Éxodo 7
7
1Pa lhechesh pa yit'esha pa Lhcaanvacle pa Moisês:
—A'va, javashan'am jayu ca ascayô'jesh ca nôque afanisheesh ca veesh'e t'ajuyish ja faraón, vooy na achecla' Aarón nitasinôy'am. 2Avaatsha lhanfacleem jayu na Aarón lhacôm'a cava c'ayôjeesha yivaatsha. Pa lhecheesh na lhech ca nanfacleem ja faraón ca jaspa nivashan ca nitay'e na lhavtsaat napi israelitas. 3Taj ti vooy yivaatsha janshi' jayu ja faraón ca ninteeesh. Pa lhechesh pa javclanjat'e jayu pava acloj matas yiey na Egipto ca chinatampoyem.*xq* 4Vooy ja faraón tan jayu ca nacuulhshelh côque avaatsheelh. Taj ti vooy yivaatsha janôclitem jayu na yunaj yiey na Egipto. Pa jatojoneshfach'ee jayu napi tsitsôt'ajesh javooyshiyitam israelitas. 5Pa meelh ti p'alha ti janôclitem na yunaj yiey na Egipto shi' ti p'alha ti jayjat'e napi israelitas, pa nitô'ya jayu napi egipcios ti ya lhech yivaatsha ti ya Lhcaanvacle.
6Pa Moisês shi' pa Aarón yisnatshelh lhacôm'a pava yiyôjiesha pa Lhcaanvacle. 7Pa Moisês ochenta pava lhnincôpes pa vooy pa Aarón ochenta y tres pava lhnincôpes, meelh ti tasinôyelh pa faraón.
Pa lhavcôjat pa Aarón
8Pa Lhcaanvacle yit'esha pa Moisês shi' pa Aarón:
9—Ca nit'aalhtaja ja faraón ca asnatshelh pa ve'lha nimatasa papu ca nitô'yish, pa ayôjeesha na Aarón ca natcum'e na lhavcôjat pa nu'e t'ajuyish ja faraón ca jaspa yalhatajeesh ca toseesh.
10Pa Moisês shi' pa Aarón yichey ts'ivee pa faraón, pa yisnatesh pava yiyôjiesha pa Lhcaanvacle. Pa yu'a cotsjaat pa lhavcôjat pa Aarón yiey pa t'ajuyish pa faraón shi' papi lhcavos. Pa yalhatajesh ti tosesh pa lhavcôjat. 11Pa lhechesh pa vancacheney yitsha pa faraón papi yitsôt'ajesh lhavcajôyshinjas shi' papi tôyjes. Vooy papi lhech, lhech lhfanishesh yitsha yiey pan lhjunash'in ti vôntôyitesh. 12Pa ve'lha ts'ivee papi lhech ti yu'a cotsjaat pava lhavcôjates, pa yalhatajesh vitsha ti tosesh lhacôm'a pava lhavcôjates. Taj ti vooy pa lhavcôjat pa Aarón tuj pava lhavcôjates papi lhavcajôyshinjas shi' papi tôyjes. 13Lhama'taj côque pa faraón ti lhetipa ti ninteesh yiey pan t'ônashesh pa Lhcaanvacle ti yit'esh.
Ti vaclan pava vo'oy
14Pa nijooylha pa Lhcaanvacle ti yit'esha pa Moisês:
—Ja faraón palha vatsuyiyan pa ninteesh ca nivashan napi israelitas ca nôqu'in. 15Taj ti vooy lhum'ashi ca nich'a nalhutaja pa meey shta pa ajôchiey meelh ca nôctajey ja tovôc. Pa ach'an'ec'oya yiey ja lhavôôj'e, pa achaaj shta na avcôjat nan tanu'jam ti tosesh. 16Pa lhechee pa at'eshem: “Pa Lhcaanvacle, pa lh'Dios japi hebreos, tsichen'ay ca janfac'am: An'ate japi tsitsôt'ajesh ca nôqu'in ca jaspa nitsôclôj yiey ja ampa ca nôv'e'. Taj ti vooy nôqueesh jôjjeclay na at'esh. 17Pa lhe'naa pa Lhcaanvacle ti nôque yit'esh: Nôqueesh natô'ya jayu ti ya'lhech yivaatsha ya Lhcaanvacle. Meelh yivaatsha ca jaclôntajesh'apee na tovôc nôque yivcôjat nan jachaj'in, pa lhechesh jayu ca nitanujam na yinôôt ca vatvoyeyeesh.*xr* 18Pa yivômjatsha'ne jayu pava sajech. Pa uj jayu shta ca niclatshi na tovôc, pa jaalh jayu ca napunshi napi egipcios ca niyô'ji nôque yinôôt.
19Pa jô'tajesha shta pa Lhcaanvacle ti yit'esha pa Moisês:
—Ayôjeesha na Aarón ca natcum'e na lhavcôjat pa nôclôjquisham'in ca jaspa lhacôm'aa java tovjôy, java tovjôy lhcles, java vishinic shi' java tnôjquey yiey na Egipto; shi' lhacôm'a pava yinôtisesh ca jaspa nitanujam ca vatvoyeyeesh. ¡Pa nôque lhjunash ti caaj pava vatvoyey yamja pava chiyanch'e'in pava yiclôyesh shi' pava utesesh!
20Pa Moisês shi' pa Aarón yisnatesh lhacôm'a pavan yiyôjiesha pa Lhcaanvacle. Pa yinenjatchisham pa Aarón pa lhavcôjat pa yiclônesham pa yinôôt pa tovôc ti yivanjiyinesh pa faraón shi' papi lhcavos, pa lhacôm'a pa yinôôt ti tanujam ti vatvoyeyesh. 21Pa vafsha'ne lhacôm'a pava sajech, pa uj ti niclatshi pa tovôc, pa nit'ôyisheey ca niyô'ji pa yinôôt papi egipcios. ¡Lhacôm'a pa Egipto ti caaj pa vatvoyey!
22Taj papi tôyjes egipcios lhech lhfanishesh shta ts'ivee tôlhesha pava vôntôyitesha'ne. Pa nôque lhjunash pa faraón ti ninteesh shta ca nicu'lhesh pa Moisês shi' pa Aarón, yiey pan t'ônashesh pa Lhcaanvacle ti yit'esh: 23Pa vapecley pa faraón pa lhajpôyich pa nitiqu'in'aesh ca naychavalhch'e côque lhjunash. 24Pa lhacôm'a papi egipcios ti yisnateshane pava lhquitsjes yiesh'e lhavooj pa tovôc ca jaspa nanclanshi pa isshi' yinôôt. Lhayaash pa yinôôt pa tovôc sasjop ca chinyôji'.
Ti vaclan pava fiyô
25Nôjeshch'e pava napu'yama nalhus ti yiclônsham pa yinôôt pa Lhcaanvacle,
Currently Selected:
Éxodo 7: NIVA
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Nivacle Bible © Sociedades Bíblicas Unidas, 1994.