PONGWANG LAIPEX 32
32
Jakop-e Esau füi Apong ang Achwon
1Jakop hwom hom to chatle ngopongma, kaxtaimixbu chix füi apong. 2Chemtue chixe hwom ngünle laxpuix, chixe thüi: “Ija a Zang pom changpu.” Idaile chixe ikha ang Mahanaim#32.2: mahanaim: Ija mün a Ibri kax ma “pom anyi”, le thüikya kax changle.
3Edom nok to hotüi Esau hato achale Jakop-e kaxhomix awün. 4Chixe ibibile wünlaxo lükya tsai-kax apuale chix ang thüi: “Ku, Jakop, nang kaxkax ma laxle tüikya da-e, ku hopunu Esau hato kaxho fapu; ku a Laban hom to ngolaxle athax kople chat ang chitsuakle ngole hüidaoa. 5Ku ma tsom-pom: mantsakbu, chunbu, zwonbu, üntoxle dabu huanuma tüile. Kue nang chingcha lomle, tüta küntsik-mongmakya taxtüiünfa le tsaiju-kaxjule kaxho ahüi ngopu.”
6Kaxhomixbu chatlaxle Jakop ang thüi: “Kwom hüntüi Esau hato nguile toxdaoa; chix a nang füi apong ang hüile ngole. Chix füi tomle khünak 400 jao tüile.” 7Ija atatlaxle Jakop a abünle za. Chixe chix khünakbu othom anyi ang achangle ahan; ija ningle chix müi: chun, zwon, maihu hia utbu chuwüi ahan. 8Chix mongto thüt: “Esau nguilaxle pongwang angkya othom to single changkoxchu mama othom tuita a paole azang ang thoüi.”
9Ifüima Jakop-e zangjop: “Ku apu hia ku apa Isak nyi Zang, ku kax to apahüi! Jowanpa, nange ku ma chaxwan to mamixbu hato chat angkya akaxpu, ilaxle ija a ku hanpakma omüimüi angwüi changüi le akaxpu. 10Ku nang dapa a nang chingcha hia mongkün atak koxle ojao chiasukya khünak changpu. Kue Jordan shuanu tale changpongma chemchu chitüile chak-hua ma kiathox tata füi tale lepu, ikoxle athax ku, khünak hia müi othom anyi achangle ahanle pu-tsa laxle chatpu. 11Atüi Esau chak tokya nange ku khosünfa le kue joppu. Kwom sheko hia naosom hwom to lünle pangwüi amüt ang chix a kwom zan to kale tüile le ku a müimamale abüt-abanle tüile. 12#Pon 22.17.Nange ku ang, pangnu müile hüi angkya tamchu owaechu akiak ang chithole shuanu kax angkya fixtsang büta kusix-kuli lai ang koxüihex-ole tsaokya nang kaxtsao texle atak-hüi.”
13-15Ija ja chix ikhama pom ilaxle chix tuina kha angkya hotüi Esau ang kox ang, chix hingho ang ibibile süile kop: Zwonunu 200 ilaxle zwonpongpong 20; chunnunu 200 ilaxle chunlala 20; ut honunu 30 füi hosabu; maihu hununu 40 ilaxle hupongpong 10; mantsak honunu 20 ilaxle olala 10 ibibi. 16Ibu pangwüi chixe chix dabu chak to zyempong-zyempong ang achangle ahanle kox, ilaxle hwom ang thüi: “Hünzom ku thoto achale leün ilaxle hünzom othom-othom bama oba toxle changkox.” 17Tunpa angkya füi chixe ile akax: “Chemtue atüi Esau apongle ‘hünzom owa kux tamchu ochichi to le angkya?’ le atüikya zuma 18hünzome, ‘Ibu a nang da Jakop kux changle; ibu a chix hopunu Esau hato hingho ang ahüikya changle, ilaxle chixchu kwom füifüi ma hüile tüile’ le lan angkya changle.” 19Chixe othom anyi-lükya, azom lükya ilaxle ifüima hüile ngokya othom pangnusa angwüi, ilailaile lan angkya anole kox. Tamnüilechu füifüima chix hüile tüikya apua angkya akax. 20Chemthüikoxle chix mongto: “Kue thochito achale alyetkya hinghobue chix mong anom-anaile chang ang thoüi, ilaxle kue chix jao apongkya zuma, chixe ku mongmüile pongkopüi”, le chixe thüt. 21Idaile chixe chix hingho-chaktwon thochito achale alyet, ikoxle chix a ija ja pom ma wüi nuile tox.
Peniel ma Jakop Ashingkya
22Ija ja zangnak ma wüi zolaxle, hosheko nyi, chix dabu ilaxle sasün hwom 11 tüikya komle laxlaxle Jabbak shuanu tale le. 23Hwom pangwüi shua atale changkya füima chixe tuinabu chuwüi bakle ata, 24#Hos 12.3,4.ikoxle chix a hwom füishuk to chix tata ngo.
Ifüima zangngaiüi khakhama mixsün tuita nguilaxle chix füi alople ashing. 25Ija mixsüne, chixe münlüttsuaküi laxle le ngünkya zuma, chixe Jakop to ke ma chietle kemik adox ang tom. 26Ija mixsüne thüi: “Athaxpi zangngaitu nguile hüile, ku pao ang danfa.” Jakop-e lan: “Nange ku to mohimanle machang tanto kue nang mündan.”
27Ija mixsüne atüi: “Nang mün chemle changkya?” Chixe lan: “Ku a Jakop changpu.”
28 #
Pon 35.10. Ija mixsüne thüi: “Athax nang mün a Jakop le münchangüi. Nang Zang füi tamchu ku füi ashingle changdaoa ilaxle nange wüi anaodaoa; ikhoma nang mün a Israel”
29 #
Kax 13.17,18. Jakop-e lan: “Athaxpi nang mün apuahüi.” Ikoxle chixe lan: “Nange ku mün chemle thüi ang awanse tsupu?” Ifüima chixe Jakop to mohiman.
30Jakop-e thüi: “Kue thün-khang asaole jao Zang ngün ang kopdaoa, ikoxlechu athax kople ku ozün ma ngopu.” Ikhoma chixe ijakha ang Peniel#32.30: peniel: Ija mün a Ibri kax ma “Zang thünza”, le thüikya tha changle. le nyak. 31Jakop Peniel dantoxlaxle achex pongma zanghan dongle changdaokya; ilaxle chix a ke adoxkya khoma faifai le aham. 32Jakop-e ketui ma thomzün apongle changkya khoma, anyix kople Israel sixli hwome kemik angkya müi ohak münsax.
Currently Selected:
PONGWANG LAIPEX 32: WANCBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.