitu bage, bansania tabeli kueitu? Umpanga kuni kuasangila wono bubuno bunsania? 57Nu beinine mitima nage. Nu Yesu ababuide bune, Mulengania ntakubengua ku ungo, umpanga kuabo, nu mu numba zage. 58Nu ntakitile migeleko kuko, kubuno tabakatizizie.
Currently Selected:
Matayo 13: NTKI57
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Nouveau Testament en Kilega © Bible Society of the Democratic Republic of Congo, 1957.
