Éxodo 8
8
1Pa yit'esha shta pa Lhcaanvacle pa Moisês:
—Meey ca ajôchiey ja faraón, pa anfacleem: ‘Nôque yit'esh pa Lhcaanvacle: An'ate ca nôqu'in napi tsitsôt'ajesh ca jaspa nitsôclôj. 2Lhayaash ca niavashantaja ca nôqu'in, pa jaclôyitesh jayu yivaatsha lhacôm'a na avtsaat pava fiyôc.*xt* 3Na tovôc nitsoyinshi jayu pava fiyôc pavan tayshi jayu, pa nôc'ôcjiin jayu na ajpôyich, yiey shta pan lhjo'een, yi'apee pa amôjôvat. Pa yiey shta pava lhajpôyjey japi acavos shi' japi achifas. Pa nôc'ôcji jayu shta pava ayucuveshiyiselh shi' pa yiey pan lhôveshelh'een ti lhasnatshelh'in pa climshi t'ajuya lhpa yucuve. 4Pava fiyôc t'eclet'at'apeean jayu shi' shta japi acavos pa shi' lhacôm'a japi achifas.’
5Pa Lhacaanvacle yit'esha pa Moisês:
—Ayôjeesha na Aarón ca nôclôj'apee na lhavcôjat java tovjôy, java tovjôy lhcles shi' java vishinic ca jaspa lhech nitôlh'e pava fiyôc pa nitif'apee na yitsaat Egipto.
6Pa yôclôj'apee pa Aarón pava yinôtes yiey pa Egipto, pa lhacôm'a pa yitsaat ti acloj'e pava fiyôc pavan lhech tôlh'e'in. 7Pa e'anojo papi tôyjesesh ti lhech lhfanishesh yitsha ti tôlhesha pava vôntôyitesha'ne, pa chi' shta ts'ivee ti namjatey pava fiyôc pa cotsjaat Egipto. 8Pa lhechesh pa vancacheney pa faraón pa Moisês shi' pa Aarón, pa yit'esha:
—Aalhshelha pa Lhcaanvacle ca nayjatelhyijop nava fiyôc yivaatsha shi' napi yichifas. Pa javashan jayu napi achifas ca nôquey ca nasnatshem pa lhcufayjat'em pa Lhcaanvacle.
9Pa yicuulh pa Moisês pa faraón:
—Anfacyam ta ca t'elhesh avaatsha ti lhen ca jaya'lhelhaam avaatsha, napi acavos pa nôquee napi achifas, ca jaspa nitayelh'ajop nava fiyôc avaatsha shi' java ajpôyjeyelh. Pa tsi'shaa ca nôvji' yiey ja tovôc.
10—Vooy lhum'ashi —yit'esh pa faraón.
Pa yicuulh pa Moisês:
—Nôque lhanfanash jayu, ca jaspa natô'yelha ti ampapu ca ve'lhaa ca lhjunashajulh pa Lhcaanvacle cas Dios. 11Nava fiyôc tay'een jayu na ajpôyich shi' nava lhajpôyjey napi achifas, pa tsi'sha jayu ca mônlhaashiin yiey ja tovôc. Pa tan jayu ca namelh'a t'oyish'e.
12Pa tayelh'ôcji pa Moisês pa Aarón pa lhajpôyich pa faraón. Pa lhechesh pa t'aalhsha pa Moisês pa Lhcaanvacle ca nayjatjop pava fiyôc pavan yicheney pa faraón. 13Pa Lhcaanvacle yisnatesh pan t'aalhsha pa Moisês. Pa vafshaneen pava fiyôc pavan yiôcjiin yiey pava jpôyjey, yi'shi' shta pava clayôych'e shi' pava yi'shi' pava jotoy. 14Pa vooy papi egipcios yichaj'in pava vafsha'ne fiyôc ti yaclôpju'in, pa ampa ca nintanshiyee lhacôm'a pa yitsaat. 15Taj ti meelh ti vatvanesh pa faraón ti vô'mesh pava tavijatayem, pa ninteesh shta ca nicu'lhesh pa Moisês shi' pa Aarón yiey pan t'ônashesh pa Lhcaanvacle.
Ti vaclan pava yiya'
16Pa Lhcaanvacle yit'esha pa Moisês:
—Ayôjeesha na Aarón ca nôclôj'apee na lhavcôjat pa niclôneshicham na lhech pa lhqu'imjayaj na cotsjaat ca jaspa nitanujam pava yiya' yiey lhacôm'a na Egipto.
17Pa lhech lhfanishesh. Pa Aarón yôclôj'apee pa lhavcôjat pa yiclôneshicham pa lhqu'imjayaj pa cotsjaat. Pa lhacôm'a pa lhqu'imjayaj yiey pa Egipto tanu'jam pava yiya'. Pava lhech yijuujjaneen papi egipcios shi' pava lhclôy. 18Papi tôyjesesh yentaj yitsha ca nicaatjat pava yiya' ti yichentajesh'in pava vôntôyitesh, taj ti nincôôvjôychishi ca nasnatesh. Pa lhan'e pava yiya' yijuujjane jum papi egipcios shi' pava lhclôy. 19Pa lhechesh pa yit'esha papi tôyjesesh pa faraón:
—¡Côque yitsôt'ajshi pa Dios!
Taj pa faraón mônlheesh ti ninteesh, yiey pan t'ônash pa Lhcaanvacle.
Ti vaclan pava fôômjômis
20Pa Lhcaanvacle yit'esha pa Moisês:
—Ja faraón yichey jayu lhum'ashi ca nich'a nalhutaja ja tovôc. Pa nôquenlhayaash aneetsham tatsha ca lhavoojtajulh pa nalhu pa meey ca anfacleem: ‘Nôque yit'esh pa Lhcaanvacle: An'ate ca nôqu'in napi tsitsôt'ajesh ca jaspa nitsôclôj. 21Lhayaash avaatsha ca niavashantaja ca nôqu'in, yivaatsha jachen'ay jayu pava fôômjômis, napi acavos shi' lhacôm'a napi achifas. Pa acloj'ôcji jayu shta pava fôômjômis pava lhajpôyjey papi egipcios, pa yitsôyin'e cotsjaat jayu shta. 22Taj ti meelh ca navclantaj côque pa tanca yamjatey jayu ja cotsjaat Gosên yiey jan yie' japi tsitsôt'ajesh. Pa tan jayu pa ca ve'lhaa pa ca fôômjôma ca lhech nôv'e'. Pa nôque lhjunash natô'ya jayu yivaatsha ya Lhcaanvacle, ti jôvji' jô lhech'e yitsaat. 23Pa javenchatc'oya jayu ja lhavtsaat japi tsitsôt'ajesh shi' japi natsôt'ajesh avaatsha. Côque vaclan jayu lhum'ashi.’
24Pa lhech lhfanishesh pa Lhcaanvacle. Pa lhaya'sha lhpa vôse' pava fôômjômis ti namey pa lhajpôyich pa faraón shi' pava lhajpôyjey papi lhcavos, pa tif'apee lhacôm'a pa Egipto. Pava fôômjômis uj ti yicaatjat pava tavijatayem pa yitsaat.
25Pa lhechesh pa vancacheney pa faraón pa Moisês shi' pa Aarón, pa yit'esha:
—Meelh'in ca asnatshelhem pava acufayjateselh pa a'Dioselh, taj ti ya aj ca ayelhshi na yitsaat.
26Pa yicuulh pa Moisês:
—Côque nintajulhey ca lhech lhanfanasha, lhayaash java yiclôyelh pava jaclônelhem jayu pa Lhcaanvacle yi'Dioselh, lhech ti lhasnôyjasem japi egipcios. Lhayaash ti meelh ca nasvantajeshelh japi egipcios ti yicufayjateseshelh cava yiclôyelh cavan yôclôj'in japi lhech, pa tsitô'ya jô pa lhetajeesh ca nitsôôtjateshelh'in pava utes. 27Tajulhey jô ca jôquelhey ja ampa ca nôv'e'. Pava pu'jana nalhus ca jayôtayelhshi pa lhechee ca jasnatshelhem pa yicufayjat'elh pa Lhcaanvacle yi Dioselh, yiey ca nit'ônasheshelhyam.
28Pa lhechesh pa yit'esh pa faraón:
—Javashanelh'am jayu ca meelhey ja ampa ca nôv'e' ca jaspa asnatshelhem pa Lhcaanvacle a'Dioselh pa acufayjat'elh, taj ti ya aj ca jô ca atôseeshelhch'e pa ca môôjelhshi. Pa tajulhey ca a'lhelhyam yitsha.
29Pa yit'esh ti yicuulh pa Moisês:
—Meelh yivaatsha ca jayayjat'e nôque, pa jayaalhshelhaam jayu pa Lhcaanvacle ca nitayelh'ajop lhum'ashi avaatsha nava fôômjômis shi' napi acavos, pa nôquee shta lhacôm'a napi achifas. Taj ti ya aj ca t'oyisheey ca astejeelhshiin shi' ca niavashana napi israelitas ca nôquesh ca nasnatshem pa lhcufayjat'em pa Lhcaanvacle.
30Pa meelh ti tay'ôcji pa Moisês pa lhajpôyich pa faraón, pa t'alhey pa Lhcaanvacle. 31Pa vooy pa Lhcaanvacle yisnatesh pa Moisês pava t'aalhsha. Pa tayjop pa faraón pava fôômjômis shi' papi lhcavos shi' papi lhchifas. 32Taj pa faraón vapecleyjop ti ninteesh pa ninvashanem ca nôqu'in papi israelitas.
Currently Selected:
Éxodo 8: NIVA
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Nivacle Bible © Sociedades Bíblicas Unidas, 1994.
