PONGWANG LAIPEX 50
50
1Ifüima Jusep-e hopa hato hüi üntoxle chix füi tun apongle chix mangsop. 2Jusep-e hing twonkyabu ang hopa mang to chwonle chishan angkya hanpakma hing füi pa ang tom. Idaile hingtwonpabue Israel mang to hing füi pa. 3Itukux lax angkya olom daile hwome ija hingzuk mwot tsuak ang nyix 40 lax. Ifüima chix hanpakma Ijip nokbue nyix 70 mangtsale sop.
4Chemtue sopkya hia mangtsakya hanpak ashukle hüipuix, Jusep-e Farao homkha angkya nguakhobu ang thüi: “Chingchalaxle hünzome pi wanghompa hato ija kaxho apüikox: 5#Pon 47.29-31.Apa zitu nguile hüikya zuma, kue chix mang, Kanan haxtok to chixe achwonle toxkya zukting ma akhün ang pao angkya changle le ku ang tsaotsüt ang tomle changdaoa, idaile ku apa mang zule toxlaxle chat ang pao ang tomhüi.”
6Wanghompa-e lan: “Nange tsaotsüt daokya ningle paolax ilaxle hünpa mang zule toxlax.”
7Ikhoma Jusep a hopa mangzu ang pao. Wanghom khwa angkya nguakhobu, chix wangshembu tamchu Ijip haxtok angkya lompabu Jusep füi tomle pao. 8Chix kako-homkha, hotüi-honao hwom tamchu hopa homkha mamix pangwüi chix füito pao. Naosombu, chun hia zwon ilaxle maihubu, hwom tata Goshen haxsha ma ngole nui. 9Man-kanlin#50.9: man-kanlin: Mane linkya zyen. kho ma ngakya hia mankho ma ngakya khünakbu chu chix füito hüi. Hwom a chongkya jenthom tuita ang achangle tüikya.
10Chemtue hwom Jordan zongma tachi, handünchi ma Atad kux tsaxnak nui alople changpuix, hwom tüle akhongle sople mangtsa, ilaxle Jusep ikhama hopa mangtsale nyix anüt zomzingle nui. 11Atad haxtok ma ibu khünakbu sople mangtsa ngokya nguikya zuma Kanan noke thüi: “Ijip nokbu huanuma mangtsale sopkya changa.” Ikhoma ijongkha ang Abel Mizraim le nyak.
12Ile sasün hwome hopa hanpakma, chixe hwom füi akaxle toxdaokya ningle mok. 13#Mwt 7.16.Hwome chix Kanan chaxwan to pao ilaxle Makpelah haxtok ma akhün. Ija haxtok Mamre zui ma tüikya a zukting ang lax ang Abraham-e Hit nok Efron ma shakkya kha changkya. 14Hopa mangzu le toxlaxle Jusep, hotüi-honao hwom hia chix füito azuile hopa mangzuk ma wom ang hüikya khünakbu füi tomle chix a Ijip to chat.
Jusep-e Hotüi Hwom füi Mong Chiao angkya Akax
15Hopa zikya füima, Jusep hotüi-honao hwome, amipongma hwome chix to chichang-chizangle hwon daokya mongma Jusep-e hwom to olüix khomle jangchangba le hwom abüt-abanle ngo. 16Idaile hwom Jusep hato ngui ilaxle thüi: “Hünpae chix zile paoüima, kwome nang to chichang-chizangle hwondaokya bama thailak#50.16: thailak: Thaidaokya alakkya. tüikox-ole thüitoxkya ningle, 17athax kwome nang ma thaidaokya ija alak-hüile thüi ang nguipu. Chingcha üntoxle hünpa dapa hwom kwom to thailakkya tüihüi.” Hwome ija akax pongma Jusep sop.
18Hotüi-honao hwom chuwüi soplaxle chix chitong ma akhuxlaxle thüi: “Ikhato kwom a nang dapabu ningle changpu.”
19Ikoxle Jusep-e hwom ang thüi: “Hünzom taxza! Ku a Zang changkya hia? 20Hünzome ku to oma hwonkya ningle sütdaokoxle chu, Zang ija omüi lom to laxpu ilaxle athax tüikya ningle khünaknu a e-ang chithole pu-tsa ang tompu. 21Idaile hünzom ojao taxza. Hünzom tamchu hünzom su-sa hwom pangwüi kue tuxüi.” Ile chixe kaxmüi zangwün makhange hwom ang mong azang ang tom.
Jusep Zikya
22Jusep a chix hopa homkha, ma haxnu-homsa pangwüi füi Ijip nok to ngole hüi; ile chix 110 zanglao tsünlo-khothole ngo. 23Jusep-e Efraim hosu, chix zongto sutai kople ngünle tox. Manasseh sasün Makir naosom hwom ngaxchu Jusep chitong ma wüi pux-pai. 24Ifüima Jusep-e hotüi-honao hwom ang thüi: “Athaxpi ku a ziüikhakha; Zang chixjao hünzom waile nguiüi ilaxle ija haxtok angkya hünzom chixe zunle paoüi.” 25#Lai 13.19; Jih 24.32; Ibr 11.22.Ija ma Jusep-e Israel khünaknu ang tsao-atsütle akax: “Otsingtsingma thüipu, hünzom khui-waile Zang chix tomtata nguiüi, ilaxle hünzome ikhatokya ku za-tua hünzom füi tomle paokox.” 26Ile Jusep zanglao 110 tsünlo-khothole ngolaxle zi. Hwome chix mang to shanle chipao angkya ongan müikya hinghai füi pa ilaxle chix a Ijip chaxwan ma zuk khato shole thom.
Currently Selected:
PONGWANG LAIPEX 50: WANCBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.