PONGWANG LAIPEX 43
43
Jusep Hotüi-Honao Hwom Ijip to Benjamin Koplaxle Chat
1Kanan haxtok angkya nuak ozia süma-süma le male hüi. 2Chemtue hwome Ijip nok tokya shakle apüikya süt bakle hüipuix, Jakop-e sasün hwom ang thüi: “Ijip to chatle kalaxle kwom ang süt asütlax.”
3Judah-e chix ang thüi: “Ija khünake kwom ang naoshukpa chilax homtoxle chix hato jangngui münmüipox-ole jao azale changdaoa. 4Nange kwom nao kwom füi tomle ka ang dankoxtix wüi kwom ka üntoxle süt shak ang tsuaküi. 5Nange chix mün-apaoüi le jangtex, kwom münka, chemthüikoxle kwom naoshukpa chilax homtoxle chix hato chak-hua ma nguile jangchang münmüipox-ole ija mixsüne kwom füi kaxshing kople akaxdaoa.”
6Jakop-e lan: “Hünzom ang chatle chu naoshukpa tamtüile le ija mixsün hama wünle toxlaxle büthüikoxle ku mong ama ang tompu?”
7Hwome lan: “Ija mixsüne kem kako homkha bama ‘Hünpa tüichami? Hünzom ang chatle hotüi-honao chitüitüi?’ le chatchatnaole atüidao khato. Kwome chix kax to lan angkya wüi laipu. Chix hato naoshukpa apüi angkya wüile atsangüi le kwome omatik?”
8Judah-e hopa ang thüi: “Nange naosa kwom füi tomle akatüile jangthüi: kwom athax ile achexüi. Ile jangchang thüiningle kem opupuchu woknuak ma münzi. 9Kue ku khang hangle akaxpu, chix bama hünlix ku ang koxlax. Kue chix nang hato chatle haxmüi-zangmale chiapüi jangthüiba, pangnu ku khang ma kholax. 10Ipongpong tan-nyele chingo thüikoxle kwom ikhato othom anyi tukux ma jao noxdaose.”
11Hopae hwom ang thüi: “Ija ile wüi chang angkya jangchang thüiningle hünzome Gowarnor hato hingho a kem chaxwan ma laikya oli amüikya; fupsa-zan hidaole, nax-ti hidaole, otex-tsyapi, pistachio hia almon ziak, ibu katlax. 12Hünzome ngun thom-anyi tsyen katlax, chemthüikoxle shongnyix hünzom hünkho ma bangkya hanpakchu achat angkya changüi. Owatsing hwome thaithax lüwüi koxdaotüi. 13Hünnao koplaxle kalax üntoxle chwonle wüi chatlax. 14Khüthak Zang-e chix kün-mong ma hünzom to chingcha angkya tuitex müikya naxfafa. Chixe Benjamin hia hotüi nyi hünzom ang achatle naxfafa. Kue naosom amüt angkya wüile jangchang daoba, atix naxmax koxa, büthüikoxse le.”
15Idaile hotüi-honao hwome hingho ibu lax, othom anyi tsyen ngun kop üntoxle Benjamin koplaxle hwom ka. Ekhato hwom Jusep tuntho to ngui. 16Chemtue Jusep-e hwom füi tomle Benjamin ngünpuix, chixe homkha angkya da ang thüi: “Ibu ku hom to paokox. Hwome athax tungto shene ku füi tomle fongsax angkya changle idaile müilang laxle song-khale changkox.” 17Chix füi akaxkya lailaile ija dae mokle alai ilaxle chixe ibu a Jusep hom to apüi.
18Hwom ile Jusep hom to apüile toxkya zuma, ami owangpongma hwom tsong khato shole koxkya ngun khoma changpule thütlaxle hwom tüle abanle max. Hwome allele singlaxle hwom kux mantsakbu pale lax üntoxle hwom a da ang achangle thom ang tungpu le thütlaxle tüle zale ngo. 19Idaile fülom zui ma tüipongma ija da tüichong hama hwome thüi: 20“Nangepi chingchalaxle kwom kax to tam apahüi; thochima chu kwom ikhato sax shak ang tam nguidaopu. 21Chatüi lomba to kwome tsong dok-koxle kwom pangnu ang wüi ma tsongkaxkax ma, ikhama tüikya tsaxthatha ngun bangle. Kwome ija ngun chatle achat ang katle tüipu. 22Chatle mama tamshak ang chuwüi kwome ngun kat tüipu. Idu ngun kwom tsongkax to owae shole koxdaopuix kwome müntik!”
23Ija dapae lan: “Tax-aban, taxza; hünzom zang tamchu hünpa hwom Zang-e hünzom hanpak ang shole fakya wüi changdaotüi. Kue ija pongle kopthom fang.” Ifüima chixe Simeon hwom hato apüi.
24Ija dapae hwom a hommong to dün. Chixe hwom ang cha-chak so angkya hanpakma ti alaile kox. Chixe hwom mantsakbu ang chuwüi osüt kox. 25Athax tungto shene chatkya zuma Jusep ang kox angkya hwom hinghobu achwon, chemthüikoxle chixe hwom füi tomle fongsax angkya changle le akax. 26Chemtue Jusep hom to nguipuix, hwome hingho ibu chix hato apüile kox ilaxle chix cha to shwom. 27Chixe hwom ang müimüi tüilaxmale atüilaxle thüi: “Hünzome hünzom hopa azupa tüile thüikya müimüi tüilaxma?”
28Hwome lan: “Nang-hi nang-da, kwom apa azupa, müimüi-zangngai lüwüi tüipuix.” Ija akax üntoxle hwom chix cha to shwomle akhux.
29Jusep-e honao Benjamin ngünkya zuma hwom ma atüi: “Ija a hünzome ku hama wünkya naoshukpa hia? Ku sasün, nang to Zang-e mohimankya naxtüi.” 30Ifüima Jusep aküile pao, chemthüikoxle honao ngünlaxle chix mongto sopthu le hüi. Chix a chix nui to donglaxle sop. 31Chixe thün-le tsuxlaxle chatle lai, ilaxle chix lailai to mongnu adünle thung ilaxle fong fex ang tom. 32Jusep ang tsap tuita ma ilaxle hotüi-honao hwom ang mama tsap ma hule fa, chemthüikoxle Ibri khünakbu füi tomle fongsax angkya a hwom zongto tuita thajao ang lax. 33Hotüi-honao hwom a tsap ma ajale thungle tüikya; hwome Jusep chito thün ahole, tüichong naoli achwotle thungle tüikya. Chemtue hwom ile thungle asukya hwome ngünle lax, hwome tata to abütle hu. 34Hwom ang süt Jusep tsap angkya danle kox. Benjamin ang a hotüi-honao hwom to nüile othom aga majao danle kox. Ile hwom tokle machang machangle hwome Jusep füi tomle saxling le chang.
Currently Selected:
PONGWANG LAIPEX 43: WANCBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.