PONGWANG LAIPEX 28
28
1Ifüima Isak-e Jakop se üntoxle chix to mohimanle chix ang thüi: “Nange Kanancha münlaxüi. 2Idaile chwonchwonle wüi Paddan-aram to hünhochong Bethuel, owa hünnu hopa changpuix, chix hato kalax; ilaxle ikhato hünnu hotüi Laban sacha hwomkha angkya tuituita nang kakonu ang laxlax. 3Nang tüle simüi-limüile pu-tsale chang angkya hanpakma Khüthak Zang-e mohimanle naxchangfa. 4#Pon 17.4-8.Chixe nang ang Abraham mohiman naxfa, nang ang tamchu nangsix-nanglibu ang chuwüi, ipongma nang mixnok wünpa tuita ningle ngokya haxtok, oja Zang-e Abraham ang koxle toxdaopuix, ija haxtok ma hopunu ang nang naxchang kox!” 5Ile Isak-e Jakop tomle akat. Jakop a Paddan-aram nok to kale Aram nok Bethuel sasün Laban hom to ngui. Chix a Esau hia Jakop nyi honu Rebika zongto hotüi changkya.
Esau-e Kako Mama chuwüi Lax
6Athax Isak-e, Kanancha chilax angkya hanpakma zünlaxle Jakop a Paddan-aram to chix kakonu lom ang mohiman koxlaxle tsanle akat. 7Honu hia hopa nyi kaxtom ma laxle Jakop Paddan-aram to kaüi Esau-e ngünle lax. 8Chemtue chix kakonu ang Kanan cha laxkya to hopa Isak ang mongzom chimüikya Esau-e ngünle laxpuix, 9Esau a Ishmael hato kalaxle, Abraham hosu Mahalath, owa Ishmael sasün tamchu Nabaioth honao changkya hex, she a chix kakonu ang apüi. Chix ang sheko mamabu chuwüi tüihukya, ibu to obo ang lax.
Bethel ma Jakop Wünmang
10Bersheba dantoxlaxle Jakop Haran chito ka. 11Zangwat dütkya füima chix tuita otsao nui#28.11: otsao nui tuita. to ngui ilaxle ikhama nazak. Long tuita ma ngom ate laxle chix a jip ang shui. 12#Jhn 1.51.Wünmang chito chixe haxwannu makhange zangdingkho to thukya dixtua tuita ma kaxtaimixbu dong-dong-ju le ngokya ngün. 13#Pon 13.14,15.Ikhama Jowanpa chix zui ma ajongle tüikya.#28.13: chix zui ma; chichangba ija khama. Chixe thüi: “Ku a, Jowanpa, Abraham hia Isak nyi Zang changpu. Athax nang jiple ngokya haxtok a, nang ang tamchu nangsix-nangli hwom ang kox angkya changpu. 14#Pon 12.3; 22.18.Hwom a haxtsa angkya haxbu büta pu-tsale changüi. Hwome hwom haxsüt longzi pangnu chito akhaole paoüi, ilaxle nang hia nangsix-nanglibu makhange pangnu jat-li#28.14: nang hia…tüiüi; chichangba kue nang to tamchu nangsix-nangli hwom to mohimankya ningle hwom tochu mohiman angkya pangnu jat-lie ku füi akaxüi. to mohimankya tüiüi. 15Mong ma koplax, ku a tütakhatochu nang füi womle tamchu nang kho-awale ngoüi, ilaxle kue nang ija haxtok to chatle chat ang tomüi. Kue nang füi tsaosax daokyabu pangnu changle mahüi tanto kue nang otuechu danle müntox.”
16Jakop zo ilaxle thüi: “Jowanpa a ikhama tüile! Chix ikhama tüikya kue chitsing ngodao ngüna!” 17Chix za ilaxle thüi: “Ikha chemningkya za-adünkya onuihex! Ija a Zang hom changüi; ija a zangkangting to ngui angkya fülom changüi.”
18Ofüinop Jakop akhangle zo, chix ngom atekya long kop, ilaxle ija tuita münwan ang küile tox. Chixe ija Zang hanpak ang atsaole koxkya ang achangle ija to müngae li. 19Chixe ikha ang Bethel#28.19: bethel: Ija a Ibri kax ma “Zang hom”, le thüikya tha. le nyak. (Ikhama tüikya tingnu ang noxta Luz le nyakle tüikya.) 20Ifüima Jakop-e Jowanpa füi Tsaotsüt lax: “Ku ojongto paopuix ikhato nange ku kho-awa tamchu sütling hia nyi-za koxle jangchang, 21üntoxle ku apa hom to haxmüi-zangmale chat ang jangkop, nang a ku Zang ang changüi. 22Athax kue münwan ang oja long ajongle toxpuix, ikha a nang to shwom-to le chang angkya nui-ting ang changüi, ilaxle nange ku ang koxkya kha angkya kue bün ma othom tuita nang ang koxüi.”
Currently Selected:
PONGWANG LAIPEX 28: WANCBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.